YANGILIKLAR XABARNOMASI

YANGILIKLAR XABARNOMASI №137 TIV Jamoatchilik va OAV bilan aloqalar boshqarmasi 2018-yil 16-iyul

posted 16 Jul 2018, 11:09 by Webmaster Ambasciata

PREZIDENT.. 1

O‘zbekiston Prezidenti Jahon banki vitse-prezidentini qabul qildi 1

Siril Myuller: Jahon banki O‘zbekiston bilan o‘zaro manfaatli sheriklikni yanada rivojlantirishga tayyor 1

O‘zbekiston mustaqilligining 27 yilligiga.. 2

O‘zbekiston mustaqilligining 27 yilligi tantanalari “Aziz va yagonamsan, jonajon O‘zbekistonim!” shiori ostida o‘tkaziladi 2

Markaziy Osiyo – O‘zbekiston tashqi siyosatining ustuvor yo‘nalishi. 3

O‘zbekiston delegatsiyasining Issiqko‘ldagi uchrashuvda ishtiroki to‘g‘risida. 3

O‘zbekiston Respublikasi va Tojikiston Respublikasi bosh vazirlarining uchrashuvi to‘g‘risida. 3

Xalqaro munosabatlar.. 4

NATO sammiti Afg‘oniston bo‘yicha toshkent konferensiyasining yakunlarini qo‘llab-quvvatladi 4

O‘zbekiston – Shveysariya: faol bosqichga o‘tayotgan iqtisodiy hamkorlik. 5

O‘zbekiston respublikasi oliy majlisi qonunchilik palatasi. 6

Deputatlar mamlakat ijtimoiy-iqtisodiy hayotida muhim o‘rin tutuvchi qonun loyihalarini muhokama qildilar 6

Ekologiya.. 8

Ekologik muammolar yechimiga amaliy ishlar orqali erishiladi 8

O‘zbekiston turizm o‘lkasi. 10

O‘zbekistonga kelish uchun elekron kirish vizalarini rasmiylashtirish va berish tizimi (e-visa.gov.uz) yo‘lga qo‘yildi 10

Ilova.. 11

Sud-huquq tizimini yanada takomillashtirish va sud hokimiyati organlariga ishonchnioshirish chora-tadbirlari to‘g‘risida. 11

 

 

PREZIDENT

O‘zbekiston Prezidenti Jahon banki vitse-prezidentini qabul qildi

O‘zbekiston Respublikasi Prezidenti Shavkat Mirziyoyev 13 iyul kuni Jahon bankining Yevropa va Markaziy Osiyo mintaqasi bo‘yicha vitse-prezidenti Siril Myuller boshchiligidagi delegatsiyani qabul qildi.

Davlatimiz rahbari mehmonlarni samimiy qutlar ekan, O‘zbekiston va Jahon banki guruhi o‘rtasidagi hamkorlik munosabatlari jadal rivojlanayotganini chuqur mamnuniyat bilan qayd etdi.

Joriy yilda ushbu nufuzli xalqaro moliyaviy institut rahbariyati bilan o‘tkazilgan qator samarali uchrashuvlar, jumladan, may oyida bank prezidenti Jim Yong Kim bilan Vashingtonda, yanvar oyida bosh boshqaruvchi direktor Kristalina Georgiyeva bilan Toshkentdagi uchrashuvlar aloqalarni faollashtirish va o‘zaro munosabatlarning yangi yo‘nalishlarini belgilash, shuningdek, O‘zbekistondagi ijtimoiy-iqtisodiy islohotlarni qo‘llab-quvvatlashga qaratilgan istiqbolli loyihalar va dasturlarni amalga oshirishga xizmat qilayotgani alohida ta’kidlandi.

Bugungi kunda mamlakatimizning Jahon banki bilan o‘zaro manfaatli hamkorlik portfeli umumiy qiymati 4,4 milliard dollarlik imtiyozli moliyalashtirish evaziga amalga oshirilgan va oshirilayotgan 39 ta loyihani o‘z ichiga oladi.

Ular energetika, transport va kommunal infratuzilmani modernizatsiya qilish, ilg‘or va energetik jihatdan samarali texnologiyalarni joriy etish, agrosanoat kompleksini jadal rivojlantirish, suv resurslarini samarali boshqarish, ta’lim va sog‘liqni saqlash tizimlarini takomillashtirish kabi ko‘plab ustuvor sohalarni qamrab oladi.

Hozirgi vaqtda 2020 yilgacha bo‘lgan davrga mo‘ljallangan Sheriklik dasturi doirasida 20 dan ziyod yangi loyihalar ham ko‘rib chiqilmoqda.

Bundan tashqari, bankning yetakchi ekspertlari O‘zbekiston soliq tizimini isloh qilish konsepsiyasini ishlab chiqish jarayonida faol ishtirok etdi. Qo‘shma Iqtisodiy kengashni shakllantirish bo‘yicha ish olib borilmoqda.

Uchrashuvda O‘zbekiston va Jahon banki o‘rtasidagi ko‘p qirrali hamkorlikni yanada kengaytirish masalalari muhokama qilindi. Jumladan, “Yo‘l xaritasi”ni tayyorlash, milliy kadrlar malakasini oshirish asosida sarmoyaviy loyihalarning sifatli va o‘z vaqtida amalga oshirilishini ta’minlashga alohida e’tibor qaratildi.

Mamlakatimizda qishloq xo‘jaligi, fuqarolik aviatsiyasi va qayta tiklanadigan energetika sohalarida, shuningdek, Markaziy Osiyo mintaqasida salmoqli qo‘shma loyihalarni amalga oshirish borasidagi o‘zaro hamkorlikni yanada mustahkamlash muhimligi qayd etildi.

Siril Myuller davlatimiz rahbariga samimiy qabul uchun chuqur minnatdorlik bildirib, Jahon banki prezidenti Jim Yong Kimning salomi va ezgu tilaklarini yetkazdi.

Amalga oshirilayotgan keng ko‘lamli islohot va o‘zgarishlarni qo‘llab-quvvatlash, shuningdek, mamlakatimiz va butun mintaqaning barqaror taraqqiyotini ta’minlash maqsadida bank O‘zbekiston bilan o‘zaro manfaatli hamkorlikni mustahkamlashga tayyor ekani yana bir bor qayd etildi.

(Manba: O‘zA)

Siril Myuller: Jahon banki O‘zbekiston bilan o‘zaro manfaatli sheriklikni yanada rivojlantirishga tayyor

O‘zbekiston Respublikasi Prezidenti Shavkat Mirziyoyev 13 iyul kuni Jahon bankining Yevropa va Markaziy Osiyo mintaqasi bo‘yicha vitse-prezidenti Siril Myuller boshchiligidagi delegatsiyani qabul qildi.

Mehmon uchrashuvdan keyin O‘zA muxbiriga quyidagilarni so‘zlab berdi:

– O‘zbekiston rahbari bilan uchrashuvda Sheriklik dasturi ijrosiga alohida e’tibor qaratdik. Bu dastur qishloq xo‘jaligi, irrigatsiya, energetika, ta’lim, sog‘liqni saqlash kabi sohalarni qamrab olgan.

O‘zbekistonni ijtimoiy-iqtisodiy modernizatsiya qilishda hamkorlikni yanada faollashtirish masalasini ham muhokama qildik. Xususan, oliy ta’lim sohasini isloh qilish, sog‘liqni saqlash tizimini takomillashtirish, maktabgacha ta’lim sifatini oshirish, bunda ayniqsa, qishloq joylardagi shu kabi muassasalarga alohida e’tibor berish borasidakelishib oldik.

Keyingi yillarda O‘zbekistonning iqtisodiy siyosati yanada erkinlashgani, xususan, bank-moliya, soliq tizimidagi o‘zgarishlar, valyuta siyosatining liberallashtirilgani mamlakat iqtisodiy imidjini oshirishda alohida ahamiyat kasb etmoqda. Xususan, mamlakatingiz 2015 yilda Jahon banki reytingida qulay biznes muhiti bo‘yicha 100-o‘rinni egallagan bo‘lsa, bugungi kunda 74-o‘rinda qayd etilmoqda. Ikki yilda 26 pog‘ona o‘sish juda yaxshi ko‘rsatkich bo‘lib, xorijiy investorlarni jalb qilishda muhim omil bo‘ladi.

Jahon banki keng ko‘lamli islohotlarni amalga oshirish va barqaror taraqqiyotni ta’minlash yo‘lida O‘zbekiston bilan o‘zaro manfaatli sheriklikni har tomonlama rivojlantirishga tayyor.

(Manba: O‘zA)

O‘zbekiston mustaqilligining 27 yilligiga

O‘zbekiston mustaqilligining 27 yilligi tantanalari “Aziz va yagonamsan, jonajon O‘zbekistonim!” shiori ostida o‘tkaziladi

2018-yil 28-iyunda O‘zbekiston Respublikasi Prezidentining “O‘zbekiston Respublikasi davlat mustaqilligining yigirma yetti yillik bayramiga tayyorgarlik ko‘rish va uni o‘tkazish to‘g‘risida”gi qarori qabul qilindi. Qaror matni O‘zAda keltirilgan.

Qarorga ko‘ra, O‘zbekiston mustaqilligining yigirma yetti yilligi tantanalari “Aziz va yagonamsan, jonajon O‘zbekistonim!” shiori ostida o‘tkaziladi.

Mazkur qaror bilan o‘zbek xalqining asriy orzusi,  O‘zbekistonni xalqaro hamjamiyatning teng huquqli a’zosiga aylantirgan mustaqillikning yigirma yetti yilligini munosib kutib olish va nishonlash maqsadida bayramga tayyorgarlik ko‘rish va uni o‘tkazish bo‘yicha respublika komissiyasining tarkibi tasdiqlandi.

Respublika komissiyasiga bir hafta muddatda “Aziz va yagonamsan, jonajon O‘zbekistonim!” g‘oyasini o‘zida mujassam etgan tashkiliy-amaliy, ma’naviy-ma’rifiy tadbirlar hamda targ‘ibot-tashviqot ishlari dasturini ishlab chiqish vazifasi topshirildi.

Mazkur dastur 2017—2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi hamda “Faol tadbirkorlik, innovatsion g‘oyalar va texnologiyalarni qo‘llab-quvvatlash yili” Davlat dasturi bilan uyg‘un holda tayyorlanadi.

Respublika komissiyasi tomonidan Qoraqalpog‘iston Respublikasi, viloyatlar va Toshkent shahrida Mustaqillik bayramiga bag‘ishlab aholining keng qatlamlari o‘rtasida ma’rifiy uchrashuvlar, ochiq muloqot va suhbatlar, adabiy-badiiy kechalar, madaniy tadbirlar o‘tkazish maqsadida taniqli olimlar, ijodkor ziyolilar va san’atkorlardan iborat ma’naviy-ma’rifiy targ‘ibot guruhlari tashkil etish hamda ularning aniq reja asosida faoliyat olib borishini ta’minlash belgilandi.

Shuningdek, O‘zbekiston Matbuot va axborot agentligi, O‘zbekiston Respublikasi Madaniyat vazirligi, O‘zbekiston Yozuvchilar uyushmasi, O‘zbekiston Jurnalistlari ijodiy uyushmasi, O‘zbekiston Badiiy akademiyasi, “Tasviriy oyina” ijodiy uyushmasi va boshqa tegishli tashkilotlar bilan birgalikda “Eng ulug‘, eng aziz”, “Ranglar jilosida — ona diyor”, “Vatan uchun yashaylik!” kabi an’anaviy ko‘rik-tanlovlarni yuqori darajada o‘tkazishni ta’minlash belgilandi.

Mazkur qarorning ijrosini nazorat qilish O‘zbekiston Respublikasi Bosh vaziri Abdulla Aripov zimmasiga yuklatildi.

(Manba: Daryo.uz)

Markaziy Osiyo – O‘zbekiston tashqi siyosatining ustuvor yo‘nalishi

O‘zbekiston delegatsiyasining Issiqko‘ldagi uchrashuvda ishtiroki to‘g‘risida

O‘zbekiston Respublikasi Tashqi ishlar vaziri Abdulaziz Kamilov boshchiligidagi delegatsiya Issiqko‘lda 2018-yil 20-22-iyul kunlari bo‘lib o‘tadigan Markaziy Osiyo davlatlari tashqi siyosat idoralari rahbarlarining uchrashuvida ishtirok etadi.

Qirg‘iziston, Qozog‘iston, Tojikiston, Turkmaniston va O‘zbekiston TIV rahbarlari 2018-yil 15-mart kuni Ostona shahrida Markaziy Osiyo davlatlari rahbarlarining birinchi maslahatlashuvlari doirasida erishilgan kelishuvlarni amalga oshirish jarayonini muhokama qiladilar, shuningdek, mintaqaviy va xalqaro kun tartibidagi dolzarb masalalar yuzasidan fikr almashadilar.

(Manba: O‘zbekiston Respublikasi TIV veb-sahifasi)

O‘zbekiston Respublikasi va Tojikiston Respublikasi bosh vazirlarining uchrashuvi to‘g‘risida

2018-yilning 16-iyul kuni Farg‘ona shahrida O‘zbekiston Respublikasi Bosh vaziri Abdulla Aripov va Tojikiston Respublikasi Bosh vaziri Qohir Rasulzodaning amaliy uchrashuvi bo‘lib o‘tdi.

Delegatsiyalar tarkibiga vazirliklar va idoralar, yetakchi iqtisodiy tuzilmalari rahbarlari kiritilgan.

Bosh vazirlar ikki tomonlama munosabatlarning dolzarb masalalarini, avvalo oliy darajada bo‘lib o‘tadigan O‘zbekiston-Tojikiston uchrashuviga tayyorgarlik jarayonini muhokama qildilar.

Shuningdek, joriy yilning mart oyidagi O‘zbekiston Respublikasi Prezidenti Sh.M.Mirziyoyevning Tojikiston Respublikasiga davlat tashrifi va Prezident E.Sh.Rahmon bilan muzokaralari davomida erishilgan kelishuvlarni amalga oshirish masalalari ko‘rib chiqildi.

Ikki tomonlama hamkorlikning barcha yo‘nalishlari bo‘yicha amalga oshirilayotgan turli darajalardagi aloqalarning yuqori samaradorligi qayd etildi.

O‘zaro savdodagi o‘sishning ijobiy dinamikasi mamnuniyat bilan qayd etildi. Savdo aylanmasi 2018-yilning birinchi yarmida o‘tgan yilga nisbatan 35 foizdan ko‘proqga oshdi.

Ta’kidlanganidek, ikki mamlakat iqtisodiyoti bir birini to‘ldiradi va geografik qo‘shnilik va past transport xarajatlari tufayli raqobat ustunligiga ega.

Savdo-iqtisodiy va investitsion sohalardagi hamkorlikni faollashtirish maqsadida tomonlar jumladan Ishbilarmonlar kengashining navbatdagi yig‘ilishini o‘tkazish va O‘zbekiston va Tojikiston hududida ikki davlat ishbilarmon doiralari faoliyati uchun qulay sharoitlar yaratishga kelishib olishdi.

O‘zbekiston tomoni Tojikiston Respublikasi Prezidenti E.Sh.Rahmonning O‘zbekistonga davlat tashrifi arafasida Toshkent shahrida “Tojikistonda ishlab chiqarilgan” milliy sanoat ko‘rgazmasining hamda birgalikdagi O‘zbekiston-Tojikiston biznes-forumining o‘tkazilishini qo‘llab-quvvatladi.

Madaniy-gumanitar sohadagi hamkorlikning ahamiyati haqida to‘xtalar ekan, O‘zbekiston va Tojikiston hukumat rahbarlari o‘zbek va tojik xalqlari o‘rtasidagi birodarlik aloqalarini mustahkamlashga qaratilgan tadbirlarni o‘tkazish borasidagi qo‘shma harakatlarni kelishib olishdi.

Tomonlar barcha sohalardagi ikki tomonlama aloqalarni yanada chuqurlashtirishga sodiqligini va ularni bundanda samarali va sermahsul bo‘lishligi uchun barcha zarur choralarni ko‘rishga tayyorliklarini yana bir bor tasdiqlashdi/ta’kidlashdi.

Bosh vazirlar bo‘lajak oliy darajadagi O‘zbekiston-Tojikiston uchrashuvi davlatlararo munosabatlarni yang‘i pog‘onaga ko‘tarishiga hamda ikki davlat va xalq o‘rtasidagi o‘zaro manfaatli hamkorlikni yanada rivojlantirish uchun yangi istiqbollarni ochishiga ishonch bildirdilar.

Farg’onadagi muzokaralar yakunida uchrashuv Bayonnomasi imzolandi.

(Manba: O‘zbekiston Respublikasi TIV veb-sahifasi)

xalqaro munosabatlar

NATO sammiti Afg‘oniston bo‘yicha toshkent konferensiyasining yakunlarini qo‘llab-quvvatladi

2018-yilning 11-12-iyul kunlari Bryussel shahrida Shimoliy Atlantika shartnomasi tashkilotining (NATO) navbatdagi sammiti bo‘lib o‘tdi. Tadbirda tuzilmaga a’zo 29 ta mamlakatning davlat va hukumat rahbarlari ishtirok etdi.

Tadbir ishtirokchilari Alyans faoliyatining zamonaviy kun tartibini muhokama qilish bilan bir qatorda Afg‘oniston Islom Respublikasida tinchlik o‘rnatilishi istiqbollariga alohida e’tibor qaratdilar.

Sammit qatnashchilari NATOning Afg‘onistondagi “Qat’iy ko‘mak” missiyasi bo‘yicha Qo‘shma bayonot qabul qildilar. Hujjatda joriy yilning 28 fevral kuni o‘tkazilgan Afg‘onistonda tinchlik va xavfsizlik sohasida hamkorlik yo‘lidagi “Kobul jarayoni” anjumani, shuningdek, O‘zbekiston Respublikasi Prezidenti Shavkat Mirziyoyevning tashabbusi bilan 2018 yil 26-27 mart kunlari bo‘lib o‘tgan “Tinchlik jarayoni, xavfsizlik sohasida hamkorlik va mintaqaviy sheriklik” mavzuida Afg‘oniston bo‘yicha Toshkent xalqaro konferensiyasining natijalari alohida minnatdorlik bilan qayd etiladi.

NATOga a’zo davlatlar yetakchilarining bayonoti O‘zbekiston rahbarining Afg‘onistondagi vaziyatni siyosiy yo‘l bilan hal qilishga hamda mamlakatni mintaqaviy iqtisodiy jarayonlarga jalb qilishga ko‘maklashish bo‘yicha siyosati va xalqaro tashabbuslarining ahamiyati xalqaro hamjamiyat tomonidan e’tirof etilayotganini yana bir bor tasdiqlaydi. Birlashgan Millatlar Tashkiloti Bosh Assambleyasining 2018 yil 22 iyun kuni qabul qilingan Markaziy Osiyo bo‘yicha rezolyutsiyasida ham Toshkent konferensiyasining afg‘on mojarosini uzil-kesil hal qilishda muhimligi alohida ko‘rsatilgan edi.

Ma’lumki, Toshkent konferensiyasi ishida ko‘plab mehmonlar qatorida NATOga a’zo qator mamlakatlar vakillari hamda Alyans bosh kotibi yordamchisining o‘rinbosari ishtirok etgandi. Ushbu anjuman xalqaro hamjamiyatning Afg‘onistonda afg‘onlarning o‘zlari rahbarligida va ularning bevosita sa’y-harakatlari bilan amalga oshirilayotgan milliy yarashuv jarayonini qo‘llab-quvvatlash bo‘yicha amaliy qadamlarni jipslashtirishda burilish yasagan voqea bo‘ldi.

O‘zbekiston rahbariyati tashabbuslarining keng qo‘llab-quvvatlanishi shu bilan izohlanadiki, uchrashuv ishtirokchilari tomonidan bir ovozdan qabul qilingan Toshkent deklaratsiyasi xalqaro konsensusning mustahkamlik ko‘rsatkichi hamda mintaqaviy va umumbashariy darajada Afg‘onistondagi tinchlik jarayonini qo‘llab-quvvatlash bo‘yicha birgalikdagi sa’y-harakatlar uchun siyosiy asos sifatida xizmat qildi.

O‘zbekiston poytaxtidagi konferensiya doirasida shakllangan siyosiy muhit “Toshkent ruhi” nomini olib, u Afg‘onistondagi jarayonlarga jalb qilingan barcha tomonlar o‘rtasidagi konstruktiv muloqotning jadallashuviga ko‘maklashdi.

O‘zbekiston boshqa davlatlar va tashkilotlarning Afg‘onistonda milliy yarashuvni qo‘llab-quvvatlashga qaratilgan sa’y-harakatlari va tashabbuslarini ma’qullaydi hamda ushbu mamlakatdagi siyosiy jarayonni qo‘llab-quvvatlash, mamlakatda barqarorlikka erishish va uning ijtimoiy-iqtisodiy tiklanishi bo‘yicha o‘z siyosatini davom ettiradi.

Afg‘oniston bo‘yicha Toshkent anjumanida O‘zbekiston Respublikasi Prezidenti Shavkat Mirziyoyev dunyoning yetakchi davlatlari va donor tashkilotlar tomonidan Afg‘onistondagi tinchlik jarayonlari prinsipial jihatdan siyosiy qo‘llab-quvvatlanishi va mamlakatning ijtimoiy-iqtisodiy tiklanishi uchun moliyaviy yordam ko‘rsatilishini ta’minlash zarurligini ta’kidlagan edi.

NATO yetakchilarining afg‘on ixtilofini milliy konsensus asosida siyosiy yo‘l bilan hal qilish zarurligi to‘g‘risidagi bayonoti hamda Bryusselda joriy yilning 12 iyul kuni qabul qilingan qarorlar O‘zbekiston rahbarining keng xalqaro hamjamiyatga murojaati bilan to‘la uyg‘undir.

(Manba: “Dunyo” AA)

O‘zbekiston – Shveysariya: faol bosqichga o‘tayotgan iqtisodiy hamkorlik

Mamlakatimizga tashrif buyurgan Shveysariya federal iqtisodiyot, ta’lim va ilmiy tadqiqotlar vaziri Yohann Shnayder-Ammann boshchiligidagi delegatsiya a’zolari 13 iyul kuni poytaxtimizda tashkil etilgan O‘zbekiston – Shveysariya biznes forumida tegishli vazirliklar, qo‘mitalar, Savdo-sanoat palatasi, bank-moliya institutlari, mahalliy hokimliklar vakillari, ishbilarmonlar bilan muloqotda bo‘ldi.

Bu yil O‘zbekiston bilan Shveysariya o‘rtasida iqtisodiy hamkorlik aloqalari o‘rnatilganiga chorak asr to‘ldi. O‘tgan muddat davomida mamlakatimizda Shveysariya hukumati bilan birgalikda 33 loyiha amalga oshirildi. Ayni vaqtda ushbu davlat investitsiyasi ishtirokida iqtisodiyot, moliya, ta’lim va bank tizimida, tadbirkorlik, xodimlar malakasini oshirish va suv ta’minoti sohalarida 7 qo‘shma loyiha amaliyotga tatbiq etilmoqda. Yurtimizda shveysariyalik investorlar ishtirokida tuzilgan 84 qo‘shma korxona faoliyat yuritmoqda, ularning 29 tasi 100 foiz chet el sarmoyasi asosida tashkil etilgan. Mamlakatlarimiz o‘rtasidagi savdo aylanmasi yiliga o‘rtacha 200 million dollarni tashkil etmoqda.

Biznes forum ochilishida O‘zbekiston Respublikasi iqtisodiyot vaziri Botir Xo‘jayev, Shveysariya federal iqtisodiyot, ta’lim va ilmiy tadqiqotlar vaziri Yohann Shnayder-Ammann shular haqida so‘z yuritib, mamlakatimizda Prezident Shavkat Mirziyov boshchiligida siyosiy-huquqiy, savdo-iqtisodiy va bank-moliya sohalarida olib borilayotgan islohotlar natijasida xorijiy sarmoyadorlar uchun yanada qulay muhit yaratilganini alohida ta’kidladi.

Biznes forumda Jahon bankining Yevropa va Markaziy Osiyo bo‘yicha vitse-prezidenti Siril Myuller ham ishtirok etdi. U so‘nggi 18 oyda O‘zbekistonning iqtisodiy siyosati yanada erkinlashgani, xususan, bank-moliya, soliq tizimidagi o‘zgarishlar, erkin konvertatsiyaning yo‘lga qo‘yilgani mamlakat iqtisodiy imidjini oshirganini qayd etdi.

– 2015 yilda Jahon banki reytingida qulay biznes muhiti bo‘yicha O‘zbekiston 100 o‘rinni egallagan bo‘lsa, bugun bu ko‘rsatkich 74 ga tenglashdi, – dedi u. – Ikki yilda 26 pog‘ona o‘sish juda yaxshi ko‘rsatkich bo‘lib, xorijiy investorlarni jalb qilishda muhim omil bo‘ladi.

Biznes forum doirasida O‘zbekiston iqtisodiy salohiyatining taqdimoti o‘tkazildi. Unda Savdo-sanoat palatasi raisi A.Ikromov, Investitsiyalar bo‘yicha davlat qo‘mitasi raisining o‘rinbosari L.Qudratov va boshqalar shveysariyalik mehmonlarni yurtimiz sarmoyaviy imkoniyatlari, eksport, transport, logistika va sayyohlik salohiyati bilan yaqindan tanishtirib, 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasidan ko‘zlangan asosiy maqsadlar va uning yo‘nalishlari, yurtimizdagi erkin iqtisodiy zonalar va kichik industrial zonalarda qo‘shma korxonalar tashkil etishning afzalliklari haqida atroflicha ma’lumot berdi.

Forumning shu’ba yig‘ilishlarida Shveysariyaning “ABB Group ABB Switzerland”, “Stadler”, “Bühler AG”, “Swiss Medical Network”, “Rieter Group”, “Economiesuisse”, “Reyl”, “At a Glance”, “Trüb Trading Internetional AG”, “Switzerland Global Enterprise” kabi eskport, import va investitsiyalarga ko‘maklashuvchi, elektrotexnika, energetika mashinasozligi va axborot texnologiyalari, temir yo‘l transporti, to‘qimachilik, innovatsion qurilish materiallari ishlab chiqarishga ixtisoslashgan 20 dan ziyod yirik kompaniyasi vakillariga O‘zbekistonda yangi investitsiya loyihalarini amalga oshirish taklif etildi.

– O‘zbekiston paxta tolasini qayta ishlash bo‘yicha ko‘p asrlik an’analarga ega, – dedi Shveysariyaning to‘qimachilik uskunalari ishlab chiqaruvchi “Rieter Management AG” kompaniyasi vakili Tomas Anvander. – Bugun jahon bozorida tabiiy tolalardan tayyorlangan buyumlarga talab yuqori. Biznes forumda o‘tkazilgan taqdimotlarda O‘zbekiston nafaqat paxta tolasini yetkazib beruvchi, balki tayyor to‘qimachilik mahsulotlari ishlab chiqaruvchi sifatida ham jahon bozorida yetakchi pozitsiyalarni egallash uchun yuqori imkoniyatlarga egaligiga amin bo‘ldik. Ayni yo‘nalishlarda taklif etilgan ivestitsiya loyihalari bizda katta qiziqish uyg‘otdi.

Biznes forumda milliy iqtisodiyotimizga bevosita daxldor bo‘lgan yana bir muhim masala – mamlakatimizning Jahon savdo tashkilotiga a’zo bo‘lish borasidagi tayyorgarligi masalasi ham e’tiborda bo‘ldi. Tomonlar bu yo‘nalishdagi tizimli tadbirlarda yaqindan hamkorlik qilishga kelishib oldi. Bundan tashqari, hududiy organlar o‘rtasida birga ishlash va ikki tomonlama hamkorlik o‘rnatish, Shveysariyaning yetakchi kompaniyalari bilan tajriba almashish, sog‘liqni saqlash, to‘qimachilik va qurilish sohasidagi mutaxassislarning malakasining oshirish uchun texnik ko‘mak jalb qilish kabi masalalar muhokama qilindi.

Tadbir yakunida savdo-sotiq, sog‘liqni saqlash, yengil sanoat, bank-moliya kabi sohalarda o‘zaro hamkorlikka oid qator memorandumlar imzolandi.

(Manba: O‘zA)

O‘zbekiston respublikasi oliy majlisi qonunchilik palatasi

Deputatlar mamlakat ijtimoiy-iqtisodiy hayotida muhim o‘rin tutuvchi qonun loyihalarini muhokama qildilar

Deputatlar Oliy Majlis Qonunchilik palatasining 14 iyul kuni bo‘lib o‘tgan navbatdagi majlisida mamlakatimiz ijtimoiy-iqtisodiy hayotining turli jabhalarida amalga oshirilayotgan islohotlarni chuqurlashtirishga qaratilgan qonun loyihalarini ko‘rib chiqdilar.

Dastavval Qonunchilik palatasidagi siyosiy partiyalar fraksiyalarining hamda O‘zbekiston ekologik harakati deputatlar guruhining yig‘ilishlari o‘tkazilib, ularda quyi palata kun tartibiga kiritilgan masalalar dastlabki tarzda ko‘rib chiqilgan edi. Qonun loyihalari muhokamalarining natijalari bo‘yicha ularni takomillashtirishga doir takliflar ishlab chiqilib, tavsiyalar berilgandi.

Deputatlar o‘z ishlarini yangi tahrirdagi “Davlat bojxona xizmati to‘g‘risida”gi qonun loyihasini birinchi o‘qishda ko‘rib chiqishdan boshladilar. Ta’kidlanganidek, mamlakat iqtisodiyotining barcha soha va tarmoqlarida bo‘lgani kabi bojxonaga oid qonun hujjatlarini yanada liberallashtirish, mamlakatimizning investitsiyaviy jozibadorligini oshirish maqsadida bojxona rasmiylashtiruvlarini soddalashtirish, tashqi iqtisodiy faoliyatni yuritish borasida so‘nggi yillarda muhim tarkibiy o‘zgarishlar qilinmoqda.

Ushbu qonun loyihasi bilan bojxona organlari o‘z xizmat vazifalarini bajarish chog‘ida qonuniylik, ochiqlik, shaffoflik hamda jismoniy va yuridik shaxslarning huquqlari, erkinliklari, qonuniy manfaatlarini ta’minlashga qat’iy rioya qilish ishiga doir normalar belgilab qo‘yilmoqda. Shuningdek, tadbirkorlik faoliyatiga noqonuniy aralashish, xususiy mulkdorlar huquqlarini buzganlik uchun bojxona organlari xodimlarining javobgarligini oshirish, tashqi iqtisodiy faoliyatni amalga oshirish bilan bog‘liq tartib-taomillarda shaffoflik va ochiqlikni ta’minlash hamda bojxona ishini rivojlantirishning ustuvor yo‘nalishlarini ishlab chiqib, ularni amaliyotga tatbiq etish masalalari huquqiy jihatdan mustahkamlanmoqda.

Deputatlarning fikricha, qonun loyihasining qabul qilinishi bojxona organlari faoliyatining huquqiy asoslari takomillashishiga, fuqarolarning huquq va erkinliklari hamda tashqi iqtisodiy faoliyat qatnashchilarini ishonchli himoya qilish kafolatlarini samarali ta’minlash yuzasidan qo‘shimcha huquqiy mexanizmlarning joriy etilishiga xizmat qiladi.

Shundan so‘ng Oliy Majlis Qonunchilik palatasining Ekologiya va atrof-muhitni muhofaza qilish masalalari qo‘mitasi a’zolaridan iborat bir guruh deputatlar tomonidan ishlab chiqilib, muhokamaga kiritilgan “Qayta tiklanuvchi energiya manbalari to‘g‘risida”gi qonun loyihasi birinchi o‘qishda ko‘rib chiqildi.

Qayd etilishicha, bugungi kunda ko‘mir, neft, tabiiy gaz va uran kabi qazilma boyliklar jahon energetika balansining asosi hisoblanadi. Biroq qazib olish va foydalanish jarayonlarida ularning zaxiralari yildan-yilga kamayib bormoqda. Kelgusida iqtisodiyotning rivojlanishi, aholi sonining o‘sishi hamda odatdagi energiya ta’minoti bo‘lgan energiya resurslaridan foydalanish hajmi yildan-yilga oshib borishi tabiiy. Rivojlangan xorijiy mamlakatlarda tarkib topgan amaliyot shuni ko‘rsatadiki, uglevodorod xomashyosining tanqisligi va narxlarining barqaror emasligi bois butun dunyoda qayta tiklanuvchi energiya manbalaridan foydalanishga jiddiy e’tibor qaratilmoqda.

Mamlakatimizda ham so‘nggi vaqtlarda mazkur yo‘nalishda amaliy ishlarga kirishish maqsadida qator chora-tadbirlar olib borilmoqda. Shu nuqtai nazardan kelib chiqib, deputatlar iqtisodiyoti va sanoati jadal sur’atlar bilan rivojlanayotgan O‘zbekistonda ham ushbu sohaning rivoji uchun huquqiy asos bo‘lib xizmat qiladigan qonunning yaratilishini davrning o‘zi taqozo etayotganini alohida ta’kidladilar.

Qonun loyihasini ishlab chiqishdan ko‘zlangan maqsad mamlakatimizning barqaror rivojlanish vazifalarini amalga oshirish doirasida iqtisodiyot tarmoqlarida va ijtimoiy sohalarda energiya samaradorligini hamda yoqilg‘i-energetika balansi diversifikatsiya darajasini oshirish, mamlakat energetika xavfsizligini ta’minlash, shuningdek, aholi salomatligi uchun o‘ta xavfli sanalgan issiqxona gazlari tashlamalarini kamaytirish uchun qayta tiklanuvchi energiya manbalaridan foydalanish ko‘lamini kengaytirishdan iboratdir.

Qonun loyihasi bilan qayta tiklanuvchi energiya manbalaridan foydalanish sohasini davlat tomonidan qo‘llab-quvvatlash va rag‘batlantirish chora-tadbirlarini huquqiy tartibga solish, qayta tiklanuvchi energiya manbalaridan foydalanish sohasida davlat boshqaruvining huquqiy asoslarini belgilash nazarda tutilgan.

Deputatlarning fikr-mulohazalariga ko‘ra, qonun loyihasining qabul qilinishi Harakatlar strategiyasida belgilanganidek 2017-2021 yillarda iqtisodiyot tarmoqlari va ijtimoiy sohada energiya samaradorligini oshirish, qayta tiklanuvchi energetikani yanada rivojlantirishning ustuvor yo‘nalishlarini amalga oshirish imkonini beradi.

“Adolat” sotsial-demokratik partiyasi o‘zining saylovoldi dasturida innovatsion texnologiyalarni, xususan, qayta tiklanuvchi energetikani rivojlantirishni o‘z maqsadlaridan biri ekanini qayd etgan. Shuning uchun ham mazkur partiya fraksiyasi a’zolari masalaga o‘ta tanqidiy ruhda yondashib, talabchanlik ko‘rsatdilar va loyiha ustida jiddiy ish olib borish zarurligini uqtirdilar. Boshqa partiya fraksiyalari bildirgan takliflardan farqli o‘laroq, loyihaning konseptual maqsadlarini saqlab qolgan holda, uning qator norma va qoidalarini keng mutaxassislar ishtirokida maromiga yetkazib, ikkinchi o‘qishga kiritish lozimligini qayd etdilar.

O‘zbekiston Xalq demokratik partiyasi fraksiyasi a’zolari ushbu loyiha ustida ish olib borish barobarida qonun qabul qilingach, yuzaga keladigan vazifa va muammolar xususida ham ilmiy asoslangan izlanishlarni boshlab yuborishga e’tiborni qaratdilar. Fraksiya a’zolarining fikricha, qayta tiklanadigan energiya manbalarini qurish uchun texnologiya va asbob-uskunalarni dastlabki yillarda xorijdan keltirishga zarurat tug‘iladi. Tobora kamayib borayotgan tabiiy boyliklarni saqlab qolib, energiyalar, jumladan, quyosh energiyasi insoniyat izmiga solinsa-da, innovatsiyalarning barchasi yakuniy hosila – energiya uchun aholi to‘lashi kerak bo‘lgan tannarx oshib ketmasligini hozirdanoq chuqur ilmiy asosda o‘rganib chiqishni talab etadi. Shu nuqtai nazardan loyihani keyingi o‘qishlarda muhokama qilgunga qadar uning tashabbuskorlari deputatlarga mazkur masalada asosli tushuntirish berishi zarurligi ta’kidlandi.

Siyosiy partiyalar fraksiyalarining qizg‘in bahs-munozalaridan so‘ng har ikki qonun loyihasi birinchi o‘qishda qabul qilindi va mas’ul qo‘mitalarga muhokamalar chog‘ida bildirilgan fikr-mulohaza va takliflarni inobatga olgan holda, ikkinchi o‘qishga tayyorlash vazifasi yuklatildi.

Majlisda, shuningdek, Oliy Majlis Qonunchilik palatasi vakolatlariga taalluqli boshqa masalalar ham ko‘rib chiqildi.

(Manba: O‘zbekiston Respublikasi Oliy Majlisi Qonunchilik palatasi Matbuot xizmati )

ekologiya

Ekologik muammolar yechimiga amaliy ishlar orqali erishiladi

Yurtimizda boshqa sohalar qatori ekologik barqarorlikni ta’minlash, aholining qulay tabiiy muhitga ega bo‘lishi uchun zarur shart-sharoitlar yaratish, tabiiy resurslardan oqilona va samarali foydalanish, yuzaga kelayotgan ekologik muammolarning oldini olishva ularning salbiy oqibatlarini bartaraf etish masalalariga ham jiddiy e’tibor qaratib kelinmoqda.

Prezidentimizning 2017 yil 12 iyuldagi Oliy Majlis palatalari, siyosiy partiyalar va O‘zbekiston ekologik harakati vakillari bilan uchrashuvdagi ma’ruzasida hokimiyat vakillik organlari hamda siyosiy partiyalar va Ekologik harakatning o‘tgan davrdagi faoliyati tanqidiy ruhda tahlil etilib, islohotlarni chuqurlashtirish yuzasidan oldimizda turgan muhim vazifalar belgilab berildi. Xususan, Ekologik harakat hamda uning Qonunchilik palatasidagi deputatlik guruhining istiqboldagi vazifalari aniq ko‘rsatib o‘tildi.

Xo‘sh, o‘tgan davrda Ekoharakat hamda uning Qonunchilik palatasidagi deputatlar guruhi bundan qanday xulosalar chiqardi, boshqacha aytganda, faoliyatimizda qanday ijobiy o‘zgarishlar yuz berdi?

Avvalo, sohaga oid yangi qonun loyihalari yaratish, mavjudlarini takomillashtirish, nazorat-tahlil faoliyatini bugungi talab darajasida kuchaytirish, uzluksiz ekologik ta’lim konsepsiyasini ishlab chiqish, ekologik nazoratning jamoatchi inspektorlari tizimini rivojlantirish, aholi ekologik madaniyatini yuksaltirishga qaratilgan tizimli ishlarni amalga oshirish, atrof-muhitga zararli ta’sir ko‘rsatuvchi obyektlarni va suv tozalash inshootlarini inventarizatsiyadan o‘tkazish bo‘yicha chora-tadbirlar dasturi qabul qilinib, hayotga izchil tatbiq etilmoqda.

O‘tgan davrda Ekoharakat deputatlari guruhi tomonidan qonunchilik tashabbusi asosida bitta yangi qonun hamda 8 ta qonunni takomillashtirishga qaratilgan qonun loyihalari ishlab chiqildi. Masalan, yangi tahrirdagi “O‘rmon to‘g‘risida”, Hayvonot dunyosini va o‘simlik dunyosini muhofaza qilish va ulardan foydalanish to‘g‘risidagi qonun hujjatlari takomillashtirilishi munosabati bilan O‘zbekiston Respublikasining ayrim qonunlariga o‘zgartish va qo‘shimchalar kiritish haqidagi qonunlarqabul qilindi.

Shuningdek, “Qayta tiklanuvchi energiya manbalari to‘g‘risida”, “Chiqindilar to‘g‘risida”, “Atmosfera havosini muhofaza qilish to‘g‘risida”, “Ekologik ekspertiza to‘g‘risida”gi O‘zbekiston Respublikasi Qonuniga o‘zgartish va qo‘shimchalar kiritish haqida”, “Suv va suvdan foydalanish to‘g‘risida”gi O‘zbekiston Respublikasi Qonuniga o‘zgartish va qo‘shimchalar kiritish haqida”gi qonun loyihalari tayyorlanib, Qonunchilik palatasiga kiritish mo‘ljallanmoqda.

Qonun loyihalarini ishlab chiqish, ular hayotiyligini ta’minlash maqsadida qonun ijodkorligi jarayoniga keng jamoatchilik, olimlar va ekspertlar jalb qilinayotgani muhim ahamiyat kasb etmoqda. Misol uchun, ushbu qonun loyihalarini ishlab chiqish jarayonida o‘tkazilgan 40 dan ortiq ishchi guruhlari tadbirlarida 230 dan ziyod taklif va mulohazalar o‘rtaga tashlandi. Birgina yangi tahrirdagi “O‘rmon to‘g‘risida”gi qonun loyihasi bo‘yicha 2017 yil iyul-avgust oylarida jamoatchilik vakillarini jalb etgan holda o‘tkazilganmuhokamalarda 110 dan ortiq takliflar, fikr va mulohazalar olindi.

Parlament hamda deputatlar faoliyati bilan yoshlarni keng tanishtirish, ularningEkoharakat deputatlari guruhi bilan doimiy muloqotini o‘rnatish maqsadida Ekoharakatning “Yoshlar qanoti” va O‘zbekiston yoshlar ittifoqi faollari bilan ochiq muloqotlar o‘tkazish, ularni guruh yig‘ilishlariga jalb etish ishlari tizimli ravishda amalga oshirib kelinayotir.

Parlament va deputatlik nazoratini samarali yo‘lga qo‘yish ham doimiy e’tiborimizda. Shu paytgacha 11 davlat hamda xo‘jalik boshqaruvi organlari funksional vazifalaridan kelib chiqqan holda, ekologiya va atrof-muhitni muhofaza qilish masalalari bilan bog‘liq faoliyati ustidan ana shunday nazorat yo‘lga qo‘yildi.

Shuningdek, Ekologiya va atrof-muhitni muhofaza qilish davlat qo‘mitasi bilan birgalikda ekologik xavfsizlikni ta’minlash, soha qonunchiligini takomillashtirish, atrof-muhitni muhofaza qilish va tabiiy resurslardan oqilona foydalanish hamda aholining bu boradagi madaniyatini yuksaltirish bo‘yicha harakatlar dasturi tasdiqlandi. Shu asosda ekologiya hamda atrof-muhitni muhofaza qilish borasidagi hujjatlarni takomillashtirish, aholi ekologik madaniyatini yuksaltirish hamda atrof-muhitni muhofaza qilishda ular faolligini kuchaytirish, sohaga axborot-kommunikatsiya texnologiyalarini keng joriy etish, jamoatchilik ekologik nazorati tizimini rivojlantirish, jamoatchi inspektorlarni o‘qitish va ular malakasini oshirish, chiqindilar bilan bog‘liq muammolarni hal etish bo‘yicha bir qator samarali ishlar olib borildi. Masalan, Fuqarolarning o‘zini o‘zi boshqarish organlari faoliyatini muvofiqlashtirish bo‘yicha hududiy kengashlar hamkorligida yurtimizdagi 8982 ta mahalla fuqarolar yig‘inida zarur chora-tadbirlar bajarilib, har bir mahalla bo‘yicha ekologik nazoratning jamoatchi inspektorligiga nomzodlar zaxirasi shakllantirildi. Hozirgi paytda ularning sohaga oid bilim va malakasini oshirish choralari ko‘rilayotir.

Sohaga tegishli qonunlar, davlat dasturlari, Prezident Farmon hamda qarorlari ijrosini o‘rganish bo‘yicha 10 dan ziyodnazorat-tahlil tadbirlari o‘tkazildi. Shular asnosida respublikamizning barcha hududini qamrab olgan holda, sayyor yig‘ilishlar tashkil etilayotir. Misol uchun, Jizzax viloyatida “O‘rmon to‘g‘risida”gi Qonun ijrosi, Buxoroda Dezinfeksiya stansiyasi bosh vrachi hamda “Agrokimyohimoya” hududiy aksiyadorlik jamiyati direktorining termitlarga qarshi kurash va profilaktika chora-tadbirlarining ijrosi to‘g‘risidagi axboroti, Qoraqalpog‘iston Respublikasida Prezidentimizning 2017 yil 18 yanvardagi qarori bilan tasdiqlangan “2017 — 2021 yillarda Orolbo‘yi mintaqasini rivojlantirish Davlat dasturi”ning bajarilishi holatini nazorat-tahlil tartibida o‘rganish yakuni yuzasidan tashkil etilgan sayyor yig‘ilish ana shular jumlasidan.

Shuningdek, O‘zbekiston Respublikasining “Suv va suvdan foydalanish to‘g‘risida”gi Qonuni aholining iste’mol, maishiy va boshqa ehtiyojlari uchun suv obyektlaridan foydalanish qismining ijro etilishi yuzasidan Sog‘liqni saqlash hamda Uy-joy kommmunal xizmat ko‘rsatish vazirliklari, Ekologiya va atrof muhitni muhofaza qilish, Geologiya va mineral resurslar davlat qo‘mitalari axboroti yuzasidan parlament eshituvlari bo‘lib o‘tdi. Ayni chog‘da “Xavfli chiqindilarni transchegaraviy tashish va ularni yo‘q qilish ustidan nazorat qilish to‘g‘risida”gi Bazel konvensiyasi bajarilishi holati o‘rganilib, Ekologiya va atrof muhitni muhofaza qilish masalalari qo‘mitasi eshituvi tashkil etildi.

Orol fojiasi oqibatlarini yumshatish, hudud aholisi salomatligini muhofaza qilish, ularning turmush darajasini yanada yaxshilash, hududning ijtimoiy-iqtisodiy, ekologik barqarorligini ta’minlashga yo‘naltirilgan chora-tadbirlarni amalga oshirishda ham harakat va uning deputatlar guruhi faollik ko‘rsatmoqda. Birgina misol: joriy yil 7-8 iyun kunlari “Orol fojiasi oqibatlarini yumshatish bo‘yicha hamkorlikdagi harakatlar: yangicha yondashuvlar, innovatsion yechimlar va investitsiyalar” mavzuida xalqarokonferensiya o‘tkazildi va Toshkent rezolyutsiyasi qabul qilindi, Orolbo‘yi mintaqasining ekologik hamda ijtimoiy-iqtisodiy vaziyatini yaxshilashga yo‘naltirilgan loyihalar to‘plami ma’qullandi.

Yirik sanoat korxonalarida vakillarimizni tayinlash bo‘yicha ham tizimli ishlar amalga oshirilyapti, ya’ni atrof-muhitga ta’siri bo‘yicha I va II toifaga mansub 593 korxonada vakillarimiz ish boshladi. Qolaversa, 760 dan ortiq korxonalar faoliyati o‘rganildi. Tanishuvlar jarayonida ularning atrof-muhitga salbiy ta’sirini kamaytirish, ilg‘or texnologiyalarni ishlab chiqarishga keng tatbiq etish yuzasidan zarur tavsiyalar berildi.

Aholining ekologik madaniyatini yuksaltirish, jumladan, yosh avlod ongida ona tabiatni asrab-avaylash, unga daxldorlik hissini kuchaytirish bo‘yicha ham muayyan ishlar ro‘yobga chiqarildi. Ekoharakat va uning deputatlari guruhi tegishli vazirlik hamda idoralar hamkorligida yosh avlodning ekologik savodxonligini oshirish, ekologik ta’lim va tarbiya jarayonini samarali tashkil etishga qaratilganO‘zbekiston Respublikasining “Ekologik ta’lim konsepsiyasi”, uni amalga oshirish bo‘yicha “Yo‘l xaritasi” hamda Vazirlar Mahkamasi qaroriloyihalari ishlab chiqilib, hukumatga taqdim etildi.

Respublikamizning 7ta hududida Oliy Majlis huzuridagi Nodavlat notijorat tashkilotlarini va fuqarolik jamiyatining boshqa institutlarini qo‘llab-quvvatlash Jamoat fondi tomonidan ajratilgan ijtimoiy buyurtma doirasida aholining ekologik madaniyatini oshirish, tabiiy resurslardan oqilona foydalanish, ularni atrof-muhitni muhofaza qilish ishlariga jalb etishga qaratilgan 350 dan ortiq targ‘ibot bannerlari o‘rnatildi. Yoshlarning ekologik madaniyatini yuksaltirishga qaratilgan ma’ruzalar to‘plami va boshqa targ‘ibot materiallari tayyorlandi. Shuningdek, suv, chiqindi muammolariga bag‘ishlangan videoroliklar tayyorlanib, markaziy telekanallarda namoyish etilmoqda.

Umuman olganda, O‘zbekiston ekologik harakati oldida turgan dolzarb vazifalardan kelib chiqib, deputatlar guruhi bilan hamkorlikda o‘tgan bir yil davomida respublikamizning barcha hududida 111300 dan ortiq faollar ishtirok etgan 2500 ga yaqin amaliy-tahliliy tadbirlar o‘tkazildi.

Vakillarimiz parlament a’zolari tomonidan hududlarda o‘tkazilayotgan o‘rganishlarda ham faol qatnashmoqda. O‘tgan davrda 3911 xonadonga kirilib,

10701 nafar fuqaro bilan muloqot o‘tkazildi. Natijada aholi tomonidan ko‘tarilgan 1100 dan ortiq muammolarning aksariyat qismi mahalliy davlat hokimiyati organlari bilan joyida hal etildi.

O‘zbekiston ekologik harakati tomonidan chiqindilarni qayta ishlash jarayoniga chet el investitsiyalarini jalb etish masalasiga ham katta e’tibor berilmoqda. Xususan, “SEMAK Equipment’s and Technology” MCHJ bilan hamkorlik memorandumi imzolandi. Unga muvofiq, Jizzax viloyatida investitsiya qiymati 400 ming AQSH dollariga yaqin, yiliga 25 ming tonna chiqindini qayta ishlaydigan korxona quriladi. Hozirgi paytda bunyodkorlik ishlari jadal olib borilyapti.

Erishilgan ushbu yutuqlar o‘zimizniki. Oldimizda esa hali vazifalar ko‘p. Ekologik ta’lim-tarbiyani rivojlantirishga qaratilgan “Ekologik ta’lim konsepsiyasi”ning qabul qilinishini jadallashtirish, chiqindilar bilan bog‘liq ishlarni amalga oshirish bo‘yicha huquqbuzarliklar uchun javobgarlikni yanada kuchaytirishni nazarda tutuvchi “O‘zbekiston Respublikasining Ma’muriy javobgarlik to‘g‘risidagi kodeksiga o‘zgartish va qo‘shimchalar kiritish haqida”gi, suv zaxiralarini muhofaza qilish, suv iste’moli, suvlarning davlat hisobotini yuritish, suv xo‘jaligi inshootlariga zarar yetkazganlik uchun jismoniy va yuridik shaxslar mas’uliyatini oshirish bo‘yicha qonun loyihalarini ishlab chiqish shular sirasidandir. Bundan tashqari, Orol muammosining salbiy ta’sirlarini bartaraf etish, hudud aholisining yashash sharoitini yanada yaxshilash, bu boradagi mavjud kamchiliklarni xalqaro hamjamiyat va hamkor davlatlar moliyaviy ko‘magini jalb etgan holda hal etish istiqboldagi faoliyatimizda muhim yo‘nalishlar hisoblanadi.

Ko‘rinib turibdiki, oldimizda turgan vazifalar nihoyatda zalvorli. Ularni muvaffaqiyatli tarzda amalga oshirish har birimizdan bor bilim va mahoratimizni ishga solishni, yanayam aniqroq aytadigan bo‘lsak, Vatanimiz taraqqiyoti yo‘lida yonib yashashni talab etadi. Ana shunda xalqimizning bizga bildirgan ishonchini ma’lum darajada oqlagan bo‘lamiz.

Boriy ALIXONOV,

Oliy Majlis Qonunchilik palatasi Spikeri o‘rinbosari,

O‘zbekiston ekologik harakati Markaziy kengashi Ijroiya qo‘mitasi raisi.

(Manba: Xalq so‘zi” gazetasi)

O‘zbekiston turizm o‘lkasi

O‘zbekistonga kelish uchun elekron kirish vizalarini rasmiylashtirish va berish tizimi (e-visa.gov.uz) yo‘lga qo‘yildi

2018-yil 15-maydan e’tiboran O‘zbekiston Respublikasi Prezidentining “O‘zbekiston Respublikasiga xorijiy fuqarolarning kirishi tartibini optimallashtirishga doir qo‘shimcha chora-tadbirlar to‘g‘risida” 2018-yil 4-iyuldagi 3836-sonli qaroriga muvofiq turistik maqsadlarda O‘zbekistonga kelish uchun elekron kirish vizalarini rasmiylashtirish va berish tizimi yo‘lga qo‘yildi.

O‘zbekiston Respublikasining elekrton kirish vizasi to‘g‘risidagi Nizomga muvofiq mazkur tizim chet el fuqarolarining turistik kirish vizasini olish uchun O‘zbekiston Respublikasining diplomatik valolatxonalari, konsullik muassasalariga majburiy murojaat zaruriyatini bekor qilishni ko‘zda tutadi.

Elektron viza O‘zbekiston Respublikasi hududida 30 kungacha bir marta bo‘lish uchun beriladi.

Elektron viza berilgan vaqtdan boshlab 90 kun davomida amal qiladi.

Elektron vizani rasmiylashtirish va berish uchun murojaatni ko‘rib chiqish muddati ikki ish kunini tashkil etadi (murojaat berilgan kundan tashqari).

Berilgan elektron viza “e-visa.gov.uz” tizimining rasmiy veb-portaliga murojaat etish vaqtida ko‘rsatilgan chet el fuqarosining elektron pochtasiga jo‘natiladi.

Elektron vizani rasmiylashtirish uchun murojaat berish O‘zbekiston Respublikasiga kelish sanasidan uch ish kunidan kam bo‘lmagan muddatda amalga oshiriladi.

Elektron kirish vizasini olish murojaatini ko‘rib chiqish uchun konsullik yig‘imi hajmi 20 AQSh dollarini tashkil etadi.

To‘lov elektron ko‘rinishda xalqaro to‘lov tizimlari orqali amalga oshiriladi.

Elektron viza berishda rad javobi berilgan taqdirda konsullik yig‘imi uchun olingan mablag‘ qaytarilmaydi.

Elektron viza o‘tish xujjatiga (pasport) yopishtilmaydi. Chegara orqali o‘tish punktida chet el fuqarosi elektron vizani qog‘oz yoki elektron ko‘rinishda taqdim etadi.

(Manba: O‘zbekiston Respublikasi TIV veb-sahifasi)

ilova

Sud-huquq tizimini yanada takomillashtirish va sud hokimiyati organlariga ishonchnioshirish chora-tadbirlari to‘g‘risida

O‘zbekiston Respublikasi Prezidentining farmoni

Sud hokimiyatining chinakam mustaqilligini, fuqarolar huquq va erkinliklarining ishonchli himoyasini ta’minlash hamda odil sudlovga erishish darajasini oshirish sud-huquq tizimini isloh qilish sohasida davlat siyosatining asosiy ustuvor yo‘nalishlari hisoblanadi.

O‘tgan davr mobaynida sud tizimi faoliyati samaradorligini oshirish, sudyalarni tanlash va joy-joyiga qo‘yish tartibini takomillashtirish, har bir ish bo‘yicha qonuniy, asoslantirilgan va adolatli sud qarori chiqarilishini ta’minlashga qaratilgan kompleks chora-tadbirlar amalga oshirildi.

Xususan, O‘zbekiston Respublikasi Sudyalar oliy kengashi tuzildi, sud hokimiyatining yagona oliy organi – O‘zbekiston Respublikasi Oliy sudi, ma’muriy sudlar tashkil etildi, shuningdek, sudyalik lavozimiga muddatsiz davrga tayinlash (saylash) tartibi joriy etildi.

Barcha toifadagi sud ishlarini sayyor sud majlislarida ko‘rib chiqish amaliyotining kengaytirilganligi aholi bilan ochiq muloqotni yo‘lga qo‘yish va sud hokimiyatining ochiqligini oshirish yo‘lida ko‘rilgan muhim chora bo‘ldi.

Shu bilan birga, sud hokimiyati organlari faoliyatining tahlili ular zimmasiga yuklatilgan vazifalarni samarali amalga oshirishga to‘sqinlik qilayotgan qator muammo va kamchiliklar mavjudligini ko‘rsatdi.

Xususan, sudlarning jamoatchilik va ommaviy axborot vositalari bilan ishlari qoniqarsiz darajada tashkil etilganligi sud faoliyatini lozim darajada yoritish imkonini bermayapti hamda aholining sud hokimiyatiga ishonchi pasayishiga olib kelmoqda.

Sudyalarni moddiy ta’minlash va ijtimoiy himoya qilishning amaldagi tizimi sud hokimiyatining alohida mavqei va obro‘siga, sudyalar mustaqilligi prinsiplariga muvofiq emasligi kasbiy o‘sishni yanada rag‘batlantirishga to‘sqinlik qilib, kadrlar qo‘nimsizligiga olib kelmoqda.

Odil sudlovni amalga oshirish sifatini yaxshilash, jismoniy va yuridik shaxslarning huquqlari, erkinliklari va qonuniy manfaatlari himoyasi kafolatlarini kuchaytirish maqsadida, shuningdek, 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasiga muvofiq:

1. O‘zbekiston Respublikasi Oliy sudi, Sudyalar oliy kengashi va O‘zbekiston Sudyalar assotsiatsiyasining quyidagilar orqali sud organlari faoliyatining shaffofligini yanada ta’minlash, aholi bilan ochiq muloqotni kengaytirish va odil sudlovni amalga oshirishda jamoatchilik rolini kuchaytirish to‘g‘risidagi takliflari qabul qilinsin:

O‘zbekiston Respublikasi Oliy sudi veb-saytida sud qarorlarini tizimli ravishda e’lon qilish tartibini bosqichma-bosqich joriy etish;

qabul qilingan sud hujjati o‘qib eshittirilganidan so‘ng uning mazmun-mohiyatini sud protsessi ishtirokchilariga tushuntirilishini sud amaliyotiga joriy etish;

sudlar faoliyati to‘g‘risida jamoatchilik va ommaviy axborot vositalarini xabardor qilish maqsadida har chorakda viloyat sudlari raislari va ularning o‘rinbosarlari tomonidan brifinglar o‘tkazish;

O‘zbekiston Respublikasi Oliy sudi sudlov hay’atlari tomonidan sud ishlarini nazorat tartibida, viloyatlar va ularga tenglashtirilgan sudlar tomonidan sud ishlarini apellyatsiya va kassatsiya tartibida ko‘rib chiqish amaliyoti obzorlarini har chorakda e’lon qilish.

