ShHTga a’zo davlatlar Xavfsizlik kengashi kotiblari uchrashuvini yoritish uchun Xorijiy OAV vakillarini akkreditatsiya qilish to‘g‘risida

Дата публикации: Mar 19, 2016 12:55:54 PM

O‘zbekiston Respublikasi Tashqi ishlar vazirligi 2016-yilning 13-14-aprel kunlari Toshkent shahrida bo‘lib o‘tadigan ShHTga a’zo davlatlar Xavfsizlik kengashi kotiblari uchrashuvini yoritish uchun xorijiy ommaviy axborot vositalari vakillarini akkreditasiya qilishni boshladi.

Xavfsizlik kengashi kotiblari uchrashuvini yoritishni istagan OAV vakillari Tashqi ishlar vazirligiga quyidagi hujjatlarni taqdim etishlari talab etiladi:

1. manfaatdor xorijiy ommaviy axborot vositasi rahbarining O‘zbekiston Respublikasining xorijdagi diplomatik yoki konsullik vakolatxonalari yoki O‘zbekiston Respublikasi TIVda akkreditatsiyadan o‘tgan xorijiy diplomatik vakolatxonalar orqali o‘z muxbirini akkreditasiya qilish to‘g‘risida O‘zbekiston Respublikasi Tashqi ishlar vaziri nomiga murojaatnoma xati;

2. manfaatdor ommaviy axborot vositasi to‘g‘risida ma’lumotnoma-axborot;

3. muxbirning tarjimayi holi ma’lumotlari va pasport nusxasi;

4. akkreditatsiya qilinadigan muxbirning 700x700 dpi hajmdagi fotosurati (yuqori sifatda, qat’iy to‘g‘riga qaragan holda, oq yoki ko‘k fonda, elektron nusxasini sco2016@tiv.uz elektron pochta manziliga jo‘natishingizni so‘raymiz);

5. to‘ldirilgan anketa.

Akkreditatsiya uchun OAV vakillaridan arizalar 2016-yilning 30-mart kuni Toshkent vaqti bilan soat 18:00 gacha qabul qilinadi.

Belgilangan muddatdan so‘ng, shuningdek, ko‘rsatilgan ma’lumotlarsiz jo‘natilgan yoki fotosurat ilova qilinmagan arizalar ko‘rib chiqish uchun qabul qilinmaydi.

Xavfsizlik kengashi kotiblari uchrashuvini yoritishda ishtirok etish uchun xorijiy OAVning topshirgan arizalari O‘zbekiston Respublikasi Tashqi ishlar vazirligi tomonidan ularning akkreditatsiya qilinganligi to‘g‘risidagi tasdiqnomasisiz O‘zbekistonga tashrif buyurish va professional faoliyati bilan shug‘ullanish uchun asos bo‘la olmaydi.