2. O‘zbekiston Respublikasi Sudyalar oliy kengashining sudyalarni tanlash va lavozimga tayinlashning xolisligi va shaffofligiga ishonchni oshirish maqsadida har bir hududda sudyalar korpusini shakllantirishga ko‘maklashuvchi komissiyalar tuzish to‘g‘risidagi taklifi qabul qilinsin.

3. O‘zbekiston Respublikasi Oliy sudi, Sudyalar oliy kengashi va Moliya vazirligining:

sudlarga murojaat etishda davlat bojlarini to‘lash bo‘yicha amaldagi imtiyozlar va davlat bojlari stavkalarini qayta ko‘rib chiqish;

Sud hokimiyati organlarini rivojlantirish jamg‘armasiga jinoyat va fuqarolik ishlari bo‘yicha sudlar, ma’muriy, iqtisodiy va harbiy sudlar tomonidan ko‘rib chiqiladigan ishlar bo‘yicha davlat bojlari va jarimalar to‘lashdan O‘zbekiston Respublikasi Davlat byudjetiga tushayotgan summalarning, shuningdek, ijro hujjatlari bo‘yicha O‘zbekiston Respublikasi Davlat byudjetiga undirilgan summalarning, qarzdorning mol-mulkini sotish hisobiga soliq qarzdorligini undirish bundan mustasno, 40 foizi miqdorida ajratmalar belgilash to‘g‘risidagi takliflari ma’qullansin.

4. O‘zbekiston Respublikasi Oliy sudi, quyi sudlar sudyalari va xodimlari hamda Oliy sud huzuridagi Sudlar faoliyatini ta’minlash departamenti va uning hududiy bo‘limlari xodimlarining Yagona tarif setkasi bo‘yicha mehnatga haq to‘lash razryadlari 1–5-ilovalarga muvofiq tasdiqlansin.

5. Belgilab qo‘yilsinki, 2018-yil 1- avgustdan boshlab:

Yagona tarif setkasi bo‘yicha mehnatga haq to‘lashning tasdiqlangan razryadlariga ko‘ra sudlar, Konstitutsiyaviy sud, Sudyalar oliy kengashi sudyalari va apparatlari xodimlari, O‘zbekiston Respublikasi Oliy sudi huzuridagi Sudlar faoliyatini ta’minlash departamenti va uning hududiy bo‘limlari xodimlarining lavozim maoshini aniqlashda tarif koeffitsiyentlari bir yarim baravar miqdorda qo‘llaniladi;

malaka darajasi va mansab darajasiga ega bo‘lgan sudlar, Konstitutsiyaviy sud, Sudyalar oliy kengashi sudyalari va apparatlari xodimlari, O‘zbekiston Respublikasi Oliy sudi huzuridagi Sudlar faoliyatini ta’minlash departamenti va uning hududiy bo‘limlari xodimlariga alohida mehnat sharoitlari uchun lavozim maoshlariga qonun hujjatlarida belgilangan rag‘batlantiruvchi qo‘shimcha haq va ustamalarni hisoblashda lavozim maoshi tarkibiga kiritiladigan 50 foiz miqdorida ustama to‘lanadi;

sudlar, Konstitutsiyaviy sud, Sudyalar oliy kengashi sudyalari va apparatlari xodimlari, O‘zbekiston Respublikasi Oliy sudi huzuridagi Sudlar faoliyatini ta’minlash departamenti va uning hududiy bo‘limlari xodimlarining ko‘p yillik xizmatlari uchun, lavozim maoshlariga (mehnatni rag‘batlantirish koeffitsiyenti) ustamalar hamda malaka darajasi va mansab darajasi uchun qo‘shimcha haq miqdorlari adliya organlari xodimlari uchun belgilangan miqdorlarga tenglashtiriladi.

Ushbu bandning amal qilishi davlat organlari va tashkilotlaridagi lavozimlarga belgilangan tartibda, shu jumladan, ushbu Farmon kuchga kirgunga qadar saylangan yoki O‘zbekiston Respublikasi Prezidentining qarorlari bilan tayinlangan, shuningdek, sudyalik malaka darajalariga ega sudyalarga ushbu davlat organlari va tashkilotlarida nazarda tutilgan barcha ustamalar va qo‘shimcha haqlarni saqlab qolgan holda tatbiq etiladi.

Ushbu bandning beshinchi xatboshisida ko‘rsatilgan sudyalarning davlat organlari va tashkilotlarida ishlagan vaqti ularning ushbu organ va tashkilotlardagi mehnat faoliyati boshlangan paytdan boshlab sudyalik stajiga kiritiladi.

6. Ushbu Farmonning 5-bandida nazarda tutilgan tadbirlarni amalga oshirish bilan bog‘liq xarajatlar:

sudlar, Sudyalar oliy kengashi sudyalari va apparatlari xodimlari, O‘zbekiston Respublikasi Oliy sudi huzuridagi Sudlar faoliyatini ta’minlash departamenti va uning hududiy bo‘limlari xodimlari uchun – Sud hokimiyati organlarini rivojlantirish jamg‘armasi mablag‘lari hisobidan;

sudyalar orasidan saylangan yoki tayinlangan davlat organlari va tashkilotlari xodimlari, shuningdek, O‘zbekiston Respublikasi Konstitutsiyaviy sudi sudyalari va xodimlari uchun – O‘zbekiston Respublikasi Davlat byudjeti mablag‘lari hisobidan amalga oshiriladi.

7. O‘zbekiston Respublikasi Oliy sudi raisiga Oliy sud va O‘zbekiston Respublikasi Oliy sudi huzuridagi Sudlar faoliyatini ta’minlash departamentining yuqori malakali, tashabbuskor, xizmat majburiyatlarini halol va samarali bajarayotgan sudyalari va xodimlariga Sud hokimiyati organlarini rivojlantirish jamg‘armasi mablag‘lari hisobidan qo‘shimcha ravishda oylik mehnatga haq to‘lash fondining 100 foizigacha miqdorda ustama (pul ta’minoti) to‘lash huquqi berilsin.

8. Belgilab qo‘yilsinki, maxsus unvon va darajalar mavjud bo‘lishi nazarda tutilgan nazorat qiluvchi, huquqni muhofaza qiluvchi va boshqa organlardan tayinlangan (saylangan) sudyalarga malaka darajalari qonun hujjatlarida belgilangan tartibda 6-ilovaga muvofiq sudyalar malaka darajalarining boshqa organlar unvonlari va darajalariga nisbatini hisobga olgan holda, lekin egallab turilgan lavozim uchun nazarda tutilganidan yuqori bo‘lmagan holda beriladi.

9. O‘zbekiston Respublikasi Oliy sudi ikki oy muddatda:

a) Adliya vazirligi va Moliya vazirligi bilan birgalikda O‘zbekiston Respublikasi Vazirlar Mahkamasiga sudyalar hayoti va sog‘lig‘ini davlat tomonidan majburiy sug‘urtalash tartibi, shuningdek, ularning pensiya ta’minoti shartlari, me’yorlari va tartibi to‘g‘risidagi nizomlar loyihalarini kiritsin;

b) Markaziy bank bilan birgalikda O‘zbekiston Respublikasi Vazirlar Mahkamasiga sudyalar va ularga tenglashtirilgan shaxslarga avtomobillar sotib olish uchun, Konstitutsiyaviy sud, Sudyalar oliy kengashi, Oliy sud, quyi sudlar apparatlari, O‘zbekiston Respublikasi Oliy sudi huzuridagi Sudlar faoliyatini ta’minlash departamenti va uning hududiy bo‘limlari xodimlariga esa uy-joy sotib olish uchun imtiyozli kreditlar taqdim etishni nazarda tutadigan takliflarni kiritsin;

v) Sudyalar oliy kengashi bilan birgalikda O‘zbekiston Respublikasi Oliy Majlisining 2000-yil 14-dekabrdagi 164-II-sonli qarori bilan tasdiqlangan Sud, O‘zbekiston Respublikasi Sudyalar oliy kengashi, O‘zbekiston Respublikasi Sudyalar oliy kengashi huzuridagi Odil sudlov muammolarini o‘rganish tadqiqot markazi va O‘zbekiston Respublikasi Oliy sudi huzuridagi Sudlar faoliyatini ta’minlash departamenti xodimlarining mansab darajalari to‘g‘risidagi nizomni qayta ko‘rib chiqish bo‘yicha takliflar ishlab chiqsin va O‘zbekiston Respublikasi Oliy Majlisi Qonunchilik palatasiga kiritsin.

10. O‘zbekiston Respublikasi Moliya vazirligi ushbu Farmonda nazarda tutilgan tadbirlarni amalga oshirish uchun zarur mablag‘lar ajratilishini ta’minlasin.

11. O‘zbekiston Respublikasi Prezidentining ayrim hujjatlariga 7-ilovaga muvofiq o‘zgartirishlar va qo‘shimcha kiritilsin.

12. O‘zbekiston Respublikasi Oliy sudi Sudyalar oliy kengashi va Adliya vazirligi bilan birgalikda bir oy muddatda qonun hujjatlariga ushbu Farmondan kelib chiqadigan o‘zgartish va qo‘shimchalar to‘g‘risida takliflar kiritsin.

13. Mazkur Farmonning ijrosini nazorat qilish O‘zbekiston Respublikasi Bosh vazirining o‘rinbosari – moliya vaziri J.A.Qo‘chqorov, O‘zbekiston Respublikasi Oliy sudi raisi K.F.Kamilov va O‘zbekiston Respublikasi Prezidenti Davlat maslahatchisining birinchi o‘rinbosari B.M.Mavlonov zimmasiga yuklansin.

O‘zbekiston Respublikasi Prezidenti SH.MIRZIYOYEV

Toshkent shahri,

2018-yil 13-iyul

(Manba: O‘zA)

 

Ish jarayonida foydalanilgan manba lavhasi qo‘yilishi shart

YANGILIKLAR XABARNOMASI №136 TIV Jamoatchilik va OAV bilan aloqalar boshqarmasi 2018-yil 13-iyul

posted 16 Jul 2018, 11:08 by Webmaster Ambasciata

MOLIYA.. 1

O‘zbekiston oltin-valyuta zaxiralari 26,6 mlrd dollarni tashkil etdi 1

Energetika.. 1

O‘zbekiston – AQSH: Energetika sohasidagi hamkorlikning yangi bosqichi 1

Xalqaro munosabatlar: izoh.. 3

Mintaqaviy muloqotda yangi davr 3

Xalqaro munosabatlar.. 4

Sofiyada O‘zbekiston-Bolgariya savdo uyi ochildi 4

O‘zbekiston respublikasi oliy majlisi qonunchilik palatasi. 5

Islohotlarga qonuniy asosni parlament yaratadi 5

 

MOLIYA

O‘zbekiston oltin-valyuta zaxiralari 26,6 mlrd dollarni tashkil etdi

Iyunda O‘zbekiston yalpi oltin-valyuta zaxiralarining 463,1 mln dollarga qisqarishi oltinning arzonlashgani bilan bog‘landi.

1-iyul holatida O‘zbekistonning sof oltin zaxiralari hajmi 26,648 mlrd dollarni tashkil etib, bir oy ichida 376,1 mln dollarga qisqarish kuzatildi. Bu haqda Markaziy bank matbuot xizmati xabar qildi.

Yalpi oltin-valyuta zaxiralari 27,66 mlrd dollar bo‘lib, undagi xorijiy valyutadagi aktivlar hajmi 13,818 mlrd (bir oy ichida 186 mln dollarga kamayish), monetar oltin — 13,842 mlrd dollarni (bir oy ichida 276 mln dollarga kamayish) tashkil etdi.

Iyun oyida yalpi oltin-valyuta zaxiralarining 463,1 mln dollarga pasayishi kuzatildi. Mazkur holat hisobot davrida asosan oltin narxining 1303,50 dan 1250,55 doll/tr unsiyaga pasayishi hisobiga yuzaga keldi (narxning oltin-valyuta zaxiralarining kamayishiga ta’siri — 573,5 mln dollar).

Oltin narxi pasayishi hisobga olinmaganda yalpi oltin-valyuta zaxiralari 110,4 mln dollariga oshdi.

(Manba: Gazeta.uz)

Energetika

O‘zbekiston – AQSH: Energetika sohasidagi hamkorlikning yangi bosqichi

Joriy yilning 15-17 may kunlari O‘zbekiston Respublikasi Prezidenti Shavkat Mirziyoyev Amerika Qo‘shma Shtatlari Prezidenti Donald Trampning taklifiga binoan rasmiy tashrif bilan ushbu mamlakatda bo‘ldi. Ikki tomonlama savdo aloqalarini kengaytirish, oliy ta’lim va akademik tadqiqotlar, qishloq xo‘jaligi va energetika sohalarida hamkorlik, O‘zbekistonning Butunjahon savdo tashkilotiga a’zo bo‘lish jarayonida ishtirok etish borasidagi o‘zaro anglashuv, 2018 yilda Toshkentda Markaziy Osiyo savdo forumini o‘tkazish to‘g‘risidagi kelishuvlar ushbu tashrifning amaliy natijalaridan biri bo‘ldi.

Energetika mamlakat iqtisodiyotining asosiy tayanchi hisoblanadi. O‘zbekiston va Amerika Qo‘shma Shtatlari ayni sohada ko‘p yillardan buyon hamkorlik qilib kelmoqda. Hozirgi kunda mamlakatimiz AQSHning “Sky Power Global” va “General Electric” kabi yirik energetika kompaniyalari bilan mustahkam aloqalar o‘rnatgan.

O‘zbekston Milliy axborot agentligi – O‘zA muxbirining “O‘zbekenergo” aksiyadorlik jamiyati boshqaruvi raisi o‘rinbosari Shuhrat Sheraliyev bilan suhbati yurtimizda energiya samaradorligini ta’minlash, muqobil energiyani rivojlantirishda mazkur kompaniyalar bilan hamkorlikda amalga oshirilayotgan ishlar haqida bo‘ldi.

– Prezidentimiz Shavkat Mirziyoyevning AQSHga rasmiy tashrifi doirasida “O‘zbekenergo” aksiyadorlik jamiyati va Amerikaning “General Electric” kompaniyasi o‘rtasida bitimlar imzolangan edi. Ushbu kelishuv haqida ma’lumot bersangiz?

– Tashrif doirasida “O‘zbekenergo” AJ va “General Electric” kompaniyasi o‘rtasida imzolangan bitimlar “Toshkent IES" (issiqlik elektr stansiyasi) hududidagi bug‘-gaz qurilmasi negizida yangi H-turli turbinalarni qo‘llash orqali elektr energiyasini ishlab chiqarish loyihasini amalga oshirish, Toshkent va Surxondaryo viloyatlari hududida yuqori kulli ko‘mirni yoqish evaziga elektr energiyasini ishlab chiqarish texnologiyasini tanlash va qurishni o‘z ichiga oladi.

Kelishuvga muvofiq “General Electric” kompaniyasi “Toshkent IES”da quvvati 370 MVtga teng bug‘-gaz qurilmasini qurish” loyihasi bo‘yicha asosiy uskunalarning yetkazib beruvchisi hisoblanadi. Shuningdek, mazkur kompaniya “Taxiatosh IES”da quvvati 230-280 MVt bo‘lgan ikkita bug‘-gaz qurilmasini qurish” investitsiya loyihasiga ko‘ra, GT1, GT2 gaz turbinalari uskunalari va generatorini yetkazib berishni o‘z zimmasiga olgan.

Qayd etish joizki, bugungi kunda “General Electric” kompaniyasi ko‘magida “Toshkent IES” bug‘-gaz qurilmasida ishlab chiqarilayotgan elektr energiyasi hajmi 370 MVtga yetdi. Bu mamlakatimiz energiya tizimini rivojlantirish yo‘lidagi hamkorlikning amaliy natijasidir.

– “Toshkent IES“ hududidagi bug‘-gaz qurilmasi negizida “General Electric” kompaniyasi tomonidan taklif etilayotgan yangi texnologiyalar qanchalik samarador?

– Hamkorlarimiz sohaga innovatsion texnologiyalarni joriy etishda dunyoda yetakchilardan hisoblanadi. Chunonchi, bizga taklif etilayotgan siklli elektrostansiyalar gaz va bug‘ turbinalari, generatorlar, utilizatsiya qozonlari, elektrostansiyalarni boshqarish tizimlari va ijtimoiy tizimlar kabi uskunalarni o‘z ichiga qamrab oladi. Kombinatsiyalangan barcha siklli energobloklar 62 foizdan ortiq foydali ish koeffitsiyentiga ega. Ayni vaqtda qurilmalar ustida “General Electric”ning tajriba maydonida o‘tkazilayotgan sinovlar muvaffaqiyatli davom etmoqda.

“General Electric” kompaniyasi Fransiyaning Bushen elektrostansiyasida ishga tushirgan 9 HA seriyasidagi uskunalari yuqori foydali ish koeffitsiyentiga ega ekani bilan Ginnesning rekordlar kitobidan joy olgan. “Toshkent IES” bug‘-gaz qurilmasi negizidagi yangi texnologiyalar ham ana shunday yuqori samaradorlikka ega bo‘lishiga ishonamiz.

– "O‘zbekenergo” bilan “General Electric” o‘rtasidagi hamkorlik istiqbollari haqida nima deya olasiz?

– O‘tgan yilning sentyabr oyida “O‘zbekenergo” AJ rahbariyati bilan “General Electric” kompaniyasining Markaziy Osiyo va Ozarbayjon bo‘yicha mintaqaviy direktori Bela Ferensi o‘rtasida uchrashuv bo‘lib o‘tdi. Muloqot chog‘ida “O‘zbekenergo” AJning quvvati 450-650 MVtga teng bug‘-gaz qurilmasini qo‘shimcha o‘rganish va qiyosiy tahlil qilish masalalari muhokama qilindi. Shuningdek, joriy yilning fevral oyida “General Electric” prezidenti va bosh ijrochi direktori Ron Polletning mamlakatimizga tashrifi doirasida ikki tomonlama aloqalarni rivojlantirishga oid qo‘shma chora-tadbirlar rejasi ishlab chiqildi. Unga ko‘ra, kelgusida “Toshkent IES”da quvvati 660 MVtga teng GE H toifadagi turbinalar asosida bug‘-gaz qurilmasi bunyod etiladi.

– “O‘zbekenergo” jahonning yirik muqobil energiya ishlab chiqaruvchi kompaniyalaridan biri “Sky Power Global” bilan ham aloqa o‘rnatgan. Ayni hamkorlik mamlakatimizda quyosh energiyasini ishlab chiqarishni keng yo‘lga qo‘yishda munosib qadam bo‘la oladimi?

– Diyorimizda yilning o‘rtacha 320 kuni quyoshli ekanini inobatga olsak, mamlakatimiz quyosh energetikasidan foydalanish bo‘yicha katta salohiyatga ega. Bir so‘z bilan aytganda, yurtimizda quyosh energiyasidan foydalanish orqali 51 milliard tonna neft ekvivalentiga teng quvvat ishlab chiqarilishi mumkin.

Prezidentimiz Shavkat Mirziyoyev boshchiligida quyosh energetikasi imkoniyatlarini o‘zlashtirishga qaratilgan texnologik bazalarni ko‘paytirish borasida keng ko‘lamli ishlar olib borilmoqda. Xususan, tashkilotimiz bilan “Sky Power Global” kompaniyasi o‘rtasida 2018 yilning 19 aprelida “Elektr energiyasini sotib olish to‘g‘risida” imzolangan bitim ham ana shu jarayon mahsulidir.

Ushbu bitimga muvofiq “Sky Power Global” kompaniyasi “O‘zbekistonda umumiy quvvati 1000 MVtga teng fotoelektrik quyosh energiyasi stansiyasi obyektlarini loyihalashtirish, moliyalashtirish, bunyod etish, ularga egalik qilish va ulardan foydalanish” loyihasini amalga oshirish uchun 1,3 milliard AQSH dollari miqdorida to‘g‘ridan-to‘g‘ri investitsiyalarni jalb qiladi. Natijada yaqin 4 yilda mamlakatimizdagi yirik fotoelektr stansiyalari soni sezilarli ortadi.

Xulosa qilib aytganda, davlatimiz rahbarining AQSHga tashrifi, Vashingtonda bo‘lib o‘tgan uchrashuv va muzokaralar yakuni bo‘yicha erishilgan kelishuvlar yaqin va o‘rta muddatli istiqbolda O‘zbekiston va AQSH o‘rtasidagi munosabatlarning ustuvor yo‘nalishlarini belgilab berish bilan birga, energetika sohasida hamkorlikni sifat jihatdan yangi bosqichga olib chiqish imkoniyatini yaratdi.

– Suhbat uchun rahmat!

(Manba: O‘zA)

xalqaro munosabatlar: izoh

Mintaqaviy muloqotda yangi davr

Umumiy muammolarga birgalikda javob

22-iyun kuni BMT Bosh Assambleyasi “Markaziy Osiyo mintaqasida tinchlik, barqarorlik va izchil taraqqiyotni ta’minlash bo‘yicha mintaqaviy va xalqaro hamkorlikni mustahkamlash” rezolyutsiyasini qabul qildi. Loyihasi O‘zbekiston tomonidan Markaziy Osiyodagi qo‘shni mamlakatlar bilan hamkorlikda ishlab chiqilgan ushbu hujjatni BMTga a’zo barcha davlatlar bir ovozdan qo‘llab-quvvatladi.

Bu voqea nafaqat mintaqa uchun, balki xalqaro miqyosda ham ulkan tarixiy ahamiyatga ega. Mohiyatan, rezolyutsiyaning qabul qilinishi aniq maqsadlar yo‘lida birlashgan mintaqaga aylanayotgan Markaziy Osiyo mamlakatlari taraqqiyotida yangi bosqichni boshlab berdi.

O‘zbekiston manfaati

Ushbu rezolyutsiyani qabul qilish tashabbusi ilk bor Prezident Shavkat Mirziyoyev tomonidan 2017 yil sentyabr oyida Nyu-Yorkda bo‘lib o‘tgan BMT Bosh Assambleyasining 72-sessiyasida ilgari surilgandi. O‘zbekiston rahbari o‘z chiqishida 2017 yil noyabr oyida Samarqandda Birlashgan Millatlar Tashkiloti shafeligida Markaziy Osiyo bo‘yicha yuqori darajadagi xalqaro anjuman o‘tkazilishini ma’lum qilib, uning yakunlari bo‘yicha Markaziy Osiyo davlatlarining xavfsizlikni ta’minlash va mintaqaviy hamkorlikni mustahkamlash borasidagi sa’y-harakatlarini qo‘llab-quvvatlashga doir maxsus rezolyutsiyasini qabul qilishni taklif etdi.

Hujjatning ma’qullanishi rasmiy Toshkent tomonidan olib borilayotgan yangicha tashqi siyosatning xalqaro miqyosda e’tirof etilganini anglatadi. Bu siyosat mohiyatida esa Shavkat Mirziyoyev ta’kidlaganidek, Markaziy Osiyoni barqaror, iqtisodiy rivojlangan hududga aylantirish maqsadi yotibdi.

Mushtarak maqsadlar

Qirg‘iziston, Qozog‘iston, Tojikiston va Turkmaniston mamlakatlari O‘zbekiston tashabbusini olqishlab, BMT Bosh Assambleyasi rezolyutsiyasida hammuallif sifatida qatnashdi. Unda mintaqaviy xavfsizlikni mustahkamlash va barqaror rivojlanishni ta’minlashga katta hissa qo‘shgan tashabbuslarni birgalashib ilgari surish istagi aks etgan.

Xususan, rezolyutsiyada 2018 yil yanvarda, Qozog‘istonning BMT Xavfsizlik Kengashiga raislik qilgan davrida Xavfsizlik Kengashida Afg‘oniston bo‘yicha tashkil qilingan munozaralar yakunlari, shuningdek, Qirg‘izistonda Butunjahon ko‘chmanchilar o‘yinlari muntazam ravishda o‘tkazilayotgani qayd etildi. 2018 yil mayda Tojikistonda terrorizm va ekstremizmga qarshi kurash muammolari bo‘yicha o‘tkazilgan xalqaro anjuman natijalari ta’kidlandi. Mintaqa respublikalari 2018 yilda Orolni qutqarish xalqaro jamg‘armasi mamlakatlari rahbarlarining sammitini o‘tkazish g‘oyasini olqishladi. Har yili Markaziy Osiyo davlatlari rahbarlarining maslahatlashuv uchrashuvlarini chaqirish bo‘yicha O‘zbekiston tashabbusi qo‘llab-quvvatlandi.

O‘z mohiyatiga ko‘ra, rezolyutsiya O‘rta Osiyo mamlakatlarining ham umummintaqa muammolariga, ham globallashuv tahdidlariga bir yoqadan bosh chiqarib bergan javobi bo‘ldi. Mazkur respublikalar hududning buguni va kelajagi uchun mas’uliyatni yelkama-yelka turib zimmasiga ola biladigan, xalqaro munosabatlar tizimining mustaqil subyektlari sifatidagi o‘z o‘rnini kuchaytirdi.

Markaziy Osiyo davlatlari xavfsizlikka yangi tahdidlar yuzaga kelishi, geosiyosiy raqobatning kuchayishi, qo‘shni mamlakatlarda qurolli to‘qnashuvlar avj olishi bilan kuzatilgan ikki qutbli dunyo tartibotining qulashi davrida mustaqillikka erishdilar. Mintaqadagi xavfsizlik masalasi 90-yillar va undan so‘ng Markaziy Osiyo davlatlari duch kelgan ichki siyosiy, ijtimoiy-iqtisodiy, mafkuraviy va boshqa muammolarning og‘ir yuki bilan yanada murakkablashdi.

Amerikalik ekspert S. Kornellning fikricha, so‘nggi 25 yil davomida O‘zbekiston Markaziy Osiyoda juda muhim o‘rin tutdi. Ya’ni, avvalboshdanoq, mutaassiblik va ekstremistik g‘oyalarga nisbatan qat’iy pozitsiyada turdi, bu g‘oyalarning mintaqada tarqalishiga yo‘l qo‘ymaslikka qaratilgan kuchli siyosat olib bordi.

Markaziy Osiyo davlatlarida siyosiy tizimlar va davlat hokimiyati institutlari shakllandi va mustahkamlandi, milliy taraqqiyotning o‘ziga xos modellari va konsepsiyalari ro‘yobga chiqarilmoqda. Xalqaro munosabatlar tizimiga integratsiyalashib borar ekan, bu mamlakatlar tashqi siyosat olib borish bo‘yicha tajriba to‘pladi va bu siyosat globallashuv sharoitida strategik istiqbollarga yangicha qarashni, mintaqaviy hamkorlikka ustunlik berishni talab qiladi.

Moskva davlat xalqaro munosabatlar institutining Markaziy Osiyo va Afg‘oniston muammolarini tadqiq etish markazi direktori Andrey Kazansevning qayd etishicha, O‘zbekiston mintaqaviy ziddiyatlarni hal qilishda jiddiy salohiyatga ega ekanini namoyon etdi. Oxirgi ikki yilda Prezident Shavkat Mirziyoyev Markaziy Osiyoda hukm surgan barcha muammolarni bir chekkadan bartaraf qilib bormoqda. Shu tariqa, mintaqaviy darajadagi masalalarni yechish uchun asos qo‘yildi.

Hozirgi paytda Markaziy Osiyo davlatlari ikki va ko‘p tomonlama munosabatlarda tub o‘zgarishlarga qat’iy xohish bildirmoqda.

Xalqaro hamjamiyat e’tirofi

Markaziy Osiyo bo‘yicha BMT rezolyutsiyasining qabul qilinishi mintaqa tarixida misli ko‘rilmagan voqeadir. Chunki uni dunyoning barcha qit’alari — Avstraliya, Shimoliy va Janubiy Amerika, Afrika va Yevropaning deyarli barcha davlatlari bir ovozdan ma’qulladi. O‘zbekiston Tashqi ishlar vazirligining ma’lumot berishicha, mazkur hujjatni ishlab chiqish jarayonidagi maslahatlashuvlarda Markaziy Osiyo davlatlari bilan hamkorlik qiluvchi barcha yetakchi mamlakatlar, xususan, Rossiya, XXR, AQSH hamda YEI faol va samarali ishtirok etdi.

Sirasini aytganda, xalqaro hamjamiyat Markaziy Osiyo davlatlarining barqarorlik va taraqqiyotning eng muhim omili sanalmish mintaqaviy hamkorlikni chuqurlashtirish yo‘lidagi harakatlarini so‘zsiz qo‘llab-quvvatlashini namoyish qildi. Bugun O‘rta Osiyodagi osoyishtalik dunyo xavfsizligining ajralmas qismi ekanligiga hech kim shubha qilmayapti. Dunyoning qator mintaqalarida taranglik va ziddiyatlar saqlanib qolayotgan bir sharoitda mintaqaviy hamkorlikning strategik istiqbollari xalqaro xavfsizlikni ta’minlashda hayotiy ahamiyat kasb etmoqda. Global iqtisodiyotda oshib borayotgan mavhumlik, turg‘unlik va nomutanosiblik mintaqa davlatlaridan birgalikda rivojlanishga qaratilgan umumiy loyihalarni izlab topish va ro‘yobga chiqarish uchun yanada yaqinroq, muvofiqlashtirilgan harakatlarni talab qilyapti. Barqaror, izchil rivojlanayotgan Markaziy Osiyo davlatlarigina xalqaro hamjamiyat uchun jozibador, konstruktiv va uzoq muddatli hamkor bo‘lishi mumkin. Mintaqa va uning tashqarisidagilar bu haqiqatni allaqachon anglab yetdilar. Bu — isbot talab qilmaydigan qoida! Agar hudud davlatlari bu yo‘nalishda muvaffaqiyat qozonsa, Markaziy Osiyo “Yevrosiyoda barqarorlik va tinchlikning geosiyosiy laboratoriyasi”ga aylanishi mumkin.

Botir TURSUNOV, O‘zbekiston Respublikasi Prezidenti huzuridagi

Strategik va mintaqalararo tadqiqotlar instituti direktori o‘rinbosari.

(Manba: Xalq so‘zi” gazetasi)

xalqaro munosabatlar

Sofiyada O‘zbekiston-Bolgariya savdo uyi ochildi

O‘zbekiston hukumat delegatsiyasining Sofiyaga tashrifi doirasida O‘zbekiston-Bolgariya savdo uyi ochildi.

12 iyul kuni Sofiyada O‘zbekiston-Bolgariya savdo uyining ochilish marosimi bo‘lib o‘tdi, deya xabar qildi tashqi savdo vazirligi matbuot xizmati. Marosim bosh vazir o‘rinbosari Nodir Otajonov boshchiligidagi O‘zbekiston hukumat delegatsiyasining Bolgariyaga tashrifi doirasida bo‘lib o‘tdi.

«O‘ztreyd» tashqi savdo kompaniyasi va Bolgariyaning MBI Engineering kompaniyasi hammuassisligida ochilgan savdo uyining ochilishidan maqsad O‘zbekiston mahsulotlarining Bolgariyaga yetkazilishi hajmini oshirishdan iborat.

Tadbir ishtirokchilari O‘zbekistonning savdo va investitsion salohiyati bilan tanishdi. O‘tkazilgan uchrashuvlar yakunlari bo‘yicha o‘zbek mahsulotlarining yetkazib berilishi bo‘yicha shartnomalar imzolandi.

Bir kun oldin esa Nodir Otajonov Bolgariya bosh vazirining iqtisodiy va demografik siyosat bo‘yicha o‘rinbosari Valeri Simenov bilan uchrashdi. Ular transport-logistika, investitsiya va qishloq xo‘jaligi sohalaridagi hamkorlikni muhokama qildi.

Tashrifdan ko‘zlangan maqsad Iqtisodiy va ilmiy-texnik hamkorlik bo‘yicha O‘zbekiston-Bolgariya hukumatlararo komissiyasining beshinchi yig‘ilishini o‘tkazishga tayyorgarlik ko‘rishdan iborat.

(Manba: Gazeta.uz)

O‘zbekiston respublikasi oliy majlisi qonunchilik palatasi

Islohotlarga qonuniy asosni parlament yaratadi

O‘zbekiston Respublikasi Prezidenti Shavkat Mirziyoyevning siyosiy partiyalar, O‘zbekiston ekologik harakati vakillari, xalq deputatlari viloyat, tuman va shahar Kengashlari deputatlari bilan 2017 yil 12 iyulda bo‘lib o‘tgan uchrashuvi hamda unda parlament palatalari va barcha deputatlar korpusi faoliyatining tahliliga, istiqboldagi vazifalarga bag‘ishlangan ma’ruzasiga bir yil to‘ldi.

Mamlakatimizning barcha hududida namoyish etilgan ushbu tadbir hamda unda yangragan ma’ruzani siyosiy partiyalarning o‘n minglab faollari, shuningdek, barcha darajadagi mahalliy Kengashlar deputatlari eshitish imkoniga ega bo‘ldi. Unda belgilab berilgan vazifalarni amalga oshirish O‘zbekiston siyosat maydonidagi barcha siyosiy kuchlar faoliyatining muhim tarkibiy qismiga aylandi.

O‘zbekiston Respublikasi Oliy Majlisi Qonunchilik palatasi Spikeri Nurdinjon ISMOILOV bilan suhbatimiz ushbu sohada erishilayotgan natijalar xususida bo‘ldi.

— Siz tilga olib o‘tgan ushbu voqea muhim ijtimoiy-siyosiy ahamiyatga ega bo‘lib, aslida mamlakatimiz Konstitutsiyasining asosiy qoidalarini amalda ro‘yobga chiqarilishi bilan uzviy bog‘liqdir.

Davlat hokimiyati organlari kelishilgan holda faoliyat ko‘rsatishini va hamkorligini ta’minlashga doir o‘z konstitutsiyaviy vakolatlarini amalga oshirish asnosida O‘zbekiston Respublikasi Prezidenti hokimiyat barcha tarmoqlarini yanada takomillashtirishning istiqbolli rejalarini ishlab chiqishi talab etiladi. Ana shundan kelib chiqqan holda, O‘zbekiston Respublikasi Prezidenti Shavkat Mirziyoyev o‘zining o‘tgan yil 12 iyuldagi ma’ruzasida hokimiyat vakillik organlarini yaqin istiqbolda siyosiy jihatdan modernizatsiya qilishning asosiy qoidalarini, shuningdek, ushbu organlar faoliyatining zamon talablariga monand bo‘lishini ta’minlovchi vazifalarni belgilab berdi. Davlatimiz rahbarining ma’ruzasi mamlakatimiz hayotidagi o‘ta dolzarb tashabbuslar zamirida tarkib topgan bo‘lib, bu tashabbuslarning amalga oshirilishi milliy siyosiy tizimimiz mutlaqo yangi, yuksakroq rivojlanish bosqichiga o‘tishini anglatadi.

Shuni ta’kidlash kerakki, 2017 yil 22 dekabrda Prezidentimizning mamlakat Oliy Majlisiga yo‘llagan Murojaatnomasi 2017 yil 12 iyuldagi ma’ruzada bayon etilgan islohotlarga yuz tutgan qoidalarning mantiqiy davomi bo‘ldi. Keng jamoatchilikning e’tiboriga havola etilgan ushbu tarixiy Murojaatnoma Prezidentimiz Shavkat Mirziyoyev milliy parlamentarizm tizimining holati va istiqbollarini, siyosiy institutlar faoliyatini demokratlashtirish jarayonlarini hamda siyosiy voqelikni strategik jihatdan keng ko‘lamda qay tarzda tasavvur etishini oydinlashtirib berdi.

Prezidentimizning 2017 yil davomida deputatlar korpusiga yo‘llagan ushbu ikki murojaati O‘zbekistonda demokratik huquqiy davlat barpo etish jarayonida muhim o‘rin egalladi hamda Prezidentimizning parlament faoliyatiga bo‘lgan jiddiy e’tibori va munosabatini belgilab berdi.

Mamlakatimiz rahbarining davlat va jamiyat qurilishini takomillashtirish, qonun ustuvorligini ta’minlash, iqtisodiyotni liberallashtirish, ijtimoiy sohani rivojlantirish, o‘zaro manfaatli tashqi siyosat sohasidagi g‘oyalari va bu jabhada belgilab bergan vazifalari parlamentimiz oldiga muhim talablar qo‘ydi, uning faoliyatiga yangicha mazmun-mohiyat olib kirilishiga sabab bo‘ldi.

— Oliy Majlis Qonunchilik palatasi faoliyatini tashkil etish usullari va prinsiplaridagi o‘zgarishlar to‘g‘risida so‘z borar ekan, mamlakatimiz Prezidenti tomonidan bildirilgan takliflar parlament ishiga qanday tub o‘zgarishlar olib kirganini bilishni istardik.

— Eng avvalo, deputatlarimiz o‘z saylovchilari bilan bo‘lgan munosabatlarini yangicha shakl-shamoyilda olib bora boshladi. Agar ilgari Qonunchilik palatasi deputatlari o‘z saylovchilari bilan yiliga 2-3 marta uchrashgan bo‘lsa, bugungi kunda bunday ishlar deputatlarning muntazam, har oyda joylarda bo‘lishi tarzida amalga oshirilishi yo‘lga qo‘yilgan. Birgina 2018 yilning yanvar — may oylarida respublikamizning 70 ta tuman va shaharida olib borilayotgan ishlarning haqiqiy holati deputatlar tomonidan chuqur o‘rganildi. Amalga oshirilgan ishlarning natijalari bo‘yicha tegishli xalq deputatlari Kengashlarining majlislari o‘tkazilib, ularda hokimlarning, prokuratura, ichki ishlar organlari va soliq xizmati rahbarlarining hisoboti eshitildi hamda aniqlangan kamchiliklarni bartaraf etishga qaratilgan qarorlar qabul qilindi.

Deputatlarimiz joylarda ishlarni amalga oshirish asnosida o‘tgan davr mobaynida 28 mingdan ortiq xonadonlarga tashrif buyurdilar, 112 mingdan ortiq fuqarolar bilan, shu jumladan, 10 mingdan ziyod tadbirkorlik subyektlari bilan bevosita suhbatlar o‘tkazdi. Aniqlangan muammolarni hal etishga ko‘maklashish choralarini ko‘rdilar.

Deputatlar korpusi qonun ijodkorligi faoliyatining samaradorligi mamlakatimiz Prezidenti tomonidan adolatli tarzda tanqid ostiga olingan edi. Tanqiddan to‘g‘ri xulosa chiqargan holda qonun ijodkorligi faoliyati samaradorligini yaxshilash yo‘lida ibratli ishlar amalga oshirilishi natijasida, agar 2016 yil mobaynida deputatlar tomonidan qonunchilik tashabbusi tartibida bor-yo‘g‘i 11 qonun kiritilgan bo‘lsa, 2017 yilda ushbu raqam 27 taga yetdi (o‘sish deyarli 2,5 baravarni tashkil etdi). Joriy yilda ham shunga o‘xshash natijalar kuzatilmoqda — yarim yil ichida faqat deputatlar tashabbusi bilan 12 ta qonun loyihasi kiritildi.

Deputatlar tomonidan parlament nazoratini amalga oshirish ham sifat jihatidan o‘zgardi. Jumladan, so‘nggi yilda Prezidentimiz takliflari asosida Qonunchilik palatasi majlislarida “hukumat soati” doirasida hukumat a’zolarini eshitish mexanizmi joriy etildi va u amalda samarali qo‘llanilmoqda. Jumladan, “hukumat soati” doirasida O‘zbekiston Respublikasi uy-joy kommunal xizmat ko‘rsatish, sog‘liqni saqlash hamda bandlik va mehnat munosabatlari vazirlarining faoliyati to‘g‘risidagi axborotlari eshitildi.

— Parlament quyi palatasi tarkibida keyingi vaqtlarda amalga oshirilgan tuzilmaviy o‘zgarishlar to‘g‘risida so‘zlab bersangiz.

— Mamlakatimiz Prezidenti tomonidan oldimizga qo‘yilgan vazifalarni amalga oshirish ishimizga muayyan tuzilmaviy-institutsional o‘zgartirishlar kiritishni taqozo etdi. Shu bois aniq yo‘nalishlar bo‘yicha Oliy Majlis Qonunchilik palatasi faoliyati samaradorligi kuchayishini ta’minlashi kerak bo‘lgan yangi tarmoq bo‘linmalari shakllantirildi. Jumladan, quyi palata tarkibida Fuqarolarning sog‘lig‘ini saqlash masalalari qo‘mitasi tuzildi. Ushbu qo‘mitaning faoliyati uning a’zolari ishini bevosita joylarda yo‘lga qo‘yish ustuvorligini hisobga olgan holda tashkil etilib, qo‘mita tomonidan Jizzax viloyati va Toshkent shahrining barcha tumanida tibbiyot sohasida amalga oshirilayotgan ishlar holati o‘rganildi. Umumlashtirilgan ma’lumotlar asosida huquqni qo‘llash amaliyotini yaxshilashga doir tavsiyalar ishlab chiqildi.

Prezidentimiz taklifiga binoan, Oliy Majlis huzurida Qonunchilik muammolari va parlament tadqiqotlari instituti tashkil etildi. Institut tomonidan eng yaxshi xalqaro tajribalarni tahlil qilish asosida 25 ta qonun loyihasiga, Oliy Majlis palatalari Kengashlarining 5 ta qaroriga, O‘zbekiston Respublikasi Prezidenti farmonlari va qarorlarining 9 ta loyihasiga taklif va tavsiyalar tayyorlandi. Mazkur institut hozirgi kunda mamlakatimiz parlamenti faoliyati samarali kechishiga o‘zining munosib hissasini qo‘shmoqda.

Shuni ta’kidlash kerakki, Oliy Majlis huzurida sud sohasidagi islohotlarni amalga oshirishga, yoshlarni, ayollarni va oila institutini qo‘llab-quvvatlashga ko‘maklashishi lozim bo‘lgan yangi kollegial organlar shakllantirildi. Jumladan, Oliy Majlis huzurida o‘z faoliyatining yo‘nalishlari bo‘yicha Sud hokimiyati mustaqilligini ta’minlashga ko‘maklashuvchi komissiya hamda bevosita Qonunchilik palatasida Oila va ayollar masalalari bo‘yicha komissiya hamda Yoshlar masalalari bo‘yicha komissiya shakllantirildi. Ular bugun faol ish olib bormoqda.

Qonunchilik palatasida faoliyat ko‘rsatayotgan Axborot va kommunikatsiya texnologiyalari masalalari qo‘mitasi negizida uning vazifalari doirasiga innovatsiyalarni joriy etishga ko‘maklashish masalalarini kiritgan holda, yangi qo‘mita — Innovatsion rivojlanish, axborot siyosati va axborot texnologiyalari masalalari qo‘mitasi tuzildi va bu zamonaviy jamiyat uchun g‘oyat ahamiyatli sektorlarda deputatlar faoliyati samaradorligini yuksaltirish imkonini berdi.

— Mamlakatimiz Prezidenti davlat organlari faoliyatiga zamonaviy axborot-kommunikatsiya texnologiyalarini joriy etish masalasiga katta e’tibor qaratmoqda. Parlamentning quyi palatasida bu yo‘nalish qanday rivojlanmoqda?

— Parlament deputatlari ijtimoiy tarmoqlarda o‘z shaxsiy sahifalarini ochishi to‘g‘risidagi Prezident taklifining amalga oshirilishi natijasida hozirgi vaqtda ijtimoiy tarmoqlarda parlament vakillarining faolligi bo‘yicha O‘zbekiston o‘rtacha jahon ko‘rsatkichlaridan ancha yuqorilab ketdi. Bu, xususan, BMT tomonidan tayyorlanadigan Ye-parliament World Report xalqaro sharhida ham qayd etib o‘tildi.

Bugungi kunga kelib, Qonunchilik palatasining barcha deputatlari “Facebook” ijtimoiy tarmog‘ida shaxsiy sahifalarini ochdi. Ular tomonidan har kuni turli elektron OAV va tarmoq resurslarida jamoatchilik e’tiborini tortuvchi dolzarb masalalar bo‘yicha 200 dan ziyod axborot materiallari joylashtirilmoqda, jamoatchilik fikrini shakllantirish, ishonchli ijtimoiy-siyosiy axborotni aholiga yetkazish borasida tizimli ishlar olib borilayotir.

“Facebook”dagi shaxsiy sahifalarida, shuningdek, Qonunchilik palatasining rasmiy veb-saytida barcha fuqarolar uchun ochiq bo‘lgan “deputatning virtual qabulxonasi” xizmatidan foydalanish deputatlarning o‘z saylovchilari bilan aloqalari sifatini va tezkorligini, ular faoliyatining shaffofligi va hisobdorligi darajasini jiddiy tarzda oshirdi. Qonunchilik palatasi deputatlariga elektron murojaatlar yo‘llashni tashkil etish qulay bo‘lishi uchun fuqarolarning elektron murojaatlarini qayta ishlashni soddalashtirish va avtomatlashtirish imkonini beradigan maxsus mobil ilova ishlab chiqildi.

Shuni alohida ta’kidlash kerakki, mamlakatimiz Prezidentining tashabbusiga binoan, fuqarolarning jamoaviy elektron murojaatlari bo‘yicha “Meningfikrim.uz” veb-portali yaratilib, ishga tushirildi. Mazkur portal mamlakatimizda jamoatchilik muhokamalarining eng ommabop maydoniga aylanmoqda. O‘tgan to‘rt oy mobaynida portalga fuqarolarning tashabbuslari bilan bog‘liq 1132 ta murojaat kelib tushdi, 14138 ta sharh qoldirildi, 74 ta tashabbus ovoz berish bosqichida turibdi.

Quyi palatada qonun loyihalarining muhokamasi kundan-kunga qiziqarli, fraksiyalararo bahs-munozaralar tarzida, konstruktiv ruhda kechayotganini alohida ta’kidlab o‘tish zarur. Fuqarolarimiz bular haqida ommaviy axborot vositalari, jumladan, televideniye va radiodasturlar orqali muntazam tanishib borish imkoniga ega bo‘lmoqdalar. Nokamtarlik bo‘lsa ham shuni aytib o‘tish kerakki, Qonunchilik palatasining internetdagi veb-sayti eng o‘qishli va keng o‘quvchilar auditoriyasiga ega manbaga aylangan bo‘lib, fuqarolarimiz palatadagi qizg‘in jarayonlarni, qo‘mitalar faoliyatini, muhokama etilayotgan qonunlar haqidagi ma’lumotlarni bevosita kuzatib bormoqda. Diqqatga sazovor jihati shundaki, ijtimoiy muhim ahamiyatga molik qonun loyihalari, albatta, jamoatchilik muhokamasiga qo‘yilmoqda.

Umuman olganda, Oliy Majlis bo‘yicha “elektron parlament” kompleks dasturi qabul qilinib, amalga oshirilmoqda. Ushbu dasturni bajarish elektron ovoz berishning yangilangan hamda elektron hujjat aylanishining ixtisoslashtirilgan tizimlarini joriy etishni, foydalanuvchilarning parlament Qonunchilik palatasi fraksiyalari va qo‘mitalari yig‘ilishlarining hujjatlari, videomateriallaridan foydalanishini ta’minlaydi.

— Suhbatimiz yakunida deputatlik faoliyatining istiqbollari to‘g‘risida ham to‘xtalib o‘tsangiz. Siz ushbu sohada nimalarga va qaysi ustuvor yo‘nalishlarga e’tibor qaratgan bo‘lardingiz?

— Prezidentimiz Shavkat Mirziyoyevning islohotchilik irodasi ila ilgari surilgan keng ko‘lamli rejalari va loyihalarining ro‘yobi, shubhasiz, mamlakatimizni yangi, yanada yuqori darajadagi rivojlanish bosqichiga olib chiqadi, xalqimiz turmush farovonligi oshishiga xizmat qiladi. Jamiyatimizda qaror topgan barcha ijtimoiy kuchlarni O‘zbekistonni rivojlangan demokratik davlat sifatida qaror toptirish haqidagi buyuk g‘oya atrofida jipslantirmay turib, taraqqiyotimizda yuksak maqsadlarga erishib bo‘lmaydi. Hech shubhasiz, bunday sharoitlarda jamiyatda ishchanlik, yaratuvchanlik muhitini shakllantirish, islohotlarni ro‘yobga chiqarish uchun zarur huquqiy maydon yaratish, parlament nazorati tadbirlari salohiyatidan jamiyat manfaatlari yo‘lida samarali foydalanishda parlamentning, boshqa siyosiy institutlarning roli ortib boraveradi.

Mamlakat Prezidenti Shavkat Mirziyoyev tomonidan taklif etilgan siyosiy yo‘l to‘g‘ri, o‘z vaqtida belgilanganligiga va bundan boshqa yo‘l yo‘q ekanligiga parlamentning ishonchi komil. Biz amalga oshirilayotgan islohotlarning zarurligiga va misli ko‘rilmagan natijalarga erishishimiz muqarrarligiga qat’iy ishonamiz. Shu tufayli ham mamlakatimiz Prezidentining davlat hamda jamiyatning barqaror rivojlanishini ta’minlashga qaratilgan faoliyatini bundan buyon ham siyosiy nuqtai nazardan qat’iy qo‘llab-quvvatlaymiz. Bunday hamjihatlik faqat siyosiy bayonotlarda va rasmiy harakatlardagina ifodalanib qolmay, balki fuqarolarning manfaatlarini amalda ro‘yobga chiqarish va himoya qilish, aholi farovonligini yuksaltirish, tinchlik-xotirjamlikni ta’minlashda parlamentning, deputatlarning bevosita ishtiroki orqali amalga oshiriladi.

Ayonki, milliy davlatchiligimizning taraqqiyoti, o‘z davrida mamlakatimizda parlamentarizm tizimi jiddiy rivojlanishiga ham turtki bo‘ldi. Mustaqillik yillarida O‘zbekiston parlamenti kamol topdi, mustahkam oyoqqa turdi va kelajakka dadil boqmoqda. Hozirgi vaqtda parlament sezilarli kuch va nufuzga, xalq orasida obro‘-e’tibor va ishonchga sazovor bo‘lmoqda. Ushbu salohiyatdan va milliy parlamentarizm tizimining vakolatlaridan xalq farovonligini yuksaltirish, davlatchilikni mustahkamlash, beqiyos Vatanimizni yanada rivojlantirish yo‘lida samarali foydalanish zarur va shartdir. Deputatlik korpusi bu ishga tayyor va hozirgi shiddatli sotsial-iqtisodiy, ijtimoiy-siyosiy o‘zgarishlar davrida Prezidentimiz tomonidan qo‘yilgan yuksak vazifalarning amalga oshirilishini ta’minlashga qat’iy bel bog‘lagan.

(Manba: Xalq so‘zi” gazetasi)

 

Ish jarayonida foydalanilgan manba lavhasi qo‘yilishi shart

YANGILIKLAR XABARNOMASI №135 TIV Jamoatchilik va OAV bilan aloqalar boshqarmasi 2018-yil 12-iyul

posted 16 Jul 2018, 11:07 by Webmaster Ambasciata

Islohotlar.. 1

Germaniyalik ekspert innovatsiya vaziri o‘rinbosari bo‘ldi 1

Investitsiya.. 1

Yil boshidan buyon xorijlik investorlar tomonidan 960 tadan ortiq korxona tashkil etildi 1

ERKIN IQTISODIY HUDUDLAR.. 2

Buxoro viloyatida «Buxoro-Agro» erkin iqtisodiy zonasi tashkil etiladi 2

Markaziy Osiyo – O‘zbekiston tashqi siyosatining ustuvor yo‘nalishi. 2

O‘zbekiston markaziy banki qozoq banki bilan hamkorlik bitimi imzoladi 2

Toshkentning markaziy ko‘chalaridan biriga Chingiz Aytmatov nomi berildi 2

Xalqaro munosabatlar.. 3

Jahon banki delegatsiyasining O‘zbekistonga tashrifi to‘g‘risida. 3

Jamiyat.. 3

O‘zbekistonda “Yosh tadbirkorlar” kovorking-markazlari va “Yoshlar mehnat guzari” komplekslari quriladi 3

O‘zbekiston turizm o‘lkasi. 4

O‘zbekistonga tashrif buyurgan chet elliklar soni qariyb 2 barobarga ortdi 4

 

Islohotlar

Germaniyalik ekspert innovatsiya vaziri o‘rinbosari bo‘ldi

Germaniya fuqarosi Karsten Xayns O‘zbekiston innovatsion rivojlanish vaziri o‘rinbosari lavozimiga tayinlandi.

O‘zbekiston prezidenti Shavkat Mirziyoyev farmoni bilan Germaniya fuqarosi Karsten Xayns O‘zbekiston innovatsion rivojlanish vaziri o‘rinbosari lavozimiga tayinlandi. Bu haqda O‘zbekistonning Berlindagi elchixonasi «Gazeta.uz"ga xabar qildi.

O‘zbekistonda zamonaviy innovatsion infratuzilmalarni shakllantirishda Germaniyaning boy tajribasini joriy etish maqsadida respublikaning GFRdagi elchixonasi tashabbusi bilan Ta’lim va ilmiy tadqiqotlar federal vazirligi bilan qator muzokaralar olib borildi va ular yakunlari bo‘yicha nemis tomoni Innovatsiya vazirligi bilan ishlash uchun ekspert yuborishga rozilik bildirdi.

Vazir o‘rinbosari lavozimiga bevosita ushbu vazirlikda faoliyat olib boruvchi tajribali mutaxassis tavsiya qilindi. Karsten Xayns Toshkentda bo‘lib, O‘zbekistonning vakolatli vazirliklarida uchrashuvlar o‘tkazgan.

Germaniya hukumati uchun davlat xizmatchisining boshqa mamlakat hukumatida yuqori lavozimga tayinlanishi birinchi shu kabi holat bo‘ldi. mazkur qaror O‘zbekistondagi islohotlar jarayonini qo‘llab-quvvatlashga qaratilgan, deyiladi xabarda.

(Manba: Gazeta.uz)

Investitsiya

Yil boshidan buyon xorijlik investorlar tomonidan 960 tadan ortiq korxona tashkil etildi

Birinchi yarim yillikda O‘zbekistonda chet el kapitali ishtirokidagi 960 dan ortiq korxona ro‘yxatdan o‘tkazildi.

Birinchi yarim yillikda O‘zbekistonda chet el kapitali ishtirokidagi 960 dan ortiq korxona ro‘yxatdan o‘tkazildi. Bu o‘tgan yilning shu davriga nisbatan uch barobarga ko‘p demakdir.

Bosh vazir o‘rinbosari, O‘zbekiston Investitsiyalar bo‘yicha davlat qo‘mitasi raisi Suxrob Xolmurodov chet ellik va mahalliy sarmoyadorlarning investitsiya takliflarini ochiq muhokama qilish yagona maydonchasining birinchi uchrashuvida bu haqda ma’lum qildi.

Qo‘mita rahbari so‘zlariga qaraganda, Rossiya, Turkiya, Xitoy, Qozog‘iston, Janubiy Koreya vakillari alohida faollik ko‘rsatmoqda. Afg‘oniston, Hindiston, Germaniya, Ukraina va Ozarbayjondan ham investorlar qiziqish bildirmoqda.

Xalqaro moliya institutlari va chet el hukumat moliya tashkilotlari mablag‘larini jalb qilish sohasida faollashuv kuzatilmoqda.

«Yil boshidan buyon 1,5 mlrd dollarlik qarz va kreditlarni jalb qilish to‘g‘risidagi bitimlar imzolandi», — dedi bosh vazir o‘rinbosari.

U to‘g‘ridan-to‘g‘ri xorijiy sarmoyalarni jalb qilishda ijobiy natijalar qayd etilayotganini ma’lum qildi — O‘zbekiston hududlarida ular ishtirokida 280 dan ortiq loyihalar amalga oshirilmoqda.

«Har hafta muhokama uchun yangi sohani tanlab olayapmiz, masalan neft-gaz, kimyo, to‘qimachilik. Biroq ulardan mustaqil ravishda investorlarni qiziqtiruvchi boshqa masalalar ham ko‘rib chiqiladi», — dedi qo‘mita rahbari. U barcha xohlovchilar — investorlar, diplomatik missiyalar vakillari, tadbirkor doiralar vakillari, OAV xodimlari, O‘zbekiston va chet el fuqarolarini ishtirok etishga taklif qildi.

Maydonchaga vazirlik va mahkamalar, davlat birlashmalari rahbarlari, iqtisodiyot sohalariga javobgar mutasaddilar taklif qilinadi.

(Manba: Gazeta.uz)

ERKIN IQTISODIY HUDUDLAR

Buxoro viloyatida «Buxoro-Agro» erkin iqtisodiy zonasi tashkil etiladi

Buxoro viloyatida «Buxoro-Agro» erkin iqtisodiy zonasi tashkil etiladi. O‘zbekiston prezidenti Shavkat Mirziyoyev 10 iyul kuni shu haqdagi qarorni imzoladi.

EIZda zamonaviy issiqxona xo‘jaliklarini, jumladan, gidroponika texnologiyalarini qo‘llagan holda, klaster usuli asosida tashkil etish uchun to‘g‘ridan-to‘g‘ri xorijiy va mahalliy investitsiyalar jalb etish, shuningdek, zamonaviy energiya tejovchi issiqxonalar qurish uchun konstruksiyalar, jihozlar va boshqa butlovchi buyumlar ishlab chiqarishni tashkil etish rejalashtirilmoqda.

Ko‘chatzorlar, shuningdek, birlamchi urug‘chilikni tashkil etish uchun sharoitlar yaratish orqali issiqxona xo‘jaliklarini talabi katta, yuqori hosildorlikka ega bo‘lgan qishloq xo‘jaligi ekinlari urug‘ va ko‘chatlari bilan ta’minlashning samarali mexanizmlarini joriy etish EIZning asosiy vazifalaridan.

«Buxoro-agro» EIZning faoliyat ko‘rsatish muddati u tashkil etilgan kundan boshlab, mazkur muddatni keyinchalik uzaytirish imkoniyati bilan 30 yilni tashkil qiladi. EIZning faoliyat ko‘rsatishi muddati mobaynida uning hududida alohida soliq va bojxona rejimlari amal qiladi. EIZ ishtirokchisi maqomi Buxoro viloyati Erkin iqtisodiy zonalar va kichik sanoat zonalari ma’muriy kengashining qarori bilan beriladi.

EIZ hududida amalga oshiriladigan loyihalarni moliyalashtirish xalqaro moliya institutlari, loyiha tashabbuskorlari mablag‘lari, jumladan, to‘g‘ridan-to‘g‘ri investitsiyalar, shuningdek, tijorat banklari kreditlari va qonun hujjatlarida taqiqlanmagan boshqa manbalar hisobidan amalga oshiriladi. Bunda loyiha tashabbuskorining loyihani amalga oshirish uchun jalb etilayotgan o‘z mablag‘lari miqdori tegishli loyiha umumiy qiymatining 25 foizidan kam bo‘lishi mumkin emas.

(Manba: Gazeta.uz)

Markaziy Osiyo – O‘zbekiston tashqi siyosatining ustuvor yo‘nalishi

O‘zbekiston markaziy banki qozoq banki bilan hamkorlik bitimi imzoladi

O‘zbekiston Markaziy banki va Qozog‘iston Milliy banki bank nazorati sohasida o‘zaro hamkorlik to‘g‘risidagi bitimni imzoladi. Bu haqda Markaziy bank matbuot xizmati xabar berdi.

Xabarda aytilishicha, tarixda ilk bor imzolangan hujjat tomonlarning o‘zaro bank bozoriga kirishi uchun huquqiy asos berib, ikki tomonlama bank hamkorligini mustahkamlashga xizmat qiladi.

Qozog‘iston Milliy banki saytida qayd etilishicha, mazkur bitim O‘zbekiston hududida transchegaraviy muassasalarni yaratish yoki ularga egalik qilish imkoniyatini taqdim etadi.

Buning uchun bir qator talablarga javob berish lozim. Jumladan bank filiali uchun eng kamida 100 mln yevro ekvivalentidagi tenge, transchegaraviy muassasa uchun esa 100 mlrd so‘m miqdorida nizom jamg‘armasi (O‘R MB kursi 12.07.2018 da, 1$= 7813.42 so‘m), shuningdek, «Standard & Poor’s» agentligining «B»dan past bo‘lmagan yoxud «Fitch Ratings yoki Moody’s» agentliklarining xuddi shu darajadagi uzoq muddatli kredit reytingiga ega bo‘lish talab qilinadi.

(Manba: Xabar.uz)

Toshkentning markaziy ko‘chalaridan biriga Chingiz Aytmatov nomi berildi

O‘zbekiston Respublikasi Prezidentining 2018 yil 2 apreldagi  “Buyuk adib va jamoat arbobi Chingiz Aytmatov tavalludining 90 yilligini keng nishonlash to‘g‘risida”gi qarorida Chingiz Aytmatov xotirasini abadiylashtirish maqsadida Toshkent shahrining markaziy ko‘chalaridan biriga adib nomini berish belgilangan edi.

Kuni kecha bo‘lib o‘tgan xalq deputatlari Toshkent shahar Kengashining o‘ttiz sakkizinchi sessiyasida ushbu masala atroflicha ko‘rilib, Yunusobod tumani hududida joylashgan Bodomzor yo‘li ko‘chasiga buyuk adib va jamoat arbobi Chingiz Aytmatov nomini berish to‘g‘risida qaror qabul qilindi. Bu haqda Toshkent shahar hokimligi Axborot xizmati xabar bermoqda.

Ma’lumot o‘rnida:  Ch.Aytmatov O‘zbekiston Respublikasining «Do‘stlik» (1995), «Buyuk xizmatlari uchun» (1998) ordenlari bilan mukofotlangan. Qirg‘iziston Respublikasida Xalqaro Chingiz Aytmatov nomidagi «Oltin medal» mukofoti ta’sis etilgan.

(Manba: Kun.uz)

xalqaro munosabatlar

Jahon banki delegatsiyasining O‘zbekistonga tashrifi to‘g‘risida

2018-yilning 12-iyul kuni Toshkent shahriga Jahon bankining Yevropa va Markaziy Osiyo bo‘yicha vitse-prezidenti Siril Muller boshchiligidagi delegatsiya keldi.

Tashrif dasturidan O‘zbekiston Hukumati, Oliy Majlis Senatida uchrashuv va Muzokaralar o‘tkazish o‘rin olgan.

Shuningdek, delegatsiya O‘zbekiston-Shveysariya biznes forumida ham ishtirok etadi.

(Manba: O‘zbekiston Respublikasi TIV veb-sahifasi)

jamiyat

O‘zbekistonda “Yosh tadbirkorlar” kovorking-markazlari va “Yoshlar mehnat guzari” komplekslari quriladi

Prezidentning 2018-yil 27-iyunda “Yoshlar – kelajagimiz” Davlat dasturi to‘g‘risida”gi farmoni qabul qilindi. Farmonda “Yosh tadbirkorlar” kovorking-markazlari va “Yoshlar mehnat guzari” komplekslari qurishga topshiriq berildi.

“Yosh tadbirkorlar” kovorking-markazlari va “Yoshlar mehnat guzari” komplekslarini qurish davlat-xususiy sheriklikning quyidagi shartlarida amalga oshirilishi belgilandi:

a) tuman (shahar)lar hokimliklari:

“Yosh tadbirkorlar” kovorking-markazlari va “Yoshlar mehnat guzari” komplekslarini, shuningdek, boshqa obyektlarni qurish (joylashtirish) uchun xususiy investorlarga, istisno tariqasida, to‘g‘ridan-to‘g‘ri muzokaralar orqali yer uchastka (bo‘sh bino)larni doimiy foydalanish huquqi asosida ajratadi;

“Yosh tadbirkorlar” kovorking-markazlari va “Yoshlar mehnat guzari” komplekslarini muhandislik kommunikatsiyalariga, jumladan, elektr, gaz va suv ta’minoti tarmoqlariga olib borishni va ulashni tuman (shahar)lar byudjetlarining qo‘shimcha manbalari hisobidan ta’minlaydi;

b) Jamg‘arma “Yosh tadbirkorlar” kovorking-markazlari va “Yoshlar mehnat guzari” komplekslari qurilishi qiymatining 30 foizigacha bo‘lgan qismini moliyalashtirishda mazkur mablag‘larni ularning ustav jamg‘armasi (kapitali)ga keyinchalik kapitallashtirgan holda ishtirok etishga haqli;

v) xususiy investorlar quyidagi majburiyatlarni o‘z zimmasiga oladi:

“Yosh tadbirkorlar” kovorking-markazlari va “Yoshlar mehnat guzari” komplekslari qurilishi qiymatining kamida 70 foizini moliyalashtirish, ularning kelishilgan muddatlarda va namunaviy loyihalarga muvofiq qurilishi va foydalanishga topshirilishini ta’minlashni;

Davlat dasturi ishtirokchisi bo‘lgan yosh tadbirkorlarga “Yosh tadbirkorlar” kovorking-markazlari va “Yoshlar mehnat guzari” komplekslarida joy berish, ularga maqbul narxlarda xizmatlar ko‘rsatish, shuningdek, ularda ish o‘rinlari umumiy sonining kamida 70 foizi miqdorida band bo‘lmagan yoshlarni ishga qabul qilish sharti bilan mustaqil ravishda tadbirkorlik faoliyatini tashkil etishni;

Jamg‘armaning tuman va shahar filiallarini joylashtirish uchun “Yosh tadbirkorlar” kovorking-markazlaridagi xonalarni bepul taqdim etishni;

g) “Yosh tadbirkorlar” kovorking-markazlari va “Yoshlar mehnat guzari” komplekslarini saqlab turish xususiy investorlarning mablag‘i hisobidan amalga oshiriladi;

d) “Yosh tadbirkorlar” kovorking-markazlari va “Yoshlar mehnat guzari” komplekslarini qurishga yo‘naltiriladigan mablag‘lar xususiy investorlarning soliq solinadigan bazasidan chegirib tashlanadi.

Davlat dasturining amal qilishi yoshlar tadbirkorligi subyektlariga, 50 foiz va undan ko‘proq muassislari yoshlardan iborat bo‘lgan tadbirkorlik subyektlariga, shuningdek, yaratiladigan ish o‘rinlarining 70 foizidan kam bo‘lmagan qismini 5 yil davomida yoshlarni ish bilan ta’minlash uchun taqdim etish majburiyatini o‘z zimmasiga oladigan tadbirkorlik subyektlariga, jumladan, xorijiy investorlarga tatbiq etilishi belgilandi.

(Manba: O‘zA)

O‘zbekiston turizm o‘lkasi

O‘zbekistonga tashrif buyurgan chet elliklar soni qariyb 2 barobarga ortdi

Birinchi yarim yillikda O‘zbekistonga kelgan chet elliklar soni qariyb 2 barobarga ortib, 2 million 688 ming 962 kishini tashkil etdi.

Joriy yilning birinchi yarmida O‘zbekistonga kelgan chet el fuqarolari soni 2017 yilning shu davriga nisbatan qariyb 2 barobarga ortib, 2 million 688 ming 962 kishini tashkil etdi, deya xabar qildi Turizmni rivojlantirish davlat qo‘mitasi matbuot xizmati.

Vizasiz rejim joriy etilgan quyidagi davlatlardan tashrif buyuruvchilar soni keskin oshdi:

Turkiya — 31966 (+95,6%);

Yaponiya — 6200 (+68,1%);

Isroil — 3615 (+86,2%);

Indoneziya — 750 (3 barobardan ortiqroq);

Singapur — 424 (2,5 barobardan ortiqroq).

Iyunda Koreya Respublikasi (57,5 foiz) va Malayziyadan (2,6 barobarga) keluvchi fuqarolar sonining ortgani kuzatildi.

10 fevraldan O‘zbekiston 7 mamlakat: Isroil, Indoneziya, Koreya Respublikasi, Malayziya, Singapur, Turkiya va Yaponiya fuqarolari uchun 30 kungacha muddatga vizasiz tartib joriy etgan edi. Bundan tashqari, 39 ta davlat fuqarolari uchun turistik viza rasmiylashtirishning soddalashtirilgan tartiblari joriy etildi.

15 iyuldan esa O‘zbekistonga elektron viza rasmiylashtirish bo‘yicha E-Visa.uz tizimi ish boshlaydi.

(Manba: Gazeta.uz)

  

Ish jarayonida foydalanilgan manba lavhasi qo‘yilishi shart

YANGILIKLAR XABARNOMASI №134 TIV Jamoatchilik va OAV bilan aloqalar boshqarmasi 2018-yil 11-iyul

posted 16 Jul 2018, 11:06 by Webmaster Ambasciata

PREZIDENT.. 1

Mamlakatimizda tinch maqsadlarda foydalanish uchun atom energetikasi barpo etiladi 1

ISLOHOT.. 2

O‘zbekiston: Davlat organlari huzurida jamoatchilik kengashlari tashkil etiladi 2

IQTISODIYOT.. 2

O‘zbekiston: Yangi usul fermerlarga ma’qul bo‘lmoqda. 2

Xalqaro munosabatlar.. 3

Sloveniya Elchisi bilan uchrashuv. 3

Jamiyat.. 3

O‘zbekiston aholisi 32,9 milliondan oshdi 3

Humo qushi yuksak parvozga shaylanmoqda. 5

O‘zbekiston turizm o‘lkasi. 9

Jizzaxda turizm qachon rivojlanadi?. 9

Ilova.. 10

“Buxoro-Agro” erkin iqtisodiy zonasini tashkil etish chora-tadbirlari to‘g‘risida. 10

 

PREZIDENT

Mamlakatimizda tinch maqsadlarda foydalanish uchun atom energetikasi barpo etiladi

O‘zbekiston Respublikasi Prezidenti Shavkat Mirziyoyev raisligida 2018-yilning 10 iyul kuni mamlakatimizda mutlaqo yangi soha bo‘lgan atom energetikasini barpo etish bo‘yicha tashkiliy-texnik chora-tadbirlarni amalga oshirish masalalarigabag‘ishlangan yig‘ilish o‘tkazildi.

Dunyoda gaz, neft, ko‘mir va boshqa manbalarga bo‘lgan talab kun sayin ortmoqda. Bu, o‘z navbatida, ushbu resurslar zaxirasining keskin kamayib ketishiga olib kelayotir. Shuning uchun butun bashariyat – ehtiyoj uchun ishlatiladigan resurslarning muqobilidan foydalanishga harakat qilmoqda. Shulardan biri tinchlik maqsadlari yo‘lida atom elektr energetikasini rivojlantirishga alohida e’tibor qaratilmoqda. Hozirda jahonning 30 dan ziyod mamlakatida atom elektr stansiyalaridan samarali foydalanilmoqda. Bu mamlakat iqtisodiyotiga katta foyda keltirish bilan birga, tabiiy resurslar tejalishiga xizmat qilmoqda.

Bugungi kunda mamlakatimizda elektr energiyasiga bo‘lgan talab 69 milliard kilovatt-soatni tashkil etadi. Bu quvvatning qariyb 85 foizi gaz va ko‘mir yoqish orqali, qolgan 15 foizi gidroelektr stansiyalarida ishlab chiqariladi. Buning uchun yiliga 16,5 milliard kub metr tabiiy gaz, 86 ming tonna mazut va 2,3 million tonna ko‘mir sarflanadi.

Hisob-kitoblarga ko‘ra, iqtisodiyot o‘sishi, aholi soni va turmush darajasi oshishi evaziga 2030 yilda elektr energiyasiga bo‘lgan talab 117 milliard kilovatt-soatga yetadi. Buning uchun yangi quvvatlar tashkil etish kerak bo‘ladi.

– Agar ushbu quvvatni ta’minlash uchun tabiiy gaz va ko‘mirdan foydalanishni davom ettiraversak, ularning mavjud zaxirasi ma’lum vaqtdan keyin tugab qolishi mumkin. Bu esa kelajak avlod oldida kechirib bo‘lmaydigan xato va jinoyat bo‘ladi, – dedi Shavkat Mirziyoyev.

Shu bois mamlakatimizda tinch maqsadlarda foydalanish uchun ekologik toza va uzoq muddat tugamaydigan atom energetikasini barpo etishga kirishildi. Rossiyaning “Rosatom” davlat korporatsiyasi bilan hamkorlikda atom elektr stansiyasini qurish bo‘yicha kelishuvga erishildi. Mazkur kompleks 2energoblokdan iborat, har birining quvvati 1 ming 200 megavatt bo‘ladi. Uni 2028 yilgacha to‘liq ishga tushirish rejalashtirilgan.

Atom elektr stansiyasi barpo etilishi natijasida yiliga 3,7 milliard kub metr tabiiy gaz tejaladi. Bu manba qayta ishlanib, yuqori qo‘shilgan qiymatli neft-kimyo mahsulotlari ishlab chiqariladi. Agar tejalgan gazni qayta ishlamasdan eksport qilgan taqdirda ham, O‘zbekistonga yiliga 550-600 million dollar valyuta tushadi.

Atom energiyasi ekologik toza, bunday stansiyalar zararli is gazini hosil qilmaydi. Natijada mamlakatimizda tabiiy gazni yoqishdan hosil bo‘ladigan va atrof-muhitga tarqaladigan is gazi hajmi yiliga 3 million tonnaga kamayadi.

Yig‘ilishda atom elektr stansiyasini qurish, undan foydalanish bilan bog‘liq tashkiliy-texnik va amaliy ishlar muhokama qilindi.

Prezidentimiz shunday obyektlarni qurish bo‘yicha rivojlangan davlatlar tajribasi asosida ish tutish, atom elektr stansiyasini joylashtirish bo‘yicha texnik shartlarni ishlab chiqish va geologik-qidiruv ishlarini sifatli bajarish bo‘yicha topshiriqlar berdi.

Mamlakatimizda yangi bo‘lgan ushbu sohaga doir normativ-huquqiy baza yaratish, “Atom energiyasidan foydalanish to‘g‘risida”gi qonun va tegishli qaror loyihalarini ishlab chiqish, ularning MAGATE talablari va xalqaro hujjatlarga muvofiqligiga alohida e’tibor qaratish zarurligi ta’kidlandi.

– Bu boradagi barcha ishlarni muvofiqlashtirish, hujjatlarni tayyorlash, loyihalashtirish ishlari va muzokaralar olib borish uchun Vazirlar Mahkamasi huzurida yangi tashkilot tuzish kerak. Shu bilan birga, ushbu tashkilot huzurida atom elektr stansiyasi qurish direksiyasini ham tuzish zarur. Keyinchalik ushbu direksiya atom elektr stansiyasining operatori bo‘lib qoladi, – dedi davlatimiz rahbari.

Ma’lumki, atom elektr stansiyasi qurish va undan foydalanishda eng zamonaviy va murakkab texnologiyalar qo‘llaniladi. Buning uchun esa chuqur bilim va yuqori malakaga ega bo‘lgan mutaxassislar kerak. Shu bois Toshkentda fizika sohasida dunyoda yetakchi ta’lim muassasalaridan biri hisoblangan Moskva muhandislik-fizika instituti filialini ochish mo‘ljallanmoqda.

Shuningdek, fizika va texnika yo‘nalishlaridagi oliy o‘quv yurtlarini bitirgan salohiyatli kadrlarni tanlab olib, ularni Moskva va Minsk shaharlariga o‘qishga hamda atom elektr stansiyalarida tajriba orttirishga yuborish bo‘yicha ko‘rsatma berildi.

– Ushbu loyihani amalga oshirishda mutlaqo boshqacha tizim yaratamiz, bu borada biron-bir byurokratik to‘siqlar bo‘lishiga umuman yo‘l qo‘yilmaydi, – dedi Prezidentimiz. – Chunki har tomonlama uzoqni ko‘zlab rejalashtirilgan ekologik toza va zararsiz ushbu yirik loyiha mamlakatimiz iqtisodiy taraqqiyotiga, xalqimiz turmush farovonligini yanada oshirishga xizmat qiladi.

Yig‘ilishda har bir bosqichdagi ishlarni puxta ishlab chiqish va amalga oshirilayotgan ishlar natijadorligini qat’iy nazoratga olish bo‘yicha ko‘rsatmalar berildi.

(Manba: O‘zA)

ISLOHOT

O‘zbekiston: Davlat organlari huzurida jamoatchilik kengashlari tashkil etiladi

“Davlat organlari huzuridagi jamoatchilik kengashlari faoliyatini tashkillashtirish chora-tadbirlari to‘g‘risida”gi Prezident qarori qabul qilindi. Bu haqda Adliya vazirligining Telegram’dagi “Huquqiy axborot” kanalida ma’lum qilindi.

Qarorga ko‘ra, har bir davlat tashkilotida huzurida, shu jumladan, huquqni muhofaza qiluvchi organlar huzurida jamoatchilik kengashlari tuziladi.

Jamoatchilik kengashlari davlat organi rahbarining qaroriga asosan tuzilib, unga mehnat faxriylari, obro‘li fuqarolar, ommaviy axborot vositalari, nodavlat notijorat tashkilotlari vakillari qabul qilinadi.

Davlat organlari va ularning mansabdor shaxslari faoliyati ustidan jamoatchilik nazoratini o‘rnatish, fuqarolar va davlat organlari o‘rtasida o‘ziga xos ko‘prik vazifasini bajarish Jamoatchilik kengashlarining asosiy vazifasi hisoblanadi.

(Manba: Daryo.uz)

IQTISODIYOT

O‘zbekiston: Yangi usul fermerlarga ma’qul bo‘lmoqda

Farg‘ona viloyati Rishton tumanida joriy yilda 6 ming 500 gektar maydonda paxta klaster usulida yetishtirilmoqda. Paxtachilikka ixtisoslashgan 327 fermer xo‘jaligi bilan kontraktatsiya shartnomalari tuzilib, birinchi marta joriy etilayotgan yangi usul fermerlarda katta qiziqish uyg‘otmoqda.

O‘zbekiston Respublikasi Vazirlar Mahkamasining shu yil 25 yanvardagi “Paxta-to‘qimachilik ishlab chiqarishini tashkil etishning zamonaviy shakllarini joriy etish chora-tabdirlari to‘g‘risida”gi qarori asosida tumanda “Klaster” mas’uliyati cheklangan jamiyati tashkil etildi. Paxtachilikda hosilni parvarishlashdan tortib, tayyor mahsulot ishlab chiqarishgacha bo‘lgan barcha bosqichni o‘zida mujassam etgan klaster usuli fermer xo‘jaliklariga ma’qul bo‘lmoqda.

Bugungi kunda paxtachilik sohasini yaxshi biladigan 20 dan ziyod agronom va boshqa mutaxassislar dalalarda bo‘lib, ekin rivoji, uning hosildorligini oshirish bilan bog‘liq ishlarni olib bormoqda. Zararkunandalarga qarshi kurashish maqsadida 15 yangi OVX agregati sotib olindi va bugungi kunda ulardan fermer xo‘jaliklarida samarali foydalanilmoqda.

Endi fermer hech narsaga ehtiyoj sezmaydi, mineral o‘g‘it yoki yoqilg‘ini shartnomada ko‘rsatilgan muddatda, keragicha olishi mumkin. Ishchilar o‘z vaqtida oylik maosh bilan ta’minlanayotir. G‘o‘za rivoji va holati esa jamiyat mutaxassislari tomonidan doimiy nazorat qilib borilmoqda.

– Klaster usulining afzal tomonlarini amalda o‘z ko‘zimiz bilan ko‘rib, bunga ishonch hosil qildik, – deydi “Xoliqov Yo‘lchiboy” fermer xo‘jaligi rahbari Yo‘lchiboy Xoliqov. – Xo‘jaligimiz ixtiyorida 70 gektar yer bor. Bu yil “Klaster” mas’uliyati cheklangan jamiyati bilan shartnoma imzolab, 32 gektar maydonga 45 sentnerlik marrani ko‘zlagan holda “S 8290” navli chigit ekdik. Hozir g‘o‘za nihollari rivojidan ko‘nglimiz to‘q. Vegetatsiya davrida ekinlar holidan har kuni xabardor bo‘lish juda muhim. Chunki nihollar bir kunda u yoki bu tomonga o‘zgarib qolishi mumkin. Bu yil 3 sotix yerda baliq yetishtirish uchun ko‘l qildik.

“Klaster” MCHJ fermer xo‘jaliklariga yer, suv va boshqa resurslardan samarali va oqilona foydalanish, hosildorlikni oshirish kabi ishlarda yaqindan ko‘mak bermoqda.

– Klaster tizimining joriy etilgani daromadimiz oshishiga xizmat qilmoqda, – deydi “Zarinabonu yerlari” fermer xo‘jaligi rahbari Nodira Akbarova. – Ko‘p yillardan buyon uyda parrandachilik bilan ham shug‘ullanib kelayotganim bois 2014 yili yerga tovuq go‘ngi soldik. Odatda, arang 29 sentnerdan hosil beradigan yer keyingi yildan tubdan o‘zgardi. Bugunga kelib har gektar maydondan 35 sentnerdan hosil olinmoqda. G‘alla va paxtadan har yili mo‘l hosil yetishtirib kelamiz. Bu yil 22,5 gektar maydonda g‘o‘za parvarishlayapmiz. Hozirgacha g‘o‘za qator oralarini 4 marta, jumladan, 1 marta mineral o‘g‘it bilan kultivatsiya qildik. Yerga me’yoridan ortiq mineral o‘g‘it tushdi. Joriy yilda chigit qo‘shqator usulda ekilgani tufayli parvarish mutaxassislar tavsiyasi va agrotexnika qoidalari asosida olib borilmoqda.

(Manba: O‘zA)

xalqaro munosabatlar

Sloveniya Elchisi bilan uchrashuv

2018-yilning 11-iyul kuni O‘zbekiston Respublikasi Tashqi ishlar vazirligida Sloveniya Respublikasining Favqulodda va Muxtor Elchisi (qarorgohi Moskva shahrida) Primoj Sheligo bilan uchrashuv bo‘lib o‘tdi.

Suhbat davomida turli sohalarda va “O‘zbekiston-Yevropa Ittifoqi” shaklida ikki tomonlama aloqalar holati va uni yanada rivojlantirish istiqbollari yuzasidan fikr almashildi.

Muzokaralarda vazirliklararo siyosiy maslahatlashuvlar 1999-yildan buyon tashkillashtirilmaganligi va ushbu shakldagi aloqalarni o‘tkazish amaliyotini qayta yo‘lga qo‘yishdan tomonlar manfaatdor ekanligi qayd etildi.

Uchrashuvda Savdo-iqtisodiy hamkorlik bo‘yicha hukumatlararo komissiya kabi samarali institutlarni yaratish va ularning muntazam faoliyatini boshlash to‘g‘risida takliflar bildirildi.

O‘zbekistonda diplomatik missiyasi yakunlanayotganligi munosabati bilan Elchiga ikki mamlakat o‘rtasidagi munosabatlarni mustahkamlanishiga qo‘shgan konstruktiv hissasi uchun minnatdorchilik bildirildi.

(Manba: O‘zbekiston Respublikasi TIV veb-sahifasi)

jamiyat

O‘zbekiston aholisi 32,9 milliondan oshdi

Birinchi yarim yillikda O‘zbekiston aholisi 243,4 ming kishiga (0,7 foiz) oshib, 32,9 millionga yetdi.

O‘zbekiston doimiy aholisi soni 1 iyul holatiga 32,9 million kishini tashkil etib, yanvar-iyun oylarida 243,4 ming kishiga yoki 0,7%ga o‘sgan. Bu haqda Davlat statistika qo‘mitasi xabar qildi.

Shahar aholisi soni 16 million 646,1 ming kishini (jami aholi sonidagi ulushi 50,6%), qishloq aholisi soni 16 million 254 ming kishini (49,4%) tashkil etdi.

1 iyul holatiga eng ko‘p aholi soni Samarqand viloyatida — 3 million 753,3 ming kishini (respublika aholisi sonidagi ulushi 11,4%ni) va Farg‘ona viloyatida 3 million 644,9 ming kishini (11,1%), aksincha eng kam aholi soni Navoiy viloyatida 964,7 ming kishi (2,9%) va Sirdaryo viloyatida 821,9 ming kishini (2,5%) tashkil etdi.

Hududlar kesimida aholining eng yuqori o‘sish sur’ati 2017 yilning mos davriga nisbatan Surxondaryo viloyatida 2,1 foizni, Qashqadaryo va Samarqand viloyatlarida 2,0%ni, Jizzax viloyatida 1,9%ni, Namangan viloyatida 1,8%ni, aksincha eng kam o‘sish sur’ati Qoraqalpog‘iston Respublikasida 1,4%ni va Toshkent viloyatida 1,2%ni tashkil etdi.

Tug‘ilish va o‘lim

2018 yilning yanvar-iyun oylarida 324,3 mingta bola tug‘ilganligi qayd etilgan bo‘lib (bu yerda va bundan keyin tug‘ilganlarga faqat tirik tug‘ilganlar inobatga olingan), mos ravishda 1000 aholiga nisbatan tug‘ilish koeffitsiyenti 20 promilleni tashkil etib, 2017 yilning mos davriga nisbatan 0,5 promillega oshgan (2017 yilning yanvar-iyun oylarida 19,5 promille bo‘lgan).

Tug‘ilish koeffitsiyenti 2017 yilning mos davriga nisbatan Samarqand (21,0 promilledan 22,9 promillega) va Qashqadaryo (21,4 promilledan 22,4 promillega) viloyatlarida sezilarli o‘sgan bo‘lib, aksincha sezilarli kamayish Navoiy (19,8 promilledan 19,1 promillega) va Xorazm (16,7 promilledan 16,2 promillega) viloyatlarida kuzatildi. Jami tug‘ilganlarning 31,6%i onaning 1-farzandi, 36,6%i onaning 2-farzandi va 31,8%i onaning 3-va undan yuqori farzandlariga to‘g‘ri kelmoqda.

Jami 324,3 ming nafar bola tug‘ilgani qayd etilgan bo‘lib, shundan onasining yoshi bo‘yicha tug‘ilganlarning 120,6 ming nafari (jami tug‘ilganlarga nisbatan 37,2%) 20−24 yoshlardagi ayollar, 115,8 ming nafari (35,7%) 25−29 yoshlardagi ayollar, 58,5 ming nafari (18,0%) 30−34 yoshlardagi ayollar hissasiga to‘g‘ri kelgan.

Yanvar-iyun oylarida 75,6 mingta o‘lim qayd etilgan bo‘lib, mos ravishda 1000 aholiga nisbatan o‘lim koeffitsiyenti 4,7 promilleni tashkil etdi, 2017 yilning mos davriga nisbatan 0,2 promillega kamaydi (2017 yilning yanvar-iyun oylarida 4,9 promille bo‘lgan).

O‘lim koeffitsiyenti 2017 yilning mos davriga nisbatan birgina Toshkent viloyatida (5,7 promilledan 5,8 promillega) o‘sgan bo‘lib, sezilarli darajada kamayishi Navoiy (4,7 promilledan 4,2 promillega) Farg‘ona (5,0 promilledan 4,5 promillega), Xorazm (4,6 promilledan 4,1 promillega) Namangan (4,8 promilledan 4,4 promillega) va Andijon (5,5 promilledan 5,1 promillega) viloyatlarida kuzatildi. Jami vafot etganlarning 7,3%i mehnatga layoqatli yoshdan kichik yoshdagilarga (2017 yilda 7,8%), 26,7%i mehnatga layoqatli yoshdagilarga (2017 yilda 26,7%) va 66,0%i mehnatga layoqatli yoshdan katta yoshdagilar (2017 yilda 65,5%) hissasiga to‘g‘ri keldi. 2018 yilning yanvar-iyun oylarida vafot etganlar soni 2017 yilning mos davriga nisbatan 3,1 ming kishiga kamaydi.

Qayd etilgan vafot etganlarning 61,3%i qon aylanish tizimi kasalliklaridan, 9,3%i o‘simtalardan, 5,6%i baxtsiz hodisa, zaharlanish va jarohatlanishlardan, 5,5%i ovqat hazm qilish a’zolari kasalliklaridan, 4,3%i nafas olish a’zolari kasalliklaridan, 1,5%i yuqumli va parazitar kasalliklardan hamda 12,5%i boshqa kasalliklardan vafot etgan.

Ro‘yxatga olingan 1 yoshgacha vafot etgan bolalar soni 3,5 ming nafarni tashkil etib, ularning 59,6%i perinatal davrda yuzaga keladigan holatlardan, 16,8%i nafas olish a’zolari kasalliklaridan, 12,9%i tug‘ma anomaliyalardan, 2,2%i baxtsiz hodisa, zaharlanish va jarohatlanishlardan, 2,0%i yuqumli va parazitar kasalliklardan, 0,8%i ovqat hazm qilish a’zolari kasalliklaridan va 5,7%i boshqa kasalliklardan vafot etgan.

Nikoh va ajrimlar

Yanvar-iyun oylarida FHDYO organlari tomonidan 104,9 ming nikoh qayd etildi, mos ravishda 1000 aholiga nisbatan nikoh tuzish koeffitsiyenti 6,5 promilleni tashkil etdi. Tuzilgan nikohlar soni 2017 yilning mos davriga nisbatan yuqori o‘sish sur’atlari Sirdaryo (122,4%), Jizzax (121,7%), Andijon (118,0%), Farg‘ona (114,9%) va Toshkent (114,8%) viloyatlariga to‘g‘ri kelmoqda.

FHDYO organlari tomonidan 16,4 mingta nikohdan ajralishlar qayd etilgan bo‘lib, mos ravishda 1000 aholiga nisbatan nikoh tuzish koeffitsiyenti 1 promilleni tashkil etdi. Ajrimlar soni 2017 yilning mos davriga nisbatan yuqori o‘sish sur’atlari Surxondaryo (126,7%), Andijon (120,8%), Sirdaryo (112,7%), viloyatlariga va Toshkent shahriga (114,5%) to‘g‘ri kelmoqda. 2017 yilning mos davriga nisbatan sezilarli kamayish Xorazm (30,9%) va Navoiy (10,1%) viloyatlarida kuzatildi.

Migratsiya

Yanvar-iyun oylarida respublika bo‘yicha ko‘chib kelganlar soni 83,3 ming kishini (82 ming kishi respublika hududlaridan, 1,3 ming kishi xorijiy mamlakatlardan), ko‘chib ketganlar soni esa 88,6 ming kishini (82 ming kishi respublika hududlariga, 6,6 ming kishi xorijiy mamlakatlarga) tashkil etdi.

Migratsiya saldosi minus 5,3 ming kishi bo‘lib, 2017 yilning mos davrida minus 9,6 ming kishi bo‘lgan. Migratsiya saldosining yuqori darajasi Toshkent viloyatida (minus 2,6 ming kishi), Qashqadaryo viloyatida (minus 2,1 ming kishi), Qoraqalpog‘iston Respublikasida (minus 1,7 ming kishi) qayd etildi.

Migratsiya saldosining yuqori darajasi Toshkent (minus 2600 kishi) va Qashqadaryo viloyati (minus 2100), shuningdek Qoraqalpog‘istonga (minus 1700) to‘g‘ri kelgan.

(Manba: Gazeta.uz)

Humo qushi yuksak parvozga shaylanmoqda

Tug‘rolarida sher, burgut va boshqa ramzlar aks etgan davlatlarning yutuqlari xususidagi yangiliklar jahon ommaviy axborot vositalarida daryodek oqib turgani hech kimga sir emas. Endi ular qatoriga tug‘rosida Humo qushi ifodasini topgan qadimiy, shu bilan birga, navqiron, orzulari ulkan davlat ham qo‘shildi.

Eynshteyn nazariyasiga ko‘ra, vaqtning tezligi hamma joydayam bir xil emas. Bu fikrga qo‘shilish ham, inkor etish ham mumkin. Lekin foydali ish bilan band bo‘lsang, vaqt qanday o‘tishi, aksincha, behuda sarflangan daqiqalar benihoya cho‘zilishi bor gap.

Aynan shundan kelib chiqib mulohaza yuritsak, 2018 yilning birinchi yarmi mamlakatimiz uchun qanday kechdi, islohotlar yo‘lida nimalarga ulgurdik, vaqtdan yutdikmi?

Bu savollarga javob topish uchun gazeta sahifalarini varaqlash yoki internet olami bo‘ylab kezish shart emas. Biri ikkinchisidan muhim voqea-hodisalar shundoqqina ko‘z o‘ngimizda yuz berdi. Yanvardan iyulgacha bo‘lgan oraliq juda tig‘iz o‘tdi. Ko‘rilgan tadbirlar mantiqiy uzviylik kasb etib, har qaysi qadam o‘lchangan, puxta o‘ylanganligi bilan ajralib turdi. Va albatta, eng e’tiborni tortadigan voqealar O‘zbekistonning tashqi siyosati bilan bog‘liq ravishda sodir bo‘ldi.

Himoyadan — hujumga

Yutuqlar ham, kamchiliklar ham tashqaridan nigoh tashlaganda aniqroq ko‘rinadi. Shu bois, O‘zbekistondagi o‘zgarishlar mintaqamiz va butun dunyo ahlining nazariga tushgani bejiz emas.

Turkiyaning yetakchi iqtisodiy nashrlaridan biri — “Derin Ekonomi” jurnali sharhlovchilari tashqi siyosatimiz taqvimini diqqat bilan kuzatib kelishadi. Ular joriy yil boshida O‘zbekiston Prezidenti Shavkat Mirziyoyevni o‘z mamlakati va mintaqasidagi vaziyatlar o‘zgarishiga sezilarli ta’sir ko‘rsatishga qodir bo‘lgan jahonning o‘n nafar yetakchisi ro‘yxatiga kiritdilar. Mazkur ro‘yxatdan muhim ahamiyatga molik qarorlari bilan mavjud vaziyatni o‘zgartirib yuboradigan, bu bilan xalqaro maydondagi vaziyatga faol ta’sir ko‘rsatadigan hamda jahon ommaviy axborot vositalarining “nyusmeykeri” hisoblanadigan yetakchilar nomlari joy oldi.

Mutaxassislarning ta’kidlashicha, O‘zbekiston rahbari mamlakatni liberallashtirish, huquq-tartibot idoralari faoliyatini tartibga solish, diniy e’tiqod erkinligini ta’minlashga qaratilgan chuqur islohotlarni hayotga tatbiq etmoqda. Yangi rahbariyat tomonidan mamlakatni amalda erkin bozor sari harakatlantirish, tashqi savdo hamda valyuta siyosatini liberallashtirishga yo‘naltirilgan o‘ta muhim qarorlar qabul qilingani respublikaning xorijlik sarmoyadorlar uchun jozibadorligini oshirdi.

Prezident Shavkat Mirziyoyevning muhim, e’tiborga munosib qadamlaridan biri boshqa davlatlar, avvalambor, qo‘shni mamlakatlar bilan o‘zaro munosabatlarni tubdan yaxshilash yo‘lini tutganida namoyon bo‘ldi.

Futbol bo‘yicha jahon chempionati davom etayotgan shu kunlarda AQSH Tashqi siyosat kengashi huzuridagi Markaziy Osiyo va Kavkaz instituti direktori Svante Kornell O‘zbekistonning tashqi siyosiy kursi o‘zgarishlariga nisbatan juda o‘rinli, o‘ta aniq tashbehni keltirdi. “Agar futbol atamalari bilan o‘xshatish qiladigan bo‘lsak, ilgari O‘zbekiston himoya usulini qo‘llab kelardi. Lekin Prezident Mirziyoyev rahbarligida uni hujum usuliga almashtirdi”, dedi Kornell.

Bu tanlov mutlaqo boshqalarga qarshi qaratilgan emas. Ekspert fikricha, u Markaziy Osiyodagi barcha mamlakatlar, Afg‘oniston, o‘arbdagi sheriklar hamda boshqa davlatlarning manfaatiga mos va deyarli hamohangdir. Shu bilan birga, O‘zbekiston so‘nggi yillardagi erishgan yutuqlaridan kelib chiqib, faol pozitsiyani egallayapti.

Shubhasiz, e’tirof o‘z-o‘zidan yuz beradigan harakatlarning emas, balki pishiq-puxta maqsadga yo‘naltirilgan pragmatik tadbirlarning natijasidir. Mamlakatimiz rahbari tashqi siyosatning mazmunini boyitish, samaradorligini oshirish vazifasini, avvalo, Oliy Majlisga Murojaatnomasida, so‘ng joriy yilning yanvar oyida bo‘lib o‘tgan Tashqi ishlar vazirligi, mamlakatimizning xorijiy davlatlardagi elchixonalari faoliyatiga bag‘ishlangan yig‘ilishda ilgari surdi. Ayni shu yerda hamkorlikni rivojlantirish bo‘yicha “yo‘l xaritalari” taklif etildi, keyinroq Tashqi ishlar vazirligi tizimini tubdan takomillashtirish to‘g‘risidagi Farmonda barcha vazifalar o‘z ifodasini topdi.

“Avval” va “endi” o‘rtasidagi farq

Dunyo mamlakatlari bilan munosabatda hamkorlikni jadallashtirish uchun jiddiy sa’y-harakatlar amalga oshirildi. Agar raqamlar kesimida aytadigan bo‘lsak, O‘zbekistonning faol, chuqur o‘ylangan ochiq tashqi siyosati quyidagilarda yaqqol ko‘rinadi: yanvardan iyungacha yettita oliy darajadagi tashriflar almashinuvi, 20 dan ortiq davlat va xalqaro tuzilmalarning rahbarlari bilan uchrashuv va muzokaralar o‘tkazildi, 89 ta xalqaro shartnoma va bitim imzolandi. Tashqi ishlar vaziri yaqinda parlament yuqori palatasining yalpi majlisida keltirib o‘tganidek, hukumatlar, vazirliklar, idoralar rahbarlari darajasida 120 ta tashrif uyushtirildi, hukumatlararo qo‘shma komissiyalarning 10 ta yig‘ilishi, 6 marta tashqi ishlar vazirliklarining maslahatlashuvi hamda 2 marta xavfsizlik masalalari bo‘yicha maslahatlashuv bo‘lib o‘tdi. Shuningdek, 656 ta ko‘rgazma, anjuman, taqdimotlar, 30 dan ziyod biznes-forumlar o‘tkazildi. Respublikamizga ishbilarmon va tadbirkorlarning 572 ta delegatsiyasi tashrif buyurdi.

Tor fikrlovchi kishi: xo‘sh, bu uchrashuvlar nima beradi, ular avval bo‘lmaganmi? — deb o‘ylashi mumkin. To‘g‘ri, bo‘lgan. Ammo “avval” va “endi” so‘zlarining o‘rtasida katta farq bor.

Yanvardagi yig‘ilishda davlatimiz rahbari har kim o‘z faoliyatining real natijalarini ko‘rsatishi bo‘yicha topshiriq berdi. Endi elchilar ishida investitsiya jalb qilish va sayyohlar oqimini ko‘paytirish asosiy mezonlar bo‘lib hisoblanadi. Xorijdagi vakolatxonalarimiz, elchixonalarda savdo va investitsiya bo‘yicha diplomat xodimlar shtatini kiritish, kengaytirish haqidagi tashabbus mamlakat iqtisodiyotiga to‘g‘ridan-to‘g‘ri foyda keltirishga qaratilgan. Bundan tashqari, har qaysi elchixonaga viloyatlar, iqtisodiyot tarmoqlari, yirik korxonalarni biriktirishga qaror qilindi.

Mamlakatimizning tashqi siyosiy va tashqi iqtisodiy faoliyati yo‘nalishlarini bir maqsad va strategiya atrofida birlashtirish orqali 17 milliard AQSH dollarilik 182 ta loyihani amalga oshirish bo‘yicha dastlabki kelishuvlarga erishildi.

Investorlar O‘zbekistonda katta imkoniyatlarni ko‘rdilar. To‘g‘ri, mamlakatimiz ilgari ham jug‘rofiy joylashuvi, infratuzilmasi, qazilma boyliklari, mehnat resurslari bilan boshqalarni o‘ziga jalb qilib kelgan. Lekin muammo ko‘pincha davlat amaldorlarining sustkashligi va turli to‘siqlar bilan bog‘liq bo‘lib, mavjud afzalliklardan yetarlicha foydalanilmagan. Xususan, foydani valyutaga konvertatsiya qilish deyarli mumkin bo‘lmagan davlatda biznes yuritishdan ma’ni bormidi o‘zi? Hattoki, kelib, vaziyatni o‘rganish uchun ham elchixonaga bir necha bor “ta’zim qilish”, so‘ng asablar qaqshab vizani kutishga to‘g‘ri kelar edi.

Ko‘rilayotgan tadbirlarning mantiqiy uzviyligi katta ahamiyat kasb etayotgani, ya’ni bir ijobiy yechim keyingisiga yo‘l ochayotgani haqida yuqorida ham aytib o‘tgan edik. Bu yerda ham shunday bo‘ldi. Konvertatsiyaning izga tushishi fevral oyida yana bir muhim qarorni qabul qilishga zamin yaratdi, ya’ni viza bekor qilindi yoki uni olish soddalashtirildi. Bu yangilik 40 dan ortiq davlatlarda ulkan rezonans keltirib chiqardi. Uni nafaqat OAVda qizg‘in muhokama qilishdi, balki yuqori darajadagi rahbarlar ham sharhlay boshlashdi. Chunonchi, erta bahorda O‘zbekistonga tashrif buyurgan Rejeb Tayyip Erdo‘g‘on Turkiya fuqarolari uchun 30 kungacha muddatga vizasiz tartib o‘rnatilganini yuksak baholadi, buning uchun Shavkat Mirziyoyevga samimiy minnatdorlik bildirdi.

Boshqa qit’alar vakillari-chi? Ular ham sayyohlarning ortiqcha qog‘ozbozlikdan xalos bo‘lganini olqishladilar. TIV xabariga ko‘ra, qator davlatlar uchun vizasiz tartib o‘rnatilgani va uni olish soddalashtirilgani O‘zbekistonga keladigan sayyohlar oqimini ikki baravarga ko‘paytirdi. Besh oy ichida mamlakatimizga 2,2 million nafardan ziyod chet el fuqarolari tashrif buyurdi. Shunday qilib, o‘tgan yilning shu davridagiga nisbatan o‘sish 93 foizni tashkil etdi. Kelgusida bundan ham yuqori bo‘lishi kutilmoqda. Negaki, kuni kecha Prezidentimizning yana bir qarori e’lon qilindi. Unga ko‘ra, joriy yil 15 iyuldan boshlab viza rasmiylashtirish uchun O‘zbekiston Respublikasining xorijdagi diplomatik vakolatxonalari, konsullik idoralariga majburiy murojaat etishlar bekor qilindi, kirish vizasini olish muddatlari qisqartirildi, eng ahamiyatlisi, endilikda elektron kirish vizalarini rasmiylashtirish va berish uchun “E-VISA.UZ” tizimi joriy etiladi.

Biz va dunyo

Yangi davrning yana bir yoqimli jihati — xorijda O‘zbekiston to‘g‘risida ko‘proq yoza boshlashdi. Media-makon auditoriyasi mamlakatimiz haqida batafsil ma’lumot olishga kirishdi. Bu juda muhim. Mayli, ko‘pmi-ozmi, har ikkinchi, beshinchi, o‘ninchi, hatto yigirmanchi kishi Buyuk Ipak yo‘lida joylashgan yurt haqida biror yangilik bilan tanishar ekan, uni kelib ko‘rishni, albatta, xohlab qoladi, shu yerda ish yuritish imkoniyatlarini chamalab ko‘radi.

Binobarin, turli ko‘rinishda berilgan axborot o‘quvchilarda tasavvur va tegishli xulosalarni hosil qiladi. Ularga tajribani ham qo‘shsak, har bir mamlakat uchun juda qimmatli hisoblanuvchi “obro‘” degan tushuncha, zamonaviyroq qilib aytsak, “jozibador imidj” shakllanadi.

Ko‘pgina xorij nashrlarida yurtimizga nisbatan tez-tez ishlatilayotgan bir jumlani kuzatish mumkin. Londonda chiqadigan “Foreign Direct Investment Magazine” xalqaro biznes-jurnalining bosh muharriri Kortni Fingar bu fikrni o‘z maqolasining sarlavhasiga chiqardi — uni “O‘zbekistonda burilish” deb atadi.

“fDi Magazine” bosh muharriri O‘zbekistonda ro‘y berayotgan o‘zgarishlarni Shavkat Mirziyoyevning faoliyati bilan bog‘laydi va qabul qilingan Harakatlar strategiyasida boshqa yo‘nalishlar qatori iqtisodiyotni erkinlashtirish hamda investitsiyaviy muhitni yaxshilash bo‘yicha vazifalar ham aks etganini ta’kidlaydi. Amalga oshirilgan sa’y-harakatlar tufayli mamlakatimiz Jahon bankining “Doing Business-2018” hisobotida ilg‘or o‘ntalikka kiritildi. Muallifning sanab o‘tishicha, o‘tgan davr mobaynida davlatimiz rahbari 118 ta Farmon qabul qilgan bo‘lib, uning 54 tasi iqtisodiyotni rivojlantirish va erkinlashtirish, 22 tasi esa sud-huquq tizimini isloh qilish bilan bog‘liq. Shuningdek, 29 ta yangi qonun qabul qilingan va ularning 19 tasi shu yo‘nalishlarga tegishli. Maqolada qayd etiladiki, O‘zbekiston Prezidenti iqtisodiy islohotlarni ro‘yobga chiqarishga jiddiy kirishgan va bugungi kunda ular jadal sur’at bilan davom ettirilyapti.

Bunday siyosat nafaqat obro‘li invest-jurnal vakilining e’tiborini tortdi. Dunyo sari ochilayotgan mamlakatimiz global moliyaviy sektorni ham qiziqtiryapti.

Yevrosiyo taraqqiyot banki xalqaro banklarining investitsiyaviy faoliyati sharhiga ko‘ra, yilning birinchi choragida shu kabi kredit tashkilotlari tomonidan amalga oshirilgan moliyalashtirishning eng ko‘p hajmi MDH mamlakatlari orasida O‘zbekistonga to‘g‘ri kelgan. Ya’ni mamlakatimiz 841 million dollar mablag‘ni jalb qilgan, bu esa Hamdo‘stlik davlatlariga berilgan mablag‘lar umumiy hajmining 78 foizini tashkil etadi. Ko‘rinib turibdiki, ishbilarmonlik olamida hamyonning hajmi mamlakatning ochiqligi, obro‘si va imidji, u haqdagi ma’lumotning ko‘pligi bilan bog‘liq.

Tarixni kim yozadi?

Eng yangi tarix ayni shu kunlarda yozilyapti. Shubha yo‘qki, kelajakda bu bo‘yicha tayyorlanadigan darsliklar ancha qalin kitoblarga aylanadi. Ularga, juda qisqa davr — bir necha oy davomida o‘tkazilgan uchrashuvlar, ilgari surilgan tashabbuslar kiritiladiki, u tarixning eng yorqin lavhalari bo‘lib qolajak.

Shavkat Mirziyoyevning Tojikistonga amalga oshirgan davlat tashrifining o‘ziyoq alohida bir bobga arzigulik. Eslang, Dushanbeda yomg‘ir yog‘ib turishiga qaramay, aziz mehmonni kutib olish uchun o‘n minglab odamlar ko‘chaga chiqdi. Samimiy tabassum, bir-birini sog‘inib qolgan qo‘shnilarning astoydil shodligi hukmron bo‘ldi o‘sha onlarda. Ikki tomonlama muzokaralar oddiy xalqqa 30 kungacha vizasiz bordi-keldi imkoniyatini berdi, qarindosh-urug‘ va do‘stlarni birlashtirdi. O‘tish punktlari ochildi. Shuningdek, Turkmaniston Prezidentining O‘zbekistonga davlat tashrifi, Markaziy Osiyo davlat rahbarlarining Prezidentimiz tashabbusi bilan Ostonada o‘tkazilgan birinchi maslahat kengashi kabi tadbirlar ham mintaqaviy hamkorlikda yangi qirralarni ochdi. Kuni kecha 20 yillik to‘yini keng nishonlagan ushbu shaharda do‘stlik rishtalari bilan bog‘langan qo‘shni mamlakatlari o‘rtasida yana samimiy muloqotlar bo‘lib o‘tdi.

Davlatimiz rahbarining Amerika Qo‘shma Shtatlariga rasmiy tashrifi strategik sheriklikning yangi davriga asos soldi. Mezbon davlat ma’muriyati o‘zbek yetakchisining tashrifini tarixiy deb atadi. Donald Tramp yuqori martabali mehmonni: “Siz bilan Oq uyda uchrashish biz uchun sharaf”, degan so‘zlar bilan kutib oldi. U O‘zbekiston AQSH uchun muhim davlat va strategik sherik bo‘lib qolishini, respublikamizning mintaqadagi mavqei ortib borayotganini qayd etdi. AQSH Prezidentining so‘zlariga qaraganda, O‘zbekistondagi Prezidentlik saylovidan keyin mamlakatlarning o‘zaro munosabatlari yangi bosqichga chiqdi.

Birgalikda qabul qilingan hujjatlar o‘ta salmoqli, u 4,8 milliard dollarlik 20 dan ortiq shartnomalarni o‘z ichiga oladi. Bu faqat boshlanishi. Mamlakatimiz bilan hamkorlik masalasiga e’tiborning yanada kuchayganidan yaqindagina xabar qilingan yangilik ham dalolat beradi. Ya’ni AQSHning O‘zbekistondagi yangi elchisi vazifasiga Daniyel Rozenblyumning nomzodi tavsiya etildi. U ayni paytgacha AQSH Davlat kotibining Janubiy va Markaziy Osiyo ishlari bo‘yicha yordamchisi o‘rinbosari lavozimida ishlagan, demak, mintaqada munosabatlarni rivojlantirishga mas’ul bo‘lgan, katta tajriba orttirgan.

Davlatimizdagi missiyasini yakunlayotgan elchi Pamela Spratlen xonim aytishicha, uch yil avval bir mamlakatga kelgan bo‘lsa, bugun butunlay boshqacha O‘zbekistondan jo‘nab ketyapti. Chindan ham, mamlakat ichkarisidagi islohotlar bilan bir qatorda, yurtimizning ovozi tashqi dunyoda baland va dadil jaranglamoqda.

Jahonda akssado bergan muhim siyosiy tadbirlardan yana bittasi — Afg‘oniston bo‘yicha o‘tkazilgan yuqori darajadagi Toshkent konferensiyasidir. Bu voqeaga Birlashgan Millatlar Tashkiloti ham qiziqish bildirdi. Bosh kotib Antoniu Guterrish anjuman ishtirokchilariga videomurojaat yo‘llab, unda konferensiyaning Afg‘onistonda tinchlik o‘rnatilishidagi alohida ahamiyatini ta’kidladi. Rossiya tashqi ishlar vaziri Sergey Lavrov Toshkent konferensiyasini o‘z vaqtida amalga oshirilgan hamda muhim siyosiy jarayon, deb atadi. Mazkur nufuzli forum yakunida deklaratsiya qabul qilindiki, u xorijiy davlatlar bilan maslahatlashuvlar, “Tolibon” harakati vakillari bilan ishchi uchrashuvlar o‘tkazish uchun asos bo‘lmoqda.

O‘zbekiston yetakchisining yana ikkita tashabbusi munosib qarshi olindi. Sindao shahridagi sammitda ilgari surilgan SHHT davlat rahbarlarining Yoshlarga qo‘shma murojaatini qabul qilish hamda BMT Bosh Assambleyasining “Ma’rifat va diniy bag‘rikenglik” rezolyutsiyasini ishlab chiqish haqidagi takliflar hamma ishtirokchi davlatlar tomonidan qo‘llab-quvvatlandi. Oradan ikki hafta o‘tmayoq, BMT Bosh Assambleyasi “Markaziy Osiyo mintaqasida tinchlik, barqarorlik va taraqqiyotni ta’minlash bo‘yicha mintaqaviy va xalqaro hamkorlikni mustahkamlash” rezolyutsiyasini bir ovozdan qabul qildi. O‘zbekiston Prezidentining g‘oyasi dunyoning to‘rtta qit’asida joylashgan 55 ta mamlakat bilan hammualliflikda ro‘yobga chiqarildi. Ekspertlar hamjamiyati bu hodisani muhokama qilar ekan, bizning mintaqamizni gullab-yashnayotgan, o‘zaro bog‘langan siyosiy makon, deya baholamoqdalar.

Tahlilchilar fikricha, mintaqada har tomonlama hamkorlikni mustahkamlash bo‘yicha mamlakatimiz takliflarining so‘zsiz qo‘llab-quvvatlanishi bu jarayonni butun dunyo hamjamiyati ham olqishlayotganidir, deb hisoblash mumkin. Demak, ushbu jarayonlar bayroqdori O‘zbekiston — eng to‘g‘ri yo‘l bilan shiddatli qadamlar tashlab oldinga harakatlanmoqda.

Mushohadalarimiz debochasida davlatimiz tug‘rosidagi Humo qushi parvoziga to‘xtalib o‘tgan edik.

Humo — ezgulik, yaxshilik, bunyodkorlik, poklik, halollik, adolat, mehru oqibat, rahm-shafqat, umid va orzularning abadiyatga daxldor timsolidir. U yuksak parvozini boshladi. Buni esa butun dunyo ko‘rmoqda, kuzatmoqda. Jo‘shqin voqelikning mazmun-mohiyati aynan ana shunda.

(Manba: Xalq so‘zi” gazetasi)

O‘zbekiston turizm o‘lkasi

Jizzaxda turizm qachon rivojlanadi?

Nurota tog‘lari etagida joylashgan Uxum qishlog‘i betakror tabiati bilan har qanday odamni o‘ziga maftun etadi. Ayniqsa, bu tomonlarga birinchi bor kelgan kishi atrofdagi biologik xilma-xillikdan ko‘zini uzolmay qoladi.

Ana shu tabiiy imkoniyatlardan foydalangan Narzullo Musayev 2016-yilda ikki xonadan iborat uy-mehmonxona tashkil etib, sayyohlarga xizmat ko‘rsatishni yo‘lga qo‘ygan edi. Natija yomon bo‘lmadi. Daromadini biznes rivojiga sarflab, 60 o‘rinli yana 3 ta uy-mehmonxona qurdi.

Hozir Narzullo Musayevning “NURATAU-HIKING” oilaviy korxonasida 4 kishi doimiy ish bilan ta’minlangan. Hududga mehmonlar oqimi kelishi ortgan mavsumda qo‘ni-qo‘shni va qarindoshlar xizmatidan ham foydalaniladi. Bu mavsumda qo‘shimcha ish o‘rni yaratiladi, deganidir.

– O‘tgan yili 700 ga yaqin sayyohga xizmat ko‘rsatdik, – deydi tadbirkor. – Mehmonlar dunyoning turli davlatlaridan keladi, lekin ular orasida fransiyaliklarning salmog‘i ko‘proq. Sayyohlarni nafaqat tabiat, balki xalqimizning urf-odat va an’analari, turmush tarzi ham qiziqtiradi. Shuning uchun mehmonxonamizning jihozlanishi, taom tayyorlash, xizmat ko‘rsatishda sayyohlarga milliyligimizni namoyish etishga alohida e’tibor qaratamiz.

Jizzax shahridan 150, Forish tumani markazidan 50 kilometr uzoqda joylashgan qishloqqa Yevropadan, xususan, Fransiyadan sayyoh jalb qilish oson emas. Mehmonlarning maroqli va mazmunli dam olishi uchun yaxshi sharoit, sifatli xizmat ko‘rsatish to‘g‘ri yo‘lga qo‘yilgani tadbirkorning galdagi rejalari yuqori bo‘lishini ta’minlamoqda.

Tadbirkor erishilayotgan natijalar bilan qanoatlanib qolayotgani yo‘q. Bankdan kredit olib, faoliyatini yana kengaytirish niyatida. Yana bir jihati, turizm yo‘nalishida e’lon qilinayotgan yangi-yangi qo‘llanmalar bilan doimiy tanishib boradi. Ingliz va rus tillarida bemalol so‘zlasha olsa-da, o‘z ustida ishlashni kanda qilmaydi. Farzandlarining, mehmonxonada ishlayotgan xodimlarning ham til o‘rganishini rag‘batlantirib boradi.

Forish tumanining chekka qishlog‘ida ekoturizmni rivojlantirish bo‘yicha amalga oshirilayotgan ishlar viloyatda ushbu sohaning imkoniyatlari katta ekanini ko‘rsatib turibdi.

O‘zbekiston Respublikasi Vazirlar Mahkamasining 2017-yil 17-maydagi “2017-2019-yillarda Jizzax viloyatining turizm salohiyatini jadal rivojlantirish chora-tadbirlari” dasturida viloyatda turizmni rivojlantirishga qaratilgan 48 loyihani amalga oshirish belgilangan. Biroq, hozirgi kungacha ularning 22 tasi amalga oshirilganini yetarli, deb bo‘lmaydi.

Ayniqsa, viloyatning markaziy qismida, xalqaro avtomagistral yaqinida sayyohlik infratuzilmasini barpo etish borasida olib borilayotgan ishlar talab darajasida emas. Masalan, Samarqand, Buxoro, Xorazm, Nukus shaharlari, umuman, yurtimizning janubiy hududlariga o‘tayotgan sayyohlar yo‘lidagi muhim bekat –Ilono‘tti darasidagi Amir Temur darvozasi, Temur g‘ori atrofini obodonlashtirish ishlari paysalga solib kelinmoqda.

Hududda tadbirkor Nulufar Abduraimova tomonidan qurilayotgan mehmonxona va dam olish maskani majmuasida ish sust borayotir. Umumiy qiymati 1 milliard 700 million so‘mlik bo‘lgan ishning 1 milliard so‘mlik qismini tadbirkor o‘z hisobidan bajardi (O‘R MB kursi 11.07.2018 da, 1$= 7813.42 so‘m). Loyihani to‘liq ishga tushirish uchun ko‘zda tutilgan 700 million so‘m bank krediti esa hamon ajratilgani yo‘q.

Eng ko‘p sayyohlik hududi bo‘lgan Zomin tumanining Hulkar qishlog‘ida “Sehrli qarmoq” sayyohlik zonasini barpo etish loyihasini amalga oshirishda ham shunday sustkashlikni ko‘rish mumkin. Tadbirkorda tegishli hujjatlar, yetarli mablag‘ bo‘lishiga qaramay, inshootni qurish uchun yer uchastkasi ajratish paysalga solinmoqda.

Bu sustkashlik faqat ushbu turistik inshootlargagina xos emas. Birgina Zomin tumanining o‘zida turli bahonalar bilan 8 turistik loyihani amalga oshirish boshlanmay turibdi.

– Haqiqatan ham, hududimizdagi turistik imkoniyatdan to‘liq foydalanilyapti, deb bo‘lmaydi, – deydi O‘zbekiston Respublikasi Turizmni rivojlantirish davlat qo‘mitasi Jizzax viloyati hududiy boshqarmasi boshlig‘i vazifasini bajaruvchi S.Qoraboyev. – Turistik manzillarning bir-biridan uzoqligi, yo‘llarning talab darajasida emasligi, telefon, internet, kommunikatsiya tizimlaridagi kamchiliklarni bunga sabab qilib keltirish mumkin. Sohada tadbirkorlikni qo‘llab-quvvatlash borasidagi e’tiborsizlik ham jiddiy sabablardan biri. Ayni paytda bu kamchiliklarni tezroq bartaraf etish bo‘yicha mahalliy hokimliklar bilan birgalikda zarur chora-tadbirlar ko‘rilmoqda.

Endigina tashkil etilgan turizmni rivojlantirish viloyat hududiy boshqarmasi barcha muammoni hal etishga qodir emasligi ma’lum. Hududdagi turizmning bugungi ahvoli esa, sohada tezroq tub burilish yasashni taqozo etmoqda. Tub burilish qilish uchun shahar, tuman hokimlari, hududiy sektor rahbarlari turizmga munosabatni, turizmni rivojlantirishga qarashlarini ham tubdan o‘zgartirishi kerak.

(Manba: O‘zA)

ilova

“Buxoro-Agro” erkin iqtisodiy zonasini tashkil etish chora-tadbirlari to‘g‘risida

O‘zbekiston Respublikasi Prezidentining qarori

Tashqi bozorlarda talab katta bo‘lgan, yuqori qo‘shilgan qiymatli raqobatbardosh mahsulotlar yetishtirishni ta’minlaydigan zamonaviy issiqxona xo‘jaliklarini tashkil etishga xorijiy va mahalliy investitsiyalarni jalb etish uchun qulay sharoitlarni shakllantirish, shuningdek, Buxoro viloyatining ishlab chiqarish hamda resurs salohiyatidan kompleks va samarali foydalanish, shu asosda yangi ish o‘rinlari tashkil etish hamda aholi daromadlarini oshirish maqsadida:

1. Buxoro viloyati hokimligi, O‘zbekiston Respublikasi Qishloq xo‘jaligi vazirligi, Iqtisodiyot vazirligi, Moliya vazirligi, Investitsiyalar bo‘yicha davlat qo‘mitasi, “O‘zbekoziqovqatxolding” XKning Buxoro viloyatida “Buxoro-agro” erkin iqtisodiy zonasini (keyingi o‘rinlarda “Buxoro-agro” EIZ deb yuritiladi) 1-ilovaga muvofiq hududlar chegaralari doirasida tashkil etish to‘g‘risidagi taklifi qabul qilinsin.

2. Buxoro viloyati hokimligi:

O‘zbekiston Respublikasi Yer resurslari, geodeziya, kartografiya va davlat kadastri davlat qo‘mitasi bilan birgalikda bir oy muddatda “Buxoro-agro” EIZ tarkibiga kiritiladigan yer maydonlarining chegaralari aniq belgilanishini va yerlarning belgilangan tartibda ajratilishini ta’minlasin;

manfaatdor idoralar bilan birgalikda ilg‘or texnologiyalarni qo‘llagan holda zamonaviy issiqxonalar qurish uchun konstruksiyalar va jihozlar ishlab chiqarishga ixtisoslashtirilgan mahalliy korxonalar tashkil etish choralarini ko‘rsin.

3. Quyidagilar “Buxoro-agro” EIZning asosiy vazifalari va faoliyati yo‘nalishlari etib belgilansin:

zamonaviy issiqxona xo‘jaliklarini, jumladan, gidroponika texnologiyalarini qo‘llagan holda, klaster usuli asosida tashkil etish uchun to‘g‘ridan-to‘g‘ri xorijiy va mahalliy investitsiyalar jalb etish, shuningdek, zamonaviy energiya tejovchi issiqxonalar qurish uchun konstruksiyalar, jihozlar va boshqa butlovchi buyumlar ishlab chiqarishni tashkil etish;

hududning ishlab chiqarish va resurs salohiyatidan samarali foydalanish asosida qishloq xo‘jaligi mahsulotlarini ishlab chiqarishni kengaytirish, qayta ishlashni chuqurlashtirish va ularning eksport hajmini oshirish;

qishloq xo‘jaligi mahsulotlari ishlab chiqarishning urug‘dan to mahsulotni bozorga yetkazib berishgacha bo‘lgan to‘liq jarayonini tashkil etishni rag‘batlantirish;

ko‘chatzorlar, shuningdek, birlamchi urug‘chilikni tashkil etish uchun sharoitlar yaratish orqali issiqxona xo‘jaliklarini talabi katta, yuqori hosildorlikka ega bo‘lgan qishloq xo‘jaligi ekinlari urug‘ va ko‘chatlari bilan ta’minlashning samarali mexanizmlarini joriy etish;

logistika xizmatlari ko‘rsatishning zamonaviy infratuzilmasini shakllantirish, qishloq xo‘jaligi ishlab chiqarish subyektlariga ular tomonidan yetishtirilgan mahsulotlar eksportini tashkil etishda ko‘maklashish;

issiqxona xo‘jaliklarini tashkil etishda zamonaviy resurs tejovchi texnologiyalarni, muqobil issiqlik energiyalardan foydalanishni keng joriy etish;

ishlab chiqarilayotgan mahsulotlarni standartlashtirish, sertifikatlashtirish va markirovka qilish bo‘yicha xalqaro standartlarga muvofiq ilmiy-ishlab chiqarish markazlari tashkil etish va ularning xulosalari xalqaro darajada e’tirof etilishini ta’minlash chora-tadbirlarini ko‘rish;

issiqxona xo‘jaliklari sohasida yuqori malakali mutaxassislar tayyorlashda, jumladan, ular tomonidan “Buxoro-agro” EIZ hududida faoliyat yuritayotgan korxonalarda ishlab chiqarish amaliyotini o‘tashda ishtirok etish.

4. Belgilab qo‘yilsinki:

“Buxoro-agro” EIZ tarkibiga kiritilgan yer maydonlari Buxoro viloyati Erkin iqtisodiy zonalar va kichik sanoat zonalari ma’muriy kengashining bevosita tasarrufida bo‘ladi;

“Buxoro-agro” EIZning faoliyat ko‘rsatish muddati u tashkil etilgan kundan boshlab, mazkur muddatni keyinchalik uzaytirish imkoniyati bilan 30 yilni tashkil qiladi;

“Buxoro-agro” EIZning faoliyat ko‘rsatishi muddati mobaynida uning hududida alohida soliq va bojxona rejimlari amal qiladi;

“Buxoro-agro” EIZ ishtirokchisi maqomi Buxoro viloyati Erkin iqtisodiy zonalar va kichik sanoat zonalari ma’muriy kengashining qarori bilan beriladi.

5. Buxoro viloyati Erkin iqtisodiy zonalar va kichik sanoat zonalari ma’muriy kengashi:

a) bir oy muddatda “Buxoro-agro” EIZ direksiyasini va uning faoliyatini tashkil etish chora-tadbirlarini ko‘rsin;

b) O‘zbekiston Respublikasi Iqtisodiyot vazirligi, Investitsiyalar bo‘yicha davlat qo‘mitasi, Xususiylashtirilgan korxonalarga ko‘maklashish va raqobatni rivojlantirish davlat qo‘mitasi, Savdo-sanoat palatasi, “O‘zbekoziqovqatxolding” XK va tijorat banklari bilan birgalikda:

“Buxoro-agro” EIZ hududida loyihalar amalga oshirish uchun tadbirkorlik subyektlari jalb etilishini, ular bilan tizimli ishlar olib borilishini, shuningdek, loyihalarni “Buxoro-agro” EIZ hududiga joylashtirish bo‘yicha investitsion buyurtmalarning sifatli va o‘z vaqtida ko‘rib chiqilishini;

tadbirkorlik subyektlariga “Buxoro-agro” EIZ hududida amalga oshirilishi rejalashtirilayotgan investitsiya loyihalarining biznes-rejalarini ishlab chiqishda ko‘maklashishni ta’minlasin.

6. “Buxoro-agro” EIZ direksiyasi erkin iqtisodiy zonaning butun faoliyat ko‘rsatishi davrida asosiy faoliyat turi bo‘yicha soliqlar va davlat maqsadli jamg‘armalariga majburiy ajratmalar to‘lashdan ozod qilinsin.

7. “Buxoro-agro” EIZ qatnashchilariga O‘zbekiston Respublikasi Prezidentining 2016 yil 26 oktyabrdagi “Erkin iqtisodiy zonalar faoliyatini faollashtirish va kengaytirishga doir qo‘shimcha chora-tadbirlar to‘g‘risida”gi PF–4853-son Farmonining 3, 4 va 5-bandlari qoidalari tatbiq etilsin.

8. “Buxoro-agro” EIZ hududida zamonaviy issiqxona xo‘jaliklarini tashkil etishga doir tadbirlarni muvofiqlashtirish va amalga oshirishga ko‘maklashish bo‘yicha komissiya tarkibi 2-ilovaga muvofiq tasdiqlansin.

Komissiyaning (S.Xolmurodov) asosiy vazifalari etib quyidagilar belgilansin:

mazkur qarorda nazarda tutilgan tadbirlarni amalga oshirish bo‘yicha mas’ul ijrochilar faoliyatini muvofiqlashtirish, shuningdek, ushbu tadbirlarning samarali, sifatli va o‘z vaqtida bajarilishini tashkil etish;

“Buxoro-agro” EIZ hududida amalga oshirilayotgan loyihalarni moliyalashtirish uchun xorijiy investitsiyalarni, donor mamlakatlarning, xalqaro moliya institutlarining kreditlari va grantlarini jalb etish;

“Buxoro-agro” EIZ hududida loyihalar amalga oshirish uchun xorijiy va mahalliy investorlar izlashga hamda jalb etishga ko‘maklashish, ular bilan muzokaralar olib borish, shuningdek, ularga o‘z faoliyatini tashkil etishda zarur yordam va ko‘mak ko‘rsatish.

9. Belgilansinki, “Buxoro-agro” EIZ hududida amalga oshiriladigan loyihalarni moliyalashtirish xalqaro moliya institutlari, loyiha tashabbuskorlari mablag‘lari, jumladan, to‘g‘ridan-to‘g‘ri investitsiyalar, shuningdek, tijorat banklari kreditlari va qonun hujjatlarida taqiqlanmagan boshqa manbalar hisobidan amalga oshiriladi.

Bunda loyiha tashabbuskorining loyihani amalga oshirish uchun jalb etilayotgan o‘z mablag‘lari miqdori tegishli loyiha umumiy qiymatining 25 foizidan kam bo‘lishi mumkin emas.

10. “Buxoro-agro” EIZ hududida tashkil etilgan korxonalarga O‘zbekiston Respublikasi Prezidentining 2017 yil 6 yanvardagi “Oziq-ovqat, charm-poyabzal va farmatsevtika sanoatida investitsiya loyihalarini moliyalashtirish manbalarini kengaytirish chora-tadbirlari to‘g‘risida”gi PQ–2718-son qarorida belgilangan kreditlar taqdim etish tartibi va shartlari tatbiq etilishi belgilansin.

12. O‘zbekiston Respublikasi Tashqi iqtisodiy faoliyat milliy banki, “O‘zsanoatqurilishbank” ATB, “Asaka” ATB va boshqa tijorat banklariga loyiha tashabbuskorlarida garov ta’minoti yetarli bo‘lmagan yoki mavjud bo‘lmagan hollarda ularga texnologik uskunalarni lizing asosida xarid qilish imkoniyatini berish tavsiya etilsin.

13. O‘zbekiston Respublikasi Axborot texnologiyalari va kommunikatsiyalarini rivojlantirish vazirligi, Uy-joy kommunal xizmat ko‘rsatish vazirligi, Avtomobil yo‘llari davlat qo‘mitasi, “O‘zbekenergo” AJ, “O‘ztransgaz” AJ “Buxoro-agro” EIZ direksiyasi bilan birgalikda “Buxoro-agro” EIZ hududini, shuningdek, uning ishtirokchilari ishlab chiqarish maydonlarini tashqi yo‘l-transport va muhandislik-kommunikatsiya infratuzilmasi bilan kafolatli ta’minlasin.

14. O‘zbekiston Respublikasi Iqtisodiyot vazirligi va Moliya vazirligi:

Qurilish vazirligi, Uy-joy kommunal xizmat ko‘rsatish vazirligi, Axborot texnologiyalari va kommunikatsiyalarini rivojlantirish vazirligi, Avtomobil yo‘llari davlat qo‘mitasi, “O‘zbekenergo” AJ, “O‘ztransgaz” AJ, “O‘zbekiston temir yo‘llari” AJ, Buxoro viloyati hokimligi bilan birgalikda uch oy muddatda “Buxoro-agro” EIZ hududida transport, ishlab chiqarish va muhandislik-kommunikatsiya infratuzilmasini jadal rivojlantirish dasturini tasdiqlash uchun O‘zbekiston Respublikasi Vazirlar Mahkamasiga kiritsin;

Investitsiyalar bo‘yicha davlat qo‘mitasi bilan birgalikda har yili O‘zbekiston Respublikasini rivojlantirish davlat dasturi parametrlarini shakllantirishda “Buxoro-agro” EIZning belgilangan tartibda tasdiqlangan bosh rejasi asosida transport, ishlab chiqarish va muhandislik-kommunikatsiya infratuzilmasini rivojlantirish uchun kapital qo‘yilmalar limitlarini hamda zarur markazlashtirilgan investitsiyalar ajratilishini nazarda tutsin.

15. O‘zbekiston Respublikasi Qurilish vazirligi va Buxoro viloyati hokimligining:

Buxoro viloyati hokimligining “Yagona buyurtmachi xizmati” injiniring kompaniyasini “Buxoro-agro” EIZning bosh rejasini ishlab chiqish, shuningdek, yo‘l-transport va muhandislik-kommunikatsiya infratuzilmasini qurish hamda rekonstruksiya qilish bo‘yicha buyurtmachi etib;

“Qishloq qurilish loyiha” MCHJni “Buxoro-agro” EIZning bosh rejasini ishlab chiqish bo‘yicha bosh loyihalash tashkiloti etib belgilash to‘g‘risidagi taklifiga rozilik berilsin.

16. Buxoro viloyati hokimligining “Yagona buyurtmachi xizmati” injiniring kompaniyasi “Qishloq qurilish loyiha” MCHJ bilan birgalikda ikki oy muddatda “Buxoro-agro” EIZning bosh rejasi loyihasi ishlab chiqilishini hamda Buxoro viloyati Erkin iqtisodiy zonalar va kichik sanoat zonalari ma’muriy kengashi bilan kelishilgan holda belgilangan tartibda tasdiqlash uchun kiritilishini ta’minlasin.

17. O‘zbekiston avtomobil transporti agentligi, “O‘zbekiston temir yo‘llari” AJ, Davlat bojxona qo‘mitasi Buxoro viloyati hokimligi bilan birgalikda bir oy muddatda “Buxoro-agro” EIZ ishtirokchilariga o‘z vaqtida va sifatli xizmat ko‘rsatish uchun logistika markazlarini hamda bojxona postlarini qurish yuzasidan O‘zbekiston Respublikasi Vazirlar Mahkamasiga takliflar kiritsin.

18. O‘zbekiston Respublikasi Tashqi ishlar vazirligi:

O‘zbekiston Respublikasining Turkiya Respublikasi, Koreya Respublikasi, Germaniya Federativ Respublikasi, Ispaniya Qirolligi, Isroil davlati, Rossiya Federatsiyasi, Xitoy Xalq Respublikasidagi elchixonalar hamda respublikaning xorijiy davlatlardagi boshqa diplomatik vakolatxonalari zimmasiga “Buxoro-agro” EIZ hududida loyihalar, jumladan, zamonaviy energiya tejovchi issiqxona xo‘jaliklarini tashkil etish bo‘yicha loyihalar amalga oshirish uchun xorijiy investorlar, shuningdek, xorijiy kredit liniyalarini jalb etishga ko‘maklashish majburiyatini yuklasin;

Buxoro viloyati hokimligining buyurtmalariga binoan “Buxoro-agro” EIZ hududida yaratiladigan zamonaviy issiqxona xo‘jaliklarini tashkil etish bo‘yicha ishga jalb qilinadigan xorijiy mutaxassislar uchun kirish vizalari konsullik hamda boshqa yig‘imlar undirilmasdan, belgilangan tartibda rasmiylashtirilishini ta’minlasin.

19. O‘zbekiston Respublikasi Ichki ishlar vazirligi Buxoro viloyati hokimligining buyurtmalariga binoan “Buxoro-agro” EIZ hududida yaratiladigan zamonaviy issiqxona xo‘jaliklarini tashkil etish bo‘yicha ishga jalb qilinadigan xorijiy mutaxassislarga davlat bojlari undirilmasdan ko‘p martalik vizalar berilishi va uzaytirilishini, shuningdek, ularning yashash joyida vaqtinchalik ro‘yxatdan o‘tkazilishi hamda vaqtinchalik ro‘yxatdan o‘tkazish muddati uzaytirilishini belgilangan tartibda ta’minlasin.

20. O‘zbekiston Respublikasi Bandlik va mehnat munosabatlari vazirligi Buxoro viloyati hokimligining buyurtmalariga binoan “Buxoro-agro” EIZ hududida tashkil etiladigan korxonalarda, jumladan, issiqxona xo‘jaliklarida ishlash maqsadida respublikaga xorijiy mutaxassislarni jalb etish uchun belgilangan tartibda ruxsatnomalar berilishini (muddati uzaytirilishini), shuningdek, ularga O‘zbekiston Respublikasi hududida mehnat faoliyati huquqiga tasdiqnomalar berilishini (muddati uzaytirilishini) ta’minlasin.

21. O‘zbekiston Respublikasi Qishloq xo‘jaligi vazirligi:

a) Fanlar akademiyasi, Innovatsion rivojlanish vazirligi, “O‘zbekoziqovqatxolding” XK, “Energiya tejash milliy kompaniyasi” AJ bilan birgalikda ikki oy muddatda zamonaviy energiya tejovchi issiqxona komplekslarini (issiqxonalarni) ular joylashgan hududning (joyning) o‘ziga xos xususiyatlaridan, issiqxonaning ixtisoslashuvidan hamda issiqxona xo‘jaligi samaradorligiga ta’sir etuvchi boshqa omillardan kelib chiqqan holda maqbul sharoitlarda tashkil etish yuzasidan tavsiyalar ishlab chiqsin;

b) Fanlar akademiyasi, Innovatsion rivojlanish vazirligi va Toshkent davlat agrar universiteti bilan birgalikda:

bir oy muddatda issiqxona xo‘jaliklari rahbarlari va mutaxassislari uchun issiqxona xo‘jaliklarini boshqarish, jumladan, qishloq xo‘jaligi mahsulotlarini yetishtirish hamda eksport qilish masalalari yuzasidan turkum o‘quv seminarlarini tashkil etsin;

zamonaviy issiqxona xo‘jaliklarini tashkil etish va rivojlantirish sohasidagi ilmiy-tadqiqot ishlarini hamda innovatsion ishlanmalarni rag‘batlantirish, shuningdek, xorijiy mamlakatlarning mazkur yo‘nalishdagi ilg‘or tajribasi asosida mutaxassislarning malakasini oshirishni tashkil etish choralarini ko‘rsin.

22. O‘zbekiston Respublikasi Vazirlar Mahkamasi huzuridagi O‘zbekiston neft mahsulotlari va gazdan foydalanishni nazorat qilish davlat inspeksiyasi, Elektr energetikada nazorat bo‘yicha davlat inspeksiyasi manfaatdor idoralar bilan birgalikda ikki oy muddatda issiqxona xo‘jaliklarida energiya resurslaridan foydalanish samaradorligi va oqilonaligini o‘rganish maqsadida ularni joyiga chiqqan holda viloyatlar va tumanlar (shaharlar) kesimida atroflicha inventarizatsiyadan o‘tkazsin, uning natijalari yuzasidan O‘zbekiston Respublikasi Vazirlar Mahkamasiga mazkur yo‘nalishdagi ishlarni takomillashtirish bo‘yicha takliflar bilan birga hisobot kiritsin.

23. O‘zbekiston Respublikasi Investitsiyalar bo‘yicha davlat qo‘mitasi Adliya vazirligi va boshqa manfaatdor idoralar bilan birgalikda bir oy muddatda qonun hujjatlariga mazkur qarordan kelib chiqadigan o‘zgartish va qo‘shimchalar to‘g‘risida O‘zbekiston Respublikasi Vazirlar Mahkamasiga takliflar kiritsin.

24. Mazkur qarorning ijrosini nazorat qilish O‘zbekiston Respublikasining Bosh vaziri A.N.Aripov, O‘zbekiston Respublikasi Bosh vazirining o‘rinbosarlari S.R.Xolmurodov, Z.T.Mirzayev va Buxoro viloyati hokimi O‘.I.Barnoyev zimmasiga yuklansin.

O‘zbekiston Respublikasi Prezidenti SH.MIRZIYOYEV

Toshkent shahri,

2018-yil 10-iyul

(Manba: O‘zA)

 

Ish jarayonida foydalanilgan manba lavhasi qo‘yilishi shart

YANGILIKLAR XABARNOMASI №133 TIV Jamoatchilik va OAV bilan aloqalar boshqarmasi 2018-yil 10-iyul

posted 16 Jul 2018, 11:05 by Webmaster Ambasciata

PREZIDENT.. 1

Prezident Yaponiya Bosh vaziriga hamdardlik bildirdi 1

Turkiya Prezidentiga hamdardlik. 1

Investitsiya.. 1

Ingichkaga xitoylik tadbirkorlar investitsiya kiritadi 1

MOLIYA.. 2

O‘zbekiston Respublikasi Markaziy banki axboroti 2

Xalqaro munosabatlar.. 2

O‘zbekiston Hukumati delegatsiyasning Afg‘onistonga tashrifi to‘g‘risida. 2

O‘zbekiston delegatsiyasi “YI - MO” shaklidagi yuqori darajali muloqotda ishtirok etdi 3

BMT Bosh Assambleyasing maxsus rezolyutsiyasi Toshkentda muhokama etiladi 3

Toshkentda O‘zbekiston—Pokiston ishbilarmonlar kengashi yig‘ilishi bo‘lib o‘tdi 3

Jamiyat.. 4

Kattaqo‘rg‘ondagi hodisa tizimdagi muammolarni ko‘rsatib berdi 4

O‘zbekistonda mehnat migratsiyasi tizimidagi vazifalarning amaliy yechimi 5

 

PREZIDENT

Prezident Yaponiya Bosh vaziriga hamdardlik bildirdi

O‘zbekiston Prezidenti Shavkat Mirziyoyev Yaponiyaning markaziy va janubi-g‘arbiy hududlarida ro‘y bergan suv toshqini oqibatida ko‘plab insonlar halok bo‘lgani va talafotlar yetgani munosabati bilan mamlakat Bosh vaziri Sindzo Abega hamdardlik bildirdi.

(Manba: O‘zA)

Turkiya Prezidentiga hamdardlik

Prezident Shavkat Mirziyoyev Turkiyaning Tekirdog‘ viloyatida ro‘y bergan poyezd halokati oqibatida ko‘plab insonlar qurbon bo‘lgani va jarohatlangani munosabati bilan Turkiya Respublikasi Prezidenti Rejep Tayyip Erdog‘anga hamdardlik bildirdi.

(Manba: O‘zA)

Investitsiya

Ingichkaga xitoylik tadbirkorlar investitsiya kiritadi

Samarqand viloyati hokimligida Xitoyning Sinszyan provinsiyasidagi “Sinyan” ilmiy-savdo kompaniyasi prezidenti Sun Chjenszyun boshchiligidagi delegatsiya a’zolari bilan uchrashuv bo‘lib o‘tdi.

Samarqand viloyati hokimi T.Jo‘rayev mehmonlarni tashrifi bilan qutlab, ikki davlat rahbarlari tashabbusi bilan mamlakatlarimiz o‘rtasida savdo-iqtisodiy, investitsiyaviy, madaniy-gumanitar aloqalar tobora kengayib borayotganini ta’kidladi. Bu ayniqsa, sanoat, yuqori texnologiyalar, neft-gaz va logistika, to‘qimachilik, qishloq xo‘jaligi sohalarida yaqqol ko‘zga tashlanmoqda. 2017 yilda davlatlarimiz o‘rtasidagi tovar ayirboshlash hajmi 5 milliard dollardan oshdi. Joriy yilda bu raqamning yana ham yuqori bo‘lishi kutilmoqda.

Ayni paytda Samarqand viloyatida Xitoy kapitali ishtirokida 30 dan ortiq qo‘shma korxona faoliyat ko‘rsatmoqda. Mazkur korxonalar tomonidan qurilish materiallari, yengil sanoat, poyabzal, kimyo mahsulotlari, qadoqlash materiallari, motorollerlar va boshqa turdagi mahsulotlar ishlab chiqariladi. Endilikda ushbu yo‘nalishlar qatoriga tog‘-kon metallurgiya sanoati ham qo‘shiladi.

O‘zbekiston Respublikasi Davlat geologiya va mineral resurslar qo‘mitasi taklifiga ko‘ra yurtimizga tashrif buyurgan Xitoyning “Sinyan” ilmiy-savdo kompaniyasi, og‘ir-mexanika sanoati yo‘nalishida faoliyat ko‘rsatuvchi “CITIC” kompaniyasi, Xenan provinsiyasidagi ko‘mir sanoati instituti, tog‘-kon metallurgiya sanoati yo‘nalishidagi “Xenan Golun” kompaniyasi rahbar va muhandislari Kattaqo‘rg‘on shahridagi Ingichka qo‘rg‘onidagi sobiq “Ingichka koni” aksiyadorlik jamiyati uchastkalarida volfram, molibden va mis qazib olish bo‘yicha loyihani amalga oshirish yuzasidan dastlabki o‘rganish ishlarini olib bordi.

Uchrashuvda delegatsiya rahbari Sun Chjenszyun o‘rganish xulosalari asosida Ingichkada mavjud ikkita shaxtadan foydalanish va qo‘shimcha yangi kon shaxtalarini qurish imkoniyati mavjudligini ta’kidladi. Shuningdek, hududda o‘zaro hamkorlikda zamonaviy asbob-uskunalardan foydalangan holda geologiya-qidiruv ishlari olib borilsa, volfram, molibden va mis metallaridan tashqari boshqa mineral xomashyo resurslari zaxiralari ham aniqlanishi qayd etildi. Bu yerda ruda qumi chiqindisidan qurilish materiallari, jumladan, bezakli g‘isht ishlab chiqarish mumkin.

Xorijlik investorlar guruhi bilan o‘tkazilgan muloqotlar yakuniga ko‘ra, Ingichkada tog‘-kon metallurgiya sanoati yo‘nalishidagi loyihani amalga oshirish hamda qo‘rg‘onda kommunikatsiya tarmoqlari holatini yaxshilash, infratuzilma ob’ektlari qurish uchun Xitoy tomonidan 50-55 million AQSh dollari miqdorida to‘g‘ridan-to‘g‘ri investitsiya jalb qilinadi. Loyihaning bosqichma-bosqich amalga oshirilishi bilan 500 tadan 700 tagacha yangi ish o‘rni yaratiladi.

(Manba: )

MOLIYA

O‘zbekiston Respublikasi Markaziy banki axboroti

O‘zbekiston Respublikasi Markaziy banki 2018-yil 10-iyuldan boshlab valyuta operatsiyalari bo‘yicha buxgalteriya hisobi, statistik va boshqa hisobotlarni yuritish, shuningdek, bojxona va boshqa majburiy to‘lovlari uchun xorijiy valyutalarning so‘mga nisbatan quyidagi qiymatini belgiladi:

1 AQSH dollari         7813,42

1 YEVRO            9176,86

1 Rossiya rubli         124,19

1 Angliya funt sterlingi            10378,57

1 Yaponiya iyenasi               70,74

1 Janubiy Koreya voni           7,01

1 Quvayt dinori             25838,03

1 Malayziya ringgiti       1934,97

1 Kanada dollari              5973,56

1 Xitoy yuani                  1176,79

1 Singapur dollari           5757,44

1 Shveysariya franki        7894,74

1 BAA dirhami             2127,37

1 Misr funti                    437,97

1 Avstraliya dollari             5806,15

1 Turkiya lirasi             1710,69

1 SDR                          11011,77

1 Ukraina grivnasi              296,81

1 Polsha zlotiysi                2107,80

Valyuta qiymatini belgilash chog‘ida O‘zbekiston Respublikasi Markaziy banki mazkur valyutalarni ushbu qiymatda sotish yoki sotib olish majburiyatini olmagan.

(Manba: O‘zA)

xalqaro munosabatlar

O‘zbekiston Hukumati delegatsiyasning Afg‘onistonga tashrifi to‘g‘risida

2018-yilning 8-9-iyul kunlari Afg‘oniston Islom Respublikasida amaliy tashrif bilan bo‘lgan O‘zbekiston Respublikasi Tashqi ishlar vaziri Abdulaziz Kamilov boshchiligidagi Hukumat delegatsiyasi Kabul shahrida Afg‘oniston Hukumati Ijrochi Raisi Abdulla Abdulla, Xavfsizlik kengashi rahbari Muhammad Hanif Atmar, Tashqi ishlar vaziri Salohuddin Rabbani, Afg‘onistonning sobiq Prezidenti Hamid Karzay va boshqa nufuzli jamoatchilik va siyosat arboblari bilan uchrashuvlar o‘tkazdi.

Uchrashuvlarda Afg‘onistondagi vaziyat hamda tinchlik jarayoni, mamlakatni yanada rivojlantirish masalalari bo‘yicha keng milliy birdamlikka erishish istiqbollari yuzasidan fikr almashildi.

O‘zbekiston delegatsiyasining tashrifi doirasida O‘zbekiston Respublikasi Tashqi savdo vaziri Jamshid Xodjayev tomonidan Kabul shahrida Afg‘onistonning qator vazirlik va idoralari rahbarlari bilan ikki tomonlama muzokaralar o‘tkazildi va o‘zaro manfaatli loyihalarni tadbiq etish, qo‘shma ishlab chiqarishni yo‘lga qo‘yishning amaliy jihatlari hamda O‘zbekiston-Afg‘oniston iqtisodiy kun tartibidagi boshqa masalalar muhokama qilindi.

(Manba: O‘zbekiston Respublikasi TIV veb-sahifasi)

O‘zbekiston delegatsiyasi “YI - MO” shaklidagi yuqori darajali muloqotda ishtirok etdi

2018-yilning 9-iyul kuni O‘zbekiston Respublikasi Tashqi ishlar vaziri o‘rinbosari Dilshod Axatov boshchiligidagi delegatsiya Ashxobod shahrida “Yevropa Ittifoqi – Markaziy Osiyo” shaklidagi siyosat va xavfsizlik bo‘yicha yuqori darajali Muloqotning navbatdagi uchrashuvida ishtirok etdi.

2017-yil iyun oyida Bishkek shahridagi Muloqotning so‘nggi majlisi hamda 2018-yil mart oyida Toshkent shahridagi vazirlarning norasmiy uchrashuvida erishilgan kelishuvlarni amalga oshirish jarayoni, “YI - MO” shaklida turli darajagi bo‘lajak uchrashuvlar jadvali va kun tartibi muhokama qilindi.

Uchrashuvda terrorizm bilan kurash va zo‘ravonlik ekstremizmini oldini olishda hamkorlikni faollashtirish choralari yuzasidan fikr almashildi.

Shuningdek, delegatsiyalar tomonidan chegarani boshqarish, narkotiklarning noqonuniy aylanishi va uyushgan jinoyatchilik bilan kurash sohasidagi hamkorlik masalalari hamda mintaqaviy ekologik muammolar ko‘rib chiqildi.

(Manba: O‘zbekiston Respublikasi TIV veb-sahifasi)

BMT Bosh Assambleyasing maxsus rezolyutsiyasi Toshkentda muhokama etiladi

2018-yilning 12 iyul sanasida poytaxtimizda BMT Bosh Assambleyasining “Markaziy Osiyo mintaqasida tinchlik, barqarorlik va izchil taraqqiyotni ta’minlash bo‘yicha mintaqaviy va xalqaro hamkorlikni mustahkamlash” rezolyutsiyasiga bag‘ishlangan tadbir o‘tkaziladi.

Ushbu tadbir O‘zbekiston Respublikasi Prezidenti huzuridagi Strategik va mintaqalararo tadqiqotlar instituti va Davlat boshqaruv akademiyasi ko‘magida tashkil etilmoqda.

Tashkilotchilar bergan ma’lumotga ko‘ra, davra suhbati shaklidagi tadbirda O‘zbekiston Respublikasi Oliy Majlisi Qonunchilik palatasi va Senati, tegishli vazirliklar, “O‘zbekiston temir yo‘llari” aksiyadorlik jamiyati, Fanlar Akademiyasi vakillari, xalqaro tashkilotlar, xorijiy davlatlarning mamlakatimizdagi diplomatik vakolatxonalari rahbarlari ishtirok etishi kutilmoqda.

Ta’kidlanishicha, tadbirdan ko‘zlangan maqsad BMT BA maxsus rezolyutsiyasi mohiyati va ahamiyatini muhokama etish, shuningdek, Markaziy Osiyo mintaqasida tinchlik, barqarorlik va izchil taraqqiyotni ta’minlash bo‘yicha mintaqaviy va xalqaro hamkorlikni mustahkamlash istiqbollarini belgilab olishdan iborat.

Eslatib o‘tamiz, 2018 yilning 22 iyun kuni BMT Bosh Assambleyasining yalpi majlisida “Markaziy Osiyo mintaqasida tinchlik, barqarorlik va izchil taraqqiyotni ta’minlash bo‘yicha mintaqaviy va xalqaro hamkorlikni mustahkamlash” rezolyutsiyasi qabul qilindi. BMTga a’zo barcha davlatlar bir ovozdan qo‘llab-quvvatlagan ushbu hujjat davlatimiz rahbari Shavkat Mirziyoyev tomonidan 2017 yil sentyabr oyida Nyu-Yorkda bo‘lib o‘tgan BMT Bosh Assambleyasining 72-sessiyasida ilgari surilgan tashabbusning amaliy ijrosi hisoblanadi.

Rezolyutsiyada Markaziy Osiyoda xavfsizlikni mustahkamlash, suv va energiya manbalaridan unumli va kompleks foydalanish, Orol dengizi qurishi bilan bog‘liq ekologik va ijtimoiy-iqtisodiy asoratlarni yumshatish, mintaqada zamonaviy transport va tranzit tizimini tashkil etish, ma’rifat, fan, texnologiyalar, innovatsiyalar, turizm, madaniyat, san’at va sport sohalaridagi aloqalarni chuqurlashtirish yo‘nalishlarida ikki tomonlama va mintaqaviy hamkorlikni rivojlantirish muhimligi qayd etilgan.

(Manba: O‘zA)

Toshkentda O‘zbekiston—Pokiston ishbilarmonlar kengashi yig‘ilishi bo‘lib o‘tdi

9-iyul, dushanba kuni O‘zbekiston Savdo-sanoat palatasida O‘zbekiston—Pokiston ishbilarmonlar kengashining yig‘ilishi bo‘lib o‘tdi. Bu haqda Savdo-sanoat palatasi matbuot xizmati “Daryo”ga xabar berdi.

Uchrashuvda tomonlar Pokiston bozorlariga O‘zbekistonda ishlab chiqarilgan mahsulotlarni yetkazish, tibbiyot, qishloq xo‘jaligi, tekstil hamda turizm sohalarida o‘zaro hamkorlik aloqalarini o‘rnatish haqida kelishib oldi.

2018-yil mart oyida O‘zbekiston Savdo-sanoat palatasida Global va mintaqaviy tadqiqotlar markazi bilan hamkorlikda O‘zbekiston—Pokiston ishbilarmonlar kengashini tuzish to‘g‘risida kelishuv imzolangan. Aprel oyida kengashning birinchi yig‘ilishi Islomobodda o‘tkazilgan.

Ma’lumot uchun

2017-yili O‘zbekiston va Pokiston o‘rtasida o‘zaro tovar aylanmasi qariyb 36,2 million AQSh dollarini tashkil qildi.

(Manba: Daryo.uz)

jamiyat

Kattaqo‘rg‘ondagi hodisa tizimdagi muammolarni ko‘rsatib berdi

Xotin-qizlar qo‘mitasi Kattaqo‘rg‘ondagi hodisadan keyin IIVga bir qator talablar tayyorladi. Qo‘mita rahbari Tanzila Narbayeva kelajakda bunday holatlarning oldini olish uchun nimalar qilish kerakligini aytdi.

3 iyun kuni Kattaqo‘rg‘on shahar IIB binosi dahlizida tezkor vakil San’at Umarov va boshqalar ayol kishini o‘g‘irlik qilganlikda ayblab haqorat qilgan va yechinishga majburlagan. Umarov ushbu jarayonni videoga yozib olgan, tasvir keyinchalik «Ozodlik» radiosiga kelib tushgan. Shu kunning o‘zida jinoiy ish ochildi.

Voqea keng jamoatchilik e’tiborini jalb qildi va tizimdagi jiddiy muammolar haqidagi fikrlar yangray boshladi. Yakshanba kuni bosh vazir o‘rinbosari Tanzila Narbayeva boshchiligidagi O‘zbekiston xotin-qizlar qo‘mitasi vakillari jabrlangan ayolning uyiga bordi.

Bu ayolga psixolog Shahnoza Mamayusupova biriktirilgan bo‘lib, u orqali ayolning ruhiy holati o‘rganilmoqda. Tergov va sud jarayonlarida huquqiy va yuridik masalalarda jabrlanuvchiga advokat Azamat Ashurboyev yordam beradi. Ayolning holatidan hamshira Nilufar Hayitova va «Olmazor» mahalla fuqarolar yig‘ini vakili xabardor bo‘lib turadi.

Xotin-qizlar qo‘mitasi taklifi bilan Kattaqo‘rg‘on tuman hokimligi «Har bir oila — tadbirkor» dasturi doirasida ayollar uchun uncha katta bo‘lmagan kanselyariya mollari do‘konini tashkil etdi. Ikki nafar voyaga yetmagan bola karate to‘garagiga a’zo bo‘ldi. Mahalliy tadbirkorlar va mahalla aholisi u yashaydigan uyni ta’mirlashni boshlab yuborishdi.

Tanzila Narbayeva «Gazeta.uz» muxbiriga bergan intervyusida nima uchun ayolning huquq-tartibot organlariga ariza bilan murojaat qilmaganini (aslida esa Bosh prokuratura 22 iyun kuni murojaat bo‘lganini bildirgandi), shuningdek, kelajakda bu singari hodisalar bo‘lmasligi uchun nimalar qilish kerakligini aytdi.

Uydagi gap ko‘chaga olib chiqilmaydi

«Xotin-qizlar qo‘mitasi hodisa aniqlanganidan beri bu ayolga yordam berib kelmoqda. Uning shu paytgacha uch marta sud qilingani va ro‘yxatda turgani San’at Umarovning harakatlarini oqlamaydi. Biz bo‘linmalar faoliyatini tahlil qildik. Ular ayol bilan ishladi. Ammo tizimdagi muammolarni ko‘rsatib beruvchi ushbu hodisa yuz berdi».

«U ariza bilan murojaat qilmagan. Jinoiy ish tezkor xodim tomonidan suratga olingan video tarqalganidan so‘ng ochildi. Jabrlanuvchi hali-hamon hech kim bilan gaplashmayapti. U mazkur voqea o‘zi uchun sharmandalik ekanini aytmoqda. O‘zbek ayollari bunday faktlar haqida hatto o‘z yaqiniga ham aytmaydi. Jabrlanuvchi bu haqda indamaslikni ma’qul ko‘radi. Bizning ayollarda uydagi gapni tashqariga olib chiqmaslik odati bor. Buni o‘zgartirish kerak. Qo‘mitaning 25 yillik faoliyati haqida gapirganda ayollar bilan individual ish olib borilmaganini tan olish kerak. Bu yildan biz mazkur tizimni o‘zgartirdik: 95 foiz ish joylarda, 5 foizi kabinetda».

Endi nima bo‘ladi?

«Xotin-qizlar qo‘mitasi Ichki ishlar vazirligi bilan «yo‘l xaritasi"ni ishlab chiqmoqda. Unga IIVga qo‘yidagi talablar kiritiladi:

Birinchidan, ayol kishi biror holat yuzasidan ayblanganida yoki shubha ostiga olinganida, tergov jarayoniga jamoatchilik vakillarini jalb etish zarur. Ayol kishi har qanday holatda ham ichki ishlar organlariga murojaat qiladi — jabrlanuvchi (birinchi navbatda) sifatida ham, ayblanuvchi sifatida ham. Ikkita holatda ham, masalan mahalla, Yoshlar ittifoqi va boshqa tashkilotlardan jamoatchi himoyachi qatnashishi kerak.

Ikkinchidan, jazoni o‘tash muassasasida bo‘lib turgan ayollar o‘rtasida so‘rovnoma o‘tkaziladi: ular u yerdagi vaziyatni qanday baholaydi, huquq-tartibot organlari xodimlari tomonidan zo‘ravonlik qilingani yuzasidan shikoyat bormi? Shu orqali nimaning ustidan ishlash kerakligi borasida xulosa chiqarib olinadi.

Uchinchidan, barcha tergov nuqtalariga videokamera o‘rnatish. Bu jarayon allaqachon boshlandi.

To‘rtinchidan, kadrlar muammosini hal qilish. Xotin-qizlar qo‘mitasi IIVga aholi bilan to‘g‘ri muloqot qilish va ayollarni so‘roq qilish yuzasidan kadrlar tahlili bo‘yicha o‘z tavsiyalarini beradi. Nafaqat ayollar, balki bolalar uchun ham. Bundan so‘roqlar paytida psixolog va jamoatchi himoyachining ishtiroki ta’minlanishi shart. Har qanday ayblanuvchiga (faqat ayollar uchun emas) nisbatan qo‘pollik va noma’qul muomala bo‘lishining oldini olish uchun kadrlar tayyorlash tizimini ko‘rib chiqish lozim. Asosiy e’tiborni inson huquqlari va erkinliklari, etika va muomala madaniyatiga qaratish zarur.

IIV tarkibida ayollar sonini ko‘paytirish kerak — umumiy xodimlar sonining 20 foizidan kam bo‘lmagan miqdorda. Mazkur holat IIV uchun tizimni chuqurlashtirilgan ko‘rinishda tahlil qilish uchun asos bo‘lishi zarur.

Beshinchidan, IVV va boshqa huquq-tartibot organlari bizga bunday vaziyatlar yuzasidan axborot berishi kerak. Biz birinchi navbatda oilaga kelib, ularga yordam berdik".

Qanday amaliy ishlar qilinmoqda?

«Prezidentning 2 fevraldagi farmoniga ko‘ra Xotin-qizlar qo‘mitasi o‘zining faoliyat doirasida islohot o‘tkazmoqda va mahallalarda to‘laqonli ishlash imkoniyatini bermaydigan eskicha ish tizimini o‘zgartirmoqda. Bunga qadar tumanda ikki kishi ishlar edi. Xodimlar shtati ko‘paytirildi. «Oila» markazining bo‘linmalari tashkil etildi.

Prezidentning 2 iyuldagi farmoniga asosan «Suiqasdning oldini olish va zo‘ravonlik qurbonlarini reabilitatsiya qilish va asrash bo‘yicha Respublika markazi» tashkil etildi. Markaz qiyin ijtimoiy sharoitlarda, shu jumladan oilaviy muammolar va oiladagi zo‘ravonlikka duch keladigan odamlarga anonim ko‘rinishda tibbiy, psixologik, ijtimoiy, pedagogik, huquqiy va boshqa yordam ko‘rsatadi.

Xotin-qizlar qo‘mitasi «Umid» ijtimoiy moslashuv markazi yoki har bir tumanda boshpana tashkil qiladi. U yerda psixologik, huquqiy maslahat, tibbiy yordam ko‘rsatiladi. Ayollarning boradigan joyi bo‘lmasa, yangi uy joy topgunga qadar bu yerda bir necha kun qolishlari mumkin.

Uch oy ichida «Uy ichida zo‘ravonlikning oldini olish» bo‘yicha qonun loyihasi tayyorlanadi.

O‘zbekiston bo‘ylab 60 mingdan ziyod ayollar qiyin ahvolda yashamoqda. Joriy yilning birinchi yarmida 131 ming nafar ayol ish bilan ta’minlandi, mingdan ziyodi birinchi yarim yillikda kvartira bilan ta’minlandi hamda yil oxiriga kelib ayollar va oilalarni qo‘llab-quvvatlash jamg‘armasi hisobidan 1,5 ming nafar ayol uy-joy bilan ta’minlanadi".

(Manba: Gazeta.uz)

O‘zbekistonda mehnat migratsiyasi tizimidagi vazifalarning amaliy yechimi

So‘nggi ikki yilda barcha soha qatorida mehnat migratsiyasi masalasi ham e’tibordan chetda qolma-di. To‘g‘risi, shu davrda masalaga qarashimiz tubdan o‘zgardi. Sohadagi muammolar ochiq-oydin e’tirof etildi, uning oldini olish bo‘yicha aniq sa’y-hara-katlar boshlandi, olisdagi yaqinlarimiz, vatandoshlarimizning hukuqini tikpash borasida amaliy choralar ko‘rilmokda.

Aslida migratsiya bilan bog‘liq barcha jarayon huquqiy jihatdan to‘g‘ri tashkil etilsa, davlat va fuqarolarga keladigan foyda ham kam bo‘lmaydi. Hamma gap huquqiy mezonlarga borib taqaladi.

Lekin shuncha choralar ko‘rilishiga qaramasdan, hamon katta miqdordagi noqonuniy mehnat migratsiyasi mavjud. O‘tgan yil yakunlariga ko‘ra, ish topish ilinjida 1 million 630 mingdan ortiq fuqarolarimiz mamlakatni tark etgan. Ulardan bir million nafarga yaqini, aniqrog‘i, 944 328 nafari Rossiya Federatsiyasiga, 626 791 nafari Qozog‘istonga, qolganlari Turkiya, Janubiy Koreya va boshqa davlatlarga chiqib ketgan.

Tan olish kerak, yurtdoshlarimizni chet elda uyushgan holda ishga joylashtirish ko‘rsatkichlari judayam past, musofirlik nonini yeb, xorijda ishlab qaytgan fuqarolarni o‘zimizda ish bilan ta’minlash masalasi ham sustligicha qolmoqda.

Prezidentimiz tomonidan imzolangan “O‘zbekiston Respublikasining tashqi mehnat migratsiya tizimini yanada takomillashtirish bo‘yicha qo‘shimcha chora-tadbirlar to‘g‘risida”gi qarori sohada yechimini kutayotgan ana shunday og‘riqli muammolarni bartaraf qilish,

fuqarolarimizning xorijdagi mehnati hamda ularning ijtimoiy himoyasini ta’minlash, chet eldan qaytib kelgan mehnat muhojirlarini tadbirkorlik va mehnat faoliyatiga keng jalb etishga qaratilgan.

Qarorga muvofiq, joriy yilning 1 sentyabridan boshlab, mamlakatimizda ro‘yxatga olingan yuridik shaxslarga Bandlik va mehnat munosabatlari vazirligi tomonidan beriladigan litsenziyalar asosida yurtdoshlarimizni ishga joylashtirish, vazirlik tomonidan akkreditatsiyadan o‘tgandan so‘ng unga muvofiq chet elda vaqtinchalik mehnat faoliyatini amalga oshirish uchun ketayotgan fuqarolarimizning malakalarini, jumladan, kasbiy va xorijiy tillarni bilish ko‘nikmalariga egalik darajasini tasdiqlash vakolatlari beriladi.

— Shu kunga qadar aksariyat hollarda bu yo‘nalishda fuqarolarimizning malakasi tasdiqlanmagan, — deydi O‘zbekiston Respublikasi Bandlik va mehnat munosabatlari vazirligi huzuridagi Tashqi mehnat migratsiyasi agentligi boshlig‘i Ravshan Ibrohimov. — Shu bois ular chet davlatlarga borib, malaka talab qilmaydigan, soddaroq aytganda “qora” ishlar bilan shug‘ullanishgan. Endilikda fuqarolarimiz xorijga ishlash uchun boradigan bo‘lsa, ularning malakasini tasdiqlaydigan yangi tartib joriy qilinmoqda.

Aytish joizki, Tashqi mehnat migratsiyasi agentligi o‘z faoliyatini tubdan yangilaydi, hatto uning yangilangan nizomi tasdiqlanishi ko‘zda tutilmoqda. Darvoqe, Agentlik barcha turdagi soliqlar va davlat maqsadli jamg‘armalariga majburiy ajratmalardan ham ozod qilinadigan bo‘ldi.

Shu bilan birga, Bandlik va mehnat munosabatlari vazirligi huzurida Xorijda mehnat faoliyatini amalga oshiruvchi shaxslarni qo‘llab-quvvatlash hamda ularning huquq va manfaatlarini himoya qilish jamg‘armasi tashkil etiladi. Jamg‘arma daromadlari Davlat budjetidan ajratiladigan 200 milliard so‘m miqdoridagi bir martalik beg‘araz moliyaviy yordam orqali shakllantiriladi (O‘R MB kursi 10.07.2018 da, 1$= 7813.42 so‘m).

Bu mablag‘lar xorijda mehnat faoliyatini amalga oshirish davrida zo‘ravonlik, majburiy mehnat va kamsitishdan jabrlangan, mehnat hamda boshqa huquqlari buzilgan, og‘ir moliyaviy ahvolga tushgan va shaxsini tasdiqlovchi hujjatlarsiz, tirikchilik uchun mablag‘siz qolgan fuqarolarni huquqiy hamda ijtimoiy himoya qilish, shuningdek, ularga moddiy yordam ko‘rsatish kabi maqsadlarga sarflanadi.

Hujjat bilan tatbiq etiladigan yana bir yangilik to‘g‘risida. Endilikda chet elda mehnat qiladigan fuqarolar tomonidan O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasiga eng kam ish haqining 4,5 baravari miqdorida yillik sug‘urta to‘lovlarini ixtiyoriy ravishda to‘lash tartibi joriy etiladi. Bunda to‘lovlar amalga oshirilgan davrlar belgilangan tartibda mehnat stajiga qo‘shiladi.

— Oldin mamlakatimiz fuqarolari chet elda ishlagan davrlari pensiya jamg‘armasiga sug‘urta badallarini eng kam oylik ish haqining 12 baravari miqdorida to‘lanishi belgilangan edi, — deydi O‘zbekiston Respublikasi Moliya vazirligi huzuridagi budjetdan tashqari Pensiya jamg‘armasi sektor mudiri

Abror Xolmatov. — Yangi tahrirda esa eng kam oylik ish haqining 4,5 baravari to‘lanishi mustahkamlanib, shu bilan to‘langan sug‘urta badallari bir yil ish stajiga hisobga olinadigan bo‘ldi.

Umuman, amaliyotga kiritilgan ushbu yangiliklar “mehnat migratsiyasi” deb atalgan tizimni tartibga solish, mavjud muammolar va uning salbiy oqibatlarini bartaraf etish, ko‘ngilsiz holatlar takrorlanmasligi uchun sa’y-harakatlarni ro‘yobga chiqarish yo‘lidagi muhim huquqiy hujjat bo‘ldi.

Endi bundan buyon vatandoshlarimiz to‘rt-besh so‘m topish ilinjida musofirchilikda aziz jonini xatarga qo‘ymasligi, begona yurtlarda sarson-sargardon yurib xo‘rlanmasligi, o‘z oilasi bag‘rida, ona Vatanida emin-erkin mehnat qilib, munosib hayot kechirishi uchun mustahkam huquqiy asos bor. Qaror ana shunday ezgu maqsadlarga xizmat qilishi shubhasiz.

(Manba: Xalq so‘zi” gazetasi)

 

Ish jarayonida foydalanilgan manba lavhasi qo‘yilishi shart

YANGILIKLAR XABARNOMASI №130 TIV Jamoatchilik va OAV bilan aloqalar boshqarmasi 2018-yil 5-iyul

posted 16 Jul 2018, 11:04 by Webmaster Ambasciata

PREZIDENT.. 1

Ertasini o‘ylagan mamlakat yoshlarini e’tiborsiz qoldirmaydi 1

Rasmiy.. 3

O‘zbekistonda choy yetishtirishni rivojlantirish markazi tashkil etildi 3

Mintaqalar: surxondayo.. 4

Surxondaryoda joriy mavsumda 5 ming 100 tonna baliq mahsuloti yetishtirish mo‘ljallanmoqda. 4

Markaziy Osiyo – O‘zbekiston tashqi siyosatining ustuvor yo‘nalishi. 4

O‘zbekiston Respublikasi bilan Tojikiston Respublikasi o‘rtasida o‘zbek-tojik Davlat chegarasining alohida uchastkalari to‘g‘risidagi Shartnomani (Dushanbe, 2018-yil 9-mart) ratifikatsiya qilish haqida. 4

Ilova.. 5

Mediatsiya to‘g‘risida. 5

  

PREZIDENT

Ertasini o‘ylagan mamlakat yoshlarini e’tiborsiz qoldirmaydi

O‘zbekiston Respublikasi Prezidenti Shavkat Mirziyoyev raisligida 2018-yil 4-iyul kuni yoshlar bilan manzilli va tizimli ishlash, ular uchun munosib sharoitlar yaratish, bandligini ta’minlash masalalariga bag‘ishlangan videoselektor yig‘ilishi bo‘lib o‘tdi.

Yig‘ilishda O‘zbekiston Respublikasi Oliy Majlisi Senati Raisi, Qonunchilik palatasi Spikeri, siyosiy partiyalar rahbarlari, Bosh vazir va uning o‘rinbosarlari, Prezidentning Davlat maslahatchilari, Qoraqalpog‘iston Respublikasi Jo‘qorg‘i Kengesi raisi, viloyatlar va Toshkent shahri hokimlari, vazirlik, idora va tashkilotlar rahbarlari ishtirok etdi.

Ta’kidlanganidek, har bir yosh jamiyatda o‘z o‘rnini topishi uchun munosib sharoit yaratish keyingi yillarda amalga oshirilayotgan islohotlarning ustuvor yo‘nalishlaridan biridir. Xususan, “Kamolot” yoshlar ijtimoiy harakati negizida O‘zbekiston yoshlar ittifoqi tashkil etildi. Yoshlar bilan ishlashda yangi tizim va yondashuvlar amaliyotga joriy etilmoqda. Mamlakatimizda 30-iyun Yoshlar kuni sifatida birinchi marta keng nishonlandi.

Ammo yoshlar bilan ishlashda hamon kamchiliklar mavjud. Jumladan, katta maqsadlar bilan tuzilgan Yoshlar ittifoqi yoshlar bilan manzilli va tizimli ishlashga, ularning muammolarini hal etishga yetarlicha e’tibor bermayapti. Tashkilot o‘tkazayotgan ayrim tadbirlar dabdababozlik, o‘zini “ko‘z-ko‘z” qilishga o‘xshab qolayapti. Joylardagi 4 sektor rahbarlarining aksariyati hali yoshlar masalasi bilan faol shug‘ullanmayapti. Ichki ishlar idoralari, mahalla qo‘mitalari, boshqa jamoatchilik tashkilotlari va ta’lim muassasalarining bu boradagi ishlari qoniqarsiz. Tuman va shahar hokimlarining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosarlari, tuman ichki ishlar bo‘limi boshlig‘ining yoshlar masalalari bo‘yicha o‘rinbosarlari jonbozlik ko‘rsatayapti, deb bo‘lmaydi. Aksincha, bu mas’ul lavozimlar ayrim hollarda vakant bo‘lib qolmoqda.

Buning oqibatida yoshlar jinoyatga qo‘l urishining oldi olinmayapti. Joriy yilning o‘tgan davrida sodir etilgan 17,5 ming jinoyatning qariyb 31 foizi yoshlar hisobiga to‘g‘ri kelishi buning tasdig‘idir. Mamlakat bo‘yicha jinoyat sodir etgan 22 ming shaxsning 11 ming nafarini yoshlar tashkil etib, bu ko‘rsatkich Andijon, Buxoro, Samarqand, Farg‘ona viloyatlari va Toshkent shahrida, ayniqsa, yuqoriligicha qolmoqda.

Qashqadaryo viloyatida jinoyat sodir etgan yoshlarning 70 foizini o‘qimaydigan va ishlamaydiganlar tashkil etgan. Bu ko‘rsatkich Andijon viloyatida 57, Surxondaryo viloyatida 43, Jizzax viloyatida 42 foizga teng.

Afsuski, nafaqat uyushmagan yoshlar, balki kollej va maktab o‘quvchilari orasida ham jinoyatlarni sezilarli darajada kamaytirish ta’minlanmayapti. Joriy yilning o‘tgan davrida jami 371 o‘quvchi jinoyat sodir etgan. Kollej o‘quvchilari jinoyatlari soni Sirdaryo, Jizzax, Namangan va Samarqand viloyatlarida keskin oshgan. Maktab o‘quvchilari jinoyati asosan Jizzax, Navoiy, Buxoro, Sirdaryo, Farg‘ona viloyatlari va Qoraqalpog‘iston Respublikasiga to‘g‘ri keladi.

Xorazm, Andijon, Namangan, Qashqadaryo va Toshkent viloyatlarida voyaga yetmaganlar tomonidan qotillik jinoyatlari sodir etilgani yanada ayanchlidir.

Joriy yilning o‘tgan davrida Toshkent shahrida boshqa viloyatlardan kelib, qarovsiz va nazoratsiz yurgan 1 ming 700 ga yaqin voyaga yetmaganlar aniqlangan, ularning 500 nafari maktab va 670 nafari kollej o‘quvchilaridir.

Shu munosabat bilan Yoshlar ittifoqi, Ichki ishlar vazirligi, Bosh prokuratura, Xalq ta’limi vazirligi, Oliy va o‘rta maxsus ta’lim vazirligi rahbarlariga yoshlar bilan ishlashni takomillashtirish, qarovsizlik va nazoratsizlikning oldini olish, ular o‘rtasida jinoyatlarni keskin qisqartirishga qaratilgan aniq takliflar ishlab chiqish vazifasi topshirildi.

Ayni paytda ichki ishlar idoralarida profilaktika hisobida turuvchi voyaga yetmaganlar uchun tashkil etilayotgan “Tarbiya-sport oromgohlari” ishini tubdan qayta ko‘rib chiqish va natijadorligini ta’minlashga qaratilgan aniq tadbirlarni amalga oshirish zarurligi ta’kidlandi.

Yoshlar o‘rtasidagi muammolar, jumladan, jinoyatchilikning ildizi aksar hollarda ishsizlikka borib taqaladi. Joylarda yoshlarning bandligini ta’minlash borasida jiddiy muammolar mavjud. 1 ming 700 dan ziyod mehnat yarmarkasi o‘tkazilganiga qaramay, ularda ishtirok etgan yoshlarning atigi 5 foizigina ishga joylashtirilgani, so‘nggi bir yilda 509 ming nafar yoshlar uzoq muddatga chel ellarga chiqib ketgani ishga mas’uliyatsiz yondashuvdan dalolat beradi.

Yoshlarning bandligini ta’minlash bo‘yicha mutlaqo yangi tizim joriy qilishimiz kerak, dedi davlatimiz rahbari.

Ayni vaqtda yoshlarni biznes bilan shug‘ullanishga faol jalb qilish uchun sharoit yaratish, ularni mehnat bozorida talab yuqori bo‘lgan mutaxassislik va biznes yuritish ko‘nikmalariga o‘qitish bo‘yicha Toshkent viloyatining Quyi Chirchiq tumani va Toshkent shahrining Chilonzor tumanida yangi tizim sinovdan o‘tkazilmoqda. Buning uchun mutasaddi idoralar vakillaridan iborat ishchi guruh tuzilib, 14 yoshdan 30 yoshgacha bo‘lgan yoshlar to‘g‘risidagi batafsil ma’lumotlarni o‘zida aks ettirgan tuman pasportlari ishlab chiqildi.

Quyi Chirchiq tumani misolida oladigan bo‘lsak, bu yerda yoshlarning hisobotlarda ko‘rsatilganidek 2,5 mingi emas, balki 6,3 mingdan ziyodi ishsiz ekani aniqlangan. Tuman yoshlarini qiynab kelayotgan muammolarning aksariyati joyida hal etilgan. Ijtimoiy-iqtisodiy vaziyat va yoshlarning ijtimoiy faolligidan kelib chiqqan holda, tumandagi 37 ta mahallaning 13 tasi “og‘ir”, 18 tasi “qoniqarsiz” va 6 tasi “qoniqarli” toifaga ajratilib, ularni bosqichma-bosqich “yaxshi” toifasiga o‘tkazish bo‘yicha manzilli ishlar yo‘lga qo‘yilgan. Jumladan, “Yoshlar mehnat guzarlari” tashkil etish uchun bino va yer maydonlari ajratildi, bo‘sh ish o‘rinlari yarmarkasi va boshqa tadbirlar natijasida 1 ming 200 dan ziyod ishsiz yoshning bandligi ta’minlandi, tadbirkorlik faoliyati uchun yoshlarga 2,3 milliard so‘m kredit ajratildi(OR MB kursi 11.07.2018 da, 1$= 7846.27 som).

Ushbu tajriba asosida Yoshlar kuni arafasida “Yoshlar – kelajagimiz” Davlat dasturi tasdiqlandi va uni barcha tuman va shaharlarda amalga oshirish boshlandi. Dastur ijrosi uchun Yoshlar ittifoqi huzurida “Yoshlar – kelajagimiz” jamg‘armasi hamda uning tuman va shahar filiallari tashkil etildi. Bu tuzilma mablag‘laridan yoshlarning biznes loyihalari uchun yillik 7 foiz stavka bilan imtiyozli kredit beriladi. Dasturda har bir tumanda ajratiladigan kredit hajmi va uni oluvchilar soni, kredit beriladigan faoliyat yo‘nalishlari, buning natijasida yaratilishi zarur bo‘lgan ish o‘rinlari miqdori aniq belgilab qo‘yilgan. Shuningdek, har bir fermerga bittadan band bo‘lmagan yoshni biriktirish ko‘zda tutilgan.

Davlatimiz rahbari muvaffaqiyatga erishgan yosh tadbirkorlar orasidan 2 hafta muddatda Jamg‘armaning tuman va shahar filiallari rahbarlarini tayinlash, Investitsiya va Ijtimoiy masalalar komplekslarining respublika va hududiy organlari hamda tijorat banklari xodimlarining 30 foizini lavozimi va ish haqini saqlagan holda, yangi tuzilmaga, uning tuman va shahar filiallariga biriktirish lozimligini ta’kidladi.

Dastur ijrosini samarali muvofiqlashtirib borish uchun Bosh vazirga Yoshlar tadbirkorligini rivojlantirish bo‘yicha respublika komissiyasi a’zolarini har bir hududga shaxsan mas’ul etib biriktirish hamda ular boshchiligida davlat idoralari, jamoat tashkilotlari rahbar xodimlari va viloyat prokurorlaridan iborat tarkibda ishchi guruhlar tashkil etish vazifasi topshirildi.

Hokimlar va sektor rahbarlari har hafta kamida ikki kun uyushmagan, hech qayerda ishlamaydigan yoshlar bilan uchrashib, ularning muammolarini o‘rganishi, eng avvalo, bandligini ta’minlash choralarini ko‘rishi lozimligi qayd etildi.

Yig‘ilishda yoshlarni ma’nan barkamol etib tarbiyalash, ularni turli oqimlar va yot g‘oyalar ta’siridan asrash masalalariga alohida e’tibor qaratildi. Buning uchun yoshlar bilan ma’naviy-ma’rifiy yo‘nalishdagi ishlarni yanada jonlantirish, ularni muzey, teatr va boshqa madaniy-ma’naviy maskanlar, sport musobaqalari, ilm-fan, sport va amaliy san’at to‘garaklariga faol jalb etish orqali bo‘sh vaqtini mazmunli o‘tkazishini tashkil etish zarur.

Farzand tarbiyasi va yurish-turishidan ogoh bo‘lmasak, ularni ilmu-hunarga o‘rgatmasak, ko‘zi mehnatda qotmasa, munosib ish topib bermasak, ularni zararli ta’sirlardan himoya qilish qiyin bo‘ladi, dedi Prezidentimiz.

Shundan kelib chiqqan holda Yoshlar ittifoqi, Respublika Ma’naviyat va ma’rifat markazi, Yoshlar muammolarini o‘rganish va istiqbolli kadrlarni tayyorlash institutiga yoshlarni ma’nan barkamol etib tarbiyalash, ularda mafkuraviy immunitetni shakllantirish va yot g‘oyalar ta’siriga tushib qolishining oldini olishga qaratilgan ta’sirchan, amaliy chora-tadbirlarni ishlab chiqish topshirildi.

Yig‘ilishda ushbu dolzarb ishga senatorlar, Oliy Majlis va mahalliy Kengashlar deputatlarini faol jalb etish zarurligi alohida ta’kidlandi. Zotan, xalq vakillari sifatida deputatlar korpusi yoshlar kelajagi uchun hammadan ham ko‘proq jon kuydirishi lozim. Ular joylarda siyosiy partiyalarning yoshlar qanotlari faoliyatini tubdan takomillashtirish, amaliy uchrashuv va tadbirlar orqali mazkur Dastur ijrosini ta’minlashda faol ishtirok etishi, hududlarda faoliyat olib boradigan ishchi guruhlarga amaliy yordam ko‘rsatishi zarur.

Voyaga yetmagan qizlar o‘rtasida erta turmush va tug‘ruqlar soni ko‘paygani bilan bog‘liq muammolar ham muhokama qilindi. Afsuski, erta turmush qurish va ajrashish muammosi bo‘yicha joylarda faqatgina ota-onalarni aybdor qilish bilan cheklanish hollari kuzatilmoqda. Aslida bo‘lar ish bo‘lganidan keyin emas, balki salbiy holatlarni yuzaga keltirmaslik uchun oldindan manzilli ishlash tizimini joriy etish kerak.

Shu munosabat bilan Xotin-qizlar qo‘mitasi, “Oila” ilmiy-amaliy tadqiqot markazi, Fuqarolarning o‘zini o‘zi boshqarish organlari faoliyatini muvofiqlashtirish kengashi, Sog‘liqni saqlash, Xalq ta’limi vazirliklariga bu yo‘nalishdagi ishlarni tanqidiy qayta ko‘rib chiqish va ta’sirchan chora-tadbirlarni belgilash vazifasi topshirildi.

Videoselektorda mutasaddi va joylardagi rahbarlar jam bo‘lgani bois ayni kunlardagi yana bir dolzarb masala – g‘o‘za parvarishi bilan bog‘liq chora-tadbirlarga ham to‘xtalib o‘tildi.

Bu yil ob-havoning quruq va salqin kelishi sababli g‘o‘za rivoji 10-15 kunga, ba’zi joylarda 20-25 kunga kechikkani qayd etildi. G‘o‘za parvarishidagi qoloqlikni bartaraf etish, kafolatlangan hosil yaratish bo‘yicha ko‘rsatmalar berildi.

Yig‘ilishda 5 iyuldan 5 sentyabrga qadar “Hosilga-hosil qo‘shish dolzarb ikki oyligi” e’lon qilindi. Bu borada amalga oshirilishi zarur bo‘lgan ishlar belgilab olindi.

(Manba: O‘zA)

Rasmiy

O‘zbekistonda choy yetishtirishni rivojlantirish markazi tashkil etildi

O‘zbekistonda choy yetishtirishni rivojlantirish markazi tashkil etildi. Uning asosiy vazifasi choy urug‘lari va ko‘chatlarini tayyorlashga ko‘maklashishdan iborat.

O‘zbekistonda Choy yetishtirishni rivojlantirish ilmiy-ishlab chiqarish markazi tashkil etildi. Bu haqda Vazirlar Mahkamasining «Choy yetishtirishni tashkil etish va aholini mamlakatimizda ishlab chiqarilgan sifatli choy hamda choy mahsuloti bilan ta’minlash chora-tadbirlari to‘g‘risi"gi qarorida so‘z boradi.

Adliya vazirligi rasmiy Telegram-kanalida xabar qilinishicha, markazning asosiy vazifasi choy urug‘lari va ko‘chatlarini tayyorlashni tashkil qilish, bu sohada mehnat qilayotgan fermer xo‘jaliklari hamda tadbirkorlarni qo‘llab-quvvatlash, choy yetishtirish texnologiyasini ishlab chiqish va yirik sanoat choy plantatsiyalarini tashkil qilish hisoblanadi.

(Manba: )

mintaqalar: surxondayo

Surxondaryoda joriy mavsumda 5 ming 100 tonna baliq mahsuloti yetishtirish mo‘ljallanmoqda

Surxondaryo viloyatida joriy mavsumda 5 ming 100 tonna arzon va sifatli baliq mahsuloti yetishtirish mo‘ljallanmoqda.

Viloyatda baliq yetishtirishni ko‘paytirish, sohaga intensiv zamonaviy texnologiyalarni joriy etish, baliqchilik xo‘jaliklarini har tomonlama qo‘llab-quvvatlash, moddiy-texnik bazasini mustahkamlashga alohida e’tibor qaratilayotir.

“Surxondaryobaliqsanoat” mas’uliyati cheklangan jamiyatidan olingan ma’lumotlarga ko‘ra, bu yilgi mavsumda viloyatdagi 230 baliqchilik xo‘jaliklaridagi sun’iy suv havzalarida2 ming 527 tonna, yetti baliqchilik xo‘jaligida 1 ming 453 tonna baliq yetishtiriladi.Ikkita baliqchilik xo‘jaligi Vyetnam texnologiyasi asosida barpo etayotgan 6 gektar kichik suv havzalaridan 600 tonna, bitta yopiq suv aylanma tizimidan 300 tonna hamda 570 gektar sholi maydonlaridan 220 tonna baliq mahsulotlari olinadi.

– Xalqimizning arzon va sifatli luqmai halolga ehtiyojiniqoplash uchun har bir tumanning alohida dasturi ishlab chiqilib, vazifalar belgilandi, – deydi “Surxondaryobaliqsanoat” mas’uliyati cheklangan jamiyati direktori o‘rinbosari F.Sattarov. – Ishchi guruhi tashkil etilib, joylardagi baliqchilik xo‘jaliklarini inventarizatsiya qilish yo‘lga qo‘yildi. Baliqchilik loyihalarini ishga tushirish istagi bo‘lgan tashabbuskorlar taklifi o‘rganilib, tegishli tartibda ko‘rib chiqilmoqda. Dasturga muvofiq, bu yil viloyatda 470 gektar yangi sun’iy ko‘llar barpo etish ko‘zda tutilgan. Hozirgacha Jarqo‘rg‘on tumanida 33,8, Muzrabot tumanida 18,1, Sho‘rchi tumanida 10,6, Qiziriq tumanida 6,5 gektar yer ajratildi. Boshqa tumanlarda ham sun’iy ko‘llar uchun yer maydonlari ajratishga e’tibor kuchaytirilayotir. Bu jarayonda suv resurslaridan oqilona foydalanish choralari ko‘rilmoqda.

Viloyatda inkubatsiya sexlari tashkil etib, baliq chavoqlari ishlab chiqarish yo‘lida ham muayyan ishlar amalga oshirilmoqda. Shu maqsadda “Surxon Agro Fish prom KO” mas’uliyati cheklangan jamiyatining yillik quvvati 50 million dona bo‘lgan inkubatsiya sexida qurilish ishlari olib borilmoqda. “Karp havzasi” mas’uliyati cheklangan jamiyatining yillik quvvati 50 million dona bo‘lgan inkubatsiya sexi ta’mirlanib, ishga tushirildi.

Ma’lumotlarga ko‘ra, mavsumda mavjud 5 ming 17 gektar tabiiy suv havzalarini 510 ming dona baliq chavoqlari bilan baliqlantirish belgilangan. O‘tgan davrda 3 ming gektardan ortiq suv havzasiga baliq chavog‘i tashlandi. 1 ming 113 gektar sun’iy suv havzalariningming gektarga yaqin maydoni 2 million 500 donadan ortiq baliq chavog‘i bilan baliqlantirildi.

Tabiiy ko‘llar atrofida baliq chavoqlari yetishtiriladigan reproduktor havzalar bunyod etish, tabiiy suv havzalariga qafas (sadok) moslamalarini o‘rnatish, yangi loyihalarni moliyaviy qo‘llab-quvvatlash yuzasidan amalga oshirilayotgan ishlar ham vohada baliqchilikni yuksaltirib, aholini arzon, parhezbop baliq mahsulotlari bilan uzluksiz ta’minlashga xizmat qiladi.

(Manba: O‘zA)

Markaziy Osiyo – O‘zbekiston tashqi siyosatining ustuvor yo‘nalishi

O‘zbekiston Respublikasi bilan Tojikiston Respublikasi o‘rtasida o‘zbek-tojik Davlat chegarasining alohida uchastkalari to‘g‘risidagi Shartnomani (Dushanbe, 2018-yil 9-mart) ratifikatsiya qilish haqida

O‘zbekiston Respublikasining Qonuni

Qonunchilik palatasi tomonidan 2018-yil 31-mayda qabul qilingan, Senat tomonidan 2018-yil 28-iyunda ma’qullangan

O‘zbekiston Respublikasi bilan Tojikiston Respublikasi o‘rtasida o‘zbek-tojik Davlat chegarasining alohida uchastkalari to‘g‘risidagi Shartnoma (Dushanbe, 2018-yil 9-mart) ratifikatsiya qilinsin.

O‘zbekiston Respublikasining Prezidenti Sh.MIRZIYOYEV

Toshkent shahri, 2018-yil 3-iyul

№ O‘RQ—481

(Manba: Xalq so‘zi” gazetasi)

ilova

Mediatsiya to‘g‘risida

O‘zbekiston Respublikasining Qonuni

Qonunchilik palatasi tomonidan 2018-yil 12-iyunda qabul qilingan, Senat tomonidan 2018-yil 28-iyunda ma’qullangan

1-bob. Umumiy qoidalar

1-modda. Ushbu Qonunning maqsadi

Ushbu Qonunning maqsadi mediatsiya sohasidagi munosabatlarni tartibga solishdan iborat.

2-modda. Mediatsiya to‘g‘risidagi qonun hujjatlari

Mediatsiya to‘g‘risidagi qonun hujjatlari ushbu Qonun va boshqa qonun hujjatlaridan iboratdir.

Agar O‘zbekiston Respublikasining xalqaro shartnomasida O‘zbekiston Respublikasining mediatsiya to‘g‘risidagi qonun hujjatlarida nazarda tutilganidan boshqacha qoidalar belgilangan bo‘lsa, xalqaro shartnoma qoidalari qo‘llaniladi.

3-modda. Ushbu Qonunning amal qilish sohasi

Ushbu Qonunning amal qilishi fuqarolik huquqiy munosabatlardan, shu jumladan tadbirkorlik faoliyatini amalga oshirish munosabati bilan kelib chiqadigan nizolarga, shuningdek yakka mehnat nizolariga va oilaviy huquqiy munosabatlardan kelib chiqadigan nizolarga mediatsiyani qo‘llash bilan bog‘liq munosabatlarga nisbatan, agar qonunda boshqacha qoida nazarda tutilmagan bo‘lsa, tatbiq etiladi.

Ushbu Qonunning amal qilishi mediatsiyada ishtirok etmayotgan uchinchi shaxslarning huquqlari va qonuniy manfaatlariga, jamoat manfaatlariga daxl qiladigan yoki daxl qilishi mumkin bo‘lgan nizolarga nisbatan tatbiq etilmaydi.

4-modda. Asosiy tushunchalar

Ushbu Qonunda quyidagi asosiy tushunchalar qo‘llaniladi:

mediatsiya – kelib chiqqan nizoni taraflar o‘zaro maqbul qarorga erishishi uchun ularning ixtiyoriy roziligi asosida mediator ko‘magida hal qilish usuli;

mediator – mediatsiyani amalga oshirish uchun taraflar tomonidan jalb etiladigan shaxs;

mediativ kelishuv – mediatsiyani qo‘llash natijasida mediatsiya taraflari tomonidan erishilgan kelishuv;

mediatsiya tartib-taomilini amalga oshirish to‘g‘risidagi kelishuv – taraflarning tuzilgan paytdan e’tiboran mediatsiya tartib-taomili amalga oshiriladigan kelishuvi;

mediatsiyani qo‘llash to‘g‘risidagi kelishuv – nizo kelib chiqquniga qadar yoki u kelib chiqqanidan so‘ng taraflarning nizoni mediatsiya tartib-taomilini amalga oshirgan holda hal etish zarurligi to‘g‘risida tuzilgan kelishuvi.

5-modda. Mediatsiyaning asosiy prinsiplari

Mediatsiya maxfiylik, ixtiyoriylik, taraflarning hamkorligi va teng huquqliligi, mediatorning mustaqilligi va xolisligi prinsiplari asosida amalga oshiriladi.

6-modda. Maxfiylik prinsipi

Mediatsiya ishtirokchilari mediatsiya jarayonida o‘zlariga ma’lum bo‘lib qolgan ma’lumotlarni ularni taqdim etgan mediatsiya tarafining, uning huquqiy vorisining yoki vakilining yozma roziligisiz oshkor qilishga haqli emas.

Mediatsiya ishtirokchilari o‘zlariga mediatsiya jarayonida ma’lum bo‘lib qolgan holatlar haqida guvoh sifatida so‘roq qilinishi mumkin emas, shuningdek ulardan mediatsiyaga taalluqli axborotni talab qilib olish mumkin emas, bundan qonunda nazarda tutilgan hollar mustasno.

7-modda. Ixtiyoriylik prinsipi

Mediatsiya taraflarning mediatsiyani qo‘llash to‘g‘risidagi kelishuvda ifodalangan o‘zaro ixtiyoriy xohish-istagi bo‘lgan taqdirda qo‘llaniladi.

Mediatsiya taraflari mediatsiyani qo‘llashdan uning istalgan bosqichida voz kechishga haqli.

Taraflar o‘zaro maqbul kelishuvni muhokama qilish uchun masalalarni tanlashda erkindir.

Mediatsiya tartib-taomilini amalga oshirish vaqtida yarashishga majburlash taqiqlanadi.

8-modda. Taraflarning hamkorligi va teng huquqliligi prinsipi

Mediatsiya tartib-taomili mediativ kelishuv shartlariga bir tomonlama ta’sir ko‘rsatishni istisno etgan holda amalga oshirilishi kerak.

Mediatsiya tartib-taomili nizo xususida taraflarning hamkorligi asosida o‘zaro maqbul qarorga erishish maqsadida amalga oshiriladi.

Mediatsiya taraflari mediatorni, mediatsiya tartib-taomilini amalga oshirish tartibini, mediatsiya tartib-taomilidagi o‘z nuqtai nazarini, bu nuqtai nazarni himoya qilish usullari va vositalarini tanlashda, axborot olishda, mediativ kelishuv shartlarining o‘zaro maqbulligini baholashda teng huquqlardan foydalanadi hamda ularning zimmasida teng majburiyatlar bo‘ladi.

9-modda. Mediatorning mustaqilligi va xolisligi prinsipi

Mediatsiya tartib-taomilini amalga oshirishda mediator mustaqildir. Mediatsiya tartib-taomilini amalga oshirishda mediatorning faoliyatiga biror-bir tarzda aralashishga yo‘l qo‘yilmaydi.

Mediator xolis bo‘lishi, mediatsiya tartib-taomilini taraflarning manfaatlarini ko‘zlab amalga oshirishi va mediatsiyada ularning teng ishtirokini ta’minlashi, taraflarga o‘z majburiyatlarini bajarishi hamda o‘zlariga berilgan huquqlarni amalga oshirishi uchun zarur shart-sharoitlar yaratishi kerak. Mediatorning mustaqilligi va xolisligiga to‘sqinlik qiladigan holatlar mavjud bo‘lgan taqdirda, u mediatsiya tartib-taomilini amalga oshirishdan voz kechishi kerak.

2-bob. Mediatsiya ishtirokchilari hamda ularning huquq va majburiyatlari

10-modda. Mediatsiya ishtirokchilari

Taraflar va mediator mediatsiya ishtirokchilaridir. Jismoniy shaxslar ham, yuridik shaxslar ham mediatsiya taraflari bo‘lishi mumkin.

Mediatsiya ikki va undan ortiq taraflar o‘rtasida bo‘lishi, shuningdek bir yoki bir nechta mediator tomonidan amalga oshirilishi mumkin.

Taraflar mediatsiyada shaxsan yoki o‘z vakili orqali qonun hujjatlariga muvofiq ishtirok etadi.

11-modda. Mediatsiya taraflarining huquq va majburiyatlari

Mediatsiya taraflari:

mediatorni ixtiyoriy ravishda tanlashga;

mediatordan voz kechishga;

mediatsiyaning istalgan bosqichida unda ishtirok etishdan voz kechishga;

mediatsiya tartib-taomilini amalga oshirishda qonun hujjatlarida belgilangan tartibda shaxsan yoki o‘z vakillari orqali ishtirok etishga haqli.

Mediatsiya taraflari o‘z o‘rtalarida tuzilgan mediativ kelishuvni ushbu kelishuvda nazarda tutilgan tartibda va muddatlarda bajarishi shart.

Mediatsiya taraflari qonun hujjatlariga muvofiq boshqa huquqlarga ham ega bo‘lishi va ularning zimmasida o‘zga majburiyatlar ham bo‘lishi mumkin.

12-modda. Mediatorga doir talablar

Mediatorning faoliyati professional yoki noprofessional asosda amalga oshirilishi mumkin.

Professional asosdagi mediator faoliyatini O‘zbekiston Respublikasi Adliya vazirligi tomonidan tasdiqlanadigan mediatorlarni tayyorlash dasturi bo‘yicha maxsus o‘quv kursidan o‘tgan, shuningdek Professional mediatorlar reyestriga kiritilgan shaxs amalga oshirishi mumkin.

Noprofessional asosdagi mediator faoliyatini yigirma besh yoshga to‘lgan va mediator vazifalarini bajarishga rozilik bergan shaxs amalga oshirishi mumkin.

Noprofessional asosdagi mediator faoliyatini amalga oshiruvchi shaxs ham O‘zbekiston Respublikasi Adliya vazirligi tomonidan tasdiqlanadigan mediatorlarni tayyorlash dasturi bo‘yicha maxsus o‘quv kursidan o‘tishi mumkin.

Quyidagilar mediator bo‘lishi mumkin emas:

davlat vazifalarini bajarish uchun vakolat berilgan yoki unga tenglashtirilgan shaxs;

muomala layoqati cheklangan yoki muomalaga layoqatsiz deb topilganligi to‘g‘risida sudning qonuniy kuchga kirgan hal qiluv qarori mavjud bo‘lgan shaxs;

sudlanganlik holati tugallanmagan yoki sudlanganligi olib tashlanmagan shaxs;

o‘ziga nisbatan jinoiy ta’qib amalga oshirilayotgan shaxs.

Mediatorning faoliyati tadbirkorlik faoliyati hisoblanmaydi.

13-modda. Mediatorning huquqlari, majburiyatlari va javobgarligi

Mediator:

mediatsiya tartib-taomilini amalga oshirish chog‘ida bir vaqtning o‘zida ham taraflarning barchasi bilan, ham taraflarning har biri bilan alohida-alohida uchrashuvlar o‘tkazishga, ularga nizoni hal etishga doir og‘zaki va yozma tavsiyalar berishga;

mediatsiya tartib-taomilini amalga oshirishi munosabati bilan sarflagan xarajatlarining o‘rni qoplanishini talab qilishga haqli.

Mediator:

mediatsiya boshlanguniga qadar mediatsiya taraflariga mediatsiyaning maqsadini, shuningdek ularning huquq va majburiyatlarini tushuntirishi;

mediatsiya tartib-taomilini amalga oshirish chog‘ida faqat mediatsiya taraflarining roziligi bilan harakat qilishi;

nizo yuzasidan o‘zaro maqbul kelishuvga erishishga taraflarni ishontirishning qonuniy vositalari va usullaridan foydalanishi;

o‘zining mustaqilligi va xolisligiga ta’sir ko‘rsatishi mumkin bo‘lgan holatlar mavjud bo‘lsa yoki yuzaga kelsa, bu haqda taraflarga ma’lum qilishi shart.

Mediator qonun hujjatlariga muvofiq boshqa huquqlarga ega bo‘lishi va uning zimmasida boshqa majburiyatlar ham bo‘lishi mumkin.

Mediator taraflar oldida mediatsiya tartib-taomilini amalga oshirish natijasida yetkazilgan zarar uchun qonun hujjatlarida belgilangan tartibda javobgar bo‘ladi.

14-modda. Professional mediatorlar reyestri

Qoraqalpog‘iston Respublikasi Adliya vazirligi, viloyatlar va Toshkent shahar adliya boshqarmalari tomonidan Professional mediatorlar reyestri yuritiladi, ushbu reyestr ularning rasmiy veb-saytlarida, shuningdek O‘zbekiston Respublikasi Adliya vazirligining rasmiy veb-saytida joylashtiriladi.

Shaxsning mediatorlarni tayyorlash dasturi bo‘yicha maxsus o‘quv kursidan o‘tishi uni Professional mediatorlar reyestriga kiritish uchun asos bo‘ladi.

Professional mediatorlar reyestrida quyidagilar bo‘lishi kerak:

mediatorning familiyasi va ismi;

mediatorning joylashgan yeri va aloqa bog‘lashga doir ma’lumotlari;

mediator ixtisoslashgan mediatsiya sohasi;

mediator mediatsiya tartib-taomilini amalga oshirishga qodir bo‘lgan til haqidagi ma’lumotlar.

3-bob. Mediatsiyani qo‘llash va mediatsiya tartib-taomilini amalga oshirish

15-modda. Mediatsiyani qo‘llash shartlari

Mediatsiya taraflarning xohish-istagi asosida qo‘llaniladi.

Mediatsiya suddan tashqari tartibda, nizoni sud tartibida ko‘rish jarayonida, sud hujjatini qabul qilish uchun sud alohida xonaga (maslahatxonaga) kirguniga qadar qo‘llanilishi mumkin.

Mediatsiya nizoni hakamlik sudida ko‘rish jarayonida ham hakamlik sudining qarori qabul qilinguniga qadar qo‘llanilishi mumkin.

Mediatsiyada ishtirok etganlik fakti aybni tan olish dalili bo‘lib xizmat qilishi mumkin emas.

16-modda. Mediatsiyani qo‘llash to‘g‘risidagi kelishuv

Mediatsiyani qo‘llash to‘g‘risidagi kelishuv shartnomadagi uning tarkibiy qismi bo‘lgan shart tarzida yoki alohida kelishuv tarzida yozma shaklda tuziladi.

Mediatsiyani qo‘llash to‘g‘risidagi kelishuvda taraflar o‘rtasida kelib chiqqan yoki kelib chiqishi mumkin bo‘lgan barcha yoki muayyan nizolar mediatsiya tartib-taomilini amalga oshirish yo‘li bilan hal etilishi kerakligi haqidagi qoida bo‘lishi lozim.

Mediatsiyani qo‘llash to‘g‘risidagi kelishuvda nizo predmeti haqidagi, mediatsiya tartib-taomilini amalga oshirish tartibi to‘g‘risidagi, mediatsiya tartib-taomilini amalga oshirish bilan bog‘liq xarajatlarda taraflarning ishtirok etish shartlari haqidagi, mediatsiya tartib-taomilini amalga oshirish muddatlari to‘g‘risidagi ma’lumotlar bo‘lishi mumkin.

17-modda. Davlat organining ish bo‘yicha mediatsiya tartib- taomilini amalga oshirish chog‘idagi harakatlari

Qonunda nazarda tutilgan hollarda, vakolatli davlat organi ishning muhokamasini qoldirib, mediatsiya tartib-taomilini amalga oshirish uchun muddat tayinlashi mumkin.

Mediatsiya tartib-taomilini amalga oshirish chog‘ida davlat organining bevosita aralashuvi taqiqlanadi.

Sudda ish qo‘zg‘atilganidan keyin mediatsiya tartib-taomilini amalga oshirishning o‘ziga xos xususiyatlari protsessual qonun hujjatlarida belgilanadi.

Sud muhokamasi jarayonida, nizoni vakolatli davlat organida ko‘rish jarayonida mediatsiya tartib-taomilini amalga oshirish chog‘ida taraflar tomonidan erishilgan mediativ kelishuv tegishli ish qaysi sud yoki vakolatli davlat organining ish yurituvida turgan bo‘lsa, darhol o‘sha sudga yoki vakolatli davlat organiga yuboriladi.

Nizo mediativ kelishuv bilan mediatsiya tartibida hal qilingan taqdirda, to‘langan davlat boji qaytarilishi lozim.

18-modda. Davlat organi ishtirokidagi nizoda mediatsiyani qo‘llash

Davlat organi ishtirokida nizo kelib chiqqan taqdirda, davlat organi mediatsiyani qo‘llash bo‘yicha choralar ko‘rishi kerak.

19-modda. Mediatsiya tartib-taomilining boshlanishi

Mediatsiya tartib-taomili mediatsiya tartib-taomilini amalga oshirish to‘g‘risida taraflar tomonidan kelishuv tuzilgan kundan e’tiboran boshlanadi.

20-modda. Mediatsiya tartib-taomilini amalga oshirish to‘g‘risidagi kelishuv

Mediatsiya tartib-taomilini amalga oshirish to‘g‘risidagi kelishuv yozma shaklda tuziladi.

Mediatsiya tartib-taomilini amalga oshirish to‘g‘risidagi kelishuvda:

taraflar haqidagi;

nizo predmeti to‘g‘risidagi;

mediatsiya tartib-taomilini amalga oshirish tartibi, mediator, taraflar tomonidan kelishilgan majburiyatlar, ularni bajarish shartlari va muddatlari haqidagi;

mediatsiya tartib-taomili amalga oshiriladigan til, joy va sana to‘g‘risidagi;

mediatsiya tartib-taomili amalga oshiriladigan muddat haqidagi ma’lumotlar bo‘lishi kerak.

21-modda. Da’vo muddatining o‘tishini to‘xtatib turish

Mediatsiya tartib-taomili amalga oshirilayotganda da’vo muddatining o‘tishi to‘xtatib turiladi.

22-modda. Mediatsiya tartib-taomilini amalga oshirish tartibi

Mediatsiya tartib-taomilini amalga oshirish uchun taraflar o‘zaro kelishuvga ko‘ra bir yoki bir necha mediatorni tanlaydi.

Mediatsiya tartib-taomilini amalga oshirish tartibi, qoida tariqasida, mediatsiya tartib-taomilini amalga oshirish to‘g‘risidagi kelishuvda belgilanadi.

Mediatsiya tartib-taomili amalga oshirilayotganda mediator o‘zining harakatlari bilan biror-bir tarafni ustun holatga qo‘yishga, xuddi shuningdek taraflardan birining huquqlari va qonuniy manfaatlarini cheklashga haqli emas.

23-modda. Mediatsiya tartib-taomilini amalga oshirish muddati

Mediatsiya tartib-taomilini amalga oshirish muddati mediatsiya tartib-taomilini amalga oshirish to‘g‘risidagi kelishuvda belgilanadi. Bunda mediator va taraflar mediatsiya tartib-taomili o‘ttiz kundan ortiq bo‘lmagan muddatda tugallanishi uchun barcha mumkin bo‘lgan choralarni ko‘rishi kerak. Zarur bo‘lgan taqdirda, mediatsiya tartib-taomilini amalga oshirish muddati taraflarning o‘zaro roziligi bilan o‘ttiz kungacha uzaytirilishi mumkin.

24-modda. Mediatsiyaning tugatilishi

Mediatsiya quyidagi holatlar munosabati bilan tugatiladi:

taraflar tomonidan mediativ kelishuv tuzilganligi;

nizo xususida o‘zaro maqbul bo‘lgan qarorga erishish imkoniyati yo‘qligi;

mavjud ixtiloflar bo‘yicha kelishuvga erishmay turib mediatsiyani tugatish to‘g‘risida taraflarning kelishuvi tuzilganligi (mediatsiya tartib-taomilini amalga oshirish to‘g‘risida yozma kelishuv mavjud bo‘lgan taqdirda);

biror-bir tarafning mediatsiyani davom ettirishdan voz kechishni ma’lum qilganligi;

mediatsiya tartib-taomilini amalga oshirish muddatlari o‘tganligi.

25-modda. Mediatsiyani qo‘llash chog‘idagi cheklovlar

Mediatsiyani qo‘llash chog‘ida mediator:

ayni bir nizo bo‘yicha biror-bir tarafning vakili bo‘lishga, bundan qonun hujjatlarida nazarda tutilgan va uning ishtirok etishiga har ikkala tarafning o‘zaro roziligi bo‘lgan hollar mustasno;

biror-bir tarafga yuridik, maslahat yordami yoki boshqa yordam ko‘rsatishga;

agar u mediatsiyani amalga oshirish natijasidan shaxsan (bevosita yoki bilvosita) manfaatdor bo‘lsa, shu jumladan taraflardan biri bo‘lgan shaxs bilan qarindoshlik munosabatlarida bo‘lsa, mediator faoliyatini amalga oshirishga, bundan uning ishtirok etishiga har ikkala tarafning o‘zaro roziligi bo‘lgan hollar mustasno;

taraflarning roziligisiz nizoning mohiyati bo‘yicha oshkora bayonotlar berishga haqli emas.

26-modda. Mediatsiyaga taalluqli axborotning maxfiyligi

Taraflar, mediator, shuningdek mediatsiya tartib-taomilini amalga oshirishda hozir bo‘lgan boshqa shaxslar muhokamaning mediatsiya predmeti bo‘lgan nizo bilan bog‘liq bo‘lgan-bo‘lmaganligidan qat’i nazar, agar taraflar boshqacha qoida haqida kelishib olmagan bo‘lsa, muhokama jarayonida:

taraflardan birining mediatsiyani qo‘llash to‘g‘risidagi taklifi haqidagi, xuddi shuningdek taraflardan biri uni amalga oshirishda ishtirok etishga tayyor ekanligi to‘g‘risidagi;

nizoni hal etish ehtimoli xususida taraflardan biri bildirgan fikrlar yoki takliflar haqidagi;

mediatsiya tartib-taomilini amalga oshirish jarayonida taraflardan biri tomonidan bildirilgan e’tiroflar to‘g‘risidagi;

taraflardan biri mediatorning yoki ikkinchi tarafning nizoni hal etish haqidagi taklifini qabul qilishga tayyorligi to‘g‘risidagi axborotni havola qilishga haqli emas.

27-modda. Mediatsiyaga taalluqli axborotni mediator tomonidan oshkor qilish sharti

Agar mediator taraflarning biridan mediatsiyaga taalluqli axborotni olgan bo‘lsa, u bu axborotni faqat uni taqdim etgan tarafning roziligi bilan boshqa tarafga oshkor qilishi mumkin.

28-modda. Mediatorning faoliyatiga haq to‘lash

Professional asosdagi mediatorning faoliyati haq evaziga yoki tekin amalga oshirilishi mumkin.

Noprofessional asosdagi mediatorning faoliyati tekin amalga oshiriladi.

Noprofessional mediatorga uning mediatsiya tartib-taomilini amalga oshirish bilan bog‘liq holda qilgan xarajatlarining, shu jumladan nizoni ko‘rib chiqish joyiga borib kelish uchun yo‘l haqi, yashash va ovqatlanish xarajatlarining o‘rni qoplanishi mumkin.

Haq to‘lash va xarajatlarning o‘rnini qoplash taraflar tomonidan, agar ular boshqacha qoida haqida kelishib olmagan bo‘lsa, teng ulushlarda amalga oshiriladi.

Mediator mediatsiya tartib-taomilini amalga oshirishni rad etgan taqdirda, u mediatsiya taraflari tomonidan o‘ziga to‘langan pul mablag‘larini qaytarib berishi shart.

29-modda. Mediativ kelishuv

Mediatsiya tartib-taomilini amalga oshirish natijalari bo‘yicha taraflar kelib chiqqan nizo xususida o‘zaro maqbul qarorga erishgan taqdirda, taraflar o‘rtasida yozma shaklda mediativ kelishuv tuziladi.

Davlat organi yoki boshqa organ tomonidan qaysi shaxsning manfaatlarini ko‘zlab da’vo taqdim etilgan bo‘lsa, o‘sha shaxs mazkur davlat organining yoki boshqa organning ishtirokisiz mediativ kelishuv tuzishga haqli.

Mediativ kelishuv uni tuzgan taraflar uchun majburiy kuchga ega bo‘lib, ushbu kelishuv unda nazarda tutilgan tartibda hamda muddatlarda taraflar tomonidan ixtiyoriy ravishda bajariladi.

Mediativ kelishuv bajarilmagan taqdirda taraflar o‘z huquqlari himoya qilinishini so‘rab sudga murojaat etishga haqli.

Mediativ kelishuv bajarilmasligining oqibatlari taraflar tomonidan ushbu kelishuvning o‘zida belgilab qo‘yilishi mumkin.

4-bob. Yakunlovchi qoidalar

30-modda. Nizolarni hal etish

Mediatsiya sohasida kelib chiqadigan nizolar qonun hujjatlarida belgilangan tartibda hal etiladi.

31-modda. Mediatsiya to‘g‘risidagi qonun hujjatlarini buzganlik uchun javobgarlik

Mediatsiya to‘g‘risidagi qonun hujjatlarini buzganlikda aybdor shaxslar belgilangan tartibda javobgar bo‘ladi.

32-modda. Ushbu Qonunning ijrosini, yetkazilishini, mohiyati va ahamiyati tushuntirilishini ta’minlash

O‘zbekiston Respublikasi Adliya vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi o‘rtasida tushuntirilishini ta’minlasin.

33-modda. Qonun hujjatlarini ushbu Qonunga muvofiqlashtirish

O‘zbekiston Respublikasi Vazirlar Mahkamasi:

hukumat qarorlarini ushbu Qonunga muvofiqlashtirsin;

davlat boshqaruvi organlari ushbu Qonunga zid bo‘lgan o‘z normativ-huquqiy hujjatlarini qayta ko‘rib chiqishlari va bekor qilishlarini ta’minlasin.

34-modda. Ushbu Qonunning kuchga kirishi

Ushbu Qonun 2019-yil 1-yanvardan e’tiboran kuchga kiradi.

O‘zbekiston Respublikasining Prezidenti Sh.Mirziyoyev

Toshkent shahri, 2018-yil 3-iyul № O‘RQ – 482

(Manba: Xalq so‘zi” gazetasi)

 

 

Ish jarayonida foydalanilgan manba lavhasi qo‘yilishi shart

YANGILIKLAR XABARNOMASI №129 TIV Jamoatchilik va OAV bilan aloqalar boshqarmasi 2018-yil 4-iyul

posted 16 Jul 2018, 11:03 by Webmaster Ambasciata

Mintaqalar: INFRASTRUKTURA.. 1

Hukumat Chirchiq shahri bo‘yicha yangi qaror qabul qildi 1

Xalqaro munosabatlar.. 1

O‘zbekiston Respublikasi bilan Turkiya Respublikasi o‘rtasida ekstraditsiya to‘g‘risidagi Bitimni (Toshkent, 2018-yil 30-aprel) ratifikatsiya qilish haqida. 1

O‘zbekiston turizm o‘lkasi. 2

101ta davlat fuqarolari O‘zbekistonga  vizasiz kirishiga ruxsat berildi 2

O‘zbekistonga kirish elektron vizasi joriy etilmoqda. 3

O‘zbekiston musulmonlari idorasi huzurida sayyohlik firmasi ish boshladi 3

Ilova.. 3

Ish haqi, pensiyalar, stipendiyalar va nafaqalar miqdorini oshirish to‘g‘risida. 3

 

 mintaqalar: INFRASTRUKTURA

Hukumat Chirchiq shahri bo‘yicha yangi qaror qabul qildi

Vazirlar Mahkamasining 11.06.2018 yildagi «Toshkent viloyatining Chirchiq shahrini kompleks rivojlantirish chora-tadbirlari to‘g‘risida»gi 440-son qarori qabul qilindi, deb xabar bermoqda Norma.

Ma’lumot uchun: Chirchiq shahri poytaxtning shimoli-g‘arbiy tomonida 42 km narida joylashgan. U ulkan iqtisodiy va harbiy ahamiyatga ega. Shaharga 1935 yilda asos solingan bo‘lib, ayni paytda unda qariyb 150 ming kishi istiqomat qiladi.

Yangi korxonalar va ish o‘rinlari

Shaharda qo‘shimcha ravishda 1 358ta ish o‘rnini tashkil etish rejalashtirilmoqda. Bu 10ta yangi sanoat ob’ektini tashkil etish va mavjud 12tasini kengaytirish hisobiga amalga oshiriladi. Xizmatlar ko‘rsatish va servis sohasida esa 29ta loyiha amalga oshirilishi rejalashtirilgan. Ulardan 10tasi – yangi, 19tasi – kengaytirilmoqda. 

Infratuzilma va kommunal xizmat ko‘rsatish yaxshilanadi

186ta ko‘p xonadonli uylar quriladi. 7ta mahallada ikki konturli gaz qozonlari o‘rnatiladi. 12,6 km ichki yo‘llar, 136ta gaz taqsimlash punktlari, 8,1 km ichimlik suvi va 5,7 km oqava suv tarmoqlari quriladi va ta’mirlanadi.

Bundan tashqari, 4ta maktabgacha ta’lim muassasasi mukammal ta’mirlanadi, 2ta yangi maktab qurilib, 8ta faoliyat ko‘rsatayotgan maktab (sh.j. 1ta musiqa va san’at maktabi) ta’mirlanadi. O‘zbekiston davlat jismoniy tarbiya va sport universiteti 1 200 o‘rinli o‘z yotoqxonasiga ega bo‘ladi, Chirchiq davlat pedagogika institutining o‘quv binosi esa rekonstruksiya qilinadi.

2ta poliklinika ham jami 560tagacha bemorni qabul qila olishi uchun rekonstruksiya qilinadi.

Moliyalashtirish va rahbarlik

Mo‘ljallangan rejalar 700 mlrd 709 mln so‘m miqdoridagi mablag‘ni talab etadi (O‘R MB kursi 4.07.2018 da, 1$= 7846.27 so‘m)

. Shundan 17%ini davlat maqsadli jamg‘armalar va mahalliy budjetdan ajratadi. Tadbirkorlik sub’ektlari – loyihalar tashabbuskorlari xarajatlarning 54%ini zimmalariga oladilar. Banklar esa qolgan 29%ni qoplash uchun kredit bilan yordam beradilar.

Ishlarni bosh vazir o‘rinbosari – «O‘zbekneftgaz» AJ Boshqaruvi raisi boshchiligidagi respublika ishchi komissiyasi muvofiqlashtiradi.

Hujjat 12.06.2018 yildan kuchga kirdi.

(Manba: Kun.uz)

xalqaro munosabatlar

O‘zbekiston Respublikasi bilan Turkiya Respublikasi o‘rtasida ekstraditsiya to‘g‘risidagi Bitimni (Toshkent, 2018-yil 30-aprel) ratifikatsiya qilish haqida

O‘zbekiston Respublikasining Qonuni

Qonunchilik palatasi tomonidan 2018-yil 26-iyunda qabul qilingan, Senat tomonidan 2018-yil 28-iyunda ma’qullangan

O‘zbekiston Respublikasi bilan Turkiya Respublikasi o‘rtasida ekstraditsiya to‘g‘risidagi Bitim (Toshkent, 2018-yil 30-aprel) ratifikatsiya qilinsin.

O‘zbekiston Respublikasining Prezidenti Sh.MIRZIYOYEV

Toshkent shahri, 2018-yil 2-iyul

№ O‘RQ—477

(Manba: Xalq so‘zi” gazetasi)

O‘zbekiston turizm o‘lkasi

101ta davlat fuqarolari O‘zbekistonga  vizasiz kirishiga ruxsat berildi

15 iyuldan boshlab O‘zbekistondagi xalqaro aeroportlar orqali uchinchi tomonga tashrif buyurmoqchi bo‘lgan 101ta davlat fuqarolari besh kungacha O‘zbekistonda qolishi mumkin. Bu haqda davlat rahbari 4 iyul kuni imzolagan hujjatda shunday deyiladi.

Ma’lum qilinishicha, uchinchi tomonga avichiptasi bo‘lgan holda, O‘zbekistondagi xalqaro aeroportlardan birida tranzit-qatnovni amalga oshirayotgan xorijiy yo‘lovchilar besh kungacha vizasiz O‘zbekistonda ham qolishi mumkin.

Hujjatda qayd etilgan 101ta davlat esa quyidagilar:

Eslatib o‘tamiz, hujjat bilan O‘zbekistonga kirish elektron vizasini taqdim etish tizimi ham ishga tushgani haqida xabar berilgandi.

(Manba: Kun.uz)

O‘zbekistonga kirish elektron vizasi joriy etilmoqda

Joriy yilning 15 iyul kunidan boshlab xorijiy fuqarolar O‘zbekistonga kirish vizasini olish uchun diplomatik vakillik yoxud O‘zbekistonning chet ellardagi konsullik idorasiga rasmiy murojaat qilishi shart emas. Bu haqda O‘zbekiston Respublikasi Prezidenti Shavkat Mirziyoyev 4 iyul kuni imzolagan hujjatda shunday deyiladi.

Ma’lum bo‘lishicha, yangi tashkil etilgan  «E-visa.uz» kirish vizalarini rasmiylashtirish tizimi orqali chet el fuqarolari O‘zbekistonga kirish huquqini beruvchi vizani qo‘lga kiritishi mumkin.

Unga ko‘ra, respublika hududiga kirish huquqini beruvchi vizani rasmiylashtirish axborot-kommunikatsion texnologiyalar asosida amalda oshiriladi.

Ta’kidlash joizki, sayyohlarni O‘zbekistonga jalb etishda ko‘mak beruvchi bunday tashabbus Ozarboyjon, Armaniston, Gruziya, Hindiston, Singapur va Turkiyada ham yo‘lga qo‘yilgan.

Hujjatga ko‘ra, viza 30 kun muddatga O‘zbekiston hududida bo‘lish huquqini beradi va undan taqdim etilgan kundan boshlab 90 kun muddat ichida foydalanish mumkin.

Viza olish uchun murojaat yuborilgan kundan tashqari, 2 kun ichida ko‘rib chiqiladi. Murojaatlarni ko‘rib chiqish uchun 20 AQSh dollari miqdorida boj to‘lanadi.

(Manba: Kun.uz)

O‘zbekiston musulmonlari idorasi huzurida sayyohlik firmasi ish boshladi

O‘zbekiston musulmonlari idorasi muassisligida Muslim-tour sayyohlik firmasi o‘z faoliyatini boshladi. Bu haqda O‘zbekiston musulmonlari idorasi Matbuot xizmati xabar berdi.

Bunday faoliyat olib borish uchun Turizmni rivojlantirish davlat qo‘mitasining litsenziyasi qo‘lga kiritildi. U kirish, chiqish va ichki turizm yo‘nalishlarida turizm faoliyatini amalga oshirish huquqini beradi.

O‘zbekiston musulmonlari idorasi huzuridagi Muslim-tour sayyohlik firmasi respublikadagi qadamjo, ziyoratgoh va tabarruk maskanlarga mahalliy va xorijiy fuqarolarning keng ko‘lamdagi ziyoratlarini uyushtirish, ziyoratchilar uchun munosib shart-sharoitlar yaratish va musulmon dunyosidagi nufuzini yanada oshirishga xizmat qiladi, deyiladi xabarda.

(Manba: Daryo.uz)

ilova

Ish haqi, pensiyalar, stipendiyalar va nafaqalar miqdorini oshirish to‘g‘risida

O‘zbekiston Respublikasi Prezidentining farmoni

Respublika aholisining daromadlari va turmush darajasini yanada muttasil oshirib borish, fuqarolarga ijtimoiy madadni kuchaytirish maqsadida:

1. 2018-yilning 15-iyulidan boshlab byudjet muassasalari va tashkilotlari xodimlarining ish haqi, pensiyalar, stipendiyalar hamda nafaqalar miqdori o‘rta hisobda 1,07 baravar oshirilsin.

2. 2018-yilning 15-iyulidan boshlab O‘zbekiston Respublikasi hududida eng kam:

ish haqi – oyiga 184 300 so‘m (O‘R MB kursi 4.07.2018 da, 1$= 7846.27 so‘m);

yoshga doir pensiyalar – oyiga 360 460 so‘m;

bolalikdan nogironlarga beriladigan nafaqa – oyiga 360 460 so‘m;

zarur ish stajiga ega bo‘lmagan keksa yoshdagi va mehnatga layoqatsiz fuqarolarga beriladigan nafaqa oyiga 221 190 so‘m miqdorida belgilansin.

3. Belgilab qo‘yilsinki, ish haqi hamda pensiyalarga qo‘shilgan ustama va qo‘shimcha haqlarning barcha turlari, eng kam ish haqiga nisbatan belgilangan kompensatsiya va boshqa to‘lovlar 2018-yilning 15-iyulidan boshlab mazkur Farmonda belgilangan eng kam ish haqi miqdoridan kelib chiqqan holda amalga oshiriladi.

4. O‘zbekiston Respublikasi Moliya vazirligi Bandlik va mehnat munosabatlari vazirligi hamda boshqa manfaatdor vazirliklar va idoralar, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari, O‘zbekiston Respublikasi Davlat byudjetidan moliyalashtiriladigan tashkilot hamda muassasalar bilan birgalikda pensiyalar, stipendiyalar hamda byudjet muassasalari va tashkilotlari xodimlarining lavozim maoshlari miqdorini mazkur Farmon qoidalaridan kelib chiqqan holda o‘z vaqtida qayta hisoblab chiqishni ta’minlasin.

5. Byudjet muassasalari va tashkilotlari xodimlarining ish haqi, pensiyalar, nafaqalar va stipendiyalarning oshirilishi bilan bog‘liq sarf-xarajatlar O‘zbekiston Respublikasi Davlat byudjeti va O‘zbekiston Respublikasi Moliya vazirligi huzuridagi Byudjetdan tashqari pensiya jamg‘armasi mablag‘lari hisobidan amalga oshirilsin.

Xo‘jalik hisobidagi korxona va tashkilotlar 2018-yilning 15-iyulidan boshlab mazkur Farmonda belgilangan eng kam ish haqiga muvofiq, ishlab chiqarish samaradorligini oshirish va mehnat sarfini kamaytirish hisobiga ish haqi miqdorini oshirsin.

6. O‘zbekiston Respublikasi Prezidentining 2017-yil 20-noyabrdagi “Ish haqi, pensiyalar, stipendiyalar va nafaqalar miqdorini oshirish to‘g‘risida”gi PF-5245-son Farmoni (6-bandi istisno qilingan holda) 2018-yilning 15-iyulidan o‘z kuchini yo‘qotgan deb hisoblansin.

7. O‘zbekiston Respublikasi Adliya vazirligi Moliya vazirligi bilan birgalikda bir oy muddatda qonun hujjatlariga ushbu Farmondan kelib chiqadigan o‘zgartish va qo‘shimchalar to‘g‘risida Vazirlar Mahkamasiga takliflar kiritsin.

8. Mazkur Farmonning ijrosini nazorat qilish O‘zbekiston Respublikasining Bosh vaziri A.N.Aripov va O‘zbekiston Respublikasi Bosh vazirining o‘rinbosari – moliya vaziri J.A.Qo‘chqorov zimmasiga yuklansin.

O‘zbekiston Respublikasi Prezidenti Sh.MIRZIYOYEV

Toshkent shahri,

2018-yil 2-iyul

(Manba: O‘zA)

 Ish jarayonida foydalanilgan manba lavhasi qo‘yilishi shart

YANGILIKLAR XABARNOMASI №126 TIV Jamoatchilik va OAV bilan aloqalar boshqarmasi 2018-yil 29-iyun

posted 16 Jul 2018, 11:01 by Webmaster Ambasciata

PREZIDENT.. 1

O‘zbekiston va Turkmaniston Prezidentlarining telefon orqali muloqoti to‘g‘risida. 1

Rasmiy.. 1

O‘zbekiston Respublikasi davlat mustaqilligining yigirma yetti yillik bayramiga tayyorgarlik ko‘rish va uni o‘tkazish to‘g‘risida. 1

Markaziy Osiyo – O‘zbekiston tashqi siyosatining ustuvor yo‘nalishi. 3

Mintaqa yoshlari uchun muloqot maydoni 3

O‘zbekiston respublikasi oliy majlisi senati. 4

O‘zbekiston Respublikasi Oliy Majlisi Senatining o‘n beshinchi yalpi majlisi to‘g‘risida axborot 4

Jamiyat.. 9

O‘zbekiston: Uzoq muddatli rivojlanishning strategik konsepsiyasi muhokama qilindi 9

O‘zbekiston turizm o‘lkasi. 10

Shahrisabz YUNESKO Umumjahon merosi ro‘yxatida qoladi 10

Ilova.. 11

O‘zbekiston Respublikasida oila institutini mustahkamlash konsepsiyasini tasdiqlash to‘g‘risida. 11

 

PREZIDENT

O‘zbekiston va Turkmaniston Prezidentlarining telefon orqali muloqoti to‘g‘risida

O‘zbekiston Respublikasi Prezidenti Shavkat Mirziyoyev 29-iyun kuni Turkmaniston Prezidenti Gurbanguli Berdimuhamedov bilan telefon orqali muloqot qildi.

Davlatimiz rahbari suhbat avvalida Turkmaniston Prezidentini tug‘ilgan kuni munosabati bilan samimiy muborakbod etib, unga mustahkam sog‘lik, baxt-saodat va yangi zafarlar tiladi.

Bugungi Turkmaniston erishayotgan ulkan muvaffaqiyatlar, uning xalqaro nufuzi izchil yuksalib borayotgani Gurbanguli Berdimuhamedov rahbarligida amalga oshirilayotgan keng miqyosli islohotlar va yangilanishlarning, ijobiy betaraflik siyosatining amaliy natijalari ekani alohida ta’kidlandi.

Turkmaniston Prezidentining Markaziy Osiyo mintaqasida xavfsizlik va barqarorlikni ta’minlash, transport yo‘laklari va energetik infratuzilmani rivojlantirish, suvdan oqilona foydalanish, sportni ommalashtirish borasida va boshqa yo‘nalishlardagi xalqaro miqyosdagi tashabbuslariga yuksak baho berildi.

Oliy darajadagi muntazam muloqot va uchrashuvlar qardosh xalqlarimiz o‘rtasidagi ko‘p asrlik do‘stlik rishtalarini mustahkamlashga, shuningdek, mamlakatlarimiz o‘rtasida yaxshi qo‘shnichilik va strategik sheriklik munosabatlarini kengaytirishga xizmat qilayotgani chuqur mamnuniyat bilan qayd etildi.

Turkmaniston Prezidentining joriy yil aprel oyida O‘zbekistonga amalga oshirgan samarali davlat tashrifi hamda uning yakunida erishilgan muhim kelishuvlar va bitimlar ko‘p qirrali O‘zbekiston-Turkmaniston hamkorligiga yangi sur’at baxsh etib, uni amaliy mazmun bilan boyitgani ta’kidlandi.

Suhbat chog‘ida savdo, ishlab chiqarish kooperatsiyasi, energetika sohalari, samarali transport va tranzit kommunikatsiyalarini rivojlantirish, shuningdek, madaniy-gumanitar yo‘nalish bo‘yicha hamkorlik istiqbollari ko‘rib chiqildi. Mintaqaviy va xalqaro ahamiyatga molik dolzarb masalalar yuzasidan fikr almashildi.

Turkmaniston Prezidenti samimiy tabrik va tilaklar uchun davlatimiz rahbariga minnatdorlik bildirdi hamda O‘zbekiston Prezidentini joriy yil avgust oyida Ashxobodda bo‘lib o‘tadigan Orolni qutqarish xalqaro jamg‘armasi ta’sischi davlatlari rahbarlarining sammitida ishtirok etishga taklif qildi.

Muloqot so‘ngida davlat rahbarlari qardosh mamlakatlarimiz va xalqlarimiz farovonligi yo‘lida O‘zbekiston Respublikasi va Turkmaniston o‘rtasidagi strategik sheriklik va o‘zaro manfaatli hamkorlik munosabatlarini yanada rivojlantirish va mustahkamlashda intilishi qat’iy ekanliklarini yana bir bor tasdiqladilar.

Bu haqda O‘zbekiston Respublikasi Prezidentining Matbuot xizmati xabar berdi.

(Manba: O‘zA)

Rasmiy

O‘zbekiston Respublikasi davlat mustaqilligining yigirma yetti yillik bayramiga tayyorgarlik ko‘rish va uni o‘tkazish to‘g‘risida

O‘zbekiston Respublikasi Prezidentining qarori

Jonajon Vatanimiz – O‘zbekistonimiz milliy taraqqiyotning yangi bosqichiga qadam qo‘yib, barcha soha va tarmoqlarda demokratik yangilanish jarayonlari amalga oshirilayotgan bugungi kunda biz uchun bebaho ne’mat bo‘lgan mustaqillikning qadr-qimmati va ahamiyati tobora ortib bormoqda.

O‘tgan davr biz uchun g‘oyat muhim bir haqiqatni takror va takror tasdiqlab bermoqda. Erkin va farovon hayotimizni, buyuk kelajagimizni faqat mustaqillik asosida qurishimiz, odamlarimiz, el-yurtimizni faqat mustaqil siyosat asosida rozi qilishimiz mumkin. Faqat mustaqillik bugungi va kelgusi avlodlar uchun misli ko‘rilmagan imkoniyatlar ochib beradi.

Shu ma’noda, mamlakatimiz istiqlolini, u bilan bog‘liq tarixiy sana va voqea-hodisalarning mohiyatini chuqur anglash va qadrlash, har tomonlama munosib nishonlash ijtimoiy-siyosiy va ma’naviy hayotimizda alohida muhim o‘rin tutadi.

Xalqimizning asriy orzusi bo‘lgan, Vatanimizning necha ming yillik tarixida mutlaqo yangi sahifa ochgan, mamlakatimizni xalqaro hamjamiyatning teng huquqli a’zosiga aylantirgan O‘zbekiston mustaqilligining yigirma yetti yilligini munosib kutib olish va nishonlash maqsadida:

1. O‘zbekiston Respublikasi davlat mustaqilligining yigirma yetti yillik bayramiga tayyorgarlik ko‘rish va uni o‘tkazish bo‘yicha respublika komissiyasining tarkibi ilovaga muvofiq tasdiqlansin.

2. Respublika komissiyasi bir hafta muddatda “Aziz va yagonamsan, jonajon O‘zbekistonim!” degan g‘oyani o‘zida mujassam etgan tashkiliy-amaliy, ma’naviy-ma’rifiy tadbirlar hamda targ‘ibot-tashviqot ishlari dasturini ishlab chiqsin.

Mazkur dastur 2017 – 2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi hamda “Faol tadbirkorlik, innovatsion g‘oyalar va texnologiyalarni qo‘llab-quvvatlash yili” Davlat dasturi bilan uyg‘un holda tayyorlansin.

Bunda davlat va jamiyat qurilishi tizimini takomillashtirish, ayniqsa, xalq bilan doimiy muloqotni yo‘lga qo‘yish, inson manfaatlarini ta’minlash, qonun ustuvorligiga erishish va sud-huquq tizimini yanada isloh qilish, iqtisodiyotni rivojlantirish va faol tadbirkorlikni qo‘llab-quvvatlash, ijtimoiy sohani, xususan, fan, ta’lim, sog‘liqni saqlash, madaniyat va san’at, turizm va sport tarmoqlarini rivojlantirish, tinchlik-osoyishtalik va xavfsizlik, millatlararo totuvlik va diniy bag‘rikenglikni mustahkamlash, tashqi siyosat sohasida barcha uzoq va yaqin davlatlar bilan o‘zaro manfaatli aloqalarni jadal rivojlantirish bo‘yicha amalga oshirilayotgan keng ko‘lamli ishlarning mazmun-mohiyatini ilmiy-ma’rifiy asosda, hayotiy misollar orqali ochib berishga alohida e’tibor qaratilsin.

3. Respublika komissiyasi tomonidan Qoraqalpog‘iston Respublikasi, viloyatlar va Toshkent shahrida Mustaqillik bayramiga bag‘ishlab aholining keng qatlamlari o‘rtasida ma’rifiy uchrashuvlar, ochiq muloqot va suhbatlar, adabiy-badiiy kechalar, madaniy tadbirlar o‘tkazish maqsadida taniqli olimlar, ijodkor ziyolilar va san’atkorlardan iborat ma’naviy-ma’rifiy targ‘ibot guruhlari tashkil etilsin hamda ularning aniq reja asosida faoliyat olib borishi ta’minlansin.

4. Respublika komissiyasi o‘z yig‘ilishlarida belgilangan chora-tadbirlar markazda va joylarda qanday amalga oshirilayotgani yuzasidan har bir hudud, vazirlik va idora rahbarlarining hisobotlarini muntazam ravishda eshitib borsin.

5. Qoraqalpog‘iston Respublikasi, viloyatlar va Toshkent shahrida o‘tkaziladigan bayram dasturlarini tayyorlashga ommaviy tomoshalar bo‘yicha yuksak mahorat va tajribaga ega bo‘lgan ssenarist va rejissyorlar, yozuvchi va shoirlar, kompozitor va baletmeysterlar, sahna rassomlari, iste’dodli yosh ijrochilar, folklor san’ati vakillaridan iborat ijodiy guruhlar keng jalb etilsin.

6. O‘zbekiston Respublikasi Madaniyat vazirligi O‘zbekiston Yozuvchilar uyushmasi, O‘zbekiston kompozitorlari va bastakorlari uyushmasi bilan birgalikda yurtimiz istiqlolini tarannum etishga qaratilgan eng yaxshi qo‘shiq va musiqa asarlari uchun “Yagonasan, muqaddas Vatan!” respublika tanlovining yakuniy bosqichini o‘tkazsin.

Tanlov g‘oliblari va sovrindorlari Mustaqillik bayrami arafasida e’lon qilinsin va taqdirlansin.

7. O‘zbekiston Matbuot va axborot agentligi O‘zbekiston Respublikasi Madaniyat vazirligi O‘zbekiston Yozuvchilar uyushmasi, O‘zbekiston Jurnalistlari ijodiy uyushmasi, O‘zbekiston Badiiy akademiyasi, “Tasviriy oyina” ijodiy uyushmasi va boshqa tegishli tashkilotlar bilan birgalikda “Eng ulug‘, eng aziz”, “Ranglar jilosida – ona diyor”, “Vatan uchun yashaylik!” kabi an’anaviy ko‘rik-tanlovlarni yuqori darajada o‘tkazishni ta’minlasin.

8. Belgilab qo‘yilsinki, o‘tkaziladigan bayram tadbirlari:

Qoraqalpog‘iston Respublikasi va viloyatlarda mahalliy byudjetlar hamda homiylik xayriyalari hisobidan;

Toshkent shahrida O‘zbekiston Respublikasining Davlat byudjeti va Toshkent shahar mahalliy byudjeti mablag‘lari hisobidan teng ulushlarda qoplanadi.

9. O‘zbekiston Matbuot va axborot agentligi, O‘zbekiston Milliy teleradiokompaniyasi, O‘zbekiston Milliy axborot agentligi, “Dunyo” axborot agentligi va boshqa ommaviy axborot vositalariga O‘zbekiston Respublikasi mustaqilligining yigirma yetti yillik bayramiga tayyorgarlik ko‘rish va uni o‘tkazish bo‘yicha amalga oshirilayotgan ishlarni atroflicha yoritib borish tavsiya etilsin.

10. Mazkur qarorning ijrosini nazorat qilish O‘zbekiston Respublikasi Bosh vaziri A.Aripov zimmasiga yuklansin.

O‘zbekiston Respublikasi Prezidenti SH.MIRZIYOYEV

Toshkent shahri, 2018-yil 28-iyun

(Manba: O‘zA)

Markaziy Osiyo – O‘zbekiston tashqi siyosatining ustuvor yo‘nalishi

Mintaqa yoshlari uchun muloqot maydoni

27-iyun kuni Samarqand temir yo‘l vokzalida mamlakatimizda o‘tkazilayotgan “Markaziy Osiyo yoshlar forumi” ishtirokchilari Samarqand viloyati hokimligi, jamoatchilik vakillari tomonidan tantanali kutib olindi.

O‘zbekiston Respublikasi delegatsiyasi a’zolari, jumladan, O‘zbekiston yoshlar ittifoqi, Qozog‘istonning “Nur Otan” partiyasi “Jas Otan” yoshlar qanoti, Qirg‘iziston Yoshlar, jismoniy tarbiya va sport sohasi davlat agentligi, Tojikiston Yoshlar va sport davlat qo‘mitasi hamda Turkmaniston Sport va yoshlar siyosati vazirligi, Maxtumquli nomidagi Turkmaniston yoshlar tashkiloti kengashi vakillarining Samarqand tarixiy obidalari, diqqatga sazovor maskanlari bo‘ylab sayohati uyushtirildi.

Mehmonlar Payariq tumanidagi Imom Buxoriy majmuasi, Samarqand shahridagi Amir Temur, Bibixonim maqbaralarini ziyorat qildi. Mirzo Ulug‘bek madrasasida tashkil etilgan xayriya auksionida ishtirok etdi.

Viloyat hokimligida forumning ochilish marosimi bo‘lib o‘tdi. Unda so‘zga chiqqanlar Prezidentimiz tashabbusi bilan birinchi marta o‘tkazilayotgan forum Markaziy Osiyo davlatlari o‘rtasida tarixan qaror topgan do‘stlik va yaqin qo‘shnichilik munosabatlarini yanada mustahkamlash, globallashuv jarayonida mintaqa yoshlarini turli yot g‘oya va ta’sirlardan asrash hamda ularni yuksak ma’naviyatli insonlar etib kamolga yetkazishga qaratilgani bilan ahamiyatli ekanini ta’kidladi.

– O‘tgan yil 30 iyun kuni O‘zbekiston “Kamolot” yoshlar ijtimoiy harakatining IV qurultoyida Prezidentimiz yoshlar hayotidagi kamchilik va muammolar haqida gapirib, tizimda tub burilish yasaydigan islohotlar o‘tkazish lozimligini ta’kidlagan edi, – deydi O‘zbekiston Yozuvchilar uyushmasi raisi o‘rinbosari N.Jonuzoqov. – Shu kuni “Kamolot” yoshlar ijtimoiy harakati o‘rnida O‘zbekiston yoshlar ittifoqi tashkil etilib, uning imtiyoz va imkoniyatlari yanada kengaytirildi. Mamlakatimizda 30 iyun – Yoshlar kuni, deb e’lon qilindi. Davlat organlari va jamoat tashkilotlarida yoshlar masalalari bo‘yicha o‘rinbosar lavozimi joriy qilindi. Faol yoshlarni rag‘batlantirish uchun davlat mukofotlari ta’sis etildi. Yoshlarni uy-joy bilan ta’minlash, ularning tadbirkorlik faoliyatini olib borishi, oliy o‘quv yurtlarida o‘qishi uchun bir qator imtiyozlar yaratildi. Prezidentimiz yoshlarga e’tibor va g‘amxo‘rlik ko‘rsatish, ularni har tomonlama barkamol insonlar qilib tarbiyalash butun bashariyatning oldida turgan muhim vazifaekanini jahonning yuksak minbarlaridan turib alohida ta’kidladi. Xususan, davlatimiz rahbari Birlashgan Millatlar Tashkiloti Bosh Assambleyasining 72-sessiyasida so‘zlagan nutqida globallashuv va axborot-kommunikatsiya texnologiyalari jadal rivojlanayotgan bugungi sharoitda yoshlarga oid siyosatni amalga oshirishga qaratilgan umumlashtirilgan xalqaro huquqiy hujjat – Birlashgan Millatlar Tashkilotining Yoshlar huquqlari to‘g‘risidagi Xalqaro konvensiyasini ishlab chiqish taklifini ilgari surdi.

Joriy yil 10 iyun kuni Xitoy Xalq Respublikasining Sindao shahrida o‘tkazilgan Shanxay hamkorlik tashkilotiga a’zo davlatlar rahbarlarining navbatdagi sammitida tashkilotga a’zo davlatlar rahbarlarining Yoshlarga murojaati va uni amalga oshirish bo‘yicha Harakatlar dasturi qabul qilindi.

Azaldan bir zaminda yonma-yon yashab kelayotgan o‘zbek, tojik, qirg‘iz, qozoq, turkman xalqlarining yoshlari jam bo‘lgan bugungi forum Markaziy Osiyo mamlakatlarining ijtimoiy ahamiyatga ega loyihalar va dasturlarni hamkorlikda amalga oshirishi uchun muhim qadam sanaladi.

– Mintaqa yoshlari uchun ezgu maqsadlarni ko‘zlagan bugungi anjumanning Samarqandda o‘tkazilayotgani bejiz emas ekan, – deydi Qozog‘istonning “Jas Otan” yoshlar qanoti Akmola oblasti filiali raisiS.Bekeshev. – Chunki bu shahar qadimdan madaniyat, ilm-fan, ma’naviyat va ma’rifat maskani, sivilizatsiya beshigi sifatida shuhratqozongan. Bugun bu yerdagi me’moriy obidalarni tomosha qilib, dunyo ahlining ma’rifati va madaniyati tutashgan ko‘hna va navqiron Samarqandning salobatini, muhtashamligini dildan his etdik. Anjuman tadbirlarida mintaqadagi barcha mamlakatlardan kelgan tengdoshlarimiz hayoti va davlat siyosatiga doir muhim masalalar xususida fikr almashdik. Kelajakda bir maqsad sari intilish, jipslashishga kelishib oldik. Shu jihatdan ham forum samarali o‘tmoqda.

Forum doirasida “Fan va ta’limni rivojlantirishda yoshlarning o‘rni”, “Markaziy Osiyo mintaqasidagi madaniy hamkorlik”, “Yoshlar turizmi Markaziy Osiyo taraqqiyotining asosiy omili”, “Terrorizmga olib keluvchi tajovuzkor ekstremizm va radikalizmning oldini olish hamda ularga qarshi kurashishda yoshlarning roli” kabi mavzularda davra suhbatlari, yoshlar press-klublari o‘tkaziladi. Registon maydonida qardosh xalqlar yoshlari uchun 3D shou namoyish qilinadi. Forum yakunida mamlakatlar o‘rtasida “Qo‘shma hamkorlik 2019-2021” memorandumi imzolanadi.

(Manba: O‘zA)

O‘zbekiston respublikasi oliy majlisi senati

O‘zbekiston Respublikasi Oliy Majlisi Senatining o‘n beshinchi yalpi majlisi to‘g‘risida axborot

2018-yil 28-iyun kuni Toshkent shahrida O‘zbekiston Respublikasi Oliy Majlisi Senatining o‘n beshinchi yalpi majlisi ish boshladi. Yalpi majlisda Vazirlar Mahkamasi a’zolari, vazirlik va idoralar rahbarlari, boshqa tashkilotlar, ommaviy axborot vositalari vakillari ishtirok etdilar.

Majlisni Oliy Majlis Senati Raisi N.Yo‘ldoshev olib bordi.

Senatorlar ishni “Ekstremizmga qarshi kurashish to‘g‘risida”gi O‘zbekiston Respublikasi Qonunini ko‘rib chiqishdan boshladilar. Qonun shaxs, jamiyat va davlatning ekstremizmdan xavfsizligini ta’minlashga, O‘zbekiston Respublikasining konstitutsiyaviy tuzumini, hududiy yaxlitligini himoya qilishga, fuqarolar tinchligini, millatlararo va konfessiyalararo totuvlikni saqlashga qaratilgan.

Qonunda ekstremizmga qarshi kurashishning asosiy tushunchalari, prinsiplari va yo‘nalishlari, bu sohada faoliyatni amalga oshiruvchi organlar doirasi va ularning vakolatlari, ekstremizmga qarshi kurashish chora-tadbirlari, shuningdek, ekstremistik faoliyatni amalga oshirganlik uchun javobgarlik nazarda tutilgan.

Senatorlarning fikricha, ushbu Qonun aholining huquqiy ongi va huquqiy madaniyatini yuksaltirishga, jamiyatda ekstremizmga nisbatan murosasizlik munosabatini shakllantirishga, ekstremizm sohasidagi huquqbuzarliklarning o‘z vaqtida oldini olish, aniqlash va ularga chek qo‘yishga, shuningdek, javobgarlikning muqarrarligi prinsipini ta’minlashga, xalqaro umume’tirof etilgan normalar va standartlarni ijro etishga ko‘maklashadi. Qonun senatorlar tomonidan ma’qullandi.

So‘ngra senatorlar “Mediatsiya to‘g‘risida”gi O‘zbekiston Respublikasi Qonunini ko‘rib chiqdilar. Qonunning maqsadi O‘zbekiston Respublikasida nizolarni tartibga solishning muqobil usullarini rivojlantirish uchun huquqiy shart-sharoitlar yaratishdan, mamlakatimiz sud tizimida ish hajmini kamaytirishdan iborat.

Ushbu Qonun fuqarolik huquqiy munosabatlardan, shu jumladan, tadbirkorlik faoliyatini amalga oshirish munosabati bilan kelib chiqadigan nizolarga, shuningdek, yakka mehnat nizolariga, oilaviy huquqiy munosabatlardan kelib chiqadigan nizolarga mediatsiyani qo‘llash bilan bog‘liq munosabatlarga nisbatan tatbiq etiladi. Shunisi e’tiborliki, ushbu Qonun mediatsiyada ishtirok etmayotgan uchinchi shaxslarning huquqlari va qonuniy manfaatlariga, jamoat manfaatlariga daxl qiladigan yoki daxl qilishi mumkin bo‘lgan nizolarga nisbatan qo‘llanilmaydi.

Qonunda mediatorning faoliyati professional yoki noprofessional asosda amalga oshirilishi mumkinligi mustahkamlab qo‘yilgan.

Professional asosdagi mediator faoliyatini O‘zbekiston Respublikasi Adliya vazirligi tomonidan tasdiqlanadigan mediatorlarni tayyorlash dasturi bo‘yicha maxsus o‘quv kursidan o‘tgan, shuningdek, Professional mediatorlar reyestriga kiritilgan shaxs amalga oshirishi mumkinligi Qonunda nazarda tutilgan.

Noprofessional asosdagi mediator faoliyatini yigirma besh yoshga to‘lgan va mediator vazifalarini bajarishga rozilik bergan shaxs amalga oshirishi mumkin. Qonunda mediatsiya tadbirkorlik faoliyati hisoblanmasligi, maxfiylik, ixtiyoriylik, taraflarning hamkorligi va teng huquqliligi, mediatorning mustaqilligi va xolisligi prinsiplari asosida amalga oshirilishi ham ko‘rsatilgan. Qonun senatorlar tomonidan ma’qullandi.

Senatorlar tomonidan “Jamoat joylarida chilim va elektron sigaretalar chekishni cheklash to‘g‘risida”gi O‘zbekiston Respublikasi Qonuni ham ko‘rib chiqildi. Qonunning maqsadi jamoat joylarida chilim va elektron sigaretalar chekish keng tarqalishiga yo‘l qo‘ymaslik, chekmaydigan fuqarolar huquqlari himoyasini ta’minlash va tamaki tutuni bilan zararlanishning oldini olish, chilim va elektron sigaretalar chekish natijasida kelib chiqadigan kasalliklar hamda guruh bo‘lib chekish oqibatida yuqish xavfi bo‘lgan xastaliklar tarqalishining oldini olishdir.

Qonunda “chilim”, “chilim uchun tamakisiz chekish aralashmasi”, “chilim chekish uchun damlama”, “chilim uchun chekish toshi”, “elektron sigareta” kabi asosiy tushunchalarning mazmuni ochib berilgan, shuningdek, chilim va elektron sigaretalar chekish mumkin bo‘lmagan jamoat joylari ro‘yxatiga aniqlik kiritilgan.

Qonun chilim va elektron sigaretalar chekishni reklama va targ‘ib qilishni cheklashga doir normalardan iborat bo‘lib, unda jamoat joylarida chilim va elektron sigaretalar chekishni cheklash choralarini ko‘rish uchun mas’ul shaxslar va ularning majburiyatlari belgilangan, jamoat joylarida joylashgan xonalarni chilim va elektron sigaretalarni chekish uchun berish, shuningdek, jamoat joylarida chilimni va elektron sigaretalarni foydalanishga berish taqiqlanadi.

Senatorlar ta’kidlaganidek, jamoat joylarida chilim va elektron sigaretalar chekishni cheklashga qaratilgan profilaktik tadbirlarni amalga oshirishda davlat hokimiyati va boshqaruvi organlari, fuqarolarning o‘zini o‘zi boshqarish organlari, nodavlat notijorat tashkilotlar, korxonalar, muassasalar, tashkilotlar, ta’lim maskanlari va boshqa tashkilotlar ishtirok etishining belgilab qo‘yilgani bunda muhim ahamiyat kasb etadi. Qonun senatorlar tomonidan ma’qullandi.

Senatorlar ishni yangi tahrirdagi “O‘zbekiston Respublikasi Savdo-sanoat palatasi to‘g‘risida”gi O‘zbekiston Respublikasi Qonunini ko‘rib chiqish bilan davom ettirdilar. Qonun O‘zbekiston Respublikasi Prezidentining “Biznesning qonuniy manfaatlari davlat tomonidan muhofaza qilinishi va tadbirkorlik faoliyatini yanada rivojlantirish tizimini tubdan takomillashtirishga doir chora-tadbirlar to‘g‘risida”gi Farmonini ijro etish maqsadida ishlab chiqilgan.

Ta’kidlanganidek, Qonunning maqsadi integratsiyalashgan tadbirkorlar hamjamiyatini shakllantirish va tadbirkorlik subyektlarining, ular birlashmalarining davlat organlari bilan samarali hamkorligini ta’minlash, shuningdek, tadbirkorlik subyektlarini keng qamrab olish va ularni tadbirkorlar hamjamiyatini shakllantirish jarayoniga jalb qilishdan iboratdir.

Qonunda umumiy qoidalar, Palataning vazifalari va funksiyalari, davlat organlari, boshqa organlar va tashkilotlar bilan hamkorligi, tadbirkorlik subyektlari faoliyatini tekshirishlardagi ishtiroki, uning faoliyatini tashkil etish, xalqaro hamkorligi, nizolarni hal qilish mexanizmi nazarda tutilgan.

Qonunning yangi tahririda tadbirkorlik subyektlari huquqlarini himoyalash hamda ishbilarmonlik va investitsiya muhitini yaxshilash, tadbirkorlik faoliyatiga ko‘maklashish, davlat organlari, boshqa organlar va tashkilotlar bilan o‘zaro hamkorlik qilish, tadbirkorlik subyektlarini o‘qitish va kadrlar tayyorlash, tashqi iqtisodiy faoliyat va chet el investitsiyalarini jalb etish sohalaridagi Palataning funksiyalari mustahkamlab qo‘yilgan.

Senatorlar ta’kidlaganidek, mazkur Qonunning hayotga tatbiq etilishi tadbirkorlik subyektlarini, ayniqsa, ularning faoliyati shakllanayotgan davrda qo‘llab-quvvatlashning samarali tizimini yaratishga, huquqlari va qonuniy manfaatlarini ishonchli himoya qilish kafolatlarini kuchaytirishga, xususiy mulk va tadbirkorlikni jadal rivojlantirishga har tomonlama ko‘mak berishga, ularning ustuvor rolini va daxlsizligini ta’minlashga, respublika tumanlari va shaharlari aholisini tadbirkorlik faoliyatiga keng jalb qilishga ko‘maklashadi. Senatorlar Qonunni ma’qulladilar.

Majlis davomida senatorlar yangi tahrirdagi “O‘simliklar karantini to‘g‘risida”gi O‘zbekiston Respublikasi Qonunini ko‘rib chiqdilar.

Qonunda o‘simliklar karantini sohasini, O‘zbekiston Respublikasining o‘simliklar karantini bo‘yicha davlat xizmati tizimini va unga rahbarlik qilishni tartibga soluvchi umumiy qoidalar, davlat va xo‘jalik boshqaruvi organlarining, yuridik va jismoniy shaxslarning o‘simliklar karantini sohasidagi huquq va majburiyatlari, o‘simliklar karantiniga doir tadbirlar va ularni amalga oshirish, mazkur sohadagi axborotning ochiqligi, karantin ostidagi mahsulotni olib kirish va olib chiqish nazarda tutilgan.

Shuningdek, Qonunda o‘simliklar karantini sohasidagi davlat siyosatining asosiy yo‘nalishlari, davlat nazoratini yuritish, xalqaro hamkorlikni rivojlantirish, tashqi va ichki o‘simliklar karantini bo‘yicha tadbirlar tizimini amalga oshirish, fitosanitar xavfsizlikni ta’minlash, o‘simliklar karantini sohasida samarali monitoring olib borish tizimini ishlab chiqish ko‘zda tutilgan.

Qonun O‘zbekiston Respublikasi Vazirlar Mahkamasining, mahalliy davlat hokimiyati organlarining o‘simliklar karantini sohasidagi vakolatlarini nazarda tutadigan normalar bilan to‘ldirilgan.

O‘zgartishlarga muvofiq fuqarolarning o‘zini o‘zi boshqarish organlari o‘simliklar karantini sohasidagi davlat dasturlarini, hududiy va boshqa dasturlarni amalga oshirishda ishtirok etadi, tegishli hududda bu sohada jamoatchilik nazoratini amalga oshiradi, aholini o‘simliklar karantini obyektlari tarqalganligi haqida xabardor qilishda o‘simliklar karantini davlat inspektorlariga ko‘maklashadi.

Senatorlar qayd etganidek, mazkur Qonun o‘simliklar karantini sohasidagi munosabatlarni tartibga solish mexanizmini takomillashtirish, xalqaro hamkorlikni kengaytirish, karantin xizmati faoliyatiga zamonaviy xorijiy texnologiyalarni va ishlash usullarini joriy etish, O‘simliklar karantini davlat inspeksiyasi mas’ul xodimlarining majburiyatlarini aniq belgilash, shuningdek, don, o‘simliklar, xomashyo va boshqa o‘simlik mahsulotlari bilan xalqaro miqyosda savdo qilishda o‘simliklar kasalliklarini qo‘zg‘atuvchilar, yovvoyi o‘tlar va zararkunandalar o‘tishining oldini olish maqsadida import va eksport qiluvchi mamlakatlarning tadbirkorlik subyektlari bajarishi kerak bo‘lgan fitosanitariya chora-tadbirlari hamda normalarini mukammal belgilash orqali fitosanitar xavfsizlikni ta’minlashga doir tadbirlarni amalga oshirish imkonini beradi. Qonun senatorlar tomonidan ma’qullandi.

So‘ngra senatorlar davlat hokimiyati va boshqaruvi organlari faoliyatini, jinoyat va jinoyat-protsessual qonun hujjatlarini, ma’muriy javobgarlik to‘g‘risidagi qonun hujjatlarini yanada takomillashtirishga, shuningdek, mamlakat iqtisodiyotini rivojlantirishga qaratilgan “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi O‘zbekiston Respublikasi Qonunini ko‘rib chiqdilar. Qonun senatorlar tomonidan ma’qullandi.

Senatorlar O‘zbekiston Respublikasining xalqaro shartnomalarini ratifikatsiya qilish to‘g‘risidagi qator qonunlarni ham ko‘rib chiqdilar. Qonunlar senatorlar tomonidan ma’qullandi.

Senatorlar O‘zbekiston Respublikasi Bosh prokurorining O‘zbekiston Respublikasi prokuratura organlarining 2017-yildagi faoliyati to‘g‘risidagi hisobotini eshitdilar.

Hisobotda ta’kidlanganidek, prokuratura organlari tomonidan 2017-yilda qonun ustuvorligini ta’minlash, qonuniylikni mustahkamlash, fuqarolar huquqlari va erkinliklarini, jamiyat va davlatning qonun bilan qo‘riqlanadigan manfaatlarini himoyalash, mamlakatda jinoyatlar va huquqbuzarliklarning oldini olish va profilaktikasi borasida muayyan ishlar amalga oshirildi.

Xususan, tadbirkorlik subyektlarining huquqiy himoyasini kuchaytirish, tuman (shahar) prokuraturalarida tadbirkorlik faoliyati erkinligi kafolatlari to‘g‘risidagi qonun hujjatlarining shak-shubhasiz ijrosini ta’minlash maqsadida 386 ta shtat birligi miqdorida qo‘shimcha prokuror o‘rinbosari va yordamchisi lavozimlari joriy etildi.

O‘zbekiston Respublikasi Prezidentining 2017-yil 14-noyabrdagi “Prokuratura organlarining axborot-tahlil faoliyati samaradorligini yanada oshirish chora-tadbirlari to‘g‘risida”gi Qaroriga muvofiq amalga oshirilayotgan islohotlar va yangilanishlarning, qabul qilinayotgan qonun hujjatlarining mazmun-mohiyatini keng jamoatchilikka yetkazish, aholini yuz berayotgan voqealardan o‘z vaqtida xabardor qilish maqsadida Bosh prokuratura huzurida Axborot-tahlil multimedia markazi tashkil etildi.

Qonuniylikni ta’minlash holatini va jinoyatlar sonini tahlil qilish natijalari bo‘yicha huquqiy bo‘shliqlarni bartaraf etish, huquqiy normalarni qo‘llashda noxolislikka yo‘l qo‘ymaslik, me’yoriy-huquqiy hujjatlarni amalga oshirish mexanizmlarini ishlab chiqish maqsadida 2017-yilda Bosh prokuratura tashabbusi bilan O‘zbekiston Respublikasi Prezidentining va Vazirlar Mahkamasining qator qarorlari qabul qilindi.

Qonun hujjatlariga kiritilgan o‘zgartish va qo‘shimchalarga muvofiq prokurorlar tomonidan har yili o‘z faoliyati haqida xalq deputatlarining tegishli Kengashlariga hisobot taqdim etish hamda fuqarolarning o‘zini o‘zi boshqarish organlarini qonuniylikni ta’minlash va jinoyatchilikka qarshi kurashish holati to‘g‘risida xabardor qilish tartibi belgilandi.

Qishloq xo‘jaligida islohotlar olib borishga qaratilgan qonunlar ijrosi bo‘yicha o‘tkazilgan nazorat tadbirlari natijasida fermer xo‘jaliklariga 51,3 milliard so‘mlik kredit (O‘R MB kursi 29.06.2018 da, 1$= 7871.66 so‘m), 9,9 milliard so‘mlik ish haqi olishda hamda 5,8 milliard so‘mlik debitorlik qarzini undirishda, 375 ta fermer xo‘jaligining bankda hisob raqamlarini ro‘yxatdan o‘tkazishda va ochishda amaliy yordam berildi. Nazorat tadbirlari vaqtida 15,5 ming gektar asossiz berilgan yoki noqonuniy foydalanilayotgan yerlar zaxira jamg‘armasiga qaytarildi, irrigatsiya va melioratsiya tadbirlarini o‘tkazish uchun ajratilgan 114 million so‘m hamda 61,8 milliard so‘mlik ish haqi, kreditlar va boshqa to‘lovlar talon-toroj qilingani aniqlandi. Aybdorlar javobgarlikka tortildi.

Nazorat tadbirlari davomida 51260 ta tadbirkorlik subyektining huquqlarini buzish holatlari, shu jumladan, 57 ta noqonuniy aralashish holati va 53 ta noqonuniy tekshiruv, 752 ta noqonuniy qaror qabul qilingani aniqlandi. 49 866 nafar tadbirkorning huquqlari va 2797 nafar tadbirkorning faoliyati tiklandi.

Hisobotni eshitgach, senatorlar jamiyatda qonun ustuvorligini ta’minlash, adolatni mustahkamlash, jismoniy va yuridik shaxslarning huquqlari va qonuniy manfaatlarini himoya qilish, aholining huquqiy madaniyatini yuksaltirish bo‘yicha chora-tadbirlarni kuchaytirish zarurligini qayd etdilar.

Shundan so‘ng senatorlar O‘zbekiston Respublikasi Hisob palatasining 2017-yildagi faoliyati to‘g‘risidagi hisobotni eshitdilar.

Qayd etilganidek, 2017-yilda Hisob palatasi tomonidan 70 ga yaqin tahliliy o‘rganish va nazorat tadbiri olib borildi. Shundan 49 tasi bevosita joylarda, qolganlari vazirlik va idoralarda o‘tkazildi.

Hisobotda ta’kidlanganidek, 2018-yilgi Davlat byudjeti loyihasini va soliq-byudjet siyosatining asosiy yo‘nalishlarini ko‘rib chiqishda Hisob palatasi tomonidan takliflar tayyorlangan va Moliya vazirligiga taqdim etilgan. Ushbu takliflar asosida byudjet daromadlari prognozi 1,4 trillion so‘mga qayta hisob-kitob qilindi. Davlat byudjetining respublika va mahalliy darajadagi shakllanishi hamda uning ijrosi yuzasidan nazorat o‘rnatilib, davlat mablag‘larining qonuniy, maqsadli, samarali sarflanishi byudjetdan moliyalashtiriladigan vazirlik va idoralar misolida o‘rganib chiqildi.

Nazorat tadbirlari natijasida 37 milliard so‘mlik va 7 million dollarlik noqonuniy va samarasiz xarajatlar hamda 270 milliard so‘mlik qo‘shimcha daromad manbalari aniqlandi.

Senatorlar hisobotni eshitib, Davlat byudjeti va byudjetdan tashqari jamg‘armalar mablag‘laridan samarali, byudjet daromadlari manbalaridan esa to‘liq foydalanish, joylardagi sektorlar rahbarlarining ish faoliyatiga baho berish, hududlarni ijtimoiy-iqtisodiy rivojlantirish dasturlarining, Prezident qarorlari va farmoyishlaridagi topshiriqlarning ijrosi ustidan nazoratni yanada kuchaytirish yuzasidan tegishli choralar ko‘rish zarurligini ta’kidladilar. Muhokama yakuni bo‘yicha Senatning tegishli qarori qabul qilindi.

Shundan keyin senatorlar O‘zbekiston Respublikasi ichki ishlar vazirining ichki ishlar organlari tomonidan 2018-yilning birinchi yarim yilligida jinoyatchilikka qarshi kurashish, huquqbuzarliklar profilaktikasi va jamoat xavfsizligini ta’minlash borasidagi faoliyati to‘g‘risidagi axborotini eshitdilar.

Qayd etilganidek, hisobot davrida vazirlik tomonidan jamiyatda tinchlik va osoyishtalikni mustahkamlash, tergov jarayonida gumon ostida bo‘lgan va jabrlangan shaxslarning huquqlarini to‘liq himoya qilishga qaratilgan qator ishlar amalga oshirildi.

Joriy yil boshidan buyon olib borilgan ishlar natijasida sodir etilgan jinoyatlar sonini 40,7 foizga kamaytirishga erishildi.

Shu bilan birga, keyingi vaqtda ichki ishlar organlarining tezkor-xizmat faoliyati jinoyatchilikning erta oldini olish, huquqbuzarliklarga qarshi kurashish ishlariga qaratildi. Har bir xonadonni o‘rganish va mavjud muammolarni qisqa muddatda hal etish bo‘yicha keng qamrovli tadbirlar amalga oshirildi.

Mahallalarda jinoyatchilikning erta oldini olishda va aholida jinoyatlarning har qanday ko‘rinishiga murosasiz munosabatni shakllantirishda muhim omil sifatida har bir sodir etilgan jinoyatni jamoatchilik bilan muhokama qilish va har oyda aholi oldida profilaktika inspektorlari tomonidan hisobot berish mexanizmi yo‘lga qo‘yildi.

Bundan tashqari, yosh oilalar orasida ajrashish hollarining oldini olish, notinch oilalardagi janjallarni bartaraf etish bo‘yicha mutaxassislar ishtirokida maqsadli profilaktik chora-tadbirlarni amalga oshirish belgilandi.

Profilaktika inspektorlari Ichki ishlar vazirligining ma’lumotlar bazalariga ulangan zamonaviy mobil smartfonlar bilan ta’minlangani ularning faoliyatini yanada yaxshilashda muhim omil bo‘layotgani qayd etildi. Shu orqali ularga shubhali shaxslarni tekshirish va huquqbuzarlik sodir etgan shaxslar to‘g‘risidagi ma’lumotlarni yagona bazaga joylashtirish uchun imkoniyat yaratildi.

Sud-huquq tizimini isloh qilish doirasida qonun ustuvorligini ta’minlash va inson huquqlari buzilishining oldini olish, gumon qilinuvchi va ayblanuvchilarga nisbatan zo‘ravonlik va shafqatsizlikning har qanday ko‘rinishlariga chek qo‘yish maqsadida tergov izolyatorlarida va tergovchilar xonalarida so‘roq qilish jarayonini stenografiyaga tushirish, tergov harakatlarini audio va video qayd etish tizimlari joriy etildi.

Ichki ishlar vazirining axborotini muhokama qilish chog‘ida senatorlar tomonidan jinoyatchilikka qarshi kurashish va huquqbuzarliklar profilaktikasi samaradorligini oshirish borasidagi ichki ishlar organlarining faoliyatida yangi innovatsion texnologiyalardan yanada kengroq foydalanish tavsiya etildi.

Senatorlar ta’kidlaganidek, ichki ishlar organlari faoliyatining tubdan yaxshilanishi 2017-2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasini “Faol tadbirkorlik, innovatsion g‘oyalar va texnologiyalarni qo‘llab-quvvatlash yili”da amalga oshirishga oid Davlat dasturini muvaffaqiyatli ro‘yobga chiqarishning muhim shartlaridan biri hisoblanadi. Muhokama yakunlari bo‘yicha qaror qabul qilindi.

Shuning bilan O‘zbekiston Respublikasi Oliy Majlisi Senati o‘n beshinchi yalpi majlisining birinchi ish kuni yakunlandi.

(Manba: O‘zA)

jamiyat

O‘zbekiston: Uzoq muddatli rivojlanishning strategik konsepsiyasi muhokama qilindi

Toshkent shahridagi Inha universitetida 28-iyun kuni“O‘zbekiston Respublikasini 2035-yilgacha rivojlantirish strategiyasi” mavzuida xalqaro forum bo‘lib o‘tdi.

“Buyuk kelajak” xalqaro nodavlat notijorat tashkiloti va “Taraqqiyot strategiyasi” markazi hamkorligida tashkil etilgan tadbirda Oliy Majlis Qonunchilik palatasi deputatlari, diplomatik korpus, tegishli vazirlik va idoralar, xalqaro va jamoat tashkilotlari, ilmiy markazlar vakillari, olimlar, ishbilarmonlar, 20 ga yaqin mamlakatdan kelgan 60 dan ziyod xalqaro ekspertlar, yoshlar, xorijda yashayotgan yurtdoshlarimiz ishtirok etdi.

Anjumanda O‘zbekistonni 2035-yilgacha bo‘lgan uzoq muddatli rivojlantirishning strategik konsepsiyasini ishlab chiqish masalalari muhokama qilindi.

O‘zbekiston Respublikasi tashqi ishlar vazirining o‘rinbosari A.Abduvohidov, BMTning mamlakatimizdagi doimiy muvofiqlashtiruvchisi, BMT Taraqqiyot dasturining mamlakatimizdagi doimiy vakili H.Freyzer, YEXHTning O‘zbekistondagi loyihalari muvofiqlashtiruvchisi Jon Makgregor, “Buyuk kelajak” tashkiloti ekspertlar kengashi raisi A.Kalanov va boshqalar O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi va Ma’muriy islohotlar konsepsiyasiga muvofiq iqtisodiyotni liberallashtirish, davlat va jamiyat hayotini isloh qilish borasida keng ko‘lamli ishlar amalga oshirilayotgani, bu jarayonda xalqaro tajriba va ilmiy yondashuvlardan foydalanilayotgani muhim ahamiyat kasb etayotganini ta’kidladi.

Dunyoning turli mintaqalarida ta’lim olayotgan yoki mehnat qilayotgan o‘zbekistonlik yoshlarning davlat boshqaruvi institutlarini isloh qilish, ijtimoiy sohani rivojlantirish, investitsiyalar bozorini qo‘llab-quvvatlashga keng jalb qilinishi O‘zbekistonning pragmatik siyosatini aks ettirishi qayd etildi.

Tadbir doirasida tashkil etilgan yalpi sessiya yig‘ilishlarida davlat va jamiyat boshqaruvi tizimida demokratik islohotlarni chuqurlashtirish, aholining yashash darajasi va ijtimoiy muhofazani kuchaytirish, qishloq xo‘jaligi, sanoat, issiqlik va elektr energiyasi majmuasi infratuzilmalarini rivojlantirish, ta’lim kabi sohalardagi mavjud muammolar muhokama etildi.

– Buyuk Britaniya va Shimoliy Irlandiya Birlashgan Qirolligining Oksford shahrida dunyoning qadimiy muzeyi – Eshmolean joylashgan, – dedi “Buyuk kelajak” xalqaro nodavlat notijorat tashkiloti eksperti Umid Obidxo‘jayev. – Undagi Markaziy Osiyoga bag‘ishlangan bo‘limda mashhur ispan sayyohi Rui Gonsales de Klavixoning xotiralari o‘rin olgan. Qaydnomalarda Samarqanddagi oddiy kundalik buyumlar Parijdagi san’at durdonalariga qiyoslanadi. Biz bugun mamlakatimizning sanoat mollariga shunday baho berilishini istaymiz. Sessiya yig‘ilishlarida bu kabi muammolarni bartaraf etish va taraqqiyotning yuqori ko‘rsatkichlariga erishish borasidagi qarashlarim bilan o‘rtoqlashdim.

Xalq farovonligi zamin qarida emas, balki tafakkurda. Shu ravnaqning keyingi bosqichi quyosh va shamol energiyasidan unumli foydalanishda namoyon bo‘lmoqda. Bu cheksiz, ekologik barqaror energiya manbaidir. Yaqin yillarda mazkur manbalar har bir korxona va uy xo‘jaligi uchun maqbul tanlov va imkoniyatga aylanishiga shubha yo‘q.

Bu kabi fikr-mulohazalar sanoat infratuzilmasini rivojlantirish masalalariga bag‘ishlangan sessiya yig‘ilishlarida atroflicha muhokama qilindi.

– Biz to‘qnash kelayotgan masalalar va javobini kutayotgan savollarning aksariyati rivojlangan mamlakatlarda qisman o‘z yechimini topgan, – dedi xalqaro ekspert Hasan Rajabboyev. – Mana shu tayyor va inkor etish qiyin bo‘lgan tajriba bilan o‘rtoqlashish, mukammal bo‘lmasa-da, xolis va amaliy fikrlarni bildirish maqsadida mazkur forum tashkil etildi. Asosiy maqsadimiz mamlakatimizda kechayotgan islohotlar yo‘lidagi to‘siqlarni bartaraf etish, korrupsiyaga qarshi murosasiz kurashish, meriotokratik tizimni rag‘batlantirish, innovatsion siyosatning turkumlarini yaratishdan iboratdir.

Tadbirda O‘zbekistonni 2035-yilgacha bo‘lgan uzoq muddatli rivojlantirishning strategik konsepsiyasini ishlab chiqishdagi asosiy yo‘nalishlarni belgilash, kengash a’zolaridan iborat iqtisodiyot, davlat boshqaruvi va ijtimoiy soha yo‘nalishida ishchi guruhlari faoliyatini jadallashtirish masalalari ko‘rib chiqildi. Moliya, innovatsiyalar, kichik va o‘rta biznesni rivojlantirish, ilm-fan, turizm, madaniyat sohalarida ilg‘or xorijiy tajribani o‘zlashtirish yuzasidan fikr almashildi.

(Manba: O‘zA)

O‘zbekiston turizm o‘lkasi

Shahrisabz YUNESKO Umumjahon merosi ro‘yxatida qoladi

Bosh vazir o‘rinbosari Aziz Abduhakimov O‘zbekistonda tarixiy ob’ektlarni saqlab qolish bo‘yicha ishlar tubdan kuchaytirilishini ma’lum qildi.

Shahrisabzning tarixiy markazi (Qashqadaryo viloyati) YuNYeSKO Umumjahon merosi ro‘yxatida qoladi. Bu haqdagi qaror shu kunlarda Manamada (Bahrayn) bo‘lib o‘tayotgan YuNYeSKO Umumjahon merosi qo‘mitasining 42-sessiyasida qabul qilindi. Sessiyada O‘zbekiston delegatsiyasiga bosh vazir o‘rinbosari Aziz Abduhakimov rahbarlik qilmoqda.

Shahrisabz tarixiy markazini YuNYeSKO Umumjahon merosi ro‘yxatidan chiqarish sessiya kun tartibidagi masalalardan biri edi. 2016 yilda Umumjahon merosi qo‘mitasi Istanbulda bo‘lib o‘tgan 40-sessiyasida xavf ostida turgan Shahrisabz tarixiy markazini Umumjahon merosi ro‘yxatiga kiritgan edi.

«Gazeta.uz"ning hukumatdagi axborot manbasining xabar qilishicha, Aziz Abduhakimov o‘z nutqida sessiya ishtirokchilarini Shahrisabz tarixiy markazida olib borilgan ishlar bilan tanishtirib, ular mahalliy aholi hayotini yaxshilash maqsadida amalga oshirilganini ta’kidlab o‘tdi.

Qo‘mita a’zolari O‘zbekiston hukumatining yaqinda qabul qilingan «O‘zbekistonda Umumjahon merosi ob’ektlarini himoya qilish to‘g‘risida"gi qarori bilan ham tanishtirildi. U Umumjahon merosi qo‘mitasi tavsiyalarini bajarishning aniq muddatlari ko‘rsatilgan «yo‘l xaritasi"ni ham o‘z ichiga oladi.

«Yo‘l xaritasi» YuNYeSKOning Toshkentdagi vakolatxonasi bilan hamkorlikda Umumjahon meros ob’ektlari hamda O‘zbekistonning tarixiy shahar landshaftlari hududlarida amalga oshiriluvchi barcha loyihalar bo‘yicha dastlabki ekspertizalar vazifalarni belgilab beradigan xalqaro konsultativ guruhni tashkil etishni ham ko‘zda tutadi.

Aziz Abduhakimov O‘zbekiston ham moddiy, ham nomoddiy merosni saqlashni uyg‘unlashtirish yo‘lidan borayotganini ta’kidlab o‘tdi. Joriy yil boshida O‘zbekiston prezidenti Shavkat Mirziyoyev har ikki yilda bir marta sentabr oyining birinchi dekadasida Shahrisabz tarixiy markazida Maqom san’ati bo‘yicha xalqaro forum o‘tkazish tashabbusi bilan chiqdi. Mazkur tashabbus YuNYeSKO va 2003 yilgi Konvensiya tomonidan rasman qo‘llab-quvvatlandi.

Muhokamalar jarayonida Aziz Abduhakimov O‘zbekiston hukumati tomonidan mamlakatdagi tarixiy ob’ektlarni saqlab qolish bo‘yicha ko‘rilayotgan choralar yuzasidan qo‘mita a’zolarining ko‘plab savollariga javob qaytardi.

Debatlar yakunlari bo‘yicha qo‘mita a’zolari o‘rtasida Shahrisabz tarixiy markazini YuNYeSKO Umumjahon merosi Ro‘yxatida saqlab qolishni ko‘zda tutuvchi Umumjahon meros qo‘mitasining muqobil qarori loyihasini ishlab chiqish bo‘yicha ishchi guruh tashkil etishga qaror qilindi.

«Qo‘mita a’zolari yakuniy qarorga keldi va mazkur hujjatni qo‘llab-quvvatlandi. Unda mamlakatimizdagi madaniy yodgorliklarni saqlash sohasida O‘zbekistonning YuNYeSKO bilan faol hamkorlik qilishiga chaqiriq ham o‘rin olgan», — dedi axborot manbasi.

(Manba: Gazeta.uz)

ilova

O‘zbekiston Respublikasida oila institutini mustahkamlash konsepsiyasini tasdiqlash to‘g‘risida

O‘zbekiston Respublikasi Prezidentining qarori

O‘zbekistonda oilani rivojlantirishga global darajada Birlashgan Millatlar Tashkilotining Barqaror taraqqiyot maqsadlari doirasida, shuningdek, 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi doirasida qaraladi.

Shu bilan birga, ushbu sohada davlat siyosatini muvaffaqiyatli olib borishni to‘xtatib turuvchi bir qator tizimli muammo va kamchiliklar oila institutini mustahkamlash sohasidagi islohotlarni to‘liq ro‘yobga chiqarishga va belgilangan maqsadlarga erishishga to‘sqinlik qilmoqda. Chunonchi:

birinchidan, tegishli idora va tashkilotlar faoliyatini muvofiqlashtirish hamda monitoring qilishning ta’sirchan tizimi mavjud emas, oilani rivojlantirish masalalari bo‘yicha davlat, fuqarolik jamiyati institutlari va xususiy sektor hamkorligi past darajada;

ikkinchidan, oila institutini mustahkamlash sohasidagi ilmiy tadqiqotlar ixtisosligi tor, hozirgi hayot voqeligidan uzilib qolgan, ilmiy tadqiqotlar natijalari amaliyotga sust joriy etilmoqda;

uchinchidan, oilaning demografik rivojlanishida o‘zgarishlar yuz bermoqda, oila ajralishlari soni o‘smoqda, mazkur sohada salbiy tendensiyalar va muammolar sabablarini asoslovchi tadqiqotlar yetishmayapti;

to‘rtinchidan, oilada, ta’lim muassasalarida madaniy-tarixiy meros salohiyatidan sust foydalanilmoqda, milliy mentalitetimizga yot bo‘lgan g‘oya va qarashlar ta’sirining oldini olish borasidagi ishlar samarasiz;

beshinchidan, oila institutini mustahkamlashning qonunchilik asoslari mukammal emas, huquqni qo‘llash amaliyotini va ilg‘or xorij amaliyotini o‘rganish asosida oilani himoya qilish va qo‘llab-quvvatlash sohasida mustahkam huquqiy asos mavjud emas;

oltinchidan, mutaxassislar yetishmaydi va kadrlar malakasi past darajada, ta’lim tizimida mutaxassislarga bo‘lgan ehtiyojni prognozlashtirish mexanizmi yo‘lga qo‘yilmagan, oila institutini mustahkamlash va rivojlantirish bo‘yicha o‘quv dasturlari mukammal emas.

Oila institutini takomillashtirish bo‘yicha kompleks chora-tadbirlarni amalga oshirish, bu jarayonda davlat organlari, fuqarolik jamiyati institutlari va fuqarolarning yaqin hamkorligini hamda faol rolini ta’minlash maqsadida, shuningdek, O‘zbekiston Respublikasi Prezidentining 2018 yil 2 fevraldagi “Xotin-qizlarni qo‘llab-quvvatlash va oila institutini mustahkamlash sohasidagi faoliyatni tubdan takomillashtirish chora-tadbirlari to‘g‘risida”gi PF–5325-son Farmoniga muvofiq:

1. O‘zbekiston Respublikasining Konstitutsiyasiga binoan oila jamiyatning asosiy bo‘g‘ini hamda jamiyat va davlat muhofazasida bo‘lish huquqiga ega ekanligi ma’lumot uchun qabul qilinsin.

2. Quyidagilar O‘zbekiston Respublikasida oila institutini mustahkamlash bo‘yicha asosiy yo‘nalishlar etib belgilansin:

oila institutini mustahkamlashning institutsional va huquqiy asoslarini takomillashtirish, ijtimoiy sheriklikni kuchaytirish;

zamonaviy oilani mustahkamlash va rivojlantirish masalalari bo‘yicha fundamental, amaliy va innovatsion tadqiqotlar olib borish;

demografik rivojlanishni rag‘batlantirish va oila farovonligi darajasini oshirish;

oilaning tarbiyaviy-ta’lim salohiyatini mustahkamlash, jamiyatda an’anaviy oilaviy qadriyatlarni saqlash, oilalarda ma’naviy-axloqiy muhitni yaxshilash;

oilalarga ta’sirchan metodik, konsultativ va amaliy yordam ko‘rsatishning samarali tizimini yaratish.

3. Quyidagilar:

O‘zbekiston Respublikasida oila institutini mustahkamlash konsepsiyasi (keyingi o‘rinlarda Konsepsiya deb yuritiladi) 1-ilovaga muvofiq;

O‘zbekiston Respublikasida oila institutini mustahkamlash konsepsiyasini amalga oshirish bo‘yicha “Yo‘l xaritasi” (keyingi o‘rinlarda “Yo‘l xaritasi” deb yuritiladi) 2-ilovaga muvofiq tasdiqlansin.

Vazirliklar, idoralar, mahalliy davlat hokimiyati organlari va boshqa tashkilotlar rahbarlari “Yo‘l xaritasi”da nazarda tutilgan tadbirlar sifatli hamda to‘liq bajarilishi uchun shaxsan javobgar ekanligi belgilab qo‘yilsin.

4. O‘zbekiston Respublikasi Vazirlar Mahkamasi huzuridagi “Oila” ilmiy-amaliy tadqiqot markazi (keyingi o‘rinlarda “Oila” markazi deb yuritiladi):

Konsepsiya va “Yo‘l xaritasi”ni amalga oshirish jarayonining samarali muvofiqlashtirilishi hamda tizimli monitoringi, ularning ijrosi to‘g‘risida O‘zbekiston Respublikasi Vazirlar Mahkamasiga har chorakda axborot berilishini ta’minlasin;

Konsepsiya va “Yo‘l xaritasi”ni amalga oshirishga bag‘ishlangan axborot-tahliliy sharhlarni aniq ko‘rsatkich va natijalarni ko‘rsatgan holda muntazam ravishda tayyorlash va ommaviy axborot vositalarida e’lon qilib borilishi choralarini ko‘rsin;

zarur hollarda, fuqarolik jamiyati institutlari, ilmiy doiralar, xalqaro tashkilotlar vakillarini, xorijiy ekspertlarni Konsepsiya va “Yo‘l xaritasi”ni amalga oshirishda ishtirok etishga, shuningdek, oila institutini mustahkamlash bo‘yicha dolzarb masalalarni muhokama qilishga jalb qilsin.

5. “Oila” markazi, O‘zbekiston Xotin-qizlar qo‘mitasi, “Mahalla” xayriya jamoat fondi, O‘zbekiston yoshlar ittifoqi va keng jamoatchilikning Birlashgan Millatlar Tashkiloti Bosh Assambleyasining 1993 yil 20 sentyabrdagi A/RES/47/237-son rezolyutsiyasi bilan e’lon qilingan Xalqaro oila kunini respublikaning barcha hududlarida har yili nishonlash to‘g‘risidagi taklifi ma’qullansin.

“Oila” markazi respublikada 2019 yilda va keyingi yillarda Xalqaro oila kunini nishonlash to‘g‘risidagi Hukumat farmoyishi loyihasini 2018 yil 1 sentyabrga qadar O‘zbekiston Respublikasi Vazirlar Mahkamasiga kiritsin.

6. O‘zbekiston Respublikasi Jismoniy tarbiya va sport vazirligi, Madaniyat vazirligi Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari bilan birgalikda muntazam ravishda sport va madaniy tadbirlarni tashkil qilsin hamda ularni Xalqaro oila kuni arafasida o‘tkazishga alohida e’tibor qaratsin.

7. O‘zbekiston Milliy axborot agentligi, O‘zbekiston Milliy teleradiokompaniyasi, O‘zbekiston Matbuot va axborot agentligi ommaviy axborot vositalarida mazkur qarorning maqsad, vazifalari va Konsepsiyaning amalga oshirilishini yoritib borish bo‘yicha maqolalar e’lon qilinishini va mavzuga oid ko‘rsatuvlar efirga uzatilishini tashkil qilsin.

8. “Oila” markazi O‘zbekiston Xotin-qizlar qo‘mitasi, Adliya vazirligi va boshqa manfaatdor idoralar bilan birgalikda ikki oy muddatda qonun hujjatlariga ushbu qarordan kelib chiqadigan o‘zgartish va qo‘shimchalar to‘g‘risida O‘zbekiston Respublikasi Vazirlar Mahkamasiga takliflar kiritsin.

9. Mazkur qarorning ijrosini nazorat qilish O‘zbekiston Respublikasining Bosh vaziri A.N.Aripov, O‘zbekiston Respublikasi Bosh vazirining o‘rinbosari – O‘zbekiston Xotin-qizlar qo‘mitasi raisi T.K.Norboyeva, O‘zbekiston Respublikasi Prezidenti Davlat maslahatchisining birinchi o‘rinbosari B.M.Mavlonov va O‘zbekiston Respublikasi Vazirlar Mahkamasi huzuridagi “Oila” ilmiy-amaliy tadqiqot markazi direktori D.G.Toshmuhamedova zimmasiga yuklansin.

O‘zbekiston Respublikasi Prezidenti  SH.MIRZIYOYEV

Toshkent shahri, 2018-yil 27-iyun

(Manba: O‘zA)

  

Ish jarayonida foydalanilgan manba lavhasi qo‘yilishi shart

YANGILIKLAR XABARNOMASI №125 TIV Jamoatchilik va OAV bilan aloqalar boshqarmasi 2018-yil 28-iyun

posted 16 Jul 2018, 11:01 by Webmaster Ambasciata

27-IYUN – MATBUOT VA OMMAVIY AXBOROT VOSITALARI XODIMLARI KUNI. 1

O‘zbekiston Prezidenti Shavkat Mirziyoyevning matbuot va ommaviy axborot vositalari xodimlariga tabrigi 1

Yuksak ishonch va rag‘bat mas’uliyatga undaydi 2

PREZIDENT.. 4

Aholi muammolarini hal etish, turmush sharoitiva hayot sifatini yaxshilash – bosh maqsadimiz. 4

Investitsiya.. 6

Osiyoning eng yetakchi kompaniyasi — “Indorama” Sirdaryoga investitsiya kiritadi 6

Ishbilarmonlik muhiti. 6

Soliq tizimi shakl-shamoyili ham, mazmuni ham o‘zgaradi 6

Ilova.. 8

O‘zbekistonda Shanxay hamkorlik tashkilotining xalq diplomatiyasi markazi tashkil etilishini davlat tomonidan qo‘llab-quvvatlash chora-tadbirlari to‘g‘risida. 8

  

27-IYUNMATBUOT VA OMMAVIY AXBOROT VOSITALARI XODIMLARI KUNI

O‘zbekiston Prezidenti Shavkat Mirziyoyevning matbuot va ommaviy axborot vositalari xodimlariga tabrigi

Qadrli do‘stlar!

Avvalambor, siz, azizlarni, soha rivojiga munosib hissa qo‘shgan muhtaram faxriylarimizni 27-iyun – Matbuot va ommaviy axborot vositalari xodimlari kuni bilan chin qalbimdan muborakbod etish, barchangizga chuqur hurmat-ehtiromim va ezgu tilaklarimni bildirish menga katta mamnuniyat bag‘ishlaydi.

Jamiyatimizda demokratik qadriyatlarni qaror toptirish, fuqarolarimizning axborot sohasidagi konstitutsiyaviy huquqlarini ta’minlash, dunyoda va mamlakatimizda sodir bo‘layotgan ijtimoiy-siyosiy jarayonlar, voqea-hodisalar haqida tezkor va haqqoniy ma’lumotlar yetkazish borasida siz, matbuot ahlining fidokorona mehnat qilayotganingizni xalqimiz yaxshi biladi va yuksak qadrlaydi.

Sizlar kabi ming-minglab olijanob kasb egalarining sa’y-harakatlari, iste’dod va mahorati bilan mamlakatimiz ommaviy axborot vositalari xalqimiz hayotiga, uning quvonch va tashvishlariga tobora yaqin bo‘lib, O‘zbekistonning yangi, demokratik qiyofasini shakllantirishda g‘oyat muhim rol o‘ynamoqda.

Mustaqillik yillarida mamlakatimiz ommaviy axborot vositalarining soni qariyb 4 barobar ko‘payib, 1500 taga yetgani ushbu tarmoqda o‘sish, o‘zgarish jarayonlari izchil davom etayotganidan dalolat beradi.

Eng muhimi, soha rivojida ana shunday miqdor o‘zgarishlari bilan birga sifat o‘zgarishlari ham yuz bermoqda. Buning tasdig‘ini milliy media maydonimizda fuqarolik jamiyatining muhim sharti bo‘lgan nodavlat ommaviy axborot vositalari tarmog‘i kengayib, samarali faoliyat ko‘rsatayotgani, internet jurnalistikasi jadal rivojlanib borayotgani misolida yaqqol ko‘rish mumkin.

Keyingi paytdaommaviy axborot vositalari xodimlarining demokratik jarayonlar, fuqarolik jamiyatini barpo etishdagi o‘rni va nufuzini, mahalliy gazetalar, tele-radiokanallarning moddiy-texnik bazasi va kadrlar salohiyatini mustahkamlash, eng asosiysi, matbuotda fikrlar, qarashlar xilma-xilligini ta’minlash bo‘yicha jiddiy ishlar amalga oshirilgani sizlarga yaxshi ma’lum, albatta.

Gazetalarimiz, tele-radiokanallarimizda oshkoralik, tahlil va xolis tanqid ruhi kuchaygani, bevosita xorijiy mamlakatlardan tayyorlanayotgan materiallar soni ortib borayotganini biz har tomonlama qo‘llab-quvvatlaymiz.

Bugun biz dunyodagi uzoq-yaqin davlatlar bilan hamkorlikni mustahkamlab, yurtimizdagi demokratik o‘zgarishlarni yanada chuqurlashtirishga intilar ekanmiz, boshqa sohalar qatori ommaviy axborot vositalari faoliyati bo‘yicha ham hali ko‘p ish qilishimiz kerakligini yaxshi tushunamiz. Ommaviy axborot vositalari so‘zda emas, amalda “to‘rtinchi hokimiyat” darajasiga ko‘tarilishi zarur. Bu – zamon talabi, islohotlarimiz talabi.

Birinchi navbatda media tarmoqlari faoliyati samarasini oshirish, ularni xalq bilan muloqotning ishonchli vositasiga aylantirish, zamonaviy axborot xizmatlari bozorini, sog‘lom raqobat muhitini shakllantirish singari dolzarb masalalar doimiy e’tiborimiz markazida bo‘lishi kerak.

Shu maqsadda parlamentimiz tomonidan amaldagi qonun hujjatlariga axborot sohasini yanada demokratlashtirish va rivojlantirishga qaratilgan o‘zgartish va qo‘shimchalar kiritish bo‘yicha faol ish olib borilayotgani ayniqsa e’tiborlidir.

Bu borada O‘zbekistonJurnalistlari ijodiy uyushmasi faoliyatini yanada takomillashtirish, uning moddiy-texnik bazasini yaxshilash, qalam haqi miqdorini oshirish, ijodiy jamoalar bilan yirik kompaniyalar va xo‘jalik birlashmalari, banklar o‘rtasida “do‘stlar klublari”ni tashkil etishga qaratilgan amaliy ishlarimizni ta’kidlash lozim.

Ommaviy axborot vositalari uchun zamonaviy kadrlar tayyorlash tizimini takomillashtirish maqsadida yaqinda katta umidlar bilan O‘zbekiston jurnalistika va ommaviy kommunikatsiyalar universitetini tashkil etganimizdan xabaringiz bor.

Ushbu oliy ta’lim maskani sohada erishilgan yutuqlarni har tomonlama o‘rganish, jurnalistika fani, uning ilmiy-nazariy asoslarini, zamonaviy mediatexnologiyalarni chuqur o‘zlashtirish, xalqaro standartlar darajasidagi yuqori malakali kadrlar tayyorlash imkonini beradi.

Hech shubhasiz, ommaviy axborot vositalari sohasida amalga oshirilayotgan ana shunday ishlarning barchasi O‘zbekiston jurnalistikasining jahon axborot maydonida munosib o‘rin egallashi uchun mustahkam poydevor yaratadi.

Hurmatli ommaviy axborot vositalari xodimlari!

Hozirgi vaqtda hayotimizda amalga oshirilayotgan modernizatsiya va yangilanish jarayonlarining tub mohiyatini xalqimizga yetkazish, odamlarni yangi marralar sari safarbar etish, oldimizga qo‘ygan vazifalarni sifatli amalga oshirishda sizlarning ta’sirchan so‘zingiz, faol grajdanlik pozitsiyangiz suv bilan havodek zarur.

Haqiqatan ham, har qanday murakkab sharoitda ham adolat tamoyiliga, o‘zining hayotiy va ijodiy prinsiplariga sodiq qolish, odamlarni qiynayotgan kamchilik va muammolarni dadillik bilan ko‘tarib chiqish, ularni bartaraf etish uchun jamoatchilik fikrini shakllantirishga, avvalo, sizlar kabi ma’naviy jasorat egalarigina qodir bo‘ladi.

Biz jamiyatimizda oshkoralik, adolat va qonun ustuvorligini ta’minlashda, huquqiy demokratik davlat asoslarini mustahkamlashda sizlarga, sizlarning bilim va iste’dodingizga tayanamiz.

Ayniqsa, hayot va kasb tajribangizni yoshlarga o‘rgatish, ularni zamonaviy fikrlaydigan, Vatan va xalq manfaatini muqaddas deb biladigan, sog‘lom va barkamol insonlar etib tarbiyalashda ko‘pchilikka o‘rnak va namuna bo‘lasizlar, deb ishonaman.

O‘z-o‘zidan ravshanki, mamlakatimiz ommaviy axborot vositalari xodimlarining ish va turmush sharoitlarini yaxshilash, ularning mashaqqatli va mas’uliyatli mehnatini munosib baholash va rag‘batlantirish, soha rivojiga e’tibor va g‘amxo‘rlik ko‘rsatish bundan buyon ham biz uchun ustuvor vazifa bo‘lib qoladi.

Aziz va muhtaram do‘stlar!

Sizlarni Matbuot va ommaviy axborot vositalari xodimlari kuni bilan yana bir bor samimiy tabriklayman.

Barchangizga sihat-salomatlik, ezgu faoliyatingizda yutuq va omadlar, oilaviy baxt, xonadonlaringizga tinchlik-xotirjamlik, fayzu baraka tilayman.

Shavkat Mirziyoyev,

O‘zbekiston Respublikasi Prezidenti

(Manba: O‘zA)

Yuksak ishonch va rag‘bat mas’uliyatga undaydi

Prezidentimiz Shavkat Mirziyoyev rahbarligida barcha sohalarda amalga oshirilayotgan islohotlar natijadorligini oshirish, jamiyatda demokratik prinsiplarni mustahkamlashda ommaviy axborot vositalarining o‘rni katta. Soha xodimlari mamlakatimizda kechayotgan yangilanish jarayonlarini chuqur tahlil asosida yoritish, aholiga haqqoniy va xolis axborotlarni yetkazish borasida samarali mehnat qilmoqda.

O‘zbek Milliy akademik drama teatrida 27 iyun – Matbuot va ommaviy axborot vositalari xodimlari kuni munosabati bilan tantanali tadbir bo‘lib o‘tdi.

Tadbirda O‘zbekiston Respublikasi Oliy Majlisi Senati a’zolari, Qonunchilik palatasi deputatlari, vazirlik va idoralar, jamoat tashkilotlarining vakillari, faxriy jurnalistlar, noshirlar, matbaachilar, oliy o‘quv yurtlarining professor-o‘qituvchilari qatnashdi.

O‘zbekiston Respublikasi Prezidenti Shavkat Mirziyoyevning matbuot va ommaviy axborot vositalari xodimlariga bayram tabrigini PrezidentningDavlat maslahatchisi X.Sultonov o‘qib eshittirdi.

Bu yil tariximizda birinchi marta ushbu sana munosabati bilan O‘zbekiston Respublikasi Prezidentining farmoniga binoan soha rivojiga munosib hissa qo‘shib kelayotgan bir guruh xodimlar davlatimizning yuksak mukofotlari bilan taqdirlandilar. Bu bayramga o‘zgacha shukuh va ko‘tarinki ruh bag‘ishladi. Tadbirda Vatanimizning yuksak mukofotlari tantanali topshirildi.

Tadbirda so‘zga chiqqanlar davlatimiz rahbari tomonidan so‘nggi yillarda ommaviy axborot vositalarini rivojlantirish va matbuotning ta’sirchanligini oshirishga katta e’tibor berilayotganini alohida ta’kidladi. Soha xodimlarining mehnati munosib taqdirlanayotgani uchun Prezidentimizga minnatdorlik bildirildi.

Qayd etilganidek, mamlakatimizda fuqarolarning so‘z erkinligiga doir huquqlarini, axborot xavfsizligini ta’minlash, soha xodimlari manfaatlarini himoyalash borasida barcha huquqiy asoslar yaratilgan.

Prezidentimizning 2017-yil 3-avgustda ijodkor ziyolilar vakillari bilan o‘tkazgan uchrashuvda ilgari surgan g‘oya va takliflarimamlakatimiz ijodiy tashkilotlari faoliyatida yangi davrni boshlab berdi. Xususan, O‘zbekiston Respublikasi Prezidentining“O‘zbekiston ijodkorlarini qo‘llab-quvvatlash ”Ilhom“ jamoat fondini tashkil etish to‘g‘risida”, “O‘zbekiston Jurnalistlari ijodiy uyushmasi faoliyatini yanada takomillashtirish chora-tadbirlari to‘g‘risida”, “Madaniyat va san’at tashkilotlari, ijodiy uyushmalarva ommaviy axborot vositalari faoliyatiniyanada rivojlantirish, soha xodimlari mehnatini rag‘batlantirish bo‘yicha qo‘shimcha chora-tadbirlar to‘g‘risida”gi qarorlari sohani yanada rivojlantirish va xodimlar mehnatini munosib baholash hamda ularning turmush sharoitlarini yaxshilashda muhim huquqiy asos bo‘lib xizmat qilmoqda.

Bugungi kunda mamlakatimizda 1500 dan ortiq ommaviy axborot vositasi faoliyat olib bormoqda. Ulardan 700 ga yaqini gazeta, 309 tasi jurnal, 65 tasi televideniye, 35 ta radio, 4 ta axborot agentligi, 15 tasi axborotnoma-byulleten, 395 tasi veb-saytdan iborat. Mavjud teleradiokanallarning 66 foizini, bosma nashrlarning 50 foizdan ziyodini nodavlat axborot vositalari tashkil etadi. Mustaqillikdan avval respublikamizda 395 ta ommaviy axborot vositasi bo‘lib, ularning deyarli barchasi davlatga qarashli edi.

Mamlakatimizda fuqarolik jamiyatini rivojlantirishda nodavlat ommaviy axborot vositalari muhim rol o‘ynamoqda. Zero, taraqqiyotning muhim omillaridan bo‘lgan fikrlar rang-barangligining shakllanishida ommaviy axborot vositalari salmoqli o‘rin egallamoqda.

Sohada amalga oshirilayotgan islohotlar zamon talabiga mos kadrlar tayyorlash masalasini yuzaga chiqarmoqda. Davlatimiz rahbarining 2018 yil 24 may kuni “O‘zbekiston jurnalistika va ommaviy kommunikatsiyalar universitetini tashkil etish to‘g‘risida”gi qarori bu boradagi tarixiy hujjat bo‘ldi.

Mazkur qarorda ommaviy axborot vositalarining barcha turlari uchun kadrlar, jumladan, bir necha xorijiy tillarni biladigan xalqaro jurnalistlar, ilmiy-pedagog kadrlar tayyorlash universitetning asosiy vazifalaridan etib belgilangan. Dunyoda shiddat bilan kechayotgan globallashuv jarayonida axborotning hal qiluvchi kuchga aylanib borayotgani, milliy jurnalistikamizning taraqqiyoti, bugungi holati va istiqboli bilan bog‘liq masalalarni chuqur o‘rgangan holda mamlakatimiz axborot siyosatini takomillashtirish, bu borada olib borilayotgan ilmiy-tadqiqot ishlari samaradorligini yanada oshirish muhim yo‘nalishlardan sanaladi.

Soha xodimlari mehnatini rag‘batlantirish, yangi-yangi ijodiy parvozlar sari chorlash, kasb malakasi va mahoratini yuksaltirish borasidagi ishlar ko‘lami tobora kengaymoqda. Bunday sa’y-harakatlar jurnalistikamiz rivojiga xizmat qilayotgan turli ko‘rik-tanlovlar, ijodiy bellashuvlar, grant loyihalar, ijtimoiy dasturlarda ham o‘zining yaqqol ifodasini topmoqda.

Shu kuni O‘zbekiston Jurnalistlari ijodiy uyushmasi tomonidan an’anaviy tarzda o‘tkazib kelinayotgan “Yilning eng faol jurnalisti” respublika ko‘rik-tanlovi g‘oliblari va sovrindorlariga ham mukofotlar topshirildi.

Bayram tadbiri ishtirokchilari uchun O‘zbek Milliy akademik drama teatri san’atkorlari ijrosida mashhur adib Chingiz Aytmatovning “Oq kema” asari asosida tayyorlangan spektakl namoyish etildi.

Shu kuni Toshkentning G‘afur G‘ulom nomidagi madaniyat va istirohat bog‘ida bayram sayllari davom etdi.

(Manba: O‘zA)

PREZIDENT

Aholi muammolarini hal etish, turmush sharoitiva hayot sifatini yaxshilash – bosh maqsadimiz

Prezidentimiz Shavkat Mirziyoyev raisligida 2018-yil 27-iyun kuni “Obod qishloq” va “Obod mahalla” dasturlarini amalga oshirish, aholi yashash joylarini obod maskanga aylantirish masalalariga bag‘ishlangan videoselektor yig‘ilishi o‘tkazildi.

Yig‘ilishda O‘zbekiston Respublikasi Bosh vaziri va uning o‘rinbosarlari, Qoraqalpog‘iston Respublikasi Jo‘qorg‘i Kengesi raisi, viloyatlar va Toshkent shahar hokimlari, vazirlik va idoralar mutasaddilari ishtirok etdi.

Prezidentimizning 2018-yil 29- martdagi “Obod qishloq” dasturi to‘g‘risida”gi farmoniga muvofiq, joriy yilda 159 ta tumandagi 386 ta qishloqda qurilish-obodonlashtirish ishlari olib borilmoqda. Ushbu qishloqlarda 142 mingta yakka tartibdagi uy-joy va 1000 dan ziyod ko‘p qavatli uyni ta’mirlash, 2,5 ming kilometr elektr, 495 kilometr gaz, 2 ming kilometr ichimlik suvi tarmoqlarini tortish va qayta tiklash, 17 ming dona kanalizatsiya qudug‘i va 3 ming kilometr yo‘llarni ta’mirlash, 2 ming 400 ta bozor va boshqa infratuzilma obyektlarini qurish belgilangan.

Bundan tashqari, 388 maktab, 313bog‘cha, 168 tibbiyot muassasasi, 38 mahalla binosi va 55 boshqa ijtimoiy soha obyektini qurish va ta’mirlash rejalashtirilgan.

Bugun kunga qadar 51 ming 660 yakka tartibdagi uy-joy, 518 ko‘p qavatli uy, 610 kilometr elektr tarmog‘i, 66 kilometr gaz quvuri, 398 ta transformator punkti ta’mirlangan.

Yig‘ilishda bu boradagi dastlabki natijalar atroflicha tahlil qilindi. Dasturda belgilangan ishlarni tashkil qilish va amalga oshirishda sustkashlikka yo‘l qo‘yilayotgani qayd etildi.

Ta’kidlanganidek, dasturga qo‘shimcha kiritilgan 64 qishloqning 44 tasi bo‘yicha, xususan, Andijonda – 22, Navoiyda – 6, Toshkent viloyatida – 13, Xorazmda – 3 ta qishloqning bosh rejasi ishlab chiqilmagan.

Prezidentimiz dasturni amalga oshirish uchun zarur bo‘lgan mablag‘larni shakllantirish borasidagi ishlar sustkashlik bilan olib borilayotganini tanqid qildi. Qator hududlarda uy-joylarni ta’mirlash ishlari hanuz talab darajasida tashkil etilmagan. Misol uchun, 54 qishloqdagi jami 14 mingta uy-joyni ta’mirlash ishlari boshlanmagan. Qishloq joylardagi ko‘p qavatli uylarni ta’mirlash ishlari talab darajasida emas.

Yig‘ilishda dastur doirasida aholining ichimlik suvi ta’minotini yaxshilash borasidagi ishlarni takomillashtirish zarurligi ta’kidlanib, Buxoro, Jizzax, Samarqand, Surxondaryo va Farg‘ona viloyatlarida suv tarmoqlarini qurish ishlarini jadallashtirish bo‘yicha muhim vazifalar belgilab olindi.

O‘tkazilgan tahlillar qishloqlarda sizot suvlar sathini pasaytirish borasidagi ishlar talab darajasida tashkil etilmaganini ko‘rsatmoqda. Sizot suvlar sathini pasaytirish uchun 2,2 ming kilometr melioratsiya tarmoqlarini ta’mirlash va tiklash talab etiladi. Biroq, bugungi kunda atigi 220 kilometr kollektor-drenaj tizimida ishlar bajarilgan.

Davlatimiz rahbari ikki hafta muddatda qishloqlarda irrigatsiya va kollektor-drenaj tarmoqlari bo‘yicha loyiha-smeta hujjatlarini ishlab chiqishni yakunlab, ishlarni boshlash bo‘yicha mutasaddilarga topshiriq berdi.

Yig‘ilishda 73 qishloqda 455 kilometr elektr tarmoqlarini hamda 40 aholi punktida 76 kilometr gaz ta’minotini ta’mirlash ishlari haligacha boshlanmagani alohida ko‘rsatib o‘tildi. "O‘zbekenergo” AJ rahbariyatiga bu qoloqlikni tezda bartaraf etish, mahalliy hokimliklar bilan birga ikki hafta muddatda ushbu qishloqlarda elektr energiyasi tarmoqlarini ta’mirlash ishlarini boshlash vazifasi topshirildi.

Shuningdek, chekka hududlarga suyultirilgan gaz ballonlari yetkazib berish bo‘yicha kunlik grafik ishlab chiqib ijrosini ta’minlash, dasturga kiritilgan qishloqlar va ularga tutash hududlarda avtomobil yo‘llarini ta’mirlashni kuzga qadar yakunlash zarurligi ta’kidlandi.

Yig‘ilishda yana bir muhim masalaga e’tibor qaratildi. Dasturga kiritilgan qishloqlarda ijtimoiy soha obyektlarini qurish va ta’mirlash ishlari orqada qolmoqda. Jumladan, 318 maktab bo‘yicha loyiha-smeta ishlari yakunlanmagan. 109 oilaviy poliklinikani ta’mirlash bo‘yicha tarmoq jadvallari ishlab chiqish va tasdiqlashni jadallashtirish zarur. Qashqadaryo, Samarqand, Sirdaryo viloyatlarida tibbiyot muassasalarini ta’mirlash ishlari kechiktirilmoqda. Maktabgacha ta’lim muassasalarini rekonstruksiya qilish va ta’mirlash ishlari faqat Buxoro, Jizzax, Navoiy va Toshkent viloyatlarida o‘z muddatida bajarilmoqda.

Qishloq joylarda zamonaviy savdo nuqtalari hamda maishiy xizmat ko‘rsatish majmualari barpo etish qishloq aholisi turmush sharoiti yaxshilanishida muhim samara beradi. Bundan 2 oy oldin o‘tkazilgan yig‘ilishda qishloqlarda 368 savdo kompleksi qurish bo‘yicha topshiriq berilgan edi. Ayni kunda ularning 52 tasini qurish boshlangan, 36 tasiga yer ajratilgan, 66 tasi rekonstruksiya qilinmoqda.

Yig‘ilishda 214 supermarket tipidagi savdo komplekslarini qurish, qishloqlarda maishiy xizmat ko‘rsatish majmualari va hammomlarni namunaviy loyihalar asosida barpo etish uchun bo‘sh turgan bino-inshootlarni tadbirkorlarga berish choralarini ko‘rish zarurligi qayd etildi.

Ayni kunlarda mamlakatimizning barcha viloyatlarida qurilish-obodonlashtirish ishlari jadal olib borilmoqda. Yig‘ilishda hududlarga qurilish materiallarini uzluksiz va yetarli miqdorda yetkazib berish, qishloqlarda shunday mahsulotlar do‘konlari ochish zarurligi ta’kidlandi. Bu belgilangan tadbirlarning sifatli va muddatida bajarilishini ta’minlab, qurilish ishlari narxi oshib ketishining oldini oladi.

Ma’lumki, Prezidentimiz shu yil 1 iyun kuni Chilonzor tumanidagi Xirmontepa va Tirsakobod mahallalarida bo‘lganida “Obod mahalla” dasturi loyihasini shakllantirish bo‘yicha topshiriq bergan edi.

Bugungi kunda tajriba sifatida Toshkent shahrining 11tumani va yurtimizdagi 30 shaharda 1 tadan mahalla hududida obodonlashtirish ishlari olib borilmoqda.

Yig‘ilishda davlatimiz rahbari Toshkent shahridagi mahallalarni o‘rganish borasida boshlangan ishlar xususida to‘xtalar ekan, poytaxtimizdagi ahvol viloyatlardagi eng chekka qishloqlardan ham achinarli ekanini afsus bilan qayd etdi.

– Xalqimiz bir oydan buyon Toshkent shahridagi mahallalar ahvoli to‘g‘risidagi teleko‘rsatuvlarni ko‘rib borayapti. Nafaqat Chilonzorda, balki shaharning deyarli barcha tumanida Manasdagi sharoitdan battar joylar borligini hokimlar va mutasaddi idoralar rahbarlari bilmaydi. Sababi, rahbarlar bunday joylarga umuman bormagan, – dedi Prezidentimiz. – Qachongacha hokimliklar va mutasaddi idoralar rahbarlari yuqoridan topshiriq kelishini kutib o‘tiradi, qachon ular muammo va kamchiliklarni o‘z tashabbusi bilan bartaraf etishni boshlaydi? Afsuski, shu vaqtgacha bu savolga hech kimdan javob olmadim.

Ana shu kabi kamchiliklarni bartaraf etish maqsadida “Obod qishloq” dasturi tajribasidan kelib chiqib, “Obod mahalla” dasturi qabul qilindi.

Ushbu dasturga muvofiq, joriy yilda har bir shaharda kamida 2 tadan va 2022 yilgacha har yili kamida 3 tadan mahalla qiyofasi tubdan yangilanadi. Ichimlik suvi, elektr va tabiiy gaz, kanalizatsiya tarmoqlarida qurilish-ta’mirlash, sizot suvlari sathini pasaytirish ishlari olib boriladi. Shuningdek, 5 ming 607 kilometr ichki yo‘llar, 369 ijtimoiy soha obyektini ta’mirlash, 969 bozor infratuzilmasi obyekti va servis shoxobchalari barpo etish mo‘ljallangan. Buning uchun mahalliy hokimliklar huzurida “Obod mahalla” jamg‘armalari tuziladi.

Dasturni amalga oshirish uchun 2018-2019 yillarda jami 3 trillion 130 milliard so‘m mablag‘ ajratiladi (O‘R MB kursi 28.06.2018 da, 1$= 7871.66 so‘m). Bir so‘z bilan aytganda, mazkur dastur mahallalarni obod qilishda muhim qadam bo‘ladi.

– “Obod qishloq” va “Obod mahalla” dasturlarini amalga oshirish islohotlarimiz ichida eng muhim o‘rinlardan birini egallaydi, – dedi Prezidentimiz. – Chunki biz xalqimiz oldida ularning muammolarini hal etish, turmush sharoiti va hayoti sifatini yaxshilashga burchlimiz.

Yig‘ilishda dasturga muvofiq qishloq va mahallalarni obod qilish ishlarini tizimli tashkil etish bo‘yicha ko‘rsatmalar berildi.

“Obod qishloq” va “Obod mahalla” dasturlarining so‘zsiz ijrosini ta’minlash yuzasidan qat’iy nazorat mexanizmini yanada kuchaytirish, ijtimoiy-iqtisodiy va boshqa sohalarda aniqlangan kamchiliklarni bartaraf etish borasida har bir tuman va shahar bo‘yicha alohida “yo‘l xaritasi”ni hamda uy-joylar, ijtimoiy va maishiy xizmat ko‘rsatish obyektlari qurilishini tashkil etish yuzasidan “tarmoq jadvali”ni tasdiqlash zarurligi ta’kidlandi.

Har haftaning chorshanbasi “Obod qishloq” va “Obod mahalla” kuni deb belgilandi. Shu kuni respublika – viloyat – tuman darajasidagi barcha tashkilotlar bilan ushbu dasturlar ijrosini tanqidiy muhokama qilib, muammolarni bartaraf etish choralarini ko‘rish bo‘yicha topshiriqlar berildi.

– Joylardagi haqiqiy ahvolni biz xalqimizdan yashirmaymiz va borini qanday bo‘lsa, shunday ko‘rsatib boramiz. Albatta, bu ko‘pchilikka yoqmayapti, ko‘p rahbarlar buni hazm qila olmayapti. Lekin, biz bu boradagi barcha holatni va boshlagan ishlarimizni xalqimiz bilan bamaslahat va jamoatchilik nazorati ostida amalga oshiramiz, – dedi Shavkat Mirziyoyev.

Videoselektor yig‘ilishida “Obod qishloq” va “Obod mahalla” dasturlari ijrosini o‘z vaqtida, sifatli ta’minlash, mavjud muammolarni bartaraf etish bo‘yicha mutasaddi rahbarlar zimmasiga tegishli vazifalar yuklatildi.

(Manba: O‘zA)

Investitsiya

Osiyoning eng yetakchi kompaniyasi — “Indorama” Sirdaryoga investitsiya kiritadi

Sirdaryo viloyati hokimi G’.Mirzayev Osiyodagi yetakchi kimyoviy xolding kompaniyalaridan biri, Singapurning “Indorama” kompaniyasi vakili Dipak Reynni qabul qildi.

Dipak Reyn Sirdaryo viloyatida xorijlik investorlar uchun yaratilgan imkoniyat va imtiyozlardan mamnun ekanini ta’kidladi. Jumladan, hududda qishloq xo‘jaligi mahsulotlarini ishlab chiqarish, qayta ishlash va eksport qilish uchun keng imkoniyatlar mavjudligini alohida qayd etdi. Sirdaryoda paxta klasteri va paxta tolasini qayta ishlash korxonalari tashkil etish maqsadida ekanini bildirdi.

“Indorama” – Osiyodagi yetakchi kimyoviy xolding kompaniyalaridan biri bo‘lib, 1975 yilda Indoneziyaning “Sintetiks Indo-Rama” kompaniyasi ta’sischiligida tashkil etilgan. Bugungi kunda “Indorama” kompaniyasi tomonidan polietilen, polipropilen, polester, mineral o‘g‘itlar, to‘qimachilik va tibbiy qo‘lqoplar ishlab chiqarilmoqda.

Viloyat hokimi G’.Mirzayev xorijlik tadbirkorning taklifini qo‘llab-quvvatlab, Oqoltin va Sardoba tumanlaridan yer ajratish taklifini berdi.

Shu kuni Dipak Reyn bu tumanlarda bo‘lib, unga taklif etilgan hududni o‘rgandi, tuman hokimlari bilan uchrashdi.

(Manba: )

Ishbilarmonlik muhiti

Soliq tizimi shakl-shamoyili ham, mazmuni ham o‘zgaradi

Davlat g‘aznasini to‘ldirishni soliqlarsiz tasavvur qilib bo‘lmaydi. Chunki bozor tamoyillariga asoslangan iqtisodiyotning negizini, Davlat byudjetining daromad qismini soliq yig‘imlari tashkil etadi.

Mamlakat soliq tizimining barqaror faoliyati esa yurt hamda xalq farovonligi bilan chambarchas bog‘liqdir.

Yurtimizdagi soliq tizimini isloh qilish borasida ko‘plab chora-tadbirlar amalga oshirildi. Ammo bugungi shiddatli davr har qanday sohaga yangicha yondashuvni, eski ish uslubidan voz kechgan holda, samarali mexanizmni tatbiq etishni kun tartibiga olib chiqmoqda. Xususan, davlat g‘aznasi butligini ta’minlashga mas’ul bo‘lgan soliq organlarining ish tutumi bugungi kun talablarga javob bermay qo‘ydi.

Joylardagi soliq organlarining soliq yig‘uvlari masalasiga mas’uliyatsizlik bilan yondashuvi sohada talon-torojlik, korrupsiya, qing‘ir ishlarga yo‘l ochib berdi. Oxir-oqibat bu tizimni tubdan qayta ko‘rib chiqish va takomillashtirish lozimligini ko‘rsatdi.

Prezidentimizning “Davlat soliq xizmati organlari faoliyatini tubdan takomillashtirish chora-tadbirlari to‘g‘risida”gi qarori mavjud muammolarni bartaraf qilish barobarida, sohani tubdan isloh etish, samarali tizimni ishga solishga turtki berishi, shubhasiz. Boisi, qarorga binoan, soliq tizimining ustuvor vazifalari hamda funksiyalari, ish uslubi va tashkiliy tuzilmasi ham butunlay o‘zgaradigan bo‘ldi. Mamlakat soliq ma’murchiligi tizimini takomillashtirishning muhim yo‘nalishlari belgilab berildi.

— Endilikda soliq organlari soliq to‘lovchilarning biznes hamkori hamda maslahatchisi bo‘lib, “Soliq xizmati — insofli soliq to‘lovchilarning ishonchli hamkori” tamoyili asosida ishlaydi, — deydi Davlat soliq qo‘mitasining boshqarma boshlig‘i Xolbo‘ta Ismatov. — Aynan ushbu maqsadlarni to‘la-to‘kis amalga oshirish maqsadida, birinchi navbatda, 2019 yil 1 yanvardan boshlab har bir soliq to‘lovchiga “shaxsiy kabinet” ochiladi va barcha tadbirkorlik subyekti, yuridik shaxslarga soliq xizmatlari ayni shu kabinet orqali ko‘rsatiladi. Shuningdek, 2018 yil 1 oktyabrdan e’tiboran soliq tushumlarining nazorati ham kuchaytiriladi. Ya’ni tovar yoki realizatsiyasidan tushumlarni hamda xodimlar sonini kamaytirib ko‘rsatish soliq to‘lashdan bo‘yin tovlash sifatida malakalanadigan bo‘ldi.

Hujjatga asosan, davlat soliq xizmati organlari faoliyati samaradorligini baholashning asosiy mezonlari ham belgilanmoqda. Unga ko‘ra, endilikda soliq idoralari faoliyati davlat soliq xizmati organlari ishining sifatini qoniqarli baholovchi soliq to‘lovchilar va ularning harakatlari ustidan shikoyatlar soni, kameral nazorat natijasida undirilgan soliqlar hamda boshqa majburiy to‘lovlarning umumiy summasi, xronometraj va ko‘zdan kechirish natijalari bo‘yicha aniqlangan Davlat byudjeti daromadlarini oshirish zaxiralari summasi hamda ularni undirish darajasi, hisoblangan soliq va boshqa majburiy to‘lovlar undirishning to‘liqligi, davlat soliq xizmati organlari bilan o‘zaro munosabatlarida “shaxsiy kabinet”dan foydalanish darajasi, elektron hisobvaraq-fakturalarni hisobga olish hamda onlayn nazorat-kassa mashinalarini qo‘llayotgan soliq to‘lovchilarni qamrab olish darajasi kabi qator mezonlar asosida baholanadi.

Bundan tashqari, soliq organlarining huquqlari kengaytirilmoqda. Xususan, endilikda yuridik shaxslar tomonidan soliqlarni to‘lashdagi hisobotlar o‘z vaqtida taqdim etilmaganda, soliq idoralariga ularning hisobvaraqlari bo‘yicha operatsiyalarni to‘xtatib turish, davlat ulushlari bo‘yicha dividendlarning va davlat unitar korxonalarining sof foydasidan Davlat byudjetiga ajratmalarning to‘g‘ri hisoblanishi hamda undirilishini ta’minlash, soliq to‘lovidagi axborotning ishonchliligini tekshirish maqsadida joyiga chiqqan holda, tematik va ekspress-o‘rganishlar o‘tkazish, soliq qarzdorligini jismoniy shaxslarning plastik kartalaridan yechib olish huquqlari berilmoqda.

Yangiliklardan yana biri shuki, Davlat soliq qo‘mitasining “Respublika axborot-maslahat markazi” hamda “Soliq deklaratsiyalarini qayta ishlash markazi” davlat unitar korxonalari tugatilib, uning negizida “Soliq-servis” davlat unitar korxonasi, shuningdek, Moliya vazirligi huzurida Soliq to‘lovchilar va davlat soliq xizmati organlari o‘rtasidagi soliq nizolarini sudgacha hal qilish kengashi ish boshlaydi. Qo‘mita tarkibidagi Soliq akademiyasi esa Davlat soliq qo‘mitasi huzuridagi malaka oshirish markazi sifatida qayta tashkil etiladi.

Soliq organlari xodimlarining mehnatini munosib rag‘batlantirish masalalari ham e’tibordan chetda qolmagan. 2018 yil 1 avgustdan boshlab mahalliy byudjetlarning daromad bazasini kengaytirish hamda korrupsiya holatlarining oldini olish maqsadida davlat soliq xizmati organlari xodimlarining lavozim maoshlariga tarif koeffitsiyenti 1,7 baravar oshirilgan miqdorda qo‘llaniladi.

Qisqasi, mamlakatimiz soliq tizimining shaklu shamoyili va mazmuni tubdan o‘zgaradi. Endi soliq organlari faqat soliq yig‘uvchi emas, balki soliq to‘lovchiga yaqin ko‘makchi sifatida ham faoliyat olib boradi. Bu tamoyil qo‘llanilishining asosiy maqsadi — yangi tizimni xalqimiz hamda tadbirkorlarga yanada yaqinlashtirishdan iboratdir.

Bosh prokuratura huzuridagi Axborot-tahlil

multimedia markazi materiallari asosida

(Manba: Xalq so‘zi” gazetasi)

ilova

O‘zbekistonda Shanxay hamkorlik tashkilotining xalq diplomatiyasi markazi tashkil etilishini davlat tomonidan qo‘llab-quvvatlash chora-tadbirlari to‘g‘risida

O‘zbekiston Respublikasi Prezidentining qarori

2017-yil 9-iyunda Ostona shahrida ShHTga a’zo davlatlar rahbarlari Kengashi yig‘ilishida O‘zbekiston Respublikasi tomonidan ilgari surilgan tashabbuslar va takliflarni amalga oshirish, shuningdek, 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi vazifalarini muvaffaqiyatli amalga oshirishda xalq diplomatiyasi mexanizmlaridan har tomonlama foydalanish maqsadida:

1. O‘zbekiston Respublikasi Vazirlar Mahkamasi huzuridagi Millatlararo munosabatlar va xorijiy mamlakatlar bilan do‘stona aloqalar qo‘mitasi (keyingi o‘rinlarda – Qo‘mita), Tashqi ishlar vazirligi, Madaniyat vazirligi, Oliy va o‘rta maxsus ta’lim vazirligi, Jismoniy tarbiya va sport vazirligi, Turizmni rivojlantirish davlat qo‘mitasi, Fanlar akademiyasi, Badiiy akademiya, Yoshlar ittifoqi, Jurnalistlar ijodiy uyushmasi, Yozuvchilar uyushmasining ular muassisligida nodavlat notijorat tashkiloti ko‘rinishidagi muassasa shaklida O‘zbekistonda Shanxay hamkorlik tashkilotining Xalq diplomatiyasi markazini (keyingi o‘rinlarda – Markaz) tashkil etish to‘g‘risidagi takliflariga rozilik berilsin, quyidagilar Markaz faoliyatining asosiy vazifalari va yo‘nalishlari etib belgilansin:

SHHT mamlakatlari o‘rtasida o‘zaro ishonch va yaxshi qo‘shnichilikni, millatlararo va dinlararo totuvlikni mustahkamlashga, sivilizatsiyalararo muloqotni kuchaytirishga ko‘maklashish;

SHHT mamlakatlari bilan madaniy-gumanitar aloqalarni kengaytirishda, delegatsiyalarning o‘zaro tashriflarini uyushtirishda ishtirok etish;

SHHT mamlakatlarining fuqarolik jamiyati institutlari, shu jumladan, yoshlar va xotin-qizlar tashkilotlari o‘rtasida do‘stona hamkorlik muhitini qaror toptirish uchun shart-sharoitlar yaratish;

SHHT mamlakatlari o‘rtasida axborot sohasidagi hamkorlikni rivojlantirishga ko‘maklashish, axborot resurslarini shakllantirish hamda SHHTning maqsadlari, vazifalari, faoliyatining ustuvor yo‘nalishlari va asosiy prinsiplarini keng tushuntirish maqsadida ommaviy axborot vositalari bilan hamkorlik qilish, SHHT mamlakatlarining madaniy-gumanitar sohada erishgan yutuqlari to‘g‘risida axborot-tahliliy materiallar tayyorlash va ularni muntazam chop etib borish;

SHHT mamlakatlari va ularning xalqlarini bir-biriga yaqinlashtirish, o‘zaro ishonch va yaxshi qo‘shnichilik ruhini mustahkamlash maqsadida xalq diplomatiyasi vositalaridan foydalanish.

2. Ma’lumot uchun qabul qilinsinki, quyidagilar Markaz faoliyatini moliyalashtirish manbalari hisoblanadi:

davlat subsidiyalari, ijtimoiy buyurtmalar va ijtimoiy sheriklik doirasida ajratiladigan grantlar;

texnikaviy ko‘maklashish vositalari, xalqaro va xorijiy hukumat, nohukumat tashkilotlari, tijorat banklari hamda boshqa tashkilotlarning Markaz faoliyatini qo‘llab-quvvatlashga ajratadigan grantlari;

yuridik va jismoniy shaxslarning xayriya ehsonlari;

qonunchilikda taqiqlanmagan boshqa manbalar.

3. Markazga:

o‘z zimmasiga yuklangan vazifalarni bajarish doirasida vazirliklar, idoralar va boshqa davlat tashkilotlaridan zarur statistik va tahliliy axborotni talab qilish va bepul olish;

ilmiy, madaniy, ma’naviy-ma’rifiy tadbirlarni o‘tkazish uchun davlat mulki bo‘lmish majlislar zali va konsert zallaridan (ana shu zallar o‘z tasarrufida bo‘lgan subyektlar bilan kelishilgan jadval bo‘yicha) bepul foydalanish huquqi berilsin.

4. Qo‘mita:

Tashqi ishlar vazirligi bilan birgalikda Markaz faoliyatini moddiy-texnik va axborot jihatdan ta’minlash, shuningdek, Markaz tadbirlarida ishtirok etish uchun xorijiy ekspertlarni taklif qilish maqsadida texnikaviy ko‘maklashish vositalarini va grantlarni jalb etish masalalarini SHHT hamda boshqa xalqaro va xorijiy tashkilotlar bilan puxta ishlab chiqishda Markazga yordam ko‘rsatsin;

Madaniyat vazirligi, Jismoniy tarbiya va sport vazirligi, Turizmni rivojlantirish davlat qo‘mitasi va Milliy teleradiokompaniya bilan birgalikda SHHT mamalakatlari o‘rtasida madaniy-gumanitar, sport hamda boshqa aloqalarni yo‘lga qo‘yish va rivojlantirishda madaniyat, sport, turizm va OAV sohasidagi tadbirlarni tashkil qilishda Turizmni rivojlantirish davlat qo‘mitasi va Milliy teleradiokompaniya Markazga yordam bersin.

5. Markazga ikki oy muddatda Markaz faoliyatini tashkil etish bo‘yicha “yo‘l xaritasi”ni ishlab chiqish va tasdiqlash tavsiya etilsin.

6. Madaniyat vazirligi, Jismoniy tarbiya va sport vazirligi, Oliy va o‘rta maxsus ta’lim vazirligi, Turizmni rivojlantirish davlat qo‘mitasi, Milliy teleradiokompaniya, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari majlislar zali va boshqa mulkdan vaqtincha foydalanish uchun ularni bepul taqdim etish orqali madaniy, sport tadbirlari hamda boshqa tadbirlarni tashkil etish va o‘tkazishda Markazga yordam bersinlar.

7. Markaz Toshkent shahar, Yakkasaroy tumani, Bobur ko‘chasi, 45-uyda ijara haqi “nol stavka” bo‘yicha joylashtirilsin.

8. Moliya vazirligi:

2018-yilda Qo‘mitaga Markaz joylashadigan bino qismini mukammal ta’mirlash va jihozlash uchun O‘zbekiston Respublikasi davlat byudjeti parametrlari doirasida;

Markazga xodimlar mehnatiga haq to‘lash uchun Tashqi ishlar vazirligi xodimlari uchun belgilangan normativlarga muvofiq zarur mablag‘lar ajratilishini ta’minlasin.

9. Toshkent shahar hokimligi ikki hafta muddatda Markazning zarur zamonaviy kompyuterlar, tashkiliy texnika, mebel va anjomlar bilan jihozlanishini ta’minlasin.

10. O‘zbekiston Respublikaasi Axborot texnologiyalari va kommunikatsiyalarini rivojlantirish vazirligi Markazning telefon aloqasi va internet tarmog‘iga ulanishini o‘rnatilgan tartibda ta’minlasin.

11. O‘zbekiston matbuot va axborot agentligi Alisher Navoiy nomidagi Milliy kutubxona bilan birgalikda Milliy kutubxonaning axborot-kutubxona fondiga hamda chet ellardagilitsenziyalangan yetakchi axborot-kutubxona resurslarining fondlariga doimiy elektron bog‘lanishini ta’minlasin.

12. “O‘zavtosanoat” AJga “Lasetti” rusumli 1 dona yangi avtotransport vositasini Markazga xayriya ionasi sifatida topshirish tavsiya qilinsin.

13. Adliya vazirligi bir hafta muddatda Markaz qonunchilikda o‘rnatilgan tartibda davlat ro‘yxatiga olinishini ta’minlasin.

14. Tashqi ishlar vazirligi Markazning buyurtmanomalariga binoan, Markaz tomonidan o‘tkaziladigan tadbirlarga jalb etiladigan xorijiy mutaxassislarga kirish vizalari konsullik yig‘imlari undirilmagan holda rasmiylashtirilishini ta’minlasin.

15. Ichki ishlar vazirligi Markaz buyurtmanomalariga binoan, Markazda ishlash uchun jalb etiladigan xorijiy mutaxassislarga vizalar muddati uzaytirilishini, shuningdek, ular vaqtincha yashaydigan joyda vaqtinchalik ro‘yxatga olish va uning muddatini uzaytirishni davlat boji undirilmasdan belgilangan tartibda ta’minlasin.

16. O‘zbekiston Milliy teleradiokompaniyasi va O‘zbekiston Milliy axborot agentligi Markaz faoliyatining maqsad va vazifalarini aholi o‘rtasida, shu jumladan, bosma va elektron ommaviy axborot vositalarida, jumladan, internet tarmog‘ida keng yoritilishini ta’minlasin.

17. Mazkur qarorning ijrosini nazorat qilish O‘zbekiston Respublikasining Bosh vaziri A.N.Aripov va O‘zbekiston Respublikasi Prezidenti huzuridagi Xavfsizlik kengashi kotibi V.V.Maxmudov zimmasiga yuklansin.

O‘zbekiston Respublikasi Prezidenti SH.MIRZIYOYEV

Toshkent shahri,

2018-yil 26-iyun

(Manba: O‘zA)

 Ish jarayonida foydalanilgan manba lavhasi qo‘yilishi shart

YANGILIKLAR XABARNOMASI №124 TIV Jamoatchilik va OAV bilan aloqalar boshqarmasi 2018-yil 27-iyun

posted 16 Jul 2018, 10:59 by Webmaster Ambasciata

PREZIDENT.. 1

Iqtisodiy manfaatdorlik avtomobilsozlik rivojida bosh omil bo‘lishi zarur 1

Islohotlar.. 2

Poytaxtimizda “O‘zbekiston – 2035” forumi o‘tkaziladi 2

Xalqaro munosabatlar.. 2

TIVda uchrashuv. 2

Jamshid Qo‘chqorov YTTB delegatsiyasi bilan uchrashdi 3

Aleksandar Lukashenko O‘zbekiston elchixonasi uchun yaxshi joy taklif qildi 3

O‘zbekiston respublikasi oliy majlisi qonunchilik palatasi. 3

Deputatlar aholi hayot darajasini yuksaltirishga qaratilgan qonun loyihalarini ko‘rib chiqdilar 3

Jamiyat.. 5

Oliy komissar va talabalar fikr almashdi 5

Ta’lim... 6

Vatanparvar, fidoyi diplomatlar safi kengayadi 6

Ilova.. 8

Davlat soliq xizmati organlari faoliyatini tubdan takomillashtirish chora-tadbirlari to‘g‘risida. 8

   

PREZIDENT

Iqtisodiy manfaatdorlik avtomobilsozlik rivojida bosh omil bolishi zarur

O‘zbekiston Respublikasi Prezidenti Shavkat Mirziyoyev raisligida 2018-yil 26-iyun kuni avtomobil sanoatida joriy yil uchun belgilangan ishlab chiqarish va eksport ko‘rsatkichlarini ta’minlash, tarmoqning rivojlanish istiqbollarini belgilash masalalariga bag‘ishlangan yig‘ilish o‘tkazildi.

Mamlakatimiz avtosanoati iqtisodiyotimizni yuksaltirishga salmoqli hissa qo‘shayotgan tarmoqlardan biridir. “General Motors”, “MAN”, “Isuzu” kabi jahondagi yetakchi kompaniyalar bilan hamkorlikda yurtimizda yengil va yuk avtomobillari, avtobuslar ishlab chiqarilmoqda. Shu bilan birga, bugungi kun avtomobil sanoatini modernizatsiya qilish va bosqichma-bosqich rivojlantirish, raqobatbardosh va eksportbop avtomobillar ishlab chiqarish, ularning modellarini muntazam yangilash vazifalarini qo‘ymoqda.

Yig‘ilishda tarmoqda mahalliylashtirish, aholiga avtomobillarni tez va arzon yetkazib berish, tashqi bozorga eksport qilish zamon talablariga umuman javob bermasligi tanqid qilindi.

Mamlakatimiz bir paytlar yiliga 100 mingdan ziyod avtomobil eksport qilgan bo‘lsa, oxirgi 5 yilda uni ishlab chiqarish va eksport qilish hajmi kamaygan. Tarmoqning barcha darajadagi boshqaruvida korrupsiya, tovlamachilik, tanish-bilishchilik kabi illatlar tomir otib ketgani bunga sabab bo‘lmoqda.

Keyingi 2,5 yilda avtomobil sotishda korrupsiya va tovlamachilik holatlari bo‘yicha 99 ta jinoiy ish ochilgan. “O‘zavtosanoat” aksiyadorlik kompaniyasida yuzaga kelgan qarzdorlik oqibatida o‘tgan yili tizimdagi bir nechta korxona faoliyatini zarar bilan yakunlagan. Avtomobillar yillar davomida o‘z tannarxidan past qiymatda eksportga chiqarilgan. O‘z navbatida, tannarxni tushirish bo‘yicha sezilarli ish qilinmagan.

Avtomobil ehtiyot qismlari tayyorlashni o‘zlashtirish ham qoniqarsiz ahvolda. Butlovchi qismlar importi ham hanuz yuqoriligicha qolmoqda.

Davlatimiz rahbari mazkur kamchiliklarni bartaraf etish, avtomobilsozlikda mahsulot tannarxini kamaytirish, mahalliylashtirish darajasini oshirish, importni qisqartirish bo‘yicha topshiriqlar berdi. Tarmoq korxonalarini aylanma mablag‘lar bilan to‘ldirish, avtomobillar ishlab chiqarish, ichki va tashqi bozorlarda sotish tizimini takomillashtirish lozimligini ta’kidladi.

Avtomobil sanoatining eksport salohiyatini kengaytirishda yuzaga kelayotgan zarar hajmini qisqartirish muhim o‘rin tutadi. Prezidentimiz shu maqsadda 2020 yilgacha bosqichma-bosqich foyda bilan eksport qilish choralarini ko‘zda tutuvchi kompleks dastur ishlab chiqish zarurligini ta’kidladi.

Ichki bozorda avtomobil sotishda korrupsiya bartaraf etilmayotgani aholi noroziligiga olib kelmoqda. Avtosalonlarning joylashishi va avtomobillar taqsimoti hududlar aholisining talablariga javob bermaydi, – dedi davlatimiz rahbari. – Misol uchun, 3 million aholisi bo‘lgan Qashqadaryo viloyatida atigi 2 ta avtosalon xizmat ko‘rsatayotgan bo‘lsa, 2,8 millionlik aholisi bor Toshkent viloyatida 12 ta avtosalon mavjud. Natijada aholi qo‘shni viloyatlardan avtomobil qidirib sarson bo‘lmoqda.

Yuqoridagi kamchiliklardan kelib chiqib, yig‘ilishda avtomobil ishlab chiqarishda iqtisodiy manfaatdorlikni oshirish, tashqi bozorda raqobatga chidamli mahsulotlar tayyorlashni yo‘lga qo‘yish, ularni sotish tizimini takomillashtirish yuzasidan aniq vazifalar belgilab berildi.

Hukumat va “O‘zavtosanoat” kompaniyasi rahbariyatiga mamlakatimiz avtomobilsozlik tarmog‘i jahon bozorida munosib o‘rin egallashi uchun uni izchil rivojlantirish konsepsiyasini ishlab chiqish, iste’molchilar ehtiyojini inobatga olgan holda, yanada zamonaviy mashinalar ishlab chiqarishni kengaytirish, tarmoqqa innovatsion texnologiyalarni jalb etish va investitsiyalar oqimini ko‘paytirish, kadrlar salohiyatini oshirish, yangi ish o‘rinlari tashkil etish yuzasidan zarur ko‘rsatmalar berildi.

(Manba: O‘zA)

Islohotlar

Poytaxtimizda “O‘zbekiston – 2035” forumi o‘tkaziladi

2018- yil 28-29 iyun kunlari Toshkent shahridagi Inha universitetida bo‘lib o‘tadigan mazkur forumda mamlakatimizni rivojlantirishning istiqbolli strategiyasi muhokama qilinadi.

Tadbir “Buyuk kelajak” xalqaro nodavlat notijorat tashkiloti hamda “Taraqqiyot strategiyasi” markazi tomonidan tashkil etilmoqda. Unda turli vazirlik va idoralar mutasaddilari, ilmiy markazlar mutaxassislari, diplomatik korpus vakillari hamda xalqaro ekspertlar ishtiroki kutilmoqda.

Forumda davlat va jamiyat boshqaruvi tizimida demokratik islohotlarni chuqurlashtirish, aholi yashash darajasi va ijtimoiy muhofazani kuchaytirish, qishloq xo‘jaligi, sanoat, issiqlik va elektr energiyasi majmuasi, infratuzilmani rivojlantirish, moliyaviy soha, innovatsiyalar, o‘rta va kichik tadbirkorlikni rivojlantirish, ilm-fan, turizm, madaniyat, ta’lim va inson kapitali kabi sohalardagi mavjud muammolar muhokama etiladi.

“Buyuk kelajak” tashkiloti O‘zbekistonda tug‘ilib, turli sabablarga ko‘ra xorijda yashayotgan, tahsil olayotgan va mehnat qilayotgan yurtdoshlarimiz tomonidan tashkil etilib, joriy yil aprel oyida O‘zbekiston Respublikasi Adliya vazirligida xalqaro nodavlat notijorat tashkilot sifatida ro‘yxatdan o‘tkazilgan.

Mazkur tuzilma yurt rivoji uchun o‘z hissasini qo‘shishni maqsad qilgan, innovatsion g‘oyalarini mamlakatimiz sanoati va ishlab chiqarish, shuningdek, ilmiy sohada tatbiq etishni maqsad qilgan chet ellarda yashayotgan vatanparvar yurtdoshlarimizni o‘z atrofiga birlashtiradi.

(Manba: O‘zA)

xalqaro munosabatlar

TIVda uchrashuv

2018-yilning 27-iyun kuni O‘zbekiston Respublikasi Tashri ishlar vaziri Abdulaziz Kamilov AQShning taniqli jamoatchilik arbobi va olimi, J.Hopkins Universiteti huzuridagi Markaziy Osiyo va Kavkaz instituti raisi Frederik Starr bilan uchrashdi. U mamlakatimizda nufuzli xalqaro tadqiqotchilar bilan bo‘lib turibdi.

Suhbat davomida O‘zbekiston-AQSh munosabatlarining dolzarb jihatlari muhokama qilindi.

Shu o‘rinda O‘zbekiston Prezidenti Shavkat Mirziyoyevning 2018-yil 15-17-may kunlari AQShga birinchi rasmiy tashrifi va Prezident Donald Tramp bilan muzokaralari yakunlariga yuqori baho berildi va ikki davlat hamkorligini yanada rivojlantirish uchun tarixiy ahamiyat kasb etishi qayd etildi.

Frederik Starr O‘zbekiston va butun Markaziy Osiyoning jo‘shqin va uzoq muddatli rivojlanishi o‘rtasida to‘g‘ridan-to‘g‘ri bog‘liqlik mavjudligini ta’kidladi. Uning “O‘zbekistonning yangi yuzi” kitobi Vashington shahrida may oyi boshida “Atlantika kengashi”dagi brifing chog‘ida ekspertlar hamjamiyati va keng jamoatchilikka ilk bor taqdim etilgan edi.

AQShlik tadqiqotchi “Markaziy Osiyo mintaqasida tinchlik, barqarorlik va izchil taraqqiyotni ta’minlash bo‘yicha mintaqaviy va xalqaro hamkorlikni mustahkamlash” rezolyutsiyasining O‘zbekiston tashabbusi bilan BMT Bosh Assambleyasi tomonidan 22-iyun kuni bir ovozdan qabul qilinishini olqishladi. Ushbu hujjat umumiy muammolarni birgalikda hal qilish, ko‘p millionli aholining taraqqiyoti va farovonligini ta’minlash bo‘yicha mintaqa mamlakatlarining sa’y-harakatlarini jahon hamjamiyati tomonidan qo‘llab-quvvatlanishining yana bir dalilidir.

Uchrashuvda xalqaro va mintaqaviy kun tartibining boshqa masalalari yuzasidan ham fikr almashildi.

(Manba: O‘zbekiston Respublikasi TIV veb-sahifasi)

Jamshid Qo‘chqorov YTTB delegatsiyasi bilan uchrashdi

Bosh vazir o‘rinbosari, moliya vaziri Jamshid Qo‘chqorov Yevropa Tiklanish va taraqqiyot banki (YeTTB)ning Rossiya va Markaziy Osiyo bo‘yicha ijrochi direktori Natalya Xanjenkova bilan uchrashuv o‘tkazdi.

Tomonlar moliya sektori hamda davlat-xususiy hamkorlikning joriy masalalarini, shuningdek, fond bozori va milliy valyuta bozorlari rivojlanishini muhokama qilishdi.

Natalya Xanjenkova qayd etdi: “Biz hozirda mamlakat rivojlanishining deyarli har bir yo‘nalishini bo‘layotgan O‘zbekiston rahbariyatining tashabbuslarini, barcha ishlarni, shuningdek, bizning qo‘shma loyihalarni amalga oshirishda kelajakdagi hamkorlik istiqbollari qadrlaymiz”.

Natalya Xanjenkovaning so‘zlariga ko‘ra, hozirda YeTTB tomonidan turli yo‘nalishlardagi loyihalar ishlab chiqilmoqda.

Xususan, Toshkent, Namangan va Xorazm viloyatlarida infratuzilmani, suv bilan ta’minlash va isitish tizimlarini yanada rivojlantirish masalalari ko‘rilmoqda.

YeTTB aksiyadorlari davom etayotgan iqtisodiy islohotlarni qo‘llab-quvvatlashga ijobiy munosabat bildirmoqdalar.

(Manba: UzDaily.uz)

Aleksandar Lukashenko O‘zbekiston elchixonasi uchun yaxshi joy taklif qildi

Belarus Prezidenti Aleksandr Lukashenko ikki davlat o‘rtasidagi diplomatik munosabatlarga 25 yil to‘lishi munosabati bilan Minskda O‘zbekiston elchixonasi uchun yangi bino qurishni taklif qildi.

“Biz O‘zbekiston bilan ko‘p ishlarni amalga oshirdik. Yangi elchixona binosi qurishga qaror qilsangiz, biz yaxshi joy taklif qilishimiz mumkin”, - dedi davlat rahbari O‘zbekistonning Belarusdagi Favqulodda va muxtor elchisi etib tayinlangan Nosirjon Yusupovdan ishonch yorlig‘ini qabul qilish marosimida.

Shuningdek, Aleksandr Lukashenko O‘zbekiston va Belarusni bog‘lab turgan do‘stlik rishtalarining yuqori baholashini va ko‘p yilllik hamkorining Minskda to‘laqonli diplomatik vakolatxona ochish haqidagi qarorini qo‘llab-quvavatlashini ta’kidladi.

“Bu o‘zaro muloqotni chuqurlashtirish uchun o‘z vaqtida amalga oshirilgan muhim qadamdir”, - dedi Belarus rahbari.

Nosirjon Yusupovning aytishicha, elchixona binosi qurilishi yaqin orada boshlanadi. Lekin ungacha ba’zi tashkiliy-texnik ishlar hal qilinishi kerak.

O‘zbekiston elchisining so‘zlariga ko‘ra, Belarus va O‘zbekiston munosabatlari oxirgi vaqtlarda izchil rivojlanmoqda. Ayni damda ikkala tomon ham Belarus rahbarining O‘zbekistonga rejalashtirilayotgan tashrifiga tayyorgarlik ko‘ryapti.

(Manba: Xalq so‘zi” gazetasi veb-sayti)

O‘zbekiston respublikasi oliy majlisi qonunchilik palatasi

Deputatlar aholi hayot darajasini yuksaltirishga qaratilgan qonun loyihalarini ko‘rib chiqdilar

2018-yil 26-iyun kuni Oliy Majlis Qonunchilik palatasining navbatdagi majlisi bo‘lib o‘tdi. Unda deputatlar mamlakatda Harakatlar strategiyasi asosida ijtimoiy hamda iqtisodiy sohalarda amalga oshirilayotgan islohotlar izchilligi ta’minlanishi uchun huquqiy asoslar yaratishga qaratilgan bir qator qonun loyihalarini ko‘rib chiqdilar.

Deputatlar dastlab O‘zbekiston Respublikasi tomonidan Markaziy Osiyodagi qo‘shni davlatlar bilan ishlab chiqilgan va joriy yilning 22 iyun kuni BMT Bosh Assambleyasining yalpi majlisida qabul qilingan “Markaziy Osiyo mintaqasida tinchlik, barqarorlik va izchil taraqqiyotni ta’minlash bo‘yicha mintaqaviy va xalqaro hamkorlikni mustahkamlash” rezolyutsiyasining mazmun-mohiyatiga to‘xtaldilar. Mazkur tarixiy hujjatning qabul qilinganligi 2017 yil sentyabr oyida Nyu-Yorkda bo‘lib o‘tgan BMT Bosh Assambleyasining 72-sessiyasida Prezidentimiz Shavkat Mirziyoyev tomonidan ilgari surilgan tashabbusning amaliy ijrosi ekanligi mamnuniyat bilan qayd etildi.

Shu bilan birga, hujjat hamkorlikda umumiy muammolarni hal qilish, mintaqamizning taraqqiyoti va uning ko‘p millionli aholisi farovonligini ta’minlashga qodir yaxlit, birlashgan mintaqa sifatida shakllanishida muhim bosqich bo‘lib xizmat qilishi deputatlar tomonidan alohida ta’kidlandi. Shuningdek, mazkur hujjat O‘zbekistonning xalqaro maydondagi nufuzini oshirishga xizmat qilishi qayd etilib, siyosiy partiyalar fraksiyalari, deputatlar joylarda uning ahamiyatini targ‘ib qilishga kelishib oldilar.

Shundan so‘ng deputatlar majlis kun tartibiga kiritilgan masalalarni ko‘rib chiqishga kirishdilar. Aholiga davlat xizmatlari ko‘rsatish tizimini tubdan isloh qilish, amaldagi tizimni yanada takomillashtirishga qaratilgan, shuningdek, sohaga oid huquqbuzarliklar uchun javobgarlikni nazarda tutuvchi qonun loyihasi ikkinchi o‘qishda muhokama qilindi.

Ta’kidlanganidek, mazkur qonun loyihasida mamlakatimiz Prezidentining 2017 yil 12 dekabrdagi “Aholiga davlat xizmatlari ko‘rsatishning milliy tizimini tubdan isloh qilish chora-tadbirlari to‘g‘risida”gi Farmoni va O‘zbekiston Respublikasi Prezidentining 2017 yil 12 dekabrdagi “O‘zbekiston Respublikasi Adliya vazirligi huzuridagi Davlat xizmatlari agentligi faoliyatini tashkil etish to‘g‘risida”gi qarorini amaliyotga samarali tatbiq etish mexanizmlari ko‘zda tutilgan. Jumladan, tadbirkorlik subyektlariga xizmat ko‘rsatuvchi “yagona darcha” tizimi qayta tashkil etilganligi bois qonunda “Davlat xizmatlari markazlari” maqomi va vakolatlari mustahkamlanmoqda.

Qonun loyihasining qabul qilinishi tadbirkorlik subyektlariga, aholiga davlat xizmatlari ko‘rsatish sohasida keng qulayliklar yaratishga, “Fuqarolar emas, hujjatlar harakatlanadi” tamoyilining hayotiy ifodasini ta’minlashda muhim omil bo‘lishi deputatlar tomonidan alohida qayd etib o‘tildi.

Tadbirkorlik subyektlarining mustaqilligini yanada mustahkamlash va xususiy mulk daxlsizligini ta’minlash maqsadida Jinoyat kodeksi va Ma’muriy javobgarlik to‘g‘risidagi kodeksga o‘zgartishlar kiritishni ko‘zda tutuvchi qonun loyihasi ham deputatlarning qizg‘in bahs-munozaralariga sabab bo‘ldi.

Qonun loyihasi bilan xususiy mulk huquqini, tadbirkorlik subyektlarining faoliyatini tekshirish va moliya-xo‘jalik faoliyatini taftish qilish tartibini, litsenziyalash to‘g‘risidagi qonun hujjatlarini va ruxsat berish tartib-taomillari to‘g‘risidagi qonun hujjatlarini buzish, tadbirkorlik subyektlarini homiylik qilishga va boshqa tadbirlarga majburiy jalb etish hamda tadbirkorlik subyektlaridan qonun hujjatlarini buzgan holda hujjatlar talab qilib olish, umuman, qonuniy tadbirkorlik faoliyatiga aralashganlik uchun javobgarlikni kuchaytirish belgilanmoqda.

Deputatlar tomonidan mazkur qonun loyihasining qabul qilinishi mamlakatda ishbilarmonlik muhiti yanada yaxshilanishiga, iqtisodiyot tarmoqlariga investitsiyalar jalb etishni faollashtirishga, pirovardida, xalqimiz farovonligini ta’minlashga imkon berishi aytib o‘tildi.

Kun tartibidan o‘rin olgan navbatdagi qonun loyihasi O‘zbekiston Respublikasi Prezidentining 2018 yil 23 martdagi “Bank xizmatlari ommabopligini oshirish bo‘yicha qo‘shimcha chora-tadbirlar to‘g‘risida”gi qarori ijrosini ta’minlash yuzasidan ishlab chiqilgan bo‘lib, unga asosan “Banklar va bank faoliyati to‘g‘risida”gi, “Mikromoliyalash to‘g‘risida”gi hamda “Mikrokredit tashkilotlari to‘g‘risida”gi qonunlarga o‘zgartish va qo‘shimchalar kiritilmoqda.

Qayd etib o‘tilganidek, mazkur qonun loyihasi bilan mikromoliyalash xizmatlarini ko‘rsatuvchi tashkilotlar faoliyatini takomillashtirish va iste’molchilar manfaatlarini himoya qilishni kuchaytirish, shu jumladan, mikromoliyalash xizmatlari bo‘yicha to‘lovlarni asossiz ravishda oshirishga yo‘l qo‘ymaslik bo‘yicha me’yorlarni joriy qilish nazarda tutilgan.

Deputatlarning mulohazasiga ko‘ra, kiritilayotgan ushbu qoidalar mikromoliyaviy xizmatlar iste’molchilar zimmasiga tushadigan qarz yukini kamaytirib, to‘lov qobiliyatini yaxshilaydi hamda ijtimoiy himoyasini kuchaytirishda muhim rol o‘ynaydi.

“O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasini birinchi o‘qishda muhokama qildilar.

Deputatlar O‘zbekiston Respublikasi Prezidentining 2018 yil 7 maydagi “O‘zbekiston Respublikasi Bosh prokuraturasi huzuridagi Agrosanoat majmui va oziq-ovqat xavfsizligi ta’minlanishi ustidan nazorat qilish inspeksiyasi faoliyatini tashkil etish chora-tadbirlari to‘g‘risida”gi qarorida belgilangan vazifalarni xayotga tatbiq etishga qaratilgan qonun loyihasini ham qabul qildilar. Qishloq xo‘jaligi mahsulotlarini qabul qilish, saqlash, qayta ishlash va ulardan olingan mahsulotlardan foydalanish tartibini buzganlik, shuningdek, Inspeksiyaning qonuniy talablarini bajarmaganlik va ular faoliyatiga to‘sqinlik qilganlik uchun ma’muriy javobgarlik belgilandi. Bundan tashqari, bir qator qonunlarga mazkur Inspeksiyaning vakolatlarini belgilovchi normalar kiritildi.

Majlisda, shuningdek, Oliy Majlis Qonunchilik palatasi vakolatiga taalluqli boshqa masalalar ham ko‘rib chiqildi va tegishli qarorlar qabul qilindi.

(Manba: O‘zbekiston Respublikasi Oliy Majlisi Qonunchilik palatasi Axborot xizmati)

jamiyat

Oliy komissar va talabalar fikr almashdi

Toshkent davlat iqtisodiyot universitetida Inson huquqlari bo‘yicha O‘zbekiston Respublikasi Milliy markazi tomonidan BMTning Inson huquqlari bo‘yicha Oliy komissari Zayd Raad al-Husayn bilan onlayn uchrashuv tashkil etildi.

Mazkur vebinar Toshkent va Jeneva shaharlari o‘rtasida internet orqali real vaqt rejimida o‘tkazilgan birinchi onlayn uchrashuv bo‘ldi. Unda mamlakatimiz oliy o‘quv yurtlarining iqtidorli talabalari ishtirok etdi. Tadbirni onlayn tarzda BMTning Inson huquqlari bo‘yicha Oliy komissari boshqarmasining Qirg‘izistondagi vakili ham kuzatib bordi.

O‘zbekiston Respublikasi oliy va o‘rta maxsus ta’lim vaziri Inomjon Majidov, BMTning Inson huquqlari bo‘yicha Oliy komissari Zayd Raad al-Husayn, Inson huquqlari bo‘yicha O‘zbekiston Respublikasi Milliy markazi direktori Akmal Saidov uchrashuvdan maqsad yoshlarni inson huquqlarini himoya qilishning universal va mintaqaviy mexanizmlari, sohadagi dolzarb muammolar va ularning yechimlaridan xabardor qilish ekanini ta’kidladi.

Inson huquqlari umumjahon deklaratsiyasi qabul qilinganining 70 yilligi keng nishonlanayotgan joriy yilda mamlakatimizda ushbu xalqaro hujjatda belgilangan tamoyillarni hayotga izchil tatbiq etish, inson huquq va manfaatlarini himoyalash borasida amalga oshirilayotgan ishlarni keng jamoatchilikka yetkazish, davlat, jamiyat va fuqarolarning deklaratsiyada qayd etilgan qadriyat va tamoyillarga e’tiborini kuchaytirishga alohida urg‘u berilmoqda. Prezidentimizning «Inson huquqlari umumjahon deklaratsiyasi qabul qilinganining 70 yilligiga bag‘ishlangan tadbirlar dasturi to‘g‘risida”gi farmoni asosida bu boradagi ishlar takomillashtirilmoqda.

– Tadbirda BMTning Inson huquqlari bo‘yicha Oliy komissari boshqarmasining inson huquqlari sohasidagi mintaqaviy faoliyati haqida ma’lumotga ega bo‘ldik, – deydi Toshkent davlat sharqshunoslik instituti magistranti Nilufar Mansurova. – Bu uchrashuv O‘zbekistonning inson huquqlari sohasidagi tajribasi xalqaro miqyosda tan olinayotgani namunasidir.

Onlayn uchrashuv yakunida Zayd Raad al-Husayn o‘zbekistonlik talabalarni 30 iyun – Yoshlar kuni bilan tabriklab, kelajakda o‘z sohasi bo‘yicha yetuk mutaxassis bo‘lishiga tilak bildirdi.

Tadbirda talabalarning inson huquqlari sohasidagi tajribasi va bilimlari bilan o‘rtoqlashildi. Yoshlar o‘zlarini qiziqtirgan savollarga atroflicha javob oldi.

(Manba: O‘zA)

ta’lim

Vatanparvar, fidoyi diplomatlar safi kengayadi

Prezidentimiz Shavkat Mirziyoyev Tashqi ishlar vazirligi hamda mamlakatimizning xorijiy davlatlardagi elchixonalari faoliyatiga bag‘ishlangan yig‘ilishdagi nutqida diplomat kadrlarni tayyorlash tizimini tubdan takomillashtirishni davrning o‘zi taqozo etayotgani, Jahon iqtisodiyoti va diplomatiya universiteti o‘z kasbiga sadoqatli hamda professional yosh kadrlar tayyorlash bo‘yicha vazifalarni to‘laqonli bajarmayotgani haqida kuyunchaklik bilan to‘xtalgan edi. Bu bejiz emas, albatta.

Binobarin, dunyo siyosatining tartib-taomillari kun sayin o‘zgarib borayotgan bugungi shiddatli zamon O‘zbekiston diplomatlari oldiga nafaqat ma’lum bir masalalar yuzasidan kelishuvlarga erishish, balki o‘z davlatining ham iqtisodiy, ham geosiyosiy manfaatlarini ilgari surib, undan yurtiga maksimal foyda keltirish kabi o‘ta muhim va murakkab vazifalarni qo‘ymoqda.

Shu kungacha mamlakat tashqi siyosatida faoliyat olib boradigan kadrlar 1992 yilda tashkil etilgan hamda alohida nufuzga ega bo‘lgan Jahon iqtisodiyoti va diplomatiya universitetida tayyorlanar edi. Ochig‘ini aytish kerak, yaqin vaqtgacha bu yerga o‘qishga kirish ham, uni bitirish ham ancha murakkab edi. Ta’lim jarayonlari xalqaro talab hamda standartlarga moslashtirilgan mazkur universitet diplomini qo‘lga kiritish esa har bir yosh uchun yangi istiqbollarni ochardi.

Lekin mamlakatni jadal rivojlantirish jarayonidagi talablar chet davlatlarda O‘zbekiston nomidan gapiradigan va munosib ish olib boradigan diplomatlarning yangi avlodini tarbiyalash vazifasini dolzarb qilib qo‘ydi.

Prezidentimizning “Jahon iqtisodiyoti va diplomatiya universiteti faoliyatini tubdan takomillashtirish chora-tadbirlari to‘g‘risida”gi qarori bu boradagi ustuvor vazifalarni hal etishga qaratilgani bilan g‘oyat ahamiyatlidir.

Qaror o‘z mohiyatiga ko‘ra, xalqaro munosabatlar sohasidagi mutaxassislar hamda diplomatik boshqaruv kadrlarini tanlash tizimining samaradorligini tubdan oshirish, ularni tayyorlash, qayta tayyorlash masalalarini kompleks tarzda yangicha shakl va mazmunda tashkillashtirishga xizmat qiladigan muhim hujjat bo‘ldi.

— Jahon iqtisodiyoti va diplomatiya universiteti yillar davomida o‘ziga yarasha tajribaga ega bo‘ldi, malakali hamda bilimli mutaxassislarni tayyorladi, — deydi tashqi ishlar vaziri o‘rinbosari, Jahon iqtisodiyoti va diplomatiya universiteti rektori Abdujabbor Abduvohidov. — Lekin zamon o‘zgardi, yangi dasturlar, yangi talablar yuzaga keldi. Bularni amalga oshirish hamda dunyo bilan hamohang tarzda mamlakatimiz nufuzini yangi pog‘onaga olib chiqish uchun ishni tizimli tashkil etsak, biz yanada istiqbolli va kuchli mutaxassislarni tayyorlaymiz.

Mazkur hujjatga muvofiq, Jahon iqtisodiyoti va diplomatiya universitetida yangi fakultetlar ish boshlab, ularda xalqaro iqtisodiyot hamda menejment, xalqaro munosabatlar va siyosiy fanlar, xalqaro ommaviy hamda xususiy huquq, gid hamrohligi va tarjimonlik faoliyati bo‘yicha yetuk bilimli mutaxassislar tayyorlanadi.

Universitetning asosiy vazifalari hamda faoliyat yo‘nalishi ham o‘zgarmoqda. Endilikda ushbu ta’lim muassasasi tashqi iqtisodiy va tashqi siyosiy faoliyat sohasidagi mutaxassislarni tayyorlashning yuqori sifatini ta’minlash, o‘quv-reja, dasturlar mazmuni hamda ta’lim jarayonining amaliyotga yo‘naltirilganligini yanada oshirish, doimiy yangilanib turadigan istiqbolli kadrlar zaxirasini shakllantirish maqsadida kadrlarni qayta tayyorlash va malakasini oshirish amaliy tizimini yaratish, xalqaro munosabatlar rivoji istiqbollarini bashorat qilishga yo‘naltirilgan fundamental hamda ilmiy-amaliy tadqiqotlar samaradorligini tubdan oshirish bilan shug‘ullanadi.

Ta’lim dargohi faoliyatidagi yana bir tarkibiy o‘zgarish shundan iboratki, universitetning Boshqaruv instituti va Diplomatik kurslari bekor qilinib, uning o‘rnida Oliy diplomatiya maktabi tashkil etiladi.

Jahon iqtisodiyoti va diplomatiya universiteti prorektori Matyoqub Baqoyevning ta’kidlashicha, mazkur Oliy maktab Tashqi ishlar vazirligi tizimida ishlaydigan har bir xodimning davriy ravishda malakasini oshirib boradi. Shuningdek, bu yerda xalqaro munosabatlar yo‘nalishida boshqa oliy ta’lim muassasalari ilmiy-pedagog kadrlarining malakasini oshirish hamda qayta tayyorlash bo‘yicha doimiy kurslar ish yuritadi. Shu bilan birga, Oliy maktab to‘lov-kontrakt asosida biznes boshqaruvi dasturi bo‘yicha magistrlar tayyorlashning yillik tayyorlov kursini ham ochadi.

Qarorga binoan, 2018 yil 1 sentyabrdan e’tiboran Oliy maktabda tashqi iqtisodiy va tashqi siyosiy faoliyatga jalb qilingan vazirlik hamda idoralarning ma’muriy va boshqaruv xodimlari, shuningdek, davlat hamda xo‘jalik boshqaruvi organlari, hokimliklar, tashqi siyosiy va tashqi iqtisodiy faoliyat sohasidagi vazifalarni bajarish bilan bog‘liq rahbar lavozimlariga zaxira sifatida jalb etilgan, O‘zbekistonning xorijiy idoralari hamda xalqaro tashkilotlarning ma’muriy-texnik lavozimlariga tayinlangan xodimlar, xalqaro munosabatlar va siyosiy fanlar, xalqaro iqtisodiyot hamda menejment, xalqaro ommabop va xususiy huquq, gid hamrohligi hamda tarjimonlik faoliyati sohasidagi oliy ta’lim muassasalarining pedagog kadrlari har uch yilda bir marta majburiy malaka oshiradigan bo‘ldilar.

Bundan tashqari, 2018/2019 o‘quv yilidan boshlab universitetga qabul tartiblari ham o‘zgarmoqda. Gap shundaki, avvalo, universitetda bakalavriat yo‘nalishi bo‘yicha ta’lim muddati yangi o‘quv yilidan e’tiboran to‘rt yil qilib belgilanyapti. O‘qishga qabul qilish chet tili, matematika, tarix, ona tili va adabiyot fanlaridan test sinovlari topshirish asosida amalga oshiriladi.

— Universitetga qabul jarayoniga dastlabki imtihon mexanizmi joriy etilmoqda, — deydi Jahon iqtisodiyoti va diplomatiya universiteti katta o‘qituvchisi Akram Umarov. — Bunda abituriyentlarning mantiqiy fikrlashi, dunyoqarashi, til bilish ko‘nikmalari, ma’naviy-ma’rifiy tayyorgarlik darajasiga jiddiy e’tibor qaratiladi. Mazkur tizim ushbu sohani egallamoqchi bo‘lgan abituriyentlar orasidan eng kuchlilarini saralab olish imkonini beradi. Yana bir muhim jihati shundaki, dastlabki imtihondan o‘ta olmagan abituriyentlar boshqa oliy ta’lim muassasalariga hujjat topshirishlari mumkin bo‘ladi.

Magistratura yo‘nalishiga esa ta’lim muddati — ishlab chiqarishdan ajralgan holda bir yil, ishlab chiqarishdan ajralmagan holda esa ikki yil qilib belgilanmoqda. Bundan tashqari, universitetda qabul kvotalari ham o‘zgaradi. 2018/2019 o‘quv yili uchun bakalavriatga jami 150 nafar (shu jumladan, davlat granti asosida 30 ta), magistraturaga 50 nafar (shu jumladan, davlat granti bo‘yicha 10 nafar) talaba qabul qilinadigan bo‘ldi.

Qaror bilan mustahkamlangan yana bir yangilik. Endilikda universitet tarkibida Xalqaro iqtisodiy va siyosiy tadqiqotlar markazi hamda Xalqaro-huquqiy tadqiqotlar va qiyosiy ommaviy huquq markazi tashkil etiladi.

Qisqacha aytganda, mazkur hujjat bilan O‘zbekiston diplomatlarini tayyorlaydigan oliy dargohning maqomi ham, yo‘nalish hamda vazifalari ham, kadrlarni o‘qitish uslubi ham tubdan o‘zgaradi. Bundan ko‘zlangan asosiy maqsad esa ona tilimiz, boy tariximiz, madaniyatimiz va qadriyatlarimizni mukammal biladigan chinakam vatanparvar diplomatlar safini shakllantirishdan iboratdir. Zero, davlatimiz rahbari ta’biri bilan aytganda “...diplomatiya, diplomatlik — oddiy kasb emas, balki insondan juda ko‘p fazilatlarni talab etadigan noyob san’atdir. Haqiqiy diplomat bo‘lish uchun faqat bilim va tajriba, chet tillarni bilish yetarli emas, buning uchun avvalo tug‘ma talant kerak. Eng muhimi, diplomat haqiqiy vatanparvar bo‘lishi, o‘z xalqi, o‘z yurtining chinakam fidoyisi bo‘lishi zarur”.

Bosh prokuratura huzuridagi

Axborot-tahlil multimedia markazi materiallari asosida

(Manba: Xalq so‘zi” gazetasi)

ilova

Davlat soliq xizmati organlari faoliyatini tubdan takomillashtirish chora-tadbirlari to‘g‘risida

O‘zbekiston Respublikasi Prezidentining qarori

Mamlakat iqtisodiyotini uzoq muddatli rivojlantirish borasida keng ko‘lamli islohotlar amalga oshirilayotgan sharoitda samarali soliqqa tortish tizimi va davlat soliq xizmati organlarining uyg‘unlashgan faoliyati alohida ahamiyat kasb etadi.

Shu bilan birga, soliq nazoratining eskirgan uslub va prinsiplariga asoslangan davlat soliq xizmati organlari faoliyatini tashkil etish mazkur organlar oldiga qo‘yilgan yangi vazifalarni hal qilish, jumladan, soliq solinadigan bazani kengaytirish va soliqlar yig‘iluvchanligining oshirilishini ta’minlash imkonini bermaydi, o‘z yechimini topmagan sezilarli muammolarning mavjudligi ushbu holatni yanada og‘irlashtirmoqda, xususan:

birinchidan, soliq solishning qo‘shimcha manbalarini izlamasdan soliq hisoboti bilan cheklanib qolgan, asosan prognoz ko‘rsatkichlarini bajarish bilan bog‘liq bo‘lgan soliq ma’muriyatchiligining past darajasi;

ikkinchidan, soliq ma’muriyatchiligida korrupsiyaviy muhitni shakllantirayotgan, davlat soliq xizmati organlarining deyarli barcha bo‘g‘inlarida xodimlar korrupsiyalashuviga olib kelayotgan sezilarli shart-sharoitlarning mavjudligi;

uchinchidan, soliq ma’muriyatchiligini to‘liq amalga oshirish, soliq solinadigan qo‘shimcha bazani aniqlash, iqtisodiyotda xufiyona aylanmalar darajasini qisqartirishga imkon bermaydigan axborot-kommunikatsiya texnologiyalaridan oqilona foydalanmaslik;

to‘rtinchidan, kameral nazoratni, jumladan, soliq imtiyozlari va preferensiyalaridan maqsadli foydalanilishi ustidan kameral nazoratni amalga oshirish uchun tashqi manbalarni yig‘ishni ta’minlaydigan ta’sirchan dasturiy mahsulotlarning mavjud emasligi;

beshinchidan, soliqlar to‘lashdan bo‘yin tovlashning turli sxemalari yaratilishiga olib kelayotgan, savdo, umumiy ovqatlanish korxonalari, bozorlar va savdo komplekslari faoliyatini nazorat qilish bo‘yicha berilgan vakolatlardan samarasiz foydalanilishi;

oltinchidan, maqsadli tekshiruvlar tashkil etish uchun soliqlarni to‘lashdan muntazam ravishda bo‘yin tovlayotgan shaxslarni, shuningdek, soliqqa oid huquqbuzarliklarni keltirib chiqaruvchi omillarni aniqlashning aniq mezonlari mavjud emasligi;

yettinchidan, mavjud resurslardan davlat soliq xizmati organlari xodimlarini moddiy rag‘batlantirish uchun yetarlicha foydalanilmayotganligi va intizomiy javobgarlikka tortish darajasi haddan tashqari yuqoriligi umuman soliq tizimining samaradorligiga salbiy ta’sir ko‘rsatmoqda.

Mavjud muammolarni bartaraf qilish, O‘zbekiston Respublikasi soliq siyosatini takomillashtirishning asosiy yo‘nalishlarini va 2017-2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasida belgilangan vazifalarni amalga oshirish maqsadida:

1. Quyidagilar O‘zbekiston Respublikasi soliq ma’muriyatchiligi tizimini takomillashtirishning eng muhim yo‘nalishlari hisoblansin:

birinchidan, davlat soliq xizmati organlarini soliq to‘lovchilarning biznes-hamkori va maslahatchisi sifatidagi yangi imidjini yaratish orqali xizmat ko‘rsatishga yo‘naltirilgan idoraga aylantirish, har bir xodim tomonidan “Soliq xizmati – insofli soliq to‘lovchilarning ishonchli hamkori” degan maqsadli vazifani so‘zsiz bajarish;

ikkinchidan, eksterritoriallik prinsipi asosida soliq to‘lovchilar o‘z soliq majburiyatlarini ixtiyoriy bajarishi, biznesni qonuniy, shaffof va qulay yuritish uchun maqbul shart-sharoitlar yaratish, soliq to‘lovchilarning qoniqish darajasining oshishini ta’minlash;

uchinchidan, soliq ma’muriyatchiligi va nazoratining mutlaqo yangi tizimini yaratish, shuningdek, korrupsiyaviy omillarga yo‘l qo‘ymaslik bo‘yicha preventiv va oldini olish choralarini qo‘llash;

to‘rtinchidan, soliq to‘lovlarining o‘z vaqtida va bir xildagi tushumini ta’minlash, ma’muriy tartib-taomillarni maksimal darajada kamaytirish va soddalashtirish, soliq solinadigan bazani kengaytirish va iqtisodiyotda xufiyona aylanmalarni qisqartirish hisobiga byudjetlarning daromad qismini barqaror shakllantirish;

beshinchidan, tekshiruvdan oldingi tahlil va masofaviy nazorat-tahlil ishlarini amalga oshirish uchun ma’lumotlarni to‘liq yig‘ish va qayta ishlashni ta’minlaydigan zamonaviy, ilg‘or axborot-kommunikatsiya texnologiyalarini joriy etish choralarini yanada kuchaytirish;

oltinchidan, davlat soliq xizmati organlari xodimlariga korporativ etikani singdirish, davlat soliq xizmati organlarining strategik maqsad va vazifalariga erishish uchun o‘z xizmat faoliyati samaradorligini oshirish motivatsiyasi tizimini joriy etish.

2. Belgilansinki, 2019-yil 1-yanvardan davlat soliq xizmati organlari xizmat ko‘rsatish, savdo va umumiy ovqatlanish sohasidagi tadbirkorlik subyektlari uchun yagona soliq to‘lovini, yagona yer solig‘ini, yuridik shaxslardan yer solig‘ini, shuningdek, bank aylanmalari haqidagi ma’lumotlar, shuningdek, boshqa tashqi manbalar asosida deklaratsiya qilinadigan daromadlar bo‘yicha jismoniy shaxslardan olinadigan daromad solig‘ini hisoblash tarzida soliq to‘lovchilarga servis xizmatlari ko‘rsatadi hamda hisoblangan soliqlar summasi haqida soliq to‘lovchining “shaxsiy kabineti” orqali xabarnoma yuboradi.

O‘zbekiston Respublikasi Davlat soliq qo‘mitasi, Moliya vazirligi, Markaziy banki va Savdo-sanoat palatasi bir oy muddatda xorijiy mamlakatlarning ilg‘or tajribasini o‘rganish yakuniga ko‘ra tashqi ma’lumotlar va soliq to‘lovchilarning deklaratsiyalari asosida davlat soliq xizmati organlari tomonidan hisoblanadigan soliqlar va boshqa majburiy to‘lovlar ro‘yxatini bosqichma-bosqich kengaytirish bo‘yicha kompleks chora-tadbirlarni tasdiqlasin.

4. Belgilab qo‘yilsinki, 2018-yil 1-iyuldan:

davlat soliq xizmati organlari xo‘jalik yurituvchi subyektlar faoliyatida o‘tkazilgan xronometraj natijalariga ko‘ra oxirgi hisobot davri uchun tovar (ish, xizmat)lar realizatsiyasidan kamaytirib ko‘rsatilgan tushumni va xodimlar sonini qayta hisob-kitob qilgan holda soliqlarni hisoblashni amalga oshirish haqida talabnoma yuboradi, kamaytirib ko‘rsatish takroran aniqlanganda, ushbu harakatlar soliq to‘lashdan bo‘yin tovlash sifatida malakalanadi;

uchinchi shaxslar tomonidan soliq to‘lovchi-jismoniy shaxs uchun to‘langan soliq summasi soliq to‘lovchining soliq solinadigan daromadi hisoblanmaydi;

davlat soliq xizmati organlari soliqlar va boshqa majburiy to‘lovlarni hisoblash uchun asos bo‘ladigan ko‘zdan kechirish dalolatnomasini tuzish orqali soliq to‘lovchilarning pasportlashtirilishini yuritadi.

5. Davlat soliq xizmati organlari faoliyati samaradorligini baholashning quyidagi asosiy mezonlari belgilansin:

davlat soliq xizmati organlari ishining sifatini qoniqarli baholaydigan soliq to‘lovchilar, shuningdek, ularning harakatlari va qarorlari ustidan shikoyatlarning soni;

kameral nazorat natijasi bo‘yicha undirilgan soliqlar va boshqa majburiy to‘lovlarning umumiy summasi;

xronometraj va ko‘zdan kechirish natijalari bo‘yicha aniqlangan davlat byudjeti daromadlarini oshirish zaxiralari summasi va ularni undirish darajasi;

pasportlari tuzilgan soliq to‘lovchilarning soni;

hisoblangan soliq va boshqa majburiy to‘lovlar undirilishining to‘liqligi va soliq qarzdorligining pasayish darajasi;

davlat soliq xizmati organlari bilan o‘zaro munosabatlarda “shaxsiy kabinet”dan foydalanish darajasi;

elektron hisobvaraq-fakturalarni hisobga olish va onlayn nazorat-kassa mashinalarini avtomatlashtirilgan monitoring qilish bo‘yicha dasturiy mahsulotlarni qo‘llayotgan soliq to‘lovchilarning qamrab olinishi.

6. Davlat soliq xizmati organlari xodimlari O‘zbekiston Respublikasi Davlat soliq qo‘mitasining Moddiy yordam, ijtimoiy himoya, soliq organlarini rivojlantirish va ko‘zda tutilmagan xarajatlar maxsus jamg‘armasi (keyingi o‘rinlarda Maxsus jamg‘arma deb yuritiladi) hisobidan quyidagi summalarning 10 foiziga qadar miqdorda mukofotlanishi belgilansin:

kameral nazorat natijasi bo‘yicha undirilgan soliqlar va boshqa majburiy to‘lovlar;

bir oy mobaynida xronometraj va pasportlashtirish natijasi bo‘yicha aniqlangan, soliq to‘lovchi tomonidan to‘langan soliq;

soliq tekshiruvlari natijasi bo‘yicha undirilgan soliqlar.

O‘zbekiston Respublikasi Davlat soliq qo‘mitasi bir oy muddatda

yakuniy natijalarga erishishdan kelib chiqib davlat soliq xizmati organlari faoliyatining samaradorligini baholash mezonlarini va ularni moddiy rag‘batlantirish chora-tadbirlarini tasdiqlasin.

Maxsus jamg‘armaga soliq to‘g‘risidagi qonun hujjatlarini buzganlik uchun moliyaviy sanksiyalar va ma’muriy huquqbuzarlik uchun jarimalar summasidan ajratmalar miqdori 25 foizdan 40 foizga oshirilsin, bunda qo‘shimcha tushadigan mablag‘lar xodimlarni shaxsiy mukofotlashga maqsadli yo‘naltirilsin.

7. Davlat soliq xizmati organlariga quyidagi huquqlar berilsin:

soliq to‘lovchi qayd etilgan manzilda bo‘lmagan, shuningdek, soliq to‘lovchi tomonidan soliq yoki moliyaviy hisobot, kameral nazorat natijalari yuzasidan tafovutlarning asoslari yoxud aniqlashtirilgan soliq hisoboti belgilangan muddatda taqdim etilmagan hollarda soliq to‘lovchi-yuridik shaxslarning bank hisobvaraqlari bo‘yicha operatsiyalarni to‘xtatib turish;

davlat ulushlari bo‘yicha dividendlarni va davlat unitar korxonalarining sof foydasidan O‘zbekiston Respublikasi Davlat byudjetiga ajratmalarni undirish;

soliq to‘lovchi tomonidan taqdim etiladigan axborotning ishonchliligini hamda soliq to‘lovchining hisobotlarida aks ettirilgan soliq va bojxona imtiyozlarini qo‘llashning qonuniyligini tasdiqlash uchun kameral nazorat natijasi bo‘yicha joyiga chiqqan holda mavzuga oid va ekspress-o‘rganishlarni amalga oshirish;

yuzaga kelgan soliq qarzdorligini soliq to‘lovchi-jismoniy shaxslarning plastik kartalariga xizmat ko‘rsatuvchi bank hisobvaraqlaridan oyiga eng kam oylik ish haqining ikki baravari miqdoridan ko‘p bo‘lmagan summada so‘zsiz hisobdan chiqarish.

8. O‘zbekiston Respublikasi Davlat soliq qo‘mitasining “Respublika axborot-maslahat markazi” va “Soliq deklaratsiyalarini qayta ishlash markazi” davlat unitar korxonalari negizida “Soliq-servis” davlat unitar korxonasini (keyingi o‘rinlarda – “Soliq-servis” DUK) uning hududiy markazlarini tuzgan holda tashkil etish to‘g‘risidagi taklifi ma’qullansin.

Quyidagilar “Soliq-servis” DUKning asosiy vazifalari etib belgilansin:

soliq to‘lovchilarga soliq majburiyatlarini bajarishda texnik jihatdan ko‘maklashish, shuningdek, hisobotlar va deklaratsiyalarni qabul qilish bo‘yicha soliq to‘lovchilarga xizmat ko‘rsatish yuzasidan davlat soliq xizmati organlariga amaliy yordam berish;

davlat soliq xizmati organlarining avtomatlashtirilgan axborot tizimini texnik, dasturiy va axborot ta’minotini boshqarish;

davlat soliq xizmati organlari faoliyati natijasida yuzaga keladigan hujjatlarni qog‘oz va elektron shaklda markazlashgan holda arxivda saqlash;

“call-markaz” maxsus servisi orqali aholiga axborot xizmatlarini ko‘rsatish;

soliq to‘lovchilarni elektron hisobvaraq-fakturalarni yuritish qoidalari bo‘yicha o‘qitish, ularga soliq to‘g‘risidagi qonun hujjatlari normalarini yetkazish;

axborotni himoya qilish tadbirlarini amalga oshirish;

davlat soliq xizmati organlari xodimlarining bilim va malakasini oshirish.

Davlat soliq qo‘mitasi:

davlat soliq xizmati hududiy organlarining yuqorida ko‘rsatilgan funksiyalarni bajaradigan boshqaruv xodimlari shtat birliklarini qisqartirish;

Ma’lumotlarni qayta ishlash markazi ishini tubdan takomillashtirish, jumladan, soliq to‘lovchilar uchun yangi dasturiy mahsulotlar va servislarni ishlab chiqish bo‘yicha kompleks chora-tadbirlarni qabul qilishni nazarda tutsin.

9. “Soliq-servis” DUKning xizmatlari byudjet mablag‘lari va Maxsus jamg‘arma mablag‘lari, shuningdek, qonun hujjatlari bilan taqiqlanmagan boshqa manbalar hisobidan to‘lanishi belgilansin.

“Soliq-servis” DUK tomonidan ko‘rsatiladigan barcha xizmatlar soliqlar va boshqa majburiy to‘lovlar to‘lashdan ozod etilsin.

10. O‘zbekiston Respublikasi Moliya vazirligi huzurida Soliq to‘lovchilar va davlat soliq xizmati organlari o‘rtasidagi soliq nizolarini sudgacha hal qilish kengashi tashkil qilinsin, quyidagilar uning asosiy vazifalari etib belgilansin:

soliq to‘g‘risidagi qonun hujjatlarini qo‘llashda nizoli masalalar yuzasidan xulosalar chiqarish;

soliq to‘g‘risidagi qonun hujjatlari buzilishini aniqlashda soliq to‘lovchilar va davlat soliq xizmati organlari o‘rtasida yuzaga keladigan nizolarni ko‘rib chiqish;

soliq nizolarini ko‘rib chiqish jarayonida aniqlangan soliq to‘g‘risidagi qonun hujjatlaridagi kamchiliklarni bartaraf etish bo‘yicha takliflar kiritish.

O‘zbekiston Respublikasi Vazirlar Mahkamasi bir oy muddatda Soliq to‘lovchilar va davlat soliq xizmati organlari o‘rtasidagi soliq nizolarini sudgacha hal qilish kengashining tarkibi va nizomini tasdiqlasin.

11. O‘zbekiston Respublikasi Davlat soliq qo‘mitasi tuzilmasida:

yirik soliq to‘lovchilarga xizmat ko‘rsatish, jumladan, soliq hisobotlarini qabul qilish, kameral nazorat o‘tkazish, soliqlar va boshqa majburiy to‘lovlarni undirish majburiyati yuklatilgan Yirik soliq to‘lovchilar bo‘yicha hududlararo davlat soliq inspeksiyasi;

davlat soliq xizmati organlari faoliyatining samaradorligini baholash va ularning rivojlanish strategiyasini ishlab chiqish vazifasi yuklatilgan Tahlil boshqarmasi tashkil etilsin.

12. Davlat soliq xizmati organlari xodimlari faoliyatida korrupsiyaviy jihatlarga barham berish maqsadida Chakana savdo va xizmat ko‘rsatish sohasida huquqbuzarliklarni profilaktika qilish bosh boshqarmasi hamda uning hududiy bo‘linmalari tugatilsin.

13. Soliq akademiyasi O‘zbekiston Respublikasi Davlat soliq qo‘mitasi huzuridagi Malaka oshirish markazi etib qayta tashkil qilinsin.

O‘zbekiston Respublikasi Vazirlar Mahkamasi bir oy muddatda:

O‘zbekiston Respublikasi Davlat soliq qo‘mitasi huzuridagi Malaka oshirish markazi faoliyatini tashkil qilish, uning moddiy-texnika bazasini mustahkamlash, o‘qitishning zamonaviy uslublarini, jumladan, malaka oshirishning masofaviy shakllarini joriy etish, shuningdek, hududiy filiallarini tuzishni nazarda tutgan holda hukumat qarorini qabul qilsin;

qayta tashkil etilayotgan Soliq akademiyasining bakalavriat va magistratura talabalarining o‘qishini tegishli yo‘nalishlar bo‘yicha Toshkent davlat iqtisodiyot universiteti va Toshkent moliya institutiga ko‘chirish choralarini ko‘rsin.

14. Quyidagilar:

O‘zbekiston Respublikasi Davlat soliq qo‘mitasining tashkiliy tuzilmasi 1-ilovaga muvofiq;

O‘zbekiston Respublikasi Davlat soliq qo‘mitasi markaziy apparatining tuzilmasi 2-ilovaga muvofiq tasdiqlansin.

15. Davlat soliq xizmati organlari boshqaruv xodimlarining cheklangan soni 11 903 nafar, jumladan, O‘zbekiston Respublikasi Davlat soliq qo‘mitasi markaziy apparati boshqaruv xodimlarining cheklangan soni 257 nafar etib belgilansin.

O‘zbekiston Respublikasi Davlat soliq qo‘mitasi raisiga O‘zbekiston Respublikasi Prezidenti devoni bilan kelishilgan holda quyidagi huquqlar berilsin:

O‘zbekiston Respublikasi Davlat soliq qo‘mitasi markaziy apparatining tasdiqlangan tuzilmasiga boshqaruv xodimlarining belgilangan umumiy soni doirasida o‘zgartishlar kiritish;

Qoraqalpog‘iston Respublikasi, viloyatlar va Toshkent shahar davlat soliq boshqarmalari, tuman (shahar)lar davlat soliq inspeksiyalari, shuningdek, Yirik soliq to‘lovchilar bo‘yicha hududlararo davlat soliq inspeksiyasining tuzilmasini tasdiqlash;

davlat soliq xizmatining hududiy organlari boshqaruv xodimlarining cheklangan sonini, jumladan, “Soliq-servis” DUK tashkil etilishi munosabati bilan boshqaruv xodimlarining shtat birliklari qisqartirilishini hisobga olgan holda tasdiqlash;

Maxsus jamg‘arma mablag‘lari hisobidan davlat soliq xizmati organlari boshqaruv xodimlari mutaxassislarining qo‘shimcha shtat birliklarini joriy etish.

16. Quyidagilar:

a) O‘zbekiston Respublikasi Davlat soliq qo‘mitasi raisining:

O‘zbekiston Respublikasi Davlat byudjeti va davlat maqsadli jamg‘armalariga tushumlar prognozining bajarilishi;

soliqlar va boshqa majburiy to‘lovlarning to‘liq va o‘z vaqtida tushishini ta’minlash ustidan lozim darajada nazorat o‘rnatilishi;

O‘zbekiston Respublikasi Prezidenti, Vazirlar Mahkamasining qarorlari, boshqa normativ-huquqiy hujjatlar talablarining o‘z vaqtida va sifatli bajarilishi;

davlat soliq xizmati organlariga yuqori ma’naviy-axloqiy sifatlarga ega malakali xodimlarni jalb etishga qaratilgan, kadrlarni tanlash, joy-joyiga qo‘yish va rag‘batlantirishning mutlaqo yangi tizimi yaratilishi;

xodimlarning xizmatga bo‘lgan munosabatini tubdan o‘zgartirish, qonun buzilishining barcha ko‘rinishlariga nisbatan murosasiz munosabatda bo‘lish muhiti yaratilishi, jamoada sog‘lom muhit shakllantirilishi;

davlat soliq xizmati organlari faoliyatining ochiqligi ta’minlanishi, soliq to‘lovchilar bilan to‘g‘ridan-to‘g‘ri aloqasiz muloqot o‘rnatilishi;

soliq ma’muriyatchiligining zamonaviy uslublarini joriy etish sohasida xalqaro ekspertlar, grantlarni jalb etish ishlari;

davlat soliq xizmati organlarining moddiy-texnika jihatdan ta’minlanishi uchun;

b) O‘zbekiston Respublikasi Davlat soliq qo‘mitasi raisi birinchi o‘rinbosarining:

O‘zbekiston Respublikasi Davlat byudjetiga va davlat maqsadli jamg‘armalariga soliqlar va boshqa majburiy to‘lovlar to‘liq va o‘z vaqtida tushishining ta’minlanishi;

soliq to‘g‘risidagi qonun hujjatlari va huquqni qo‘llash amaliyotini takomillashtirish bo‘yicha takliflar tayyorlanishi, soliq nazoratini amalga oshirishning zamonaviy uslublari joriy etilishi, soliq sohasidagi huquqbuzarliklarning sabab va shart-sharoitlari tahlil qilinishi, ularga barham berish choralari ko‘rilishi;

soliq solish bazasini kengaytirish bo‘yicha, jumladan, makroiqtisodiy ko‘rsatkichlar dinamikasi va hududlarning soliq salohiyatini tizimli tahlil qilish orqali kompleks chora-tadbirlar ko‘rilishi;

nazorat amalga oshirilishi va soliq qarzdorligi oshishiga yo‘l qo‘ymasligi, xalqaro tajribani chuqur o‘rganish orqali soliq tizimi modernizatsiya qilinishi uchun;

v) O‘zbekiston Respublikasi Davlat soliq qo‘mitasi raisi o‘rinbosarlarining:

soliq ma’muriyatchiligi samaradorligini oshirishga ko‘maklashuvchi soliq to‘g‘risidagi qonun hujjatlarini ishlab chiqish va qo‘llash metodologiyasi takomillashtirilishi;

O‘zbekiston Respublikasi Davlat byudjeti daromadlari darajasini oshirish uchun zaxiralarni izlash va aniqlash bo‘yicha tizimli ishlar olib borilishi;

soliq majburiyatlarini o‘z vaqtida bajarganligi uchun tadbirkorlik subyektlarini rag‘batlantirish choralari ko‘rilishi;

soliq solish qismida iqtisodiyotning xufiyona sektorini legallashtirishga qaratilgan tizimli nazorat ta’minlanishi;

sifatsiz, qalbaki (yasama) va noqonuniy olib kirilgan tovarlar ishlab chiqarilishi, shuningdek, realizatsiya qilinishiga qarshi kurashishning holati va samaradorligi;

soliq ma’muriyatchiligi jarayoniga zamonaviy axborot-kommunikatsiya texnologiyalari va tahlilning ilg‘or avtomatlashtirilgan uslublari, elektron hisobvaraq-fakturalarni hisobga olish va onlayn nazorat-kassa mashinalarining avtomatlashtirilgan monitoringi bo‘yicha dasturiy mahsulotlar joriy etilishi hamda samarali faoliyat ko‘rsatishi;

jismoniy va yuridik shaxslarning murojaatlari puxta, har tomonlama, to‘liq va obyektiv ko‘rib chiqilishi, fuqarolar shaxsan qabul qilinishi;

O‘zbekiston Respublikasi Davlat soliq qo‘mitasi huzuridagi Malaka oshirish markazi va soliq kollejlari faoliyati samarali tashkil etilishi uchun shaxsiy javobgarligi belgilab qo‘yilsin.

17. Davlat soliq xizmati organlari faoliyati va soliq ma’muriyatchiligini takomillashtirish bo‘yicha chora-tadbirlar dasturi 3-ilovaga muvofiq tasdiqlansin.

Vazirlik va idoralar rahbarlari Dasturda nazarda tutilgan chora-tadbirlarning o‘z vaqtida va samarali amalga oshirilishi uchun shaxsan javobgar ekanligi belgilansin.

18. O‘zbekiston Respublikasi Davlat soliq qo‘mitasi manfaatdor vazirlik va idoralar bilan birgalikda:

bir oy muddatda soliq to‘lashdan bo‘yin tovlayotgan shaxslar, yashirilgan soliq solish obyektlari, shuningdek, noqonuniy olib kirilgan tovarlar yetkazilishi, saqlanishi va realizatsiya qilinishi, yashirin sexlarni aniqlash yuzasidan tizimli qo‘shma reydlarni tashkil etish bo‘yicha chora-tadbirlarni qabul qilsin;

ikki oy muddatda davlat soliq xizmati organlarining huquqni muhofaza qiluvchi organlar bilan o‘zaro hamkorlik qilish tartibi to‘g‘risidagi nizomni, jumladan, offshor zonalarda ro‘yxatdan o‘tgan shaxslar bilan operatsiyalarni amalga oshiradigan soliq to‘lovchilarni monitoring qilishni nazarda tutgan holda tasdiqlasin;

uch oy muddatda soliq sohasida fuqarolar tomonidan jamoatchilik nazorati amalga oshirilishi uchun ijtimoiy tarmoqlar va dasturiy mahsulotlarning salohiyatidan foydalanish mumkin bo‘lgan, jumladan, ularga tadbirkorlik subyektlarining soliqqa oid huquqbuzarliklari to‘g‘risida xabar qilish imkonini beruvchi veb-portal ochish bo‘yicha chora-tadbirlarni amalga oshirsin;

bir oy muddatda qo‘shilgan qiymat solig‘ini elektron boshqarish tizimini, jumladan, soliqlar yig‘iluvchanligini oshirish va insofsiz soliq to‘lovchilarni aniqlash maqsadida barcha aylanmalar zanjirini tahlil va nazorat qilish uchun davlat soliq xizmati organlarida elektron hisobvaraq-fakturalarni hisobga olish bo‘yicha dasturiy kompleksni joriy etish yuzasidan takliflar kiritsin.

19. 2018-yil 1-avgustdan mahalliy budjetlarning daromad bazasini kengaytirish zaxiralarini aniqlash faoliyatini moddiy rag‘batlantirishni oshirish va korrupsiya holatlarining oldini olish maqsadida Yagona tarif setkasi bo‘yicha mehnatga haq to‘lashning tasdiqlangan razryadlariga muvofiq davlat soliq xizmati organlari xodimlarining lavozim maoshini belgilashda tarif koeffitsiyenti 1,7 baravarga oshirilgan miqdorda qo‘llanilishi belgilansin.

Mazkur bandda nazarda tutilgan tadbirlarni amalga oshirish bilan bog‘liq xarajatlar byudjet mablag‘lari hisobidan amalga oshiriladi.

20. O‘zbekiston Respublikasi Moliya vazirligi:

Iqtisodiyot vazirligi bilan birgalikda ikki oy muddatda soliq imtiyozlarini qo‘llash samaradorligini monitoring qilish va baholash tizimini joriy etish, samarasiz foydalanilgan imtiyoz summalarini byudjetga majburiy qaytarish mexanizmlarini mustahkamlashni nazarda tutadigan soliq imtiyozlarini maqsadli berish tartibini tasdiqlasin;

Davlat soliq qo‘mitasi bilan birgalikda ikki hafta muddatda O‘zbekiston Respublikasi Davlat soliq qo‘mitasining xarajatlar smetasi va shtatlar jadvaliga mazkur qarorga muvofiq tegishli qo‘shimcha va o‘zgartishlar kiritsin;

O‘zbekiston Respublikasi Davlat soliq qo‘mitasiga Ma’lumotlarni qayta ishlash markazini kengaytirish, zamonaviy elektron ma’muriyatchilik tizimini, jumladan, elektron hisobvaraq-fakturalarni hisobga olish va onlayn nazorat-kassa mashinalarini avtomatlashtirilgan monitoring qilish tizimi dasturiy mahsulotlarini joriy etish, shuningdek, davlat soliq xizmati organlari binolarini qurish, rekonstruksiya qilish va kapital ta’mirlash uchun 2018-yilda zarur mablag‘larni ajratsin, 2019-yildan boshlab esa har yili O‘zbekiston Respublikasi Davlat byudjeti parametrlarida nazarda tutsin.

21. O‘zbekiston Respublikasi Davlat soliq qo‘mitasi raisi quyidagilar bo‘yicha ta’sirchan choralar ko‘rsin:

yuqori professional malaka va ma’naviy-axloqiy sifatlarga ega bo‘lgan professional kadrlarni tanlash va joy-joyiga qo‘yish;

mamlakat iqtisodiy manfaatlarini himoya qilish borasida vijdonan xizmat qilayotgan xodimlarni ularning shaxsiy hissasidan kelib chiqqan holda rag‘batlantirish mexanizmlarini yaratish;

davlat soliq xizmati organlari xodimlari tomonidan korrupsiya ko‘rinishlari va mansab suiiste’molchiliklari sodir etilishining barcha xavflarini bartaraf qilish;

aholi va xo‘jalik yurituvchi subyektlar o‘rtasida keng tushuntirish, profilaktika ishlarini olib borish;

davlat soliq inspeksiyalarining ish yuklamasi va soliqlarni yig‘ish faoliyatining iqtisodiy samaradorligidan kelib chiqib ularning sonini optimallashtirish.

22. O‘zbekiston Respublikasi Moliya vazirligiga davlat soliq xizmati organlarining ma’lumotlar bazasini boshqa davlat organlari ma’lumotlar bazalari bilan taqqoslash, joylarda soliq tekshiruvlari dalolatnomalarini o‘rganish orqali soliq to‘lovchilarning va soliq solish obyektlarining to‘liq qamrab olinishiga alohida e’tibor qaratgan holda, soliqlar va boshqa majburiy to‘lovlarning to‘g‘ri, to‘liq va o‘z vaqtida to‘lanishini monitoring qilish vazifasi yuklansin.

O‘zbekiston Respublikasi Davlat soliq qo‘mitasi va Davlat bojxona qo‘mitasi ikki hafta muddatda mavjud ma’lumotlar bazasiga Moliya vazirligining ulanishini ta’minlasin.

23. O‘zbekiston Respublikasi Vazirlar Mahkamasi ikki oy muddatda:

O‘zbekiston Respublikasi Davlat soliq qo‘mitasi to‘g‘risidagi;

O‘zbekiston Respublikasi davlat soliq xizmati organlarida xizmatni o‘tash to‘g‘risidagi yangilangan nizomlarni tasdiqlasin.

24. O‘zbekiston Respublikasi Davlat soliq qo‘mitasi ikki oy muddatda manfaatdor vazirlik va idoralar bilan birgalikda:

qonun hujjatlariga mazkur qarordan kelib chiqadigan o‘zgartish va qo‘shimchalar to‘g‘risidagi takliflarning Vazirlar Mahkamasiga kiritilishini;

o‘zlari qabul qilgan idoraviy normativ-huquqiy hujjatlarning ushbu qarorga muvofiqlashtirilishini ta’minlasin.

25. O‘zbekiston Respublikasi Prezidentining 2017-yil 1-avgustdagi “Davlat soliq xizmati organlari faoliyatini yanada takomillashtirish chora-tadbirlari to‘g‘risida”gi PQ-3168-son qarori o‘z kuchini yo‘qotgan deb hisoblansin.

26. Mazkur qarorning ijrosini nazorat qilish O‘zbekiston Respublikasining Bosh vaziri A.N.Aripov, O‘zbekiston Respublikasining Bosh prokurori O.B.Murodov, O‘zbekiston Respublikasi Bosh vazirining o‘rinbosari – moliya vaziri J.A.Qo‘chqorov va O‘zbekiston Respublikasi Davlat soliq qo‘mitasi raisining birinchi o‘rinbosari B.A.Musayev zimmasiga yuklansin.

O‘zbekiston Respublikasi Prezidenti   SH.MIRZIYOYEV 

Toshkent shahri, 

2018-yil 26-iyun

(Manba: O‘zA)

  

Ish jarayonida foydalanilgan manba lavhasi qo‘yilishi shart

1-10 of 